Refuxu de Sarradets - Taillón - Cabietos - Vall d'Ordesa (Sobrarbe)

7 de Setiembre de 2011

Track: Refuxu de Sarradets - Taillón - Cabietos - Vall d'Ordesa (Uesca)

Alborecemos nel refuxu de Sarradets, nel que va ser el nuesu últimu día de ruta per Pireneus. Pa güei, tenemos un día muncho más sele que l'anterior pero nun va tar ermu d'emociones de xuru. Pa entamar, al tar en Francia asperábemos con ansia'l desayunu, nun vaya ser que pudiéramos ponenos finos de curasanes... pero non... nun yera pa tanto l'asuntu. Desayunu normal, tirando a floxo, floxo.

Pangua, podría darme caña coles bondaes de la cocina francesa, pero nin el desayunu nin la cena del día anterior, foron al mio entender dalgo p'alloquecer. D'otra miente, tengo que dicir que'l tratu foi bonu y ficieron dalgo que falta n'Asturies y tamién nel restu del perinéu aragonés, l'interés de los refuxeros por cual va ser la ruta que vas facer al día siguiente, pa posibles percances. Tou un detalle y dalgo a copiar n'otros sitios.

Alborez na Breca Roldán

Polo demás, pueu dicir que nun tendría nengún problema en tornar pol refuxu, ya qu'anque nengún de los dos fuimos a descansar bien, quiciás por un escesu de cansanciu pola frayada que traíemos, les habitaciones yeren cómodes y el refuxu afayaizu pal descansu en tolos xacíos.

Más menos, a les 8 y cuartu tábemos ya andando y la ruta taba clara, teníemos que xubir otra vegada a la Breca Roldán. Pusímonos a ello, caleciendo les pates con gran rapidez y anque tuviemos que lluchar un pelín col xelu del glaciar, que resbariaba dafechu, poro n'otra dómina del añu los crampones tienen de ser más qu'obligatorios, xubióse con bones sensaciones nes pates.

Bordiando la Picalayuela o Punta Bazillac y el Mallet tapándonos el Taillón

Casi media horina tárdase en tar na puerte entre Uesca y Francia, y llueu garramos un senderu que va dir pela base de la Punta Bazillac o la Picalayuela, ye dicir el marcu esquierdu de la Breca si miramos dende Aragón, el drechu sería tola cresta que vien de la Punta Corral Ciego.

Tenemos otru día ablucante, asína que vamos esfrutando del pedreru que vamos travesando pegaínos a la paré, hasta qu'aportamos a lo que nomen la Falsa Breca, que ye otru pasu qu'hai ente la Picalayuela y el Mallet o Dido.

Encarando la xigante cresta al Taillón o Punta Negra

Magar de bordialo pela mandrecha (paez ser que ye lo mesmu pel otru llau), vamos meténos nuna amplia cresta qu'empobínanos ensín erru posible al Taillón o Punta Negra. Nun tenemos muncho más que contar d'esta ascensión ya que dicen que ye un de los primeros tresmiles que fai la xente. Paezme normal, viendo que tan solo ye garrar un senderu qu'asciende per un pedreru enorme, hasta dir ganando-y altor a tolos metros que conforman esti cumal de 3142 ms.

Vignemale una vegada más y cumal del Taillón (3142 ms)

Asína qu'en menos d'hora y media tamos nel nuesu primer tresmil del día, y anque nun tamos mui cansaos, al menos a mi, apetezme facer un sandwich ya que nun desayuné demasiáu. Magar del desayunu, nun perdemos tiempu y siguimos crestiando'l Taillón, hasta aportar al pasu, que dános la posibilidá d'averanos al cuellu de Cabieto, onde podremos empobinanos a los Cabietos.

Los Cabietos na cresta del Taillón

La baxada al cuellu, ye un senderu pelín aéreu y de roca suelto, pero nun tien mayor dificultá sacante de dir bien sollerte y nun facer el fatu. Como non, ta marcáu como PD, jeje, asína que nunca vos fiéis. Eso sí, les vistes sol glaciar del Cabieto son perguapes, pero tamién atristayen ya qu'una vegada más tamos ante'l fin d'estos espectáculos de xelu y ñeves d'antañu.

