Buyera (Santu Adrianu) - Picarós - Serandi (Proaza) - Airúas - Cutiái - Tartuchas - Samartín (Proaza)

11 de Febreru de 2024

Track: Buyera (Santu Adrianu) - Picarós - Serandi - Airúas - Cutiái - Tartuchas - Samartín

Otra xornada de monte nel GM Xuan de la Borrina, como siempre, restolando llugares o fasteres que nun conocemos entá y poro, preparamos una ruta que válganos pa tener una visión más completa d'Asturies y nesti casu, del conceyu de Santu Adrianu y Proaza, ya que vamos averanos hasta los valles del Osu.

Pa ello, quedaremos un bon garrapiellu de xente, nel área recreativa de Buyera, onde llueu de presentar a los nuevos collacios del grupu y vieyos que facía que nun veníen, preparamos les mochiles y bastones y entamamos a caleyar sele pela sienda L'Osu en direición Proaza.

Partimos del área recreativa de Buyera (200 m) en Santu Adrianu

Pasaremos al llau del cercáu oseru, casi ensin mirar pa la prubina la osa Molina, enzarrada de por vida, pal caltenimientu d'un cuentu turísticu nesta fastera y desviámonos hacia la foz de Picarós, la que nun conocía entá y a la qu'entramos per una pindia pista formigonada, pa llueu metenos al pocu, nun guapu camín pente les peñes de Tresbuyera.

Entramos hacia la Foz de Picarós nel nuesu caleyar hacia'l pueblu de Serandi

Pali, pali vamos caleciendo'l cuerpu nun día fresquín y saldremos pela foz hasta un antiguu molín nel rigu Serandi, pa desvianos a la manzorga per camín empedráu y dir faciendo delles envueltes que, cómodamente va llevanos hacia'l pueblu de Serandi, onde tendremos ya enriba nuesa, el nuesu oxetivu que ye conocer tol pequeñu cordal homónimu.

Aportamos per cómodu camín hasta Serandi onde ganamos vistes hacia Caranga

En Serandi, diremos caleyando hasta la parte alta del pueblu, onde podríamos ascender al cordal per una pindia vallina, pero nosotros decidimos dar una amplia envuelta pasando peles cabañes de Curuellu, hasta aportar a la Guariza, onde podríemos siguir un pelín más hasta'l mirador so l'Escobiu Las Xanas, pero nos facemos una envuelta de 180 graos pa entamar a percorrer tola xerra de Serandi.

Facemos camín hacia la Guariza pa entamar a caleyar pela xerra de Serandi

 Asina fadrémoslo, ganando vistes hacia'l cordal de Caranga y montes de Tameza como, Caldoveiru, la L'Oral y Buei Muertu, siguiendo un camín que sorprende pola so guapura hasta facenos pasar pel mayáu de Navaliegu, onde entamaremos una pequeña ascensión hasta'l Portiellu, onde atacaremos la pequeña cume de las Airúas (971 m).

Ascendiendo al modestu cumal de las Airúas (971 m)

Con munches ganes de tener otres vistes aportaremos a esti incómodu cumal polo calizu y pequeñu, nel que ganamos vistes a a tolos increyibles y enormes puertos d'Andrúas, destacando la fastera occidental de la Mostayal y toles canales qu'ascienden a L'Aramo norte, dende Andrúas, aportando a llugares tan guapos que ya visitara va años, como Fontazán, Monrasiellu y Gamonal.

Facemos cume nas Airúas (971 m) con vistes a los puertos d'Andrúas

Descansaremos un ratín y baxaremos hacia la Veiga de Canal Seca, onde sentarémonos un ratín pa mirar opciones d'escapatoria pa Benjamín que va faciéndose-y llarga la ruta, enseñándo-y camín hacia la boquera cola Canal Seca y posterior salida per Castrión hacia Samartín, acompañándolu Alberto y quedándose con él durante'l restu la ruta, como bon fíu que ye, por munches ganes que tuviera de bregar pel monte.

Patiamos per Andrúas ascendiendo al vistosu picu Cutiái

El restu'l grupu vamos travesar la veiga Canal Seca, col envís de dá-y la vuelta al picu Cutiái, alloriando colos puertos d'Andruas abellugaos per tola fastera occidental de L'Aramo. Pararemos como non, al par de la cabaña de techu herbosu del Buxán y fadremos esta vegada una curiosa ascensión a un picu, que sí que fai reonda la ruta, ya qu'anque tenga namái que 1034 m d'altor, tien unes vistes de tola redolada grandioses.

Cumal del Picu Cutiái (1034 m)

Col bon tastu del picu Cutiái, esfrutamos de les vistes, picamos daqué y descendemos de nuevu hasta Buxán, onde vamos garrar bon camín pel GR que va hasta Arroxu, pasando pela fonte la Concha, onde ñaz el rigu Musa que pasa pela foz pente los picos Cutiái y Entrecorros continuando nel nuesu casu, camín alantre pembaxo los Cinchos, hasta da-y la vuelta al picu Entrecorros, per onde tenemos na tiesta alcontrar una baxada.

Facemos cómodu camin de Buxán hasta'l picu Entrecorros

Continuamos de collaín en colláin hasta que paranos a mirar la foz qu'ábrese ante nós pente los picos Cuamayor y Entrecorros, que pudiera tener dalgo que ver colas Tartuchas, pero que nun fui a saber el nome finalmente. Ensin dame cuenta, metíme na boca'l llobu, ya que de tolo que tenía preparáu, tamos na circular más llarga y la baxada o somos a facela, ya que nun hai referencies o tenemos que desfacer camín, ya que la mole del picu L'Airúa, a la nuesa manzorga ufrez poques escapatories o una vuelta llarguísima pa la que nun tenemos tiempu.

