Purón (Llanes) - Cuera Oriental - Villanueva (Ribedeva)

30 d'Avientu de 2013

Track: Purón (Llanes) - Cuera Oriental - Villanueva (Ribedeva)

Como tolos años, nel fin d'añu, Pangua y yo preparamos la mítica xatada navidiega. Esti añu, metiósenos na tiesta conocer la parte oriental de Cuera, y pa ello, preparé una travesía pelín xabaz pente'l pueblu llaniscu de Purón y el de Villanueva en Ribedeva.

Magar, del desayunu a altes hores de la mañana n'Unquera (a Pangua nun se-y ocurrió otru llugar), averámonos pela As-344 travesando Colombres hasta Villanueva, ellí dexaríemos el mió coche, y nel de Pangua, tiramos, nun erru pergrande, As-344 alantre hasta que dexónos mui cerquina de Purón, pero na N-634.

Entamamos en Purón a 36 ms d'altor

El Portalgo (Uviéu)

23 d'Avientu de 2013

Como ya dixe, la falta de motivación nesta dómina del añu, llevónos inclusu a preferir dar un paséu a la gueta d'antigues zones d'esguilada, qu'a siguir apretando en proyeutos del branu. Poro, Vicen, Celso y yo, magar de que colasen Diego y Pilar y que xintásemos daqué, baxamos hasta'l cercanu pueblu d'El Portalgo dende Manzanea.

Hasta que llegues a les cueves, nun yes a saber que tan ellí

Valdemurio (Quirós) - Xerra'l Gurrión

22 d'Avientu de 2013 y 26 de Xineru de 2014

Track: Valdemurio (Quirós) - Xerra'l Gurrión

Tol que me conoz, sabe que nun soi mui de repetir cumales, sobretou cola bayura montes qu'hai n'Asturies, pero esta vegada, en pocu más d'un mes tuve la suerte de facer cume nel Picu Gurrión, en dos díes, mui, pero que mui asemeyaos nes condiciones meteorolóxiques.

Como siempre p'aportar a Quirós, salimos de Xixón pela Y griega, pa enllazar n'Uviéu cola A-63, saliéndonos pal Valle'l Trubia como ye vezu, en munches de les nueses rutes. Travesaremos, los conceyos de Santu Adrianu y Proaza, garrando direición Quirós en Caranga Riba, pa namái cruciar el túnel, salirnos al aparcaderu del banzáu de Valdemurio.

Partimos del banzáu de Valdemurio (345 m)

Altu San L.lorienzu (Teberga) - Pena Michu - Pena Prieta

8 d'Avientu de 2013

Track: Altu San L.lorienzu (Teberga) - Pena Michu - Pena Prieta

Cuantayá que nun taba nel Altu San L.lorienzu, y daquella fuera en bici con Jose y César, poro munches yeren les ganes de conocer en condiciones esta parte del Camín de la Mesa. Práuticamente, pente la ruta que vos voi cuntar y la nuesa ascensión a los Bígaros, conocí too aquella ruta en bici, na que por culpa la borrina, nun vimos res.

P'aportar al Altu San L.lorienzu, salimos de Xixón pela Y griega, pa enllazar n'Uviéu cola A-63, saliéndonos pal Valle'l Trubia como ye vezu, en munches de les nueses rutes. Travesaremos, los conceyos de Santu Adrianu y Proaza, tomando'l ramal hasta Teberga, entrando por Entragu y parando p'almorzar en Samartín.

Salimos del Altu San L.lorienzu (1353 ms)

Bueida (Quirós) - Puertu Güeria

9 de Payares de 2013

Track: Bueida (Quirós) - Puertu Güeria

Un vienres, asina a lo llocu, magar de la primer ñevadona del iviernu, decidimos garrar bien trastos y averanos hasta'l Puertu Güeria, col envís d'intentar la Pena Ruea o al menos dar una vueltina y pasar el día tan guapamente.

Como ya conozo, l'ascensión dende L.lindes y la baxada a Cortes, decidimos anque más llargo, xubir dende Ricao, conociendo por mor, el Puertu Güeria en condiciones, ún de los llugares más increyibles d'Asturies con diferencia.