Baxando hacia'l Cuellu de los Cabietos y glaciar de Cabietos

En media horina, taremos na parte más baxa de la cresta qu'empobínanos al Cabieto Oriental. Pero enantes d'atacar esti picu, camentamos la posibilidá de dexar les mochiles nel entamu del ascensu. Ver a unos compañeros que salieren enantes que nós del refuxu facélu y sobretou ver la afilada cresta que nos lleva al Cabieto Occidental acaba por anímanos a ello.

A pol primer Cabieto, el Oriental

Dexamos pues, les mochiles a unos 2940 ms, y tiramos p'arriba ensín mayores problemes que superar dalguna peña na parte baxa y dempués ya toca caleyar per pedreru hasta aportar a los 3027 ms d'altor del Cabieto Oriental.

Cresta de los Cabietos y cumal del Cabieto Oriental (3027 ms)

Les vistes son como siempre una pasada, anque dempués de 3 díes, acaben por ser repetitives. Como dalgo nuevu, acolumbramos al fin, el puertu de Buxaruelo, onde atopámonos con un feu aparcaderu enllenu coches na parte francesa. Y ye qu'hai que dicir, que nun son un exemplu tampocu, nos temes conservación mediuambiental ya qu'ente esti aparcaderu y el cachu d'hotel qu'hai embaxu la Gran Cascade, ya lo dicen tou...

Cabietos Occidental y Cabieto Oriental en plenu crestéu

Polo demás, tenemos enfrente nuesa, un guapu crestéu hasta'l Cabieto Occidental y vamos ensín mochiles, poro l'esfrute va ser de continuu. Si foron diez minutos dende les mochiles hasta'l cumal del Cabieto Oriental, tan solo tardaremos otros diez en facer tola cresta hasta los 3033 ms del Occidental.

Eso sí, ficimos una cresta penriba de toles peñes qu'alcontrábemos, ensín arrodiar nengún obstáculu, trepando y destrepando gayoléramente con aéreos incluyíos. Foi una pasada sentíse llibre, ensín esi pesu que llevábemos nel llombu dende más de 3 díes.

Cumal del Cabieto Occidental (3033 ms)

11 menos cuartu de la mañana, y ya tenemos tol pescáu vendíu, en cuanto al llabor montañeru en cotes altes. Asína que tirámonos un pelín a investigar la continuidá de la cresta hasta otru cumal secundariu, y dámonos cuenta del erru de nun traer les mochiles, ya que tenemos por delantre una penosa vuelta atrás hasta elles.

Baxando a poles mochiles cola Punta Blanca

Nun quedaba otra y a pesar de ver una baxada afayaiza pa siguir ruta, tenemos que tornar atrás, y facémoslu baxando un pelín a media falda de la cresta de los Cabietos y avanzaremos, travesando pedreros y trepando y destrepando dalgún estribu que traviesa'l nuesu camín, hasta topános col nuesu destín, que nun foi otru, qu'otru plizcu de quesu y chorizu pa garrar fuercies.

Llevamos 3 hores y cuartu de ruta, cuando ponémonos de nuevu en marcha, y de regalu tenemos una fea baxada hasta'l Barrancu de Royo, primeru con destrepes per roca roto y llueu per un pedreru que nun mos facilita nada, alcontrar un camín nel qu'avanzar con soltura.

Llanos de Salarons o Plana Catuarta dende'l Barranco de Royo

Dempués de la baxada inicial pindia, alcontraremos una llanura en mediu d'esti barrancu pela que caleyaremos con tranquilidá, hasta aportar a un gran vivac, dende'l que tenemos una preciosa vista de la vertical paré de la Punta Blanca (que pena qu'esti picu nun llegue a los tresmil) y entós será cuando avistemos la Plana Catuarta, que ye una especie de llagu secu de grandes dimensiones.

