miércoles, 10 de junio de 2015

Caliao (Casu) - Cabeza L'Arcu

21 de Marzu de 2015

Track: Caliao (Casu) - Cabeza L'Arcu


Teníemos bien de ganes de facer esta circular a la Cabeza L'Arcu, dende cuantayá que xubiéramos al Retriñón conociendo'l Valle Xulió per primer vegada. Por suerte, ún de los miembros del grupu, escoyó esta ruta y encantaos arribaremos al preciosu pueblu de Caliao en Casu.

Pa llegar a él, como toles vegaes que venimos al Parque de Reres, salimos de Xixón pela autovía minera y a l'altura de Llangréu, tomamos el corredor del Nalón que traviesa los conceyos de Llangréu, Samartín del Rei Aurelio, Sobrescobiu y a la fín Casu.

Puntu de partida en Caliao (674 m) en Casu

Nós, magar del cafetín y pinchu tortiella nel chigre de Rusecu (Sobrescobiu), garraremos namái pasar el banzáu de Tañes, la carretera que nos empobinará a Caliao dempués de cruciar los pueblos de Coballes y La Encruceyada.

Llegaos al aparcaderu de Caliao, al llau de la ermita de San Antonio, preparámonos pa un día murniu en cuanto al tiempu se refier, ya que ta zarráu, borrinosu y nun tien pinta d'abrir en dengún momentu. Aún así, baxamos hacia Caliao con bon ánimu, sumándose un perrín más del pueblu a Kíla y Sua.

Averámonos hasta'l pueblu de Caliao pa empobinanos hacia'l Valle Xulió

Cruciaremos la ponte sol ríu Abeyeru, pa siguir un camín qu'asciende paralelu al pueblu y penriba los praos de la Pasera baxo les cabañes de Ceriscu, siguiremos descendiendo hacia'l guapu valle Xulió, onde caleyaremos sele esfrutando de la parte baxa del valle, destacando la Campa'l Ríu.

Perpasamos la Campa'l Riu metiéndonos en Xulió dafechu

Travesaremos el ríu Xulió siguiendo un cómodu camín, que baxo'l fayéu desnudu, xube desnivel atopando les primeres ceyes escaecíes pol desxelu. El nuesu andar, ye bien cómodu y demientres l'agua xurde dende cualquier parea, empobinámonos valle alantre hacia la manzorga, al alcontranos de frente cola Peña'l Sabogal.

Travesaremos el ríu delles vegaes ascendiendo hacia la Mayá Xulió

Nesti puntu, estréchase'l valle nuna foz, teniendo que pasar hacia la mandrecha'l ríu, nun pasu pelín delicáu, ya que'l nivel del caudal ye grande y dificulta'l vadéu. Llueu d'esti pasu, xubiremos con mayor desnivel pegaos a los parés de la Peña'l Sabogal, abriéndose al pocu'l valle hacia la mayá Xulió.

Descansamos na mayá Xulió pa siguir hacia'l Mayaín

El llugar ye guapu enforma, pero'l día nun acompaña, anque al menos nun tamos pasando fríu pel momentu. Sicasí, nun paga la pena parar muncho, poro siguimos valle alantre hacia'l Mayaín. travesando'l calce del ríu Xulió, el cual paez que baxo argayando tolo que pilló per delantre... nun lo recordaba yo asína.

Topamos muncha ñeve xubiendo al colláu L'Arcu (1345 m)

Y a la fín, nel Mayaín metémonos en farina y de la blanca, ya que tendremos un bon tramu de ñeve fondo, na nuesa ascensión hacia'l colláu L'Arcu (1345 m). Pa ello, tendremos como tramu más duru l'avance pela mandrecha la riega, con ñeve pela rodiya, hasta cruciala pa siguir en travesía per una viesca hasta'l propiu colláu con menores dificultaes.

Descendemos un pelín hacia l'entamu del ascensu a la Cabeza L'Arcu

Nel colláu pegará un airón que déxanos xelaos, asína que baxamos a la gueta del senderu que tien de llevanos a la conquista de la Cabeza L'Arcu. A vegaes, paez que quier abrir, otres métese una borrina densa y nun mos queda otra, qu'entamar l'ascensu sele, siguiendo bien les señales de senderu que vamos alcontrando.

