H.itu d'Escarandi (Cabrales) - Samelar - San Carlos

9 de Xineru de 2011

Track: H.itu d'Escarandi (Cabrales) - Samelar - San Carlos

Primer ruta del 2011, a facer coles cotes másimes de turrón na barriga, asína que teníemos una dificultá añadida, anque les ganes pudieron más que los quilinos. Pa ello, queríemos averanos a la fastera oriental de Picos, y de pasu sacanos d'enriba dalgún dosmil de los que pululan por Ándara.

Esta vegada, abandonáronme a mi suerte, tolos collacios del GM Xuan de la Borrina, y tuve qu'averame hasta Arenas de Cabrales yo solo, saliendo de Xixón, pa garrar como siempre l'autovía del Cantábricu hasta Posada de Llanes onde tomé direición a Cabrales al traviés del Altu d'Ortigueru, y darréu baxé a los pueblos de Canales, Carreña, Poo y Arenas, llugar onde desayuné en compaña de los collacios vascos: Fernan, Amaia y Juanan.

Depués d'un desayunu potente, salimos hacia'l pueblu cabraliegu de Sotres, y travesámoslo pa siguir per una pista descarnada pol xelu hasta la llende con Cantabria, el H.itu d'Escarandi a 1296 ms d'altor. Equí, preparámonos ensín saber mui bien, si va pagar la pena tol viaxe en coche y entamar a caleyar, ya que'l día, como'l parte daba, nun taba mui afayaizu, pero dalgún requexu de lluz pente la ñebla dábanos esperanza.

Entamamos nel H.itu d'Escarandi (1296 ms)

Unos minutinos pasen de les 9 y media la mañana, y tomamos la pista que nos dexa nel casetón d'Ándara, con sensaciones pelín estrañes,... y ye que la ñeve amuésase dalgo duro, colo que nun sabemos hasta onde podremos llegar, y tamién el día, que ye una incógnita total.

D'otra miente, viénenme a la tiesta demientres caleyo, delles acordances... unes d'ilusión pola montaña como nel Valdemingueru y otres de cansanciu estremu como na Travesera 2009 - 2010, onde dexamos les últimes fuercies baxando corriendo per estes pistes a la gueta d'una fabada en Sotres.

Primeros pasos pela pista col Macondiú apaeciendo

Y ye que nun soi nengún espertu nin vieyu montañeru, pero nestos tres añinos de fuerte dedicación a esta pasión tardía, pueu tener y tengo esos recuerdos de capítulos pasaos, que-y dan otru tastu a cada pasu repetíu. Nun quiero pensar, que me cuntarán a la oreya, les piedres que voi pisando cuando lleve tantos años de monte, como mi collaciu Fernan.

Xubiendo hacia'l Casetón d'Ándara

Ensín dame cuenta, pasó un hora y cuartu, y ya entamamos a dexar embaxo'l refuxu d'Ándara, tando ya na parte de la ruta desconocía pa mi. Nel intre, aprovechamos una buelga fecha na ñeve, y vamos siguiéndola con cierta facilidá hasta aportar a la collada de Tresmancondiú, onde piérdese ya que'l montañeru propietariu fizo la xubida al picu que-y da nome.

Aportando a la collada de Tresmancondiú (1839 ms)

Magar del colláu, tócanos baxar hacia una pista que vien del colláu d'Ándara y que da la vuelta al muro'l Macondiú dende'l casetón. Pa ello arrodiaremos el H.oyo la Marrana, dexándolo a la nuesa mandrecha, al igual que les mines de la Providencia. Dicir que tol macizu d'Ándara ta estráu de mines abandonaes nos años 70, y que por desgracia desficieron gran parte de la so belleza, hasta'l puntu de desaniciar el llagu d'Ándara d'un españíu mal controláu.

Siguiendo la buelga na falda del H.oyo la Marrana

En garrando la pista, empobinarémonos ensín problema hacia'l colláu San Carlos, xubiendo desnivel n'envueltes, hasta superar los más de 2000 ms d'altor. Nesti tramu, la única dificultá, ye avanzar poles buelgues dexaes por otres persones, ya que coles xelaes, queden perdures y de xemes en cuando paga la pena facer buelga ún mesmu, si nun se quier esgonciar dalgún todiellu.

