Vibuli (Ponga) - Pica Subes - Sen de los Mulos

15 de Mayu de 2011

Track: Vibuli Baxo (Ponga) - Pica Subes - Sen de los Mulos

Una ruta más na que xúntanse más vascos qu'astures, pero esto que ye, jeje. Como echamos de menos a Simón, que yera del ñucleu duru de Xuan de la Borrina..., agora vamos quedando los mui duros, Carlos, Pangua y yo (faltábanos tamién Canta, que tenía "otres coses nocturnes que facer"). De toes formes, conocer quiciás el conceyu más virxen d'Asturies, ye siempre un emburrión pal ánimu.

La ruta de güei, yera facer la Pica Subes dende'l pueblu ponguetu de Vibuli. Asína que salimos bien ceo de Xixón en direición a Cangues d'Onís pola autovía cantábrica, onde desayunamos con Fernan, Iker, Iván ya Iñaki, nuevu collaciu que súmase a esta xuntanza astur-vasca que tan bonos resultaos montañeros ta dando.

Magar del desayunu garramos la N-625, pasando pelos pueblos de Cañu y Tornín, y cruciamos el puente Dobra, pa entrar nel conceyu d'Amieva, onde travesaremos los pueblos de Buxil, Corigos, Pervís, La Vega Pervís y los Grazos onde topámonos col ríu Ponga nesti casu, y siguir camín pasando por Santiyán, Precendi, Les Vegues, Campurriondi, Ceneya y Rañes.

Semeya de grupu en Viboli Baxo (724 ms)

Equí meterémonos nel conceyu de Ponga onde siguiremos desfiladeru los Beyos alantre hasta topános con una salida na qu'hai que facer maniobra col coche pa entrar hacia los pueblos de Casielles y Vibuli. Nel nuesu casu, xubiremos la carretera que va pola Foz de Los Andamios, y qu'acoyona que flipes si mires pal fondu onde cuerre'l ríu Vibuli.

Ensín más, aportaremos al Barriu Baxu de Vibuli, onde dexaremos los coches onde menos molesten, ya que metése más al fondu nel pueblu, col envís d'alcontrar una plaza o dalgo así, afayaiza, nun mos paeció finalmente una bona opción.

Primeros pasos hacia la canal de Bodieyu

Semeya de rigor, dempués de los preparativos montañeros, y entamamos camín en direición a la guapa canal de Bodieyu. Pa llegar a ella, ya metémonos namái salir de la carretera nun senderu a la mandrecha, pelín embarráu nesti casu, pero qu'empobínase dafechu a ella, y como dende la carretera adivínase la canal, ye fácil siguilu hasta entrar nella.

Viendo Vibuli dende lo alto

El "paséu" pola canal de Bodieyu, ye muncho meyor de lo asperáu, siendo esta mui llevadera, y tando más pisáu de lo que camentábemos. Asína que simplemente esfrutar, y dir xubiendo desnivel pente les envueltes ente árboles, parés y sobretóu, quedándose plasmáu sigún va viéndose más abaxo y más abaxo'l pueblu de Vibuli.

Peña Salón y xubida a Casielles

A la fin, aportaremos al final de la canal, nel llugar del Cabrial, onde tendremos un mirador ablucante so la Peña Salón y la retorcía xubida a Casielles. En menos d'una hora y 300 ms de desnivel ganaos, taremos en disposición de xubir a la Pica Subes, por tola cresta, o bordiar un pocu hasta la Mayada de la Miesca, y facer quiciás lo que sería l'ascensión más normal a Subes.

Senda hacia'l valle de Marcianes

Escoyemos la segunda opción, porque ya tendremos abonda cresta que facer, si tou va nel bon sen, y garramos senderu fácil, que llevarános ensín perder altor pola Praería la Miesca, hasta la mayada nomada anteriormente, a la cual arribamos cola mesma sensación d'humedá y mugor de tol día, pero vemos qu'entama poquín a pocu a baxar una ñebla qu'agora sí, somos a agüeyar nos cumales más altos.

Aportando a la Mayada la Miesca

De la Miesca (1089 ms), vamos entamar una pindia ascensión al colláu Ceñal, na que la borrina dirá calándonos un pocu más, y les pates resiéntense muncho coles envueltes que tenemos que facer pa superar los casi 300 ms de desnivel.

