lunes, 3 de noviembre de 2014

Val.le (Somiedu) - Pena L.lana

17 de Mayu de 2014

Track: Val.le (Somiedu) - Pena L.lana


Aportamos al Val.le, nuestru pueblu más visitáu de Somiedu y como siempre llegaremos dende Xixón pola autovía A-64 en direición l'occidente astur, hasta Pravia, onde tomaremos la As-16 hasta Cornellana y ehí, ya la As-15 y As-227 hasta Balmonte Miranda, onde almorzamos como ye vezu nel Hotel Cela.

Llueu siguiremos pela mesma carretera hasta Auguasmestas onde éntrase al fin nel conceyu de Somiedu, pa pasar polos pueblos de Xadriz, La Riera, Recueva, Castru y al fin a la capital, onde nuna carretera ascendente arríbase al Val.le.

Entamamos la ruta nel Val.le (1231 m)


Axuntámonos na casa rural na que ya durmieron los collacios vascos y saldremos pel mediu'l pueblu hasta la ponte onde cruciamos el ríu'l Val.le, siguiendo el PR-As16 que va hacia'l Puertu Somiedu. El camín siempre n'ascensu llévanos hacia la Braña de Fuexu, dexando'l Picu Castiel.lu y el val.le de Sousas a nuesa mandrecha.

Ascendemos hacia la Braña de Sousas

Con un día perfeutu pa caleyar pel monte, ascendemos hacia la braña de Tabladiel.lu onde queden dalgunes construcciones pervieyes circulares, asitiaes enmediu d'una vega arrodiada pelos parés de guapos cumales como La Franca, El Muñón o el Robezu.

Seguimos ruta pasando por Tabladiel.lu hacia'l col.láu Muñón

El camín siempre en bones condiciones, fadrános xubir ensín pausa hacia'l col.láu Muñón (1845 m), onde nuna de les envueltes baxo'l paré del Muñón, separámonos del camín que sigue hacia'l Puertu. Nós, xubiremos de frente un pelín más hasta'l col.láu onde topámonos con un pequeñu llagu nel que Kíla decide que ye momentu d'enfrescar esi cuerpu perrunu.

El pasu pol col.láu Muñón (1845 m) danos vistes increyibles

Les vistes nel intre son perguapes, teniendo en tola redolada grandes cumales somedanos y llioneses. Dalgunos dellos como La Salgada y compañía ficiéronmos pasar un gran día de monte va un tiempu, otros como'l Montigüeru, queden tovía nel sacu de los pendientes.

Dexamos un ratín les vistes y centrámonos nel nuesu oxetivu: La Pena L.lana. Nun la conocemos, a pesar de tenela presente dende munchos de los montes algamaos nestos años. Pa dir por ella, nun duldamos ya que vemos un evidente canalizu que lleva hacia'l cumal ensín aparentes dificultaes.

Averámonos pela faldera la L.lana hacia un preciosu canalizu

P'algamar la base la canal, tendremos de faldiar ensín perder altor, hasta topanos con un pequeñu trepe per un canalizu, ganando una segunda terraza superior de la falder la L.lana. N'ella, ya garraremos la pedrera que pali pali, dirá metiéndonos en plena canal.

Esfrutamos d'un cómodu ascensu pela canal hacia la cumera la L.lana

Caún al so ritmu, vamos aportando al final de la canal, ganando vistes hacia l'Oriente, con cumales del Macizu de Penubina o grandes cotes penriba'l L.lagu'l Val.le como la Pena Orniz. A la fín tamos nel cumal de 2067 m de la Pena L.lana con 3 hores de ruta, nes qu'esfrutamos d'una ascensión sele y mui completa en percorríu y vistes.

Guapu cumal de la Pena L.lana (2067 m)

Magar de xintar con muncha calma tomando'l sol, preparamos la baxada pel otru l.lanu de la L.lana, baxando hacia'l col.lau Sobre L'Agua, alcontrándonos nun prestosu descensu coles últimes ceyes nes qu'esfrutamos dexándonos patinar.

Siguimos el crestéu hacia'l descensu al col.láu sobre L'Agua (1800 m)

Nun descender cómodu, baxamos falando de mil hestories, llamándonos muncho l'atención los desplomaos parés de los picos Fana y Canalón y lo guapu de les Veigues de Cuevameliz colgaes sol val.le unos 500 ms d'altor.

La verdá ye qu'esta fastera del val.le ye increyible y quiciás nun futura pagaría la pena conocer estes veigues ascendiendo a estos picos menores, pero con un toque alpinu mui grande. Esta vegada tocaba cumplir horarios y ensin danos cuenta tábemos nel Veneiru, onde pasando pol Gabitón empataremos cola pista na braña la Cobra que vien dende'l L.lagu'l Val.le.

Descendemos hacia l'enllaz cola pista que baxa del L.lagu


Esta pista ficímosla delles vegaes ya y anque naide nun-y quita lo guapo, el calor a les 3 de la tarde fizo un pelín pesao el nuesu caleyar tranquilu. Eso sí, dalgo d'emoción tuviemos cuando casi piso ensín querer un exemplar curiosu de víbora... menos mal que nun-y acerté.

Finalmente, aportamos al Val.le de nuevu magar de casi 6 hores y media de ruta, superando un desnivel acumuláu d'unos 1100 ms y un percorríu de 17 kms lo cual dexó mui bon tastu pa siguir cola xuntanza y la folixa a posteriori.

Camudando'l Camín en Somiedu

Nesta ruta ficimos la Pena L.lana (2067 m): vértice xeodésicu de Somiedu, dosmil y monte prestosu

Ver progresos en: Retos montañeros


2 comentarios:

  1. Ruta bien guapa y más la Pena L.lana con eses vistes que tien. Fícela muy parecida va unos años, pero yo entamela al revés y algame-y Picos Blancos, que ye otra cume tambien muy prestosa de xubir.
    Teo que xubir al blog l´utimu viaxe a Somiedu que tambien fuera perguapu.
    Un saludu

    ResponderEliminar
  2. Yo toi que nun lo dói col blogue... hai díes que danme ganes de dexalo too... tovía toi por Mayu... ye desesperante, jeje

    Un saludu

    ResponderEliminar