Plana Catuarta y Punta Blanca

P'aportar hasta la Plana, tendremos una pesada baxada per un prau pindiu, la cual faise pocu agradable, hasta qu'al fin, caleyamos per esta planicie y les nueses pates agradecen enforma la falta de desnivel, ya que dende'l pinchu coles mochiles llevamos unos 540 ms descendíos ensín parar.

Finaremos esti planu, y tendremos que xubir al colláu de Salarons o Collata dera Pilón, dende la cual vemos un valle nomáu Aguas Tuartas, qu'amósanos un serpentiar de l'agua baxante del barrancu, por meandros tan llentos que l'augua ye inclusu a tomar un ciertu color a ranciu verdín.

Aguas Tuartas dende la Collata dera Pilón o colláu de Salarons

Polo demás, baxaremos d'esti colláu, destrepando pola manzorga un resalte de roca, hasta que pisamos esta llamarga d'Aguas Tuartas y nella avanzaremos fácilmente siguiendo unos h.itos, qu'intentarán non meténos nes partes d'agua más profundes, siempre tirando pola esquierda del cursu d'agua.

Hai que dicir, que nel intre, foi la primer vegada que vimos un animal vivu, sacante de dalguna llargatexa en Góriz, ya nesta llamarga pudimos acolumbrar dalgún robezu (sarrio en Pireneus) y les tan naguaes marmotes, que Pangua nunca viera.

Un pelín más allá de la una de la tarde, tamos ya nel final del barrancu de Salarons, y tenemos antes nós, la caída final del Circu de Carriata. Pa ello, finamos la travesía per Auguas Tuertas y xubimos un pelín hacia la paré del picu Salarons o Gallinero, onde topámonos con un tapecíu crucie de caminos.

Faixeta coma Barrau (Faja de las Flores) y baxada a la Carriata

A la esquierda, en plena paré del Salarons, tenemos una terraza interna que percorre tola paré del picu hasta perdése nes sos curves, ye la nomada Faixeta coma Barráu o Faja de las Flores. Quicías ún de los caminos más ablucantes que vi na mio vida, ya qu'anque hai una caída intermedia hasta'l nuesu puntu, dende'l propiu camín, lo más cercanu al suelu qu'acolúmbrase ye'l final del circu de Carriata, ye dicir, el Vall d'Ordesa a lo baxero.

En plena faixeta de Carriata colos sos prestosos aéreos

Dende la nuesa posición, ya pon la piel de pita, percorrelu tien de ser una sensación increyible. Pero... quedará pa otra ocasión, ya que los nuesos pasos teníen otru destín y otra faixeta. La que nos diba facer baxar el circu de Carriata ensín aidanos de nengún ellementu esternu a la propia roca y los sos destrepes naturales.

Preciosos los pasos que n'envueltes baxan esta paré

Poro, baxamos más pola mandrecha hasta otru crucie, onde pues escoyer utilizar unes clavixes más direutes en baxada o garrar l'aérea faixeta, pa con un pelín más de vuelta facer lo mesmu. Sigo ensín entender, la obsesión equipadora y aseguradora d'unos pasos con alternatives naturales. Nun doi más la brasa con esti tema... ya me cansa.

Poquín a pocu vamos metíendonos en tarrén más cenciello

Asína que, magar d'un descansu tomando'l sol, y de que Pangua tornáse de visitar el cumal del Tozal dero Mallo, el cual nun entraba nos mios planes, por falta d'altor jeje, ficimos tola faixeta de Carriata, esfrutando de cada pasu aéreu, de cada destrepe y de les guapes vistes cola qu'agasayábanos en los sos distintos tramos.

En plena viesca del circu de Carriata

Foi un preciosu final pa esta ruta, anque cuando finóse'l tramu aéreu tuvimos que sofrir un calor xabaz, inclusu nos caberos pasos de la ruta, pel mediu de la viesca que nos fizo aportar al fín, a la carretera que llevaba al aparcaderu d'Ordesa.