Xubiendo pente la ñebla al colláu Ceñal

Nel intre, dempués de 1h 40 min, tamos nunes cabañes esbarrumbaes bebiendo dalgo d'augua, y con pocu más d'esfuerzu, plantarémonos nel colláu Ceñal (1340 ms), onde entamaremos l'ascensión a la Pica Subes.

Ascensión a la pica Subes cola borrina de protagonista

Pa ello, tendremos que meténos pente una fastera de cotolles baxes, y magar de superala, alternaremos caliza y yerba, p'arrimanos al cumal de la Pica Subes, un pelín pola esquierda, trepando un pocu, y ya ganaremos la cresta que nos dexa na Pica y nos sos 1475 ms.

Cumal de la Pica Subes (1475 ms)

Que dicir... pues que nestos momentos, tábemos un pelín baxos, por mor, de nun tener vistes de tan guapu llugar, ya que sabemos a les clares, qu'al oriente tenemos el Cornión y al ocidente tola viesca Peloñu, y nun tamos agüeyando res.

D'otra miente, tampoco vamos ponénos atristayaos, y sacamos unes semeyes, garramos fuercies con dalgo de xinta y bébora, y ponémonos en marcha col envís, de facer la parte más téunica de la ruta que non la más dura, porque tenemos casi tol desnivel ganáu a estes altures.

Entamu del cresteríu a Sen de los Mulos

P'allegría, namái que destrepamos les primeres peñes de Subes, el día paez qu'anicia a llevántase, como'l qu'esconsoña dempués de sonar l'espertador, y escaecemos de toes toes, les más de dos hores andaes, y garramos un ritmín de crestéu mui curiosu, cola vista puesta nel picu Sen de los Mulos.

Desfiladeru los Beyos

Nun hai que dicir que tola cresta, sacante de la dificultá téunica y los tramos aéreos que tien, tamos faciéndola nes piores condiciones, con tola yerba y roca moyada, pol orpín de tola nueche y pol ñublu de tola mañana.

Poro, anque vamos sacando alantre cada pasu, con mayor o menor xeitu, aportamos a un puntu nel que, presentámonos, ante'l mayor desafíu de tola cresta: el colláu Bocoba.

Pues baxase?? y llueu pue xubise??

Como bien dicen, les semeyes d'enriba, nun teníemos mui nidiu, como pasaríemos tal dificultá, ya qu'amás yeremos un grupu numberosu, y hai que "facer les coses pa tola xente", como digo yo, de xemes en cuando.

La verdá ye que la baxada, hasta'l colláu, faese bien con curiáu, ya que como en tola cresta la fastera ocidental, ye mui aérea, colo que cada resalte, peña, trepe o destrepe, siempre hai que facelu pel llau oriental... si vas a date una hostia, que haya probabilidaes de sobrevivir o que??, jeje.

Baxando y xubiendo

Dempués de poner el culu en dalgún pasu pa baxar (esta ye la única vegada que pue dicise esta frase y quedar tranquilu, llueu caún que pague la so hipoteca como pueda, jeje) tamos ante'l mayor problema, l'ascensu al Porru Vallea.

Pa ello, metíme'l primeru a la gueta d'un pasu y paecía nidiu, que pela mésma arista, podía xubise. Podíase?? Pues sí, pero nun se, nun me presta poner graos de dificultá porque tampoco veóme capaz d'ello... solo camiento que rondaría un III baxo, pero cola yerba moyada y que ye aérea enforma pa los dos llaos, bufff.... allá caún, pusiéronseme los güevos de corbata.

Trepada h.odía pero gayolera

Llueu ya, aselóse y pudi hasta sacá-yos unes semeyuques a los collacios, faciéndose la parte cimera de l'arista muncho más fácil qu'esi aniciu tan peligrosu. Aparte, voi dar les gracies a Fernan, ya que'l foi a alcontrar una vía, muncho más segura y fácil, al traviés de balcones yerbosos, y con un pasín agarrándose a un árbol (ver semeyes d'enriba) y con ello, algamaron tamién la cume del Porru Vallea, Carlos ya