Penmediu la borrina vamos siguiendo'l senderu hasta los 1600 m del Picu L'Arcu

La xuba a esti picu de la Cabeza L'Arcu ye cenciella, baxando primeru como dixe un pelín a la fastera contraria de la que venimos y garrando un tramu de terraces calices hasta aportar a una amplia vallina, que llibrará pela mandrecha l'espolón rocosu que baxa de la cumera, asína como un paré final qu'hai na mandrecha'l picu.

Asína, qu'esta vallina llevarános pali pali, de drecha a esquierda, algamando un valleyu final magar de travesar un ñeveru, teniendo nel tramu final l'entepechu de l'ascensión hasta los 1600 m del Picu L'Arcu.

Semeya de grupu nel Picu L'Arcu

Si bien dicíamos, que facía fríu nel colláu L'Arcu, nel cumal del Picu L'Arcu, puntu más altu de la Cabeza L'Arcu, vamos tener una inversión térmica y taremos casi una hora descansando y xintando baxo un rellumu del sol qu'intentaba facer fuercia pa salir pente'l borrín.

Les vistes teníen que ser maraviyoses, pero namái tuve la oportunidá de desplicar más menos, lo que tendríemos que tar viendo a la xente del grupu y unos cuantos collacios de Zori y Richar que vinieron pa esta ruta... que mala suerte tuvieron.

Descendemos hacia la Pandiellina

Ensín más, fartucos ya de xintar, dedicimos baxar pela mesma ruta, ya que'l sol nun ye a apaecer, tirándonos na cabera parte del descensu hacia la manzorga, col envís d'acortar hacia la mayada L'Arcu, teniendo enantes que cruciar el regueru de la Pandiellina.

Pasamos pela mayada L'Arcu y el Felgueru

Si camentábemos que conocíemos a estos altores tolos topónimos col nome de L'Arcu d'esta fastera, dempués de pasar pela guapa mayada, siguiremos hacia'l Felgueru, travesando un tremendu ábanu que baxa dende'l Coriscáu... empobinándonos per un camín colgáu pela mandrecha de la Foz de L'Arcu... últimu nomatu d'esti grupu (colláu, mayáu, cabeza, picu y foz)... anque nun fuimos a ver el famosu arcu.

Entamaremos el descensu más pronunciáu nel colláu Prendeoriu (1027 m)

Como dixe, dexando a la mandrecha la foz de l'Arcu, caleyaremos per un guapu camín baxo fayes y carrascos hasta'l colláu Prendeoriu, onde entamará'l pindiu descensu hacia la nomada riega los Arrudos.

Esfrutamos del paséu pela Foz de los Arrudos con bon caudal nel ríu

Xustamente aportaremos a la pista de los Arrudos na ponte la Calabaza, perpasando poquín a pocu, les pontes de la Fuminosa, les Campes, Agualmayu, Corones y Riafresnu, demientres esfrutamos al igual qu'en Xulió d'un bayurosu caudal dando llugar a guapos tabayones al nuesu pasu.

Travesando los Arrudos hacia Caliao de nuevu baxo l'orbayu

Tol tramu de la perconocía foz de los Arrudos, sedrá un pelín a fueu, ya que'l día finalmente decídese a amenazar con lluvia y tocará entainar hacia Caliao pa nun llegar pingando. Pela cueta, aportaremos a los coches moyaos enforma, dempués de completar una ruta de casi 8 hores, con 15,4 km de percorríu y un ascensu acumuláu de 1480 m.

Como siempre, los tiempos son orientativos... dicir que la ruta ye llarguina, pero albidro qu'una hora menos sí que se puede rebaxar, ensín los tramos de ñeve y tando un pelín menos tiempu tiraos nel cumal, jeje.

Que vos preste!!

Camudando'l Camín na Cabeza L'Arcu

2 comentarios:

  1. Que ganas le tengo a esa montaña Berto.
    Ya me hubiera gustado haberla subido con vosotros.
    El reportaje tan cojonudo que has publicado me servirá para subirla algún dia.
    Un Saludo

    ResponderEliminar
  2. Na... ya sabes... monte de diversión puru. A disfrutar simplemente.

    Un abrazu

    ResponderEliminar