Yeren finalmente, 7 hores y 45 minutos de ruta y el calor nun taba siendo mui amable con nós, y col cansanciu que teníemos enriba dempués de cuatru díes prestosos de monte pirenáicu. Nel día de güei, más de 14 kms de ruta y 850 ms d'ascensión acumulada yeren un auténticu motivu pal cansanciu pero aún más los 2125 ms de baxada que llevábemos enriba.

Aportamos al centru de visitantes y a xintar asfaltu

Quiciás ye nesos momentos, onde un tramu de 600 ms de carretera nun te fai nin plizca de gracia, jeje. Aún así, tuviemos bon humor hasta cuando pasó l'autobús que baxaba a Torla, y nun mos quiso garrar nel puntu nel que salimos a la carretera.

Bono, unos minutos más tampoco nos diben a matar, asína qu'aportamos al aparcaderu, y metíemonos una xarra de cerveza bien fría, que devolviónos parte de la vida que perdíeramos nestos díes.

En plenu Vall d'Ordesa de nuevu

Con esto ya, solo nos quedó garrar el bus, y en Torla caleyar hasta'l coche onde garramos lo necesariu pa convertinos en persones de nuevu, ye dicir, ropa llimpio. Dexamos la pesada mochila, y garramos otra cargada de ganas de descansar nel hostal, onde una ducha caliente dió pasu a una visita con tiempu pel pueblu, unes cerveces, una cena afayaiza colos méritos montañeros y una nueche nuna cama cómoda onde durmir hasta'l día siguiente.

Nesi día siguiente despedímonos del Perineu Aragonés hasta una prósima visita y ficimos les munches hores en coche hasta la naguada Asturies... l'añu que vien más.

Camudando'l Camín finalizando Pireneus 2010-2011 en Torla

 

Nesta ruta ficimos 3 tresmiles de Pireneus: Taillón o Punta Negra (3142 ms), Cabieto Oriental (3027 ms) y Cabieto Occidental (3033 ms)Ver progresos en: Retos montañeros

Refuxu de Góriz (Sobrarbe) - Circu de Gavarnía - Refuxu de Sarradets

6 de Setiembre de 2011

Track: Refuxu de Góriz (Sobrarbe) - Circu de Gavarnía- Refuxu de Sarradets

Segunda nueche horrenda nel refuxu d'Ausw.., perdón de Góriz, y eso que Pangua idegó la forma de ponénos durmiendo ún pa un sen y l'otru al revés pal menos nun dános de codazos al movenos, pero nin asína, fuimos a descansar demasiáu.

Asína qu'a les 7 p'arriba y dempués del desayunu, pagar una pasta brutal por dos díes de pernocta, dos cenes, cuatru desayunos y la de mi madre de cerveces, casi con alliviu vamos dexar esti llugar, pa nun tornar enxamás si podemos.

Primeros pasos de la ruta hacia'l circu de Góriz

Los nuesos pasos, van llevanos de nuevu a la gueta de la meyor sienda, que xuba esa primer terraza enriba del refuxu y que nos empobine hacia'l camín correutu a la vía normal del Perdito, anque como vimos el día anterior pue garráse cada día una distinta.

Nel bon camín, pasaremos otra vegada, per delantre de la canal que xube a la Punta Escaleretas, y meterémonos dafechu nel llaberintu de la Ciudá de Piedra, dempués de superar, como non, dellos resaltes del circu, que tan aseguraos ensín xacíu nengún.

Aupándonos al circu de Góriz y a la ciudá de Piedra

Magar de casi hora y media de caleyar vamos abandonar al fin, la vía normal al Perdito, pa tiranos siempre n'ascensu por terraces hacia la bas del Pitón SW del Celindro Marmorés, el cual vamos viendo que tendremos qu'arrodiar al completu pa ganar el nuesu oxetivu: El Circu de Gavarnía.

Arrodiando'l Celindro Marmorés

Pero enantes, d'ascender al primer puntu cimeru del día y cota importante del circu, el Pico Plan de Marmorés, teníemos una especie de tresmil secundariu, que nunos sitios apaez nes llistes y n'otros non, La Tuqueta Marmorés de 3091 ms, y que nos díes anteriores al viaxe a Pireneus, fízome variar la ruta sol mapa, d'aportar al colláu ente'l Plan de Marmorés y el cumal más oriental d'o Salto d'Augua, la Punta deras Crepas.

