La Terenosa (Cabrales) - Vega Urriellu - H.orcaos Roxos - Tiru Casares - Colláu H.ermosu (Valdión)

5 de Xunetu de 2015

Track: Arenas (Cabrales) - La Terenosa (Cabrales)

Tamos na segunda estaya de la Travesera 2014 - 2015 y el panorama que tenemos nel grupu ye pelín murniu, ya qu'aparte de los abandonos ya programaos nel fin de selmana, ún de los collacios que diba facer la travesera entera, Alberto, tien qu'escapar col restu del grupu por mor d'unes molesties na rodieya.

Los demás que continuamos, Fernan, Bittor, César y yo, pel momentu vamos bien, anque yo ya albidro los mesmos síntomes de frayadura nes plantes de los pies, que tuviera l'añu pasáu y que tardara en recuperar más d'un mes.

Partimos del refuxu de la Terenosa (1298 m)

Arenas (Cabrales) - Portudera - Tielve (Cabrales) - Peñe Maín - La Trenosa (Cabrales)

4 de Xunetu de 2015

Track: Arenas (Cabrales) - La Trenosa (Cabrales)

Munches vegaes cuando facemos esnalar el maxín en suaños o sobre un mapa, formamos na nuesa mente una ruta increyible, sobretou si tenemos la posibilidá de facer una travesía. Esto suel pasar casi siempre na Travesera y esti añu los dos puntos a xuntar yera'l pueblu d'Arenas en Cabrales y el refuxu de la Trenosa.

D'esta miente, tracé'l percorríu de la ruta, per bones siendes como ye la senda Caoru hasta Tielve, contando llueu con una parte más abegosa nel traviesu de la Peñe Maín. Así, sol mapa paecía una ruta de lo más prestosa, ensin albidrar realmente cuala diba ser la dureza a superar, anque nos preparativos pa la ruta ya camentaba la kilometrada y sobretou un desnivel descomanáu.

Entamamos en dos grupos n'Arenas (147 m)

Travesera Picos 2014 - 2015

Del 4 al 7 de Xunetu de 2015

Track: Travesera Picos 2014 - 2015 

Como tolos branos, apaez ante nós el platu fuerte de la temporada, la travesera de Picos. Si l'añu pasáu sofriéramos una travesera gafa, ensin dengún día de bon tiempu, esti añu va ser tolo contrariu y durante los cuatru díes de travesía, el calor y el sol fueron de los mayores protagonistes, xunto al bon ambiente y el cansanciu fonderu.

Hai que dicir, qu'esti añu bien pudiera ser la travesera de más kilómetros de percorríu y na que los participantes fueron cayendo, unos por abandonar magar del fin de selmana y otros por delles llesiones.

Semeya de grupu con tol mundiu a tope de fuercies

Muncho tuvo que ver la primer estaya de la travesera, que facía conocer delles siendes mítiques ganaderes dende Arenas hasta'l pequeñu y guapu refuxu de la Terenosa, nes cercaníes de Pandébano.

Poro, llegaríemos a la Terenosa, fóndamente cansaos, tanto los más fuertes como los menos avezaos a travesíes de díes. Ésto, fizo qu'al día siguiente tán sólo siguíesemos a completar la travesera César, Fernan, Bittor y yo.

Paradina en Tielve nun día mui llargu y calurosu

En la Terenosa retiraríase Alberto con muncha pena y un cabréu importante, teniendo que baxar col restu del grupu, mui cansáu ya dempués del durísimu primer día. Aún así, gracies a la bona cena y el descansu algamáu nel refuxu de la Terenosa quinxeron ascender faciéndonos compaña hasta la Vega Urriellu, col envís de presentar los respetos al maxestuosu Picu Urriellu.

En la Terenosa xenial refuxu lloñe del barullu d'Urriellu

Ellí, despediríamonos penriba d'una borrina qu'a la postre fué un pilancu pal descensu per Cambureru y Valcosín, que según llegó a les nueses oreyes tresformóse nuna aventura pa munchos de los collacios del grupu por mor de lo moyao del tarrén.

N'Urriellu facemos la despedida de los del finde

Los restantes del grupu, esfrutaríemos d'un día inimaxinable pelos altores de los Urrieles, ya qu'alborecer con borrina baxa na Terenosa nun mos facía preveer pasar tantísimu calor nel nuesu camín hacia'l colláu H.ermosu.