Colláu San Carlos al fondu y dexamos abaxo ya'l Mancondiú

Ye de recibu dicir que, siempre ye afayaizu llevar crampones y piolé, porque dalgún pasín espuestu, ensín peligru físicu, pue llevate a resbariar y finar unos cuantos metros pembaxu. D'esti colláu (2050 ms), vamos dir a la manzorga pa facer l'ataque al Picu Samelar, al traviés de la so arista.

Pela arista del Samelar

L'ascensión foi completamente tranquila, ensín dificultá nenguna, más que nun averase muncho a les cornises de ñeve, ya qu'esti picu fai una ablucante paré, hacia los pueblos cántabros de Camaleñu. Polo demás, simplemente facer pasu, pente la ñeve y peñes, hasta encumar nos sos 2231 ms d'altor, dempués de 3 hores y quince minutos de ruta.

Picu de Samelar (2231 ms)

Esti cumal diónos la oportunidá, d'acolumbrar delles cotes más de Picos, gracies a los claros qu'abriéronse, pero tamién, fízome poner más capes de ropa, porque tiraba l'airín mui guapamente, y taríemos pembaxu los 0 grados.

Como nun había ganes de pasar fríu, sacamos les semeyes de turnu, y a correr p'abaxu hasta'l colláu otra vegada, onde Fernan y yo, pusímonos los crampones y sacamos el piolé a pasear, por si la xubida al picu San Carlos amosábase dalgo más xelada qu'esta, al tar un pelín más protexía. Juanan y Amaia, decidieron acompañanos per detrás, hasta onde lo viesen complicáu dándose la vuelta nel intre.

Xubiendo al San Carlos y Fernan cola Rasa detrás

Asína pues, tiramos-y Fernan y yo, con ganes p'arriba, y alcontrámonos con una xubida asemeyada a l'anterior, quiciás con un pelín de xelu más, pero tamién ensín nenguna dificultá, sacante de nun averase a les cornises igualmente.

Fernan col Samelar detrás, y Amaia y Juanan en plenu ascensu

De xemes en cuando, la ñebla abríase y podiémos echar dalgún vistazu al paredón del Samelar detrás, a dellos picos por facer a la mandrecha (Rasa del Inagotable, H.unciana, ...) o simplemente xixilar, a ver que tal diben más abaxo Juanan y Amaia.

Semeya de grupu nel San Carlos (2206 ms)

A la fín, facemos cume Fernan y yo, a les 2 menos diez de la tarde, con un fríu importante, y pocu dempués llegarán Juanan y Amaia. Nun ye de mis cimes preferíes nin muncho menos, ya qu'aparte del nome horrible (San Carlos o Sagrado Corazón, madre mía que dolor), tien un horrible santu, un vértice xeodésicu, y nun restolé namás por si acasu, jeje.

Son poco más de les 2 cuando ponémonos a baxar de los 2206 ms del picu San Carlos. Dempués de 4 hores y media, ya decidiéramos, nun siguir más alantre hacia otres cotes como la H.unciana, Rasa o Grah.ales,... y pa quedanos tranquilos, abandonamos a Juanan y Amaia, pa que baxasen sele, y nós entainamos tornando so los nuesos pasos, cola intención de facer un últimu esfuerzu, colos Picos del Mancondiú.

Baxando del colláu San Carlos col Mancondiú detrás

Casi un hora, poníanos en disposición de da-y preste a esta cume, tan apetecible siempre qu'averámonos al macizu d'Ándara. La baxada, apoyándonos nos crampones, foi rápida, ataxando tolo posible por desniveles más complicaos, y la xubida diba ser asína tamién.

Pero una cosa ye lo que se quier facer y otra lo que se pue. Al final esti Mancondiú, diónos más trabayu que los dos anteriores y cola ñeve blando y pasos de peña, que con crampones faisen permal, fízonos sudar hasta aportar nos sos 1992 ms d'altor.

Ascensión al Mancondiú (1992 ms)

Poco más que cuntar, que sacar semeya, xintar un pocu chocolate (casi únicu alimentu que nos metimos en tol día) y baxar aína, p'alcontranos nel colláu Tresmancondiú, colos nuesos compañeros, que tuvieran una baxada llenta pero sin complicaciones. Cosa que nun teníemos tan claro, dempués d'oyer como si fuera un truenu a un argayu ñeve, ensín saber onde foi con seguridá.