Na "Tuqueta Marmorés" de 3091 ms

Con esta variante, tocónos lluchar con un tarrén de pedreros, xubiendo y baxando per ellos, y teniendo qu'ascender una especie de morrenas salientes d'un antiguu glaciar del Celindro Marmorés, travesando tamién quiciás el so restu, enantes d'aportar a esa cota de 3091 ms, que tan pocu valir montañeru tien, ya que dende la parte más alloñada del Celindro destaca pol so color blancu, pero dende lo caberu del Celindro, malpenes dixébrase del pedreru que baxa d'esti.

Aún así, cotámoslu, y sirviónos pa descubrir, dempués d'un incómodu ascensu per un pedreru hacia la cresta del Circu de Gavarnía, lo que nomámos como Tuqueta del Celindro, cota de 3199 ms, que ye un mirador ablucante sol Ibón de Marmorés y sobretóu sol Glaciar de Perdito, teniendo mil vegaes más interés montañeru que l'anterior y tando xusto embaxo del paredón del Celindro.

Pangua xubiendo a la tuqueta del Celindro y les sos bones vistes

D'esti cumal de color gris, baxaremos al cuello Marmorés (3183 ms), onde entamaremos l'ascensu per pedreru roxizu col envís de facer al fín, un cumal con nome, el Pico Plan de Marmorés, siendo dafechu planu, planu dende la nuesa posición, anque non tanto dende'l Vall de Gavarnía, jeje, ya que caltien so les sos parés, la mayor caída d'augua d'Europa.

Ascensión al pico Plan de Marmorés col Celindro detrás

Asína que, cuatru hores y cuartu dempués de salir de Góriz, que dizse prontu, tamos nos 3245 ms d'altor y no que será, la cota más alta nel día. Esti horariu, diz a les clares, que nun tuviemos un tarrén fácil nel nuesu andar hasta esti puntu, y poro, merecemos un descansín d'unos minutinos nos que xintar daqué, y esfrutar d'esti tremendu paisaxe.

Pico Plan de Marmorés y circu de Gavarnía (3245 ms)

Y ye qu'ante nós, tenemos el paredón que fai esti circu sol vall de Gavarnía, asína como tola llonxitú d'esti valle, y una visión que nun perdimos en tola nuesa andadura per Pireneus, el glaciar del Vignemale, de xuru'l más grande que queda en tol sistema, y que faínos una vegada más sacá-y delles semeyes y llámanos munchísimu a conocer nun futuru.

Vistes dende'l Plan de Marmorés (Circu, Gavarnía, Vignemale)

Per delantre, tenemos al fin, tol circu a percorrer, y tampoco queremos pararnos demasiáu, porque nun sabemos cuanto tiempu nos pue llevar, lo únicu que tenemos nidiu, ye que será un xube-baxa de cotes, pero qu'al menos tamos agora mesmu na más alta y eso ye una aída importante.

Ensín más, baxamos del Plan de Marmorés, pa meténos nun tridente de cumales, como son los Picos d'o Salto d'Augua, que col anterior, faen la paredona pola que xorrez la gran caída d'Augua de Gavarnía.

Xubiendo y baxando de la Punta deras Crepas (3160 ms)

El primeru ye l'oriental o Punta deras Crepas, que tien un tastu agreste importante, pero col puxu de la baxada del Plan, vamos algamalu nun tris, y casi ensín parar metémonos nuna baxada, eso sí curiosina, na qu'emplegámonos un pelín, pa destrepar hasta la so bas, dende los sos 3160 ms d'altor.

D'esti cumal de color amarielláu, vamos pasar al central que tien un color gris. Nun soi xeólogu y nun entiendo de roques, pero presta ver los camudamientos de collor, ente unos cumales y otros d'un mesmu circu.