Colláu H.ermosu amosando tola so guapura de vistes

A la segunda prestosa estaya, amestaríemos les novedaes del refuxu de H.ermosu pa completar un grandísimu día, ya que tener caña de cerveza y xarres de mediu llitru, da tolo que necesites cuando aportes con un secañu de los que faen hestoria.

Nel remocicáu refuxu de H.ermosu entamaría la mayor aventura

La tercer estaya fue un auténticu infiernu pa un compañeru del grupu, siendo de xuru un de los retos mentales y físicos más fuertes que pueden superar una presona. Nun sólo'l percorríu fizo ponenos a prueba a toos, sinon el calor insoportable llevónos hasta la llende física, pasándolo realmente mal nel descensu hasta Caín.

Desfechos mental y físicamente aportamos a Caín

La tarde-nueche de Caín, como siempre relaxante y motivante polos comentarios de los paisanos caineh.os, llevónos dende un refrescu nel Cares pa los nuesos desfechos pies, hasta una cena relaxada con muncha recuperación de llíquidos espirituosos hasta casi la media nueche.

El Cares siempre ta presente nes traveseres

La cabera estaya ya dexaba fuera de control a Fernan y Bittor, que daríen un paséu tranquilu per Cares hasta Poncebos, desviándonos César y yo a conocer dalguna fastera más de les ablucantes canales de Picos.

Tocando'l vacíu na sienda'l Cares

Como tolos años, tan sólo nos quedaría ya la xinta final de Travesera, qu'esti añu diba ser en Camarmeña con vistes al Picu Urriellu, que despedíase de nós hasta que l'añu que vien tengamos a bien tornar per estos llares.

Qu'asina seya...

Homenaxe al ascensu del Sporting col Urriellu de fondu

Una vegada más... dar les gracies a los collacios que participaron esti añu: Fernan y Bittor dende Euzkadi y Alberto, Natalia, Zori, Richar, Carlos, César, Dani, Haritz y Paulina dende Asturies, qu'espero que l'añu que vien seya a animase.

Como siempre, vamos dexar unos datos a mou resumen y les correspondientes entraes del blog (que diré escribiendo lo más ceo posible):

Estaya 1: Arenas (Cabrales) - La Terenosa (Cabrales)

Duración: 12 h
Llonxitú: 22 km
Ascensu: 2475 m
Descensu: 1313 m


Estaya 2: La Terenosa (Cabrales) - Colláu H.ermosu (Valdión)

Duración: 11 h
Llonxitú: 15,5 km
Ascensu: 1970 m
Descensu: 1225 m

Estaya 3: Colláu H.ermosu (Valdión) - Caín (Valdión)

Duración: 9 h y 20 min
Llonxitú: 10.5 km
Ascensu: 620 m
Descensu: 2260 m

Estaya 4: Caín (Valdión) - Camarmeña (Cabrales)

Duración: 5 h y 20 min
Llonxitú: 13.5 km
Ascensu: 1130 m
Descensu: 1215 m

Totales:
 
Duración: 37 h 40 min
Llonxitú: 61.5 km
Ascensu: 6195 m
Descensu: 6013 m

Valverde (Los Argüeyos) - Picu Bodón

13 de Xunu de 2015

Track: Valverde (Los Argüeyos) - Picu Bodón

Última ruta del añu na que deberíemos despedinos toos hasta la siguiente temporada, pero siendo sinceros, cuanta más xente hai nel grupu, munches vegaes menos compromisu algames. Con ello, xuntámonos Richar, Zori, Benjamín y yo, pa facer la despedida de la temporada.

Pa enriba, el tiempu n'Asturies nun ye bono precísamente y tenemos que buscar una ruta alternativa a les que tenemos de calendariu. Como siempre, a mal tiempu n'Asturies hai que restolar en tierres llioneses p'alcontrar onde caleyar un ratín.

Partimos del pueblu de Valverde (1259 m) en los Argüeyos

H.uentedé (Llébana) - Torre Salinas

6 de Xunu de 2015

Track: H.uentedé (Llébana) - Torre Salinas

Tamos na ruta propuesta por mí pa esti añu, la cuál dábame dellos dolores de tiesta por mor de les posibles trepaes n'ascensión final. Nel mió interior picábame más xubir la Torre de Lliordes, dellos metrinos más alta que la Torre Salinas, pero siendo ésta tamién más complexa de xubir que la collacia d'al llau.