Baxando hacia'l H.itu dexando'l Casetón d'Ándara atrás

El casu ye que nin lo escucharon ellos, así que despreocupación, y p'abaxo, que taba poníendose mui fríu, y yera meyor baxar al coche y xintar en dalgún pueblu'l bocata que metese nel casetón a ello.

En resumen, ruta prestosa y facilina, pa siguir tachando y esfrutando cola fastera oriental y menos xabaz de Picos. Tres cimes tan guapes como'l Samelar, San Carlos y Mancondiú, foron la captura que tuviemos nesti día, nel qu'al final la ruta fuésenos hasta les 7 hs y 15 min, faciendo un total de 16,6 kms y superando un desnivel acumuláu de 1350 ms.

Camudando'l Camín dende'l Picu San Carlos

Nesta ruta ficimos dos picos más del afamáu Club 111 de Picos nel macizu Oriental: Picu de Samelar (2231 ms) y Picu San Carlos (2206 ms)

Ver progresos en: Retos montañeros

Arangas (Cabrales) - Pica Torbina

31 d'Avientu de 2010

Track: Arangas (Cabrales) - Pica Torbina

Caberu día del añu 2010, y que meyor que cellebralu con una gran ruta, y dir facer una visita pol cordal del Cuera que sirve de llende ente'l conceyu costeru de Llanes, colos montañeros de Cabrales y les Peñamelleres. Lo raru ye qu'esti cordal nun tea envueltu pente les ñubes o la ñublina ya sea imposible d'esfrutar no paisaxísticu, como pasóme na ruta de Peña Blanca o nuna anterior al Torbina, na que tampoco pudimos ver práuticamente nada.

Así que, les mios ganes de meté-y man yeren abondes, poro una vegada más, aprovechando'l bon facer montañeru de Pangua, liélu n'otra entamada de les míes, pa facer la pica Torbina dende Arangas, pero cola intención de restolar pente los h.oos del Cuera, na gueta de dos cotes llanisques, como la Paré los Cuervos y la Pica la H.aba.

Si esto yera posible, teníemos que comprobalu, asi que salimos de Xixón mui ceo, pa garrar el camín más que comentáu hasta Arenas de Cabrales, garrando l'autovía del Cantábricu hasta Posada de Llanes onde tomaremos direición a Cabrales al traviés del Altu d'Ortigueru, y ya baxar a los pueblos de Canales, Carreña, Poo y a la fin Arenas, llugar onde desayunaríemos como bien se merecía un fin d'añu,... con polvorones... esto ye broma.

Entamando bien ceo n'Arangas (350 ms)

Cafetín aparte, tomaremos en Arenas la As-345 que nos dexaría en Arangas, onde pocu más allá de la ilesia, na parte drecha de la calzada tendremos un sitín bien guapu pa dexar el coche y ponese con xeitu montañero. Inda ta pelín escuru, y casi'l sol nun alborez, pero ye'l día nuechevieya y tampoco tamos pa llegar a casa a les mil, así que ponémonos a caleyar a les 9 y cuartu la mañana, en direición a la ilesia (con texu guapu como non) que dexáremos abaxo, y d'ellí garraremos caleyu siempre en xubida.

Vamos dexando Arangas embaxo y vemos la Pica Peñamellera

Esti camín bordiará la pica Arangas, hasta dexanos nes cabañes de Las Vegas, onde al travíes d'una senduca xubiremos hasta l'entamu d'un pedreru. Equí sería'l crucie, onde tiraríemos hacia la mandrecha, empobinándonos a la xubida natural al Torbina, pola braña'l Gobiu, pero nel nuesu casu, vamos siguir penriba'l pedreru, en direición a la paré del Cuera, pa garrar pasu n'El Cantu, algamando'l final de la paré a unos 1130 ms.

Semeya de la xubida a güevu dende Arangas

Son poco más de les 11 y tamos na entrada al mundiu xabaz del Cuera. Acabamos de facer unos 780 ms de desnivel en menos de dos hores, y ente nós, tenemos dos visiones bien dixebraes: detrás nuesa, amuésanse impresionantes tolos Urrieles (Castil, Urriellu, Neverón, Albos, Cabrones, Torrecerréu,...) y pal otru lláu, tenemos una infinidá de h.oos, polos que tenemos qu'orientanos pa facer eses dos cotes tan poco nomaes como son la Paré los Cuervos y la pica La H.aba.