Repunta deras Bruixas, Tres Serols y cumal de 3102 ms

Si un cuartu d'hora tardamos del Plan de Marmorés a la Punta deras Crepas, dalgo más de 20 minutos tardaríemos n'encaramános nos 3102 ms del Central o Repunta deras Bruixas. Esta vegada tuvimos varies fáciles trepaes per roca suelto y gris, qu'en dalgún pasu asomónos al vacíu sol glaciar del Salto d'Augua, pero ensín mayores complicaciones.

Ascensión al Occidental y los otros dos a lo lloñe ya

Coles mesmes, tocónos dexar esti cumal, y baxar a un colláu (3029 ms), qu'anímanos a bordiar pela manzorga l'entamu la cresta al picu Occidental, anque alcontrámos un canalizu qu'acorta dafechu tala vuelta, y trepámos per ella ensín problemes, pa dempués caleyar cenciellamente hasta la cota de 3092 ms del Pico d'o Salto d'Augua Occidental o Pico dera Ura.

Pangua nun "arriesgáu" segundu cumal del Pico dera Ura (3092 ms)

Otros venti minutinos tardamos d'un a otru picu, y pocu más taríemos nesti tamién, ya que vimos que teníemos xera per delantre, asína que siguimos dando zapatu y esta vegada, ensín tener nin siquiera que trepar, plantámonos no que nómase como Espalda Marmorés o Peña Portiella (3071 ms).

Lo que nos quedaba por andar más menos del circu de Gavarnía

Son les dos de la tarde y llevamos unes 5 hores y 40 min de ruta, ya inda quédanos un bon tramín paez ser, pero tenemos fame y necesitamos xintar daqué serio y descansar unos 20 minutos y esti cumal ye perfectu asína que tirámonos a ello.

Magar del descansu, vamos dir a la gueta d'una baxada que fáiganos enllazar el pasu hacia'l siguiente finxu, la Torre Faixón o Torre Marmorés. Pa ello, siguimos el track preparáu, que diba facenos baxar hasta un corte nuna paré dende la que vemos los senderos mui penbaxo nuesa hacia la Breca Roldán.

Baxada de la Portiella, de verdá se puede baxar??

Lo primeru que tengo na tiesta, ye como coño pue marcáse nos mapes una ruta asína, ensín poner dificultá y lo segundu ye... de verdá pue baxase??? Tamos viendo a les clares un destrepe per una paré de pizarra. Destrepar per pizarra rota nun yera ún de les coses que tenía pensáu facer en Pireneus, jeje.

Aún así, como vemos h.itos na paré, guardamos los palos, y metémonos nello, con más mieu que vergoña, y arrastrándonos de culu, vamos destrepando parte de la paré, hasta que ganamos un senderu d'un metru d'anchu, que va facenos percorrer la paré de drecha a esquierda nun tramu bien aéreu hasta que topámonos con otru h.itu y destrepamos de culu pela pizarra suelta.

Llargu accesu hasta la Punta Faixón

Asína taremos durante varies envueltes y destrepaes, y cuando a la fín, tamos en suelu firme y garramos un pocu resuellu alcontrámonos con un grupín de montañeros, que taben faciendo más menos lo mesmu que nós, y que nun s'atrevieron a baxar per equí, teniendo que dar una llarga vuelta de más d'una hora hasta la xubida normal al Plan de Marmorés. Menos mal, que-y echamos valor, porque sinon, vaya turra tornar hasta ellí alantrón.

Darréu, de falar con ellos, ya indicar como xubir a otros montañeros que nun taben mui decidíos tampocu (Hai que dicir que trepar yera muncho más cenciello que la baxada cola pizarra rota), vamos siguir camín, ya que tenemos per delantre'l tramu más llargu de circu ensín cota a superar.

Perguapes vistes del Vignemale y del gran salto d'augua de Gavarnía

Tramu nel que tardamos más d'hora y cuartu dende la Portiella hasta la Torre Faixón, pero que foi abondo entreteníu. La primera parte foi esa baxada aérea, la segunda fízonos travesar pedreros y neveros a partes iguales, y la última ya facíanos acabalgar penriba la cresta hacia la Torre Faixón o Torre Marmorés, teniendo unes ablucantes vistes del gran saltu d'augua y del vall de Gavarnía.