A la fín, decídome por Salinas al ver dellos reportaxes onde la dificultá paecía ser aselada pela vía normal, dándo-y más oportunidaes a la mayoría del grupu. Asína con too... quedamos 5 paisanos pa intentar ascendela y ún d'ellos, David, novatu nestes xeres col grupu Xuan de la Borrina.

Puntu de partida en H.uentedé (1083 m)

Sotres (Cabrales) - Picu Boru - Picu Valdemingueru - Brañiella

17 de Mayu de 2015

Track: Sotres (Cabrales) - Picu Boru - Picu Valdemingueru

Como casi siempre, ruta de Fernan, ruta que va llevanos hacia l'oriente y nesti casu, al macizu oriental de Picos, el d'Ándara. Esta ruta, en parte, fué planiada pa la travesera del añu pasáu, pero por mor d'avisu de truena tuvimos que facer un plan B, dexando los picos protagonistes pa otra vegada.

El casu ye que tábemos con ganes de conocer el nomáu picu Boru, cumal que tien visión direuta dende'l propiu pueblu de Sotres y que caltién nos últimos años una prueba de carreres pel monte, nel día de la fiesta de Sotres.

Partimos del pueblu cabraliegu de Sotres (1030 m)

Valdepráu (Ribas del Sil) - El Miru - Picu Veigardón

10 de Mayu de 2015

Track: Valdepráu (Ribas del Sil) - El Miru - Picu Veigardón

Nun somos mui de tirar pal occidente en términos xenerales a la hora de dir de monte y esto ye un erru perimportante... y sinon p'amuesa... la siguiente ruta. Cuantes vegaes ficísteis una ruta que xuba per una llagunes glaciares y baxen per otres, magar d'ascender dello cumales pel camín... pues mui poques de xuru.

Pa ello, tendremos de salir de Xixón mui, mui ceo, garrando nesti casu la autovía minera hacia Mieres del Camín, pa siguir A-66 hacia Campumanes onde garramos l'autovía'l Güerna hasta la salida de Vil.lablino.


Pararemos a almorzar na estación de Caldas de L.luna, erru total, enxamás... menudos lladrones, y siguiremos travesando la Babia y L.laciana hasta Vil.lablino, onde salimos hacia Cabual.les de Baxo y Riba ascendiendo hacia'l puertu de Zarréu.

Salimos de Valdepráu na fastera de Ribadesil (1126 m)

Ezkarai (Ezkarai) - Sagastia - Turza - Ezkarai (Ezkarai)

26 d'Abril de 2015

Track: Ezkarai (Ezkarai) - Sagastia - Turza - Ezkarai (Ezkarai)

Hai dos tipos d'escesos nel mundiu montañeru, tan los de les rutes del día anterior (más de 1600 m de desnivel acumuláu y 24 km) y tan los de les cellebraciones posteriores del día anterior (tar de folixa hasta más allá de la una la nueche).

Pues asína nos llevantamos el domingu de Xuntanza Asturvasca, cola resaca de la cena-folixa y coles pates cansaes de la xubida al Cuculla. Aún así, los planes tan pa cumplilos o pal menos intentalo, poro magar d'otru estupendu almuerzu tornamos otra vegada hasta l'antigua estación de tren d'Ezkarai.

Entamamos camín dende la antigua estación d'Ezkarai (840 m)

Azarrulla (Ezkarai) - Cuculla (San Lorenzo) - Valdezkarai (Ezkarai)

25 d'Abril de 2015

Track: Azarrulla (Ezkarai) - Cuculla (San Lorenzo) - Valdezkarai (Ezkarái)

Llevantámonos ceo nel pueblu rioxanu d'Ezkarai, onde aportáremos ayeri de nueche. Tamos nun pisu del padre d'Haritz, Dani, Zori, Richar, Pau y yo y dimponémonos a almorzar mil hestories bien riques que traxo Zori.

Cuando tamos bien fartucos de palmera xigante d'Unquera, salimos como tiros hacia l'antigua estación d'Ezkarai, onde xuntámonos tolos miembros del Baskonia y del GM Xuan de la Borrina, repartiéndonos en rutes más o menos complexes.