Superamos la muria'l Cuera viendo su inmensidá de h.oos y Picos detrás nuesa

Nun tenemos mui nidio, per onde entamar, así qu'averámonos pente la ñeve a la Braña'l Cantu, que ye lo primeru qu'agüeyamos y ya de primeres dámonos cuenta del mal estáu de la ñeve, dura penriba y blanda perbaxo, teniendo que pisar como un pitín pa nun fundite hasta la rodiella.... otra torga a sumar.

Espalda blanca y Peña Blanca, jeje

Así que, dexamos esta braña a la mandrecha y siempre en direición NO, vamos dir travesando h.oos mediánamente grandes, intentando nun perder muncho altor nellos, hasta ver a la nuesa manzorga la braña de Tornallás metía nuna gran vega. Darréu ya sabemos que la paré los Cuervos alcuéntrase enfrente nuesa, y que la xera será encumase na cota más alta qu'acolumbremos.

Braña de Tornallás y Paré los Cuervos

L'oxetivu taba claro, pero'l trabayu a facer al final nun foi tan amigable, y ye que la xubida a esta cuarta cota de Llanes, foi de lo más abegosu, tornándose en dellos momentos hasta peligrosu, pola cantidá de profundos h.oos, torques en dalgún casu, y polo afiláu de la caliza, que facíanos ser funambulistes nos más de los casos, pisando con un pie nuna cuchiella y con otru na siguiente y pentemedios furacos d'entre 1 y 5 ms.

Perabegosu acesu a la Paré los Cuervos (1147 ms)

A posteriori, col gps en casa, ya pude saber cuala yera la mayor cota d'esta Paré los Cuervos, pero nel intre, trepamos y destrepamos milenta h.oos y cuchilles a la gueta del altor másimu. Dende qu'asomáremos el morru nel Cantu, hasta los 1147 ms de los Cuervos, pasaren casi hora y media y per delantre teníemos el siguiente oxetivu, la Pica La H.aba, xustu a metá de camín hacia'l cerru Torbina, que nun vos podéis imaxinar lo lloñe que taba.

Del nuesu deambular per esti espaciu ente una cota y otra, nun se si comentar dalgo más que... nin se vos ocurra meteros equí, ye una fastera de tarrén, completamente estrada de h.oos y torques peligroses, con continos destrepes y trepes per cuchilles afilaes, nos cuales nunca sabes onde vas tener un fallu y matate. Toi diciendo esto mui en seriu, les condiciones p'avanzar son pésimes.

De los pocos pasos tranquilos del día cola pica la H.aba más cerquino

Dicir, que nun llevéis a xente sin esperiencia n'esguilar, porque yo tuve en más d'un momentu, cagándome en too, por meter a mi collaciu Pangua per ellí. Menos mal que tien un calter positivu, y siempre va siguiéndote con una sorrisa, anque tea pasándolo tan mal, como lo pasamos. Y ye qu'equí daste una hostia, y nun t'alcuentren nin los merucos pa xintate, y nun quiero pensar nesti llugar ensín gps y con ñebla, tas muertu de xuru. Siendo sinceros, podemos tar nun de los sitios más vírxenes d'Asturies, solo hai que dicir qu'alcontrámonos con un xabalí, que tranquilamente pasó a lo lloñe, como diciendo y estos que pintarán per equí.

Nun se como, fuimos orientándonos y llegamos (mirando pal gps tol tiempu) a un puntu en que veíamos que la xubida a la pica la H.aba, taba a tiru, así que pusímonos a ello, y tuviemos que trepar, con dalgún pasu mui duro pa nun arrodiar más h.oos, hasta dar cola cota de 1176 ms d'esti tercer cumal de Llanes.

Nel cumal de la pica la H.aba (1176 ms) y Torbina a lo lloñe

Son poco más de les 2 de la tardi, y llevamos casi dos hores dende la Paré los Cuervos, lluchando nun tarrén adversu a más non poder. Mentalmente, ye casi más duro que físicamente, siempre contando con que seas capaz de movete fácilmente por sitios mui complicaos. Dende equí riba, pescanciamos lo negativu de siguir colo que sería un cresteríu hasta'l Torbina, así qu'hai que baxar hacia les brañes que vemos nel gps: la de la H.aba que ya dexamos atrás, y la de Riaña, que tenemos xusto embaxo d'otru segundu cumal a unos metros tan solo.