Antecume de la Punta Faixón o Torre Marmorés (3005 ms) y el Taillón y Corral Ciego dende ella

A pesar de tener esti cumal de 3005 ms una hestoria d'esguilada importante na so cara norte, pela fastera sur, xúbese andando, asína que sacante de les abundantes semeyes de Pangua del saltu d'augua, dexamos ceo la cume, y metémonos nuna baxada per una canal que los mapes marquen como PD (pocu difícil) y nomen corredor Oeste.

La Punta Corral Ciego y canal de baxada del Faixón

Y asína foi, ya que tuviemos un pequeñu destrepe inicial per roca bona, y llueu ya garramos esi pedreru-canal qu'ensín mayores esfuerzos dexábanos na sienda que traviesa'l pedreru xigante que ye esta fastera del Circu de Gavarnía.

Con tranquilidá, vamos siguir alantre hasta'l cruce nel que bordiaríes la Punta Corral Ciego o Casco Marmorés, o nel qu'anicies l'ascensión a esti. La verdá ye que llevábemos un bon ratu del día, acolumbrando a lo lloñe como sería esta ascensión ya que paecía un picu dalgo complexu, pero de cerquino ya vemos nidiu que nun yera pa tanto.

Vall de Gavarnía

Con ello, vamos tomalo sele, y entamamos l'ascensu per un pedreru de roca blanca que va pegáu a la caída de la paré del Casco, y pocu a pocu diremos perdiéndonos entre trepaes pela roca blanca y pedreru, p'ascender hasta un puntu, nel que tamos embaxo del resalte superior a cume.

Equí, tendremos un pocu que trepar per esa roca blanca, y taremos ya na parte cimera del picu, que paez la coronilla d'un flaire, dando preste a los sos 3007 ms. Enriba'l cumal alcontrámonos una escoba, lo cual sorpréndenos ya que nun vimos nin un buzón de cumes, en nengún de tolos tresmiles que llevábemos hasta güei, lo cual presta enforma, asína que fízose raru... mínimu una semeya con ella.

Gran Cascade en francés y nel cumal de la Punta Corral Ciego (3007 ms)

Al fin, agora sí, finamos tolos tresmiles que teníemos en cartera pa la ruta, y son les 16:40 h, poro llevamos un total de 8 hores y 20 minutinos, colo que'l cansanciu ye más que xustificáu. Siguimos con un día espléndidu de monte, pero ya vamos teniendo ganes de finalizar y sobretóu de conocer esi refuxu que llevámos viendo dende'l Plan de Marmorés, escolingáu na falda del circu.

Pero nun too diba ser bon facer montañeru y caleyar gayoleru al traviés de tresmiles, jeje. Vamos meténos darréu, na mítica entamada de Xuan de la Borrina, por siguir ensín información les víes que marquen nos mapes y ye qu'otra vegada pónenos una tal Vía de la Chimenea con un "PD", al igual que na baxada de la Torre Faixón.

Baxada pola Vía de la Chimenea

Asína que metémonos a ello, y garramos a la mandrecha una canal de piedra suelto, xusto cuando la paré del picu córtase hacia'l cuellu de los Sarrios y entamamos la baxada con curiáu ya que resbaria abondo, anque como muncho una culada pue ser lo más peligrosu.

Cuando tamos abaxo del too de la canal, dempués de llibrar dalgún resaltucu qu'otru, tenemos que facer una travesía per una terraza xigante, que va penriba de la sienda normal a la Breca Roldán, ye dicir a más de 100 ms d'altor de caída vertical, averándonos a la propia Brecha.

Hasta equí tou perfeutu, a nun ser que cuando llegamos al puntu nel que se supón que tendremos que destrepar pa tar nel suelu, topámonos con un rapel montáu, col mal rollu que supón siempre estes coses, ya que dizte que la destrepada nun va ser cenciella.