Preparándonos n'Azarrulla (950 m)

Xuntanza Asturvasca 2014 - 2015 (Euzkadi)

25 y 26 d'Abril de 2015

5 años llevamos ya axuntándonos xente del Baskonai Mendi Taldea y el Grupu Montaña Xuan de la Borrina. Son 5 años, nos que pasamos per Euskadi na redolada del monte Gorbeia o pa la fastera l'Aizkorri y como non, ellos pasaron per Asturies nos conceyos de Nava y Somiedu.

Esti añu, el correspondiente a la temporada 2014 - 2015, tocaba tornar per tierres vasques y aprovechando la disponibilidá d'allugamientu na fastera rioxana d'Ezkarai, tanto Haritz como Fernan, decidieron que debíamos conocer esa tierra euskaldún, no qu'al menos toponímicamente toca comentar.

Grandiosu ambiente na cena del sábadu... les rises nun pararon en tola nueche

Aportamos a Ezkarai, de Vienres tarde, magar d'un prestosu viaxe conociendo dellos pueblinos pente Palencia y Burgos. Ellí tuviemos tomando vinos y picando dalgo con tola xente vasco, qu'a dalgunos d'ellos nun yeramos a conocer entá, como Aúrea y Kike... otros yeren bonos conocíos... Josean, Bea, Mariano.

Tuviemos tiempu pa turistear pel pueblu, qu'anque nun tenía muncho ambiente nesta dómina del añu, sí que tenía pinta de ser un puntu turísticu importante nos meses d'esquí y nel branu. Agora con menos xente, seguía siendo una maraviya pasiar peles cais y esfrutar de les places del pueblu.

Tamién hubo tiempu pa esfrutar d'esti guapu pueblu

La cena potente, ficímosla'l sábadu a la nueche nel cercanu pueblu de Valgañón onde conocía Haritz un chigre, que dexónos ún de les meyores alcordances de tola Xuntanza Asturvasca (Eusko-Astur Biltzarra) 2014-2015, onde les rises y la bona comida fueron un continuu durante tola cena.

Dar les gracies fonderes a Haritz, qu'aparte de facer d'anfitrión y preparar les rutes xunto con Fernan, proporcionónos llar onde durmir a la xente astur y descansar pa les rutes, que tamién les hubo como non podía ser d'otra manera.

Sábadu 25 d'Abril:

El sábadu llevantámonos col envís de facer ún de los clásicos de la fastera d'Ezkarai... el monte San Lorenzo, máxima cota de la Sierra de la Demanda y pa la que dellos valientes, a pesar del día murniu, enfotámonos n'intentar al menos.

Semeya de grupu nel cumal del San Lorenzo

Nun sólo l'algamaríemos, sinon que llevaríemos pal bolsiellu dellos dosmiles más d'esa fastera, pero esta ye otra hestoria a cuntar nel so llugar:

Azarrulla (La Rioxa) - Cuculla - Valdezkarai (La Rioxa)

Domingu 26 d'Abril:

Al día siguiente, llevantámonos con una resaca importante ya qu'hubo folixa abondo nel día anterior, poro como bien pudimos, averámonos hasta l'antigua estación de tren d'Ezkarai, col envís de dar un paseín pela redolada.

Ezkarai (La Rioxa) - Sagastia - Turza - Ezkarai (La Rioxa)

Magar del paséu y una duchina... sólo nos quedaba dir a tomar el vermú per Ezkarai, facer dalgunes compres nes tiendes de monte, picar cuatru cosines y despedinos toos hasta la próxima xuntanza, ante un viaxe llargu hasta Asturies.

Semeya de grupu nel colláu de Sagastia

Ésta, será n'Asturies... de xuru que seremos a facela tan prestosa como lo que tuviemos per tierres rioxanes, anque tovía tendremos de restolar pente los guapos conceyos asturianos p'alcontrar onde pague la pena axuntase una vegada más.

Xente astur: Raúl, Richar, Zori, Alberto, Natalia, Dani, César, Paula y Berto.
Xente vasco: Kike, Aúrea, Jose Antonio, Bea, Tito, Amaia, Juanan, Mariano, Bittor, Mari Jose, Haritz y Fernan.