Esti segundu cumal ye la Cabeza Riaña (1201 ms), ya perteneciente a Peñamellera Alta, y que namás facela, ponémonos a baxar hacia la so braña, a partir de la cual, tendremos a priori, un andar más cenciello, con h.oos amplios, nos que podremos avanzar más rápidu.

Baxando de la Cabeza Riaña hacia so Braña y amplios h.oos de camín a Torbina

Magar d'esta baxada pela Paré del Combo, ya entamaremos, lo que sería una ruta más normal, con ñeve blando, teniendo qu'abrir buelga con dificultá y esfuerzu, pero al menos facemos metros bien aína, y sobretou en cuanto decidimos dir blincando de cotolla en cotolla, fuimos a ponenos na bas de Torbina, muncho enantes de lo que camentábamos.

Pangua recuperando fuercies de cara l'ascensión a Torbina

D'equí palantre, escaecímos tol cansanciu, toles dificultaes, tol tarrén perabegosu,... y namái pensamos.... nel bocata, jaja. Así que, tiramos p'arriba como ñus y encumamos la cota más alta de tol cordal de Cuera, nun tris, p'azotar la mochila nel vértice y tar más d'un bon ratu, mirando ensín más pal cielu, pa la mar, pa les montañes que nos arriodaben en toles direiciones,... Tar l'últimu día del añu nuna posición asemeyada, quiciás yera'l broche a un añu montañeru de primera.

Dende la pica Torbina... E: Lliñu, O: Peña Blanca, S: Urrieles y N:Llanes y la mar

Magar d'estos pensamientos, llegaron otros de fae más tiempu, sobretou alcuérdome de la primer vegada que vinimos al Torbina... Diego, Simón, Rolo, yo y Carlos, que daquella nun taba preparáu y cola xubida hasta Entrambospraos, ya casi nos muerre colos kilos de más que soportaba.

Cume del Torbina (1312 ms)

Cuando quise dame cuenta, Pangua taba nel segundu cumal, pa mirar pa la costa, así que fui corriendo hasta ellí, onde ficimos dalguna semeyuca pegándonos con un montón de fierru rotu (qu'había per ellí en forma de cruz), y dempués de facer un pocu l'anticristu, tornamos al cumal cimeru del Torbina, a xintar tranquilamente, que ya yeren casi les 4 menos cuartu, y había fame abondo.

Ensín perder muncho más tiempu, ya que llevábemos más de 6 hores de ruta, entainamos a xintar, y aniciamos la baxada lo más rápidu posible, anque esta al final ficiérasenos dura, llarga y pesada a más nun poder. Los pasos, nos fueron guiyando al traviés de dellos h.oos que bordiaben el Picu Llacia, hasta atopanos na braña del Gobiu, onde caleyamos pente la ñeve blando, faciéndose un duru camín hasta la baxada por Entrambospraos.

Braña'l Gobiu y Pangua "baxando" por entrambospraos

A partir d'equí, baxaremos tola muria'l Cuera, n'envueltes, hasta endirixinos hacia'l pedreru que usáremos, cuantayá, de xubida hacia'l Cantu. Dicir que na baxada'l cansanciu yera tan grande que tuviemos que parar, ya que Pangua mareábase,... nada que nun igüase un pocu de turrón de chocolate. Nota: La semeya ye posterior col xubidón del azucre nes venes.

Última despedida a los Urrieles: esi Picu y Cabrones-Torrecerréu con ñubes

Con poco más de senderu, y posterior pista en Las Vegas, aportamos de nueu a Arangas cola visión del atapecer nos Urrieles, dempués de 8 hores y cuartu de ruta, na que ficimos 16,5 kms y superamos un desnivel positivu de 1556 ms y otru tantu de baxada.

En resumen, la ruta ye mui potente, pero atristayáu, tengo que dicir, que nun ye afayaiza pa tolos públicos, polo esixente físicamente, mentalmente y téunicamente nos puntos ente la braña Tornallás, la Paré los Cuervos, Pica la H.aba y braña Riaña, nun ye pa nada encomendable por mi parte. Avisaos quedáis, jeje, aún así espero que vos prestase.

Camudando'l Camín dende la xubida'l Cuera

Nesta ruta ficimos la tercer y cuarta cota de Llanes: Paré los Cuervos (1147 ms) y pica La H.aba (1176 ms), asína como'l vértice xeodésicu de Peñamellera Alta: Torbina (1312 ms)

Ver progresos en: Retos montañeros