Partimos de Buieda (784 ms)

Fresneo (Quirós) - Pena Xerragallos

23 de Payares de 2013

Track: Fresneo (Quirós) - Pena Xerragallos

Dalgo avezáu nesti añu, ye xuntanos un bon garrapiellu nes salides del GM Xuan de la Borrina y na programada por Pangua nun diba ser distintu. Tocábanos dir hasta'l pueblu de Fresneo en Quirós, onde díbemos intentar una llarga ruta hasta'l Picu Barzanalgas.

Esti picu quedáranos nel tinteru va un par d'años (como pasa'l tiempu) cuando ficimos la Pena Sobia y la Siel.la y por mor del fuerte vientu, decidiéramos nun tentar a la suerte dexando esti cumal pa otra vegada dende la fastera quirosana envede la del conceyu Teberga.

Partimos del pueblu de Fresneo (574 m)

Nieves (Casu) - La Ordaliega - La Frayada

10 de Payares de 2013

Track: Nieves (Casu) - La Ordaliega - La Frayada

Ruta mui especial, ya que partimos del pueblu casín de Nieves, onde crióse cola so güela, Paulina, durante munchos branos. Agora tamos na seronda, con guapos collores nes viesques y díes pelín más murnios qu'en branu, pero col mesmu ánimu qu'un rapacín, vamos conocer un pelín meyor esti ablucante conceyu montañeru que ye Casu.

P'aportar a Nieves, salimos de Xixón pela Autovía Minera, hasta garrar el corredor del Nalón pel que travesaremos los conceyos de Llangréu, Samartín del Rei Aurelio y Llaviana, metiéndonos nel Parque de Redes a traviés del conceyu de Sobrescobiu, pasando'l banzáu y pueblu de Rusecu y el pueblu y banzáu de Tañes.

Partimos del pueblu de Nieves (752 m)

Saliencia (Somiedu) - Xerra Los Bígaros

20 d'Ochobre de 2013

Track: Saliencia (Somiedu) - Xerra Los Bígaros

Esti añu, nun fuí mui esixente nes mios rutes pal grupu y escoyí, principalmente, llugares que tenía ganes de conocer, como ye la fastera del camín de la Mesa. Va unos añinos, supuestamente conocímoslo dende l'altu San L.lorienzu hasta Torrostigu en bici pero a la fín, nun vimos na pola ñebla, colo que les ganes de tornar yeren munches.

Más prestosu ainda si cabe, ye xubir al camín dende lo baxo, dende'l pueblu de Saliencia, teniendo la suerte de conocer de pasu tol val.le Saliencia, que ya nesta dómina del añu va camudando los collores al aportar la seronda.

Entamamos nel aparcaderu de Saliencia (1120 m)

Arnáu (Castrillón)

12 d'Ochobre de 2013

Kíla pasándoselo xenial pente les peñes y l'agua

Sábadu pela mañana y así sobre la marcha, llevantámonos y decidimos facer una visitina a una escuela un tantu especial, la d'Arnáu. Nun la conocíemos y hai que dicir que'l llugar ye espeutacular, ya que poder esguilar al llau de la mar nun se pue dicir tolos díes.

Entamando la vía d'El Francés (IV)

Aparte, el sitiu ye perafayadizu pa Kíla, que pue correr y bañase llibremente nes poces que suelen quedar na esplanada de pedreru qu'hai delantres les víes, asína como pa descansar d'esguilar, poder xintar y tomar el solín un ratu pa dase un bañu na sablera enantes de marchar... perfeutu.

Ablucante llugar pa esfrutar de la escalada y les vistes

Ruayer (Ayer) - Pena La L.laguna

13 d'Ochobre de 2013

Track: Ruayer (Ayer) - Peña La L.laguna

Siguimos fartucándonos de retirar del mercáu rutes d'años anteriores. Esta que mos ocupa güei, foi puesta l'añu pasáu por Canta y pa la ocasión axuntámonos un montón de xente: vieya del grupu, nueva y ensín ser del grupu inda como Marcos y la so moza ...

Teniemos munches ganes de conocer el valle del Ayer al completu, y que meyor que salir de la nuesa ruta dende'l so final, Ruayer. P'aportar a esti pueblín facemos la ruta davezu dende Xixón, pela autovía minera hasta Mieres del Camín, onde garramos la A-66, hasta'l desvíu al corredor del Ayer.

Entama'l camín nel pueblu de Ruayer (777 ms)