Semeyes de la fallida vía de la Chimenea pa baxar

Diez minutos buscando per onde coño ta'l destrepe y el "Pocu Difícil" que nun apaez per nengún llau. Tan solo vemos un balconéu vertical y muncho más peligrosu que'l de la baxada de la Espalda, y nun solo eso, sinon qu'agüeyamos baxada a un balcón pero nun vemos continuidá.

Y agora que coño facemos??? Metímonos una baxada per una canal pestosa a más non poder y agora tenemos que dar la vuelta??? Pues sí, nun mos quedó otra, ya que tan solo baxar al primer balcón ye xugásela con una mochila de 60 litros enllena y cualquier fallu nel destrepe ye igual a palmatore.

Y ye que solemos ser atrevíos, pero esto superábanos dafechu, poro a pesar del cansanciu decidimos tornar so los nuesos pasos y meténos una soba pela travesía na terraza y una mayor inda pela canal, que déxanos casi otra vegada nel cumal del Corral Ciego, y coles fuercies mui xustes ya.

Paso de los sarrios col Brecha de Rolando y parte clave de la Chimenea dende baxo

La broma de la vía de la Chimenea??? Pues una hora más de ruta perdía dafechu y posible llegada tarde pa la cena nel refu, poro baxada en llama hasta'l crucie que venía del Faixón, y sienda palantre arrodiando pembaxo la paré del Corral Ciego.

Son les 6 y 20 de la tarde cuando pasamos pol míticu pasu de los Sarrios, y vamos pelín xustos de fuercies ya que tola rodiada a les parés del nuesu últimu cumal, ta siendo un quebrapates, con xubies y baxaes per sienda de piedra suelto y ésta ta faciendo mella en nós.

Vamos pasar al fin, el pasu de los Sarrios y una vegada más, podemos agüeyar unos pasos más que sobreaseguraos con cadenes, ya que nun tien mayor dificultá y amás otra vegada hai una sienda muncho más segura unos metros más abaxo. Les contradicciones en Pireneus son costantes ya qu'alcuéntreste con seguros innecesarios y llueu en mapes márquente víes cotaes en pocu difícil que llueu a posteriori (erru míu por non interesame más) tienen destrepes hasta per una cueva, pasu definitivu de la nomada vía de la Chimenea.

Breca de Roldán y refuxu de Sarradets

Escaeciendo too esto, aportamos a la mítica Breca de Roldán nun esfuerzu final hasta los sos 2800 ms, ya importándonos res la hestoria del tal Roldán, tiramos pol fesoriazu que-y dió a la roca y baxamos pel ñeveru-glaciar casi corriendo, con dalgún resbaríu qu'otru, p'arribar reventaos a les 7 menos unos minutos al prestosu refuxu de Sarradets.

Como había otru turnu más, nun mos quedamos ensín cenar, y tuviemos una horina, pa descansar, tomar una cervecina Babaria holandesa, muncho meyor que la mierda de la Estrella Damm de Góriz y pudimos tamién camentar tol esfuerzu, tola ruta y toles víes utilizaes d'ascensu y descensu nes 10 hores y media de ruta que necesitamos pa facer los 15,6 kms percorríos nos que superamos un desnivel acumuláu de 1600 ms y 9 cotes de más de 3000 metros.

Tamién pudimos alcontrános con un refuxu muncho más curiosu que'l de Góriz y qu'entre les lliteres más amplies y qu'había menos xente, fuímonos al sacu durmir con una sensación de poder descansar pal siguiente día, pero eso ye otra hestoria...

Camudando'l Camín nel refuxu de Sarradets

Nesta ruta ficimos 9 tresmiles de Pireneus: Tuqueta Marmorés (3091 ms), Tuqueta del Celindro (3187 ms), Pico Plan de Marmorés (3245 ms), Punta deras Crepas (3160 ms), Repunta dera Bruixas (3102), Pico dera Ura (3092 ms), Peña Portiella (3071 ms), Torre Faixón (3005 ms) y Punta Corral Ciego (3007 ms)Ver progresos en: Retos montañeros