Metémonos hacia la foz de las "Tartuchas" con munchu procuru

D'esti xeitu, decidimos entrar a la foz pela manzorga, alcontrando dalgo de senderu d'animales, baxando siempre de claru en claru, hacia'l calce de la riega, hasta qu'alcontrámonos col primer tabayón, qu'apoyándonos en delles raices, somos a baxar ensin munchos problemes, anque ya toi goliendo que diez persones y dos perros per estos llugares nun va ser xera cenciella.

Magar d'esti pasu, aína vemos que siguir pela riega ye imposible dafechu ya que tórnase barrancu, asina que vamos a media faldera, siguiendo dalguna traza d'animales, apoyándonos con curiáu colos árboles y tratando de nun tocar muncho les piedres sueltes. Dempués d'un primer intentu de baxar a la riega que veo mui peligrosa, decidimos travesar un primer espolón que baxa del Entrecorros y siguimos a la siguiente vallina onde tenemos una pedrera que pudiera valir de baxada o cruciar otru espolón cola idega d'alcontrar dalgo meyor. 

La foz entama a ponese mui pindia y a embarrancar pel calce tocando ser mui finos

Arrímome hasta la punta del espolón y al otru llau, nun atopo na cenciello, solo veo tarrén vertical y ablanos y una remota posibilidá d'escapar monte arriba hacia los verticales parés del Entrecorros y que con suerte metíos na viesca podamos descender per otra fastera. Asina que tiramos pedrera abaxo, viendo dalgo de restos de pasu d'animales y aportamos a un pasu vertical, onde fai desagüe la pedrera y hai qu'andar finos pa baxar sollerte de nun resbariar y de nun tirar na, ya que baxen les piedres como misiles.

Diremos baxando ún a ún, con munchu curiáu, tirando Rubén y Silvia los primeros hasta aportar a la riega, viendo que paez que tenemos salida, asina que baxo yo tamién y voi guiyándo al restu'l grupu, nos destrepes, pasándome dalguna piedra mediu cerca, teniendo que protexeme colos árboles. Lo dicho, nun ye que seya una baxada "imposible" ye que ye peligrosa pa grupos grandes, asina que caún baxo la so responsabilidá, anque quiciás faciéndolo n'ascensu seya muncho menos díficil.

Atopamos una baxada "afayaiza" hacia la riega pero de ser finos y con curiáu

Pali, pali, templamos nervios y salimos del marrón, cruciando la riega y pasando d'al llau d'una covacha enorme, que paez sumir a les profundidaes. Dende equí, aportamos a la mecederua cola vallina de la riega de Misa, tornándose'l llugar nuna maraviya enllena de texos xóvenes, quedándome na tiesta, dalguna posibilidá d'intentar ascender a L'Airúa pela vallina de Misa, asína que fácil que decídame a volver a por más aventura.

Con pocu más, aportamos a Llindeltornu, onde atopamos delles cabañes en mal estáu y como non, el camín tapáu por varios árboles cayíos, asina que tiramos pente los praos, saliendo un pelín más alantre a lo que paez la caxa'l camín y con pocu más apaecemos na cabaña d'Entrelosregueros, onde saldría un camín que quería conocer hacia les peñes de la Siella y la Muezca, pero fáisenos tarde, asina que baxaremos a la fastera de Castrión lo más apriesa posible.

Salimos a la fin a Llindeltornu pa siguir ya per camín dalgo tomáu hasta Entrelosregueros

Digo posible, ya que ye un camín empedráu pel que cuerre una riega, asina qu'hasta aportar a Castrión, onde vendría camín pel Prau Llanu dende la veiga Canal Seca, que ye per onde baxaros los nuesos collacios, Alberto y Benjamín, nun tendremos un camín menos resbariosu pa dir a bon ritmu. La verdá ye que dende equí, ya vamos relaxaos y caún va esfrutando del camín y sobretou de les vistes hacia la riega Musa o Serandi, pero cae un tabayón de dimensiones ablucantes, que cuadra col tramu que faen los barranquistes.

Empobinámonos hacia'l pueblu proacín de Samartín onde tendremos baxa a la senda L'Osu

A bon ritmu y con meyor camín a cada pasu que damos vamos, salir a les primeres cabañes de la Piniella y Sobrevilla penriba de Samartín, quedándome col camín que saldría hacia los parés de la Siella y la Muezca pa una posterior visita y con una llarga envuelta, arribaremos a Samartín, pueblín que cruciamos con calma, pa garrar un camín a la manzorga de la ilesia, que tovía darános problemes pa baxar a la senda, ya qu'alcontramos los caminos zarraos y tuviemos que travesar los Praones pa entrar a la senda per Santu Tomás.

Baxamos pelos Praones hasta la senda L'Osu onde ya tornamos a Buyera

Quiciás, tendríemos la opción de baxar per carretera hasta la Cuandia, pa baxar per camín a la sienda o baxar hacia Picarós, onde debería descender un camín dende Samartín pel Prau Grande, pero la falta de lluz, nun mos dexó investigar más y tiramos polo más direutu qu'alcontramos ya que tuviéramos aventura abonda, na foz de "las Tartuchas" pente los picos Entrecorros y Cuamayor.

En definitiva, perguapa circular, que quiciás, sabiendo que ye transitable esta foz, fadríala nel sen contrariu, quedándonos una ruta de 17 km y un desnivel acumuláu de +/- 1100 m nun total de 8 hores y media, qu'amuesen lo complexu de la fastera las Tartuchas, onde perdimos munchu tiempu restolando una baxada afayaiza.

Camudando'l Camín na faldera occidental de L'Aramo