miércoles, 28 de julio de 2021

La Ñora (Xixón)

27 de Xunetu de 2021

La Ñora, esa gran desconocida jeje, ellí tornamos en tiempos de pandemia por mor de nun poder salir del conceyu de Xixón o simplemente porque acabes por pillá-y el puntu pesie a lo duro de la so escalada y a lo intenso de los pegues.

Entres nuna vía con un grau y nun sabes si vas facela más dura o menos, si marches con dalgún cantu, poro diseñes un pasu y nel siguiente a lo meyor toca formular otru métodu. Ye'l so encantu, asina como la solombra peles tardes y l'aire la mar que fai tar fresquín por mui chornosu que tea'l día.

Xena y Kíla relaxaes demientres trepamos un pocu
 
Delles visites cayeron nestos mesese de primavera y branu, siempre por pasar la tarde enantes de dir a tomar una botellina y siempre marché con una bona petada de garrar romos y pinces, lo cual como entrenu siempre ye perpositivu.

Esti últimu día, facíame con Extraplomadona, un 6c+ intensu d'entamu a fin y mirando la mió llibreta, cuento, con que nun me queden tantes víes por encadenar y lo mesmu vamos tener que pensar en dir a asediar y terminar con otra escuelina jaja.

La Ñora (Seutores visitaos)
Croquis modificaos por mi de la escuela d'escalada de La Ñora, por mor de Piratas Free. Gracies y col so permisu.

-----------------------------------------------------------------

1 de Xunetu de 2015

Primer día de Xunetu y primer día d'horariu de branu, poro entamen les ganes fonderes d'esguilar tolos díes que pueda. Siéntome fuerte, pero quiciás demasiáu pesáu... muncho ximnasiu y pocu aeróbicu esti añu.

Aún así, quiero saber si l'entrenamientu de tol iviernu sirve pa daqué y pa ello, nun sé mui bien por qué, quiciás por andar pelín pillaos de tiempu, tiramos Alberto y yo hasta La Ñora, a siguir lluchando escontra los regodones, los agarres de pinza y los bolos infernales de conglomeráu.

Pa ello vamos hasta'l bloque de la Enredadera onde cuantayá Pau y yo fuéramos a conocer esta escuela y quedámonos col accesu fadiáu dende la sienda baxa de la Ñora, ya que nun conocíemos l'accesu superior y con que esto yera otru mundiu dafechu distinitu al calizu.

Nesti día, los Bertos tuviemos dándo-y a aquel IV+ (Mercury) d'esi primer día pa calecer manes y llueu metíme a vista a pol 6a+ (Paso de la driza) que salió metiendo un llance a un bolu de los de facer hestoria.

Alberto peleóse col 6a+ y yo tuve probando un 6b que devolvióme a la rialidá ñorense, ye dicir... munchos pegues ensín ver solución a un pasu y cola sensación de que fai tiempu había dalgo más onde agarrase porque'l grau vase pero muncho.

Con una reventada curiosa, namái quedó que probar el IV+ de la Enredadera, el cuál nun mos prestó nin a Alberto nin a mí polo gocho y estrañu del so percorríu. Non muncho meyor yera'l 6a+ (X2), que tamién salió pero nun par de pegues, con un bloque duru embaxo y la mesma parte fea del tramu superior del IV+.

En resume, una tarde bien aprovechada con varies víes del tipu Ñora, curties, bloqueres y nes que sólu la esperiencia de da-y pegues a estos bloques de conglomeráu, fae que seyas capaz de ganar pali pali grau nesta rares peñes.

-----------------------------------------------------------------

9 de Xineru de 2015

Visita esprés a la escuelina de la Ñora en Xixón, col envís principalmente de probar el xuguetín que-y vieno pa los reis a Alberto, así que como si fuéramos guah.es tiramos cola cámara nueva, pa engolala nel cascu y ver que yéramos a grabar.

Fuimos tres, asína que nun tuviemos munchu tiempu a facer más víes y más na dómina l'añu na que tamos, que cuando dímonos cuenta ya taba atapeciendo y el mugor y la humedá apoderábase de los cantos del conglomeráu faciendo imposible esguilar.

Vidiu del IV del seutor Techo

Asína qu'aproveché a probar la cámara con un cuartu, anque los vídios salen llargos anque la vía sea cenciella y habrá qu'andar editando los tramos de descansu y tendremos que mirar bien lo del soníu ya que nun sé si la carcasa de proteición de la cámara fai que nun se oya'l soníu.

De regalu, llevéme tamién un 6a (Falta de magnesio) al segundu pegue, amestándose a los tachaos del llibretu xuntu a Escape del Techo (IV), yendo pali pali, tachando vía tres vía según entremos a la escuela pela mandrecha o manzorga.

-----------------------------------------------------------------

7, 14 y 25 d'Agostu de 2014

Anque paeza increyible, nun sólo de caliza vive l'escalador, poro dir a trepar a la Ñora ye un exerciciu de téunica de pies, confianza nos agarres y de resistencia a agarres romos y de pinza. Poro, delles sesiones braniegues d'esguilada na Ñora son más que necesaries.

Trabayando les víes de la placa Fenodere

Varios díes fuimos hasta ellí y entamamos el trabayu de mandrecha a manzorga nos seutores según vamos baxando. Asina fuí encadenando toles víes de la placa Fenodere y bloques continos, apretando y dando munchos pegues hasta'l 6b+ de grau másimu, con dalguna preba a un 7a que vilu hasta sacable.

Visión de lo que nos alcontramos na Ñora

La verdá ye que cuesta munchísimu facer grau equí... les víes siempre desplomen en dalgún tramu petando munchísimo pesie a lo curtiu de toles víes. Aún así, nesti branu les coses fueron saliendo poquín a pocu quedándonos con bon tastu pa futures prósimes.

Unos engolaos y otros asoleyando fino

--------------------------------------------------------------------------
   

8 d'Ochobre de 2013

Con un día bien guapu, anque ya va notándose'l fresquín, tiramos a la Ñora, contentos con como nos fuera l'anterior vegada. Güei, vamos escoyer los seutores más alloñaos de los que visitáramos va dos selmanes y vamos facelo baxando pol camín de la mandrecha'l aparcaderu hasta la Placa Fenodere.

De primeres cuéstanos un pocu salinos de la trialera y algamar el bon camín, pero baxando, baxando vemos que tamos al altor de los bloques y ya siguimos un senderín, que baxando déxanos nesta guapa mole de conglomeráu.

La Ñora y les escoyíes... Placa Fenodere y Puro

Dicir, que paez una fastera mui húmeda y qu'hai qu'andar con güeyu pa nun resbariar col mufu y llevar una culada, sinon que-y lo digan a Sonia. Aína, metémonos al líu y entamamos con Castillo de Elsey, un V+ de placa que como siempre cuéstame un pocu sacar a vista de calentamientu.

Pa entamar... Castillo de Elsey (V+)

Llueu, tanto Berto como Sonia, pruébenla ún tres d'otru aportando al descuelgue, anque nun s'atreven a intentala de primeros. Como siempre, los descuelgues hai que montalos y esta vegada, dempués de ver que'l camín nun ta mui llimpiu pa facelo a pata, rapelé de los químicos y recoyí tolos trastos.

Sonia y Berto, cola cuerda penriba nel V+

Metémonos n'otra vía, tamién de V+ nomada la Cresta del Naño, na que'l intentu a vista quedo pelín pilláu y llanzo la mandrecha a un cantu malu, baxando p'abaxo y teniendo que meté-y otru pegue a esta vía, p'algamala camudando'l llance de dreches a esquierdes nun cantín finu y apretando una barbaridá.

Encadenando la Cresta del Naño (V+)

Berto y Sonia, viendo'l tema, prefieren intentar Los Piloños de la Tía Carmen (V+/6a) ya que-y ven un par de descansos y non una vía tan continua como l'anterior, compartiendo reunión cola mía. Los dos son capaces de llegar al descuelgue, anque tienen que parar un bon ratín a descansar y anque paez cenciella, tien un par de pasinos gafos.

Pero que fai esti ehí colgáu y Sonia nesa posición... tamos llocos?

Los Piloños de la Tía Carmen, cayería por mi parte a vista, paeciéndome muncho más guapa que la Cresta del Naño, y con esta tocamos retirada pa otru seutor. Los díes ya non duren tanto, y entre recoyer y demás, aportamos al puro, con poques opciones de conocer más qu'una vía.

Última vía del día nel Puro... Calla, calla que me estalla (V)

La escoyida va ser Calla, calla que me estalla (V), una vía continua y vertical, con bonos agarres pero cola roca pelín más probe que n'otros llugares. Dicir que durante'l pegue a vista del encadene, debí romper colos pies tres o cuatru cantos.

Con esto, namái Sonia animóse a intentala en toprope, demientres Berto restoló un camín de salida hacia la trialera de baxada, el cual alcontrolu dempués de desbrozar un pelín. Dempués del pegue de Sonia, probé un 6a+ cola cuerda penriba y apretando aporté al descuelgue pa recoyer los trastos y rapelar p'abaxo, colando de la Ñora atapeciendo dafechu.  

 La Ñora (Seutores visitaos)
Croquis modificaos por mi de la escuela d'escalada de La Ñora, por mor de Piratas Free. Gracies y col so permisu.

--------------------------------------------------------------------------
 
26 Setiembre de 2013
 
Nun yera d'esperar que teniendo'l nivel de caliza qu'hai nel país astur, apeteciérame dir a trepar en conglomeráu, pero como esti branu foi mui intensu en delles escueles, voi teniendo ganes d'esguilar n'otres menos visitaes.
El Pino y el Regodón foron les escoyíes

Asína qu'engaño a Berto y Sonia y tornamos dempués de munchu tiempu, a la Ñora. Ellí, pa que vean de que falamos Pau y yo, cuando decimos... vaya telar esguilar equí, llévolos a los seutores que ya conozo y nos que tengo una alcordanza voladora nun V.

Preparaos.... a trepar pelos cantos rodaos...

Así que, dexamos el coche nel ocalitu del aparcaderu y baxamos pela carretera de la esquierda, hasta'l camín que llévanos al cartelu de los bloques: Regodón y El Pino. Primeru esguilamos ún tres d'otru les tres víes del Regodón, sacando esi V infernal que me quedara la otra vegada, que bien pudiera ser V+.

Asegurando con cascu demientres esguilen Berto y Sonia

Bero y Sonia, tamién van garrando confianza y encadenen El Regodón Peleón (IV) y una Vieja Vía (V), quedándo-yos claro cola cuerda penriba que Dos Escaladores, tres opiniones merez dalgo más qu'un simple V raspáu.

Guapes semeyes dende riba los bloques

Del Regodón pasamos al Pino, onde tenemos un pié de vía, de los que presten y muncho, con bona amplitú, pa enfrentanos a les víes del seutor. Si nun m'equivoco, tanto Berto como Sonia, encadenaron El Panameño le pone empeño (IV+) y probaron cola cuerda penriba Si lo se, no trepo (V+).

Trepando mi primer V+ d'esta escuela de conglomeráu

Esti V+, ye'l primer V+ que soi a facer na Ñora, anque la verdá que de la última visita a esta, camudaron muncho les coses y pa na, marcho frustráu nin muncho menos con esta escuela, ya que poquín a pocu, se-y va garrando'l truquín a eso de los romos y xúbese'l nivel a cada pegue de cada vía.

Perguapa semeya de la escuela de la Ñora

Nesti día, nun dió tiempu a más, y como siempre alcordáivos si venis hasta equí, que'l cascu, sobretou pal asegurador ye bien necesariu, ya que los cantinos del conglomeráu son a desprendese cenciellu y tamién llevar un reversu pa rapelar de los químicos ye bona opción a la hora de recoyer los mosquetones y cintes qu'usamos pa la reunión.

-------------------------------------------------------------------------- 

Hestoria na escuela de La Ñora

Namái un par de vegaes fuimos a esta escuela d'escalada que paez ser remóntase a los años 40, pero que foi va pocu, reequipada nun intentu, de conocer n'Asturies dalgo más que la caliza como ellementu al qu'agarrase, jeje.

La verdá, ye que'l primer día costónos un triunfu aportar a los peñones de conglomeráu que formen esta escuela, ya qu'entramos dende la propia playa de la Ñora y lo meyor ye venir dende riba, como desplícase nos croquis. Tan bien señalizaos, caún de los seutores, con prestosos cartelos en madera y la última vegada taben los caminos desbrozaos en condiciones.

Otra cosina ye la propia escalada, jeje. Pa los avezaos a la caliza, esto ye dafechu distintu, ya que vamos tener agarres romos, de cantos rodaos y en xeneral una roca sucia y húmeda, por mor de tar nun llugar tan húmedu, al llau del mar y perdíu nuna viesca.

Les sensaciones nun foren bones la verdá, anque nun m'importaría tornar a prebar l'esguile, anque seya pa quitar esi mal rollu y vuelacu que metíme nun putu quintu, jeje. Eso sí, el cascu imprescindible pal asegurador nesta escuela, por mor de los milenta cantucos que despréndense al pisar fuerte colos gatos.

Tampoco, ye dalgo a desdexar, llevar un reversu pa rapelar, ya que les reuniones son dos químicos y l'últimu que faiga la trepada o sale penriba la peña, o tendrá que rapelar de los químicos pa baxar d'ella.

Polo demás, personalmente, si tengo que dir a Xixón a esguilar un ratín, soi más de la Peñona, pero bono, equí ta La Ñora, que tien la playa pa pegase un bañín y si vuelvo per ellí, habrá que sacar unes semeyuques al menos, jeje.

4 comentarios:

  1. Respuestas
    1. Falten unes semeyuques y dalgunes hores más, probando víes, jeje

      Un abrazu

      Eliminar
  2. Has cogido carrerilla, enseguida a completar el libro.

    Un abrazu.

    ResponderEliminar
    Respuestas
    1. Buah... tengo trabayu a pataes... lo que pasa que les entraes d'escalada son rápides de facer, ajaja

      Un abrazu

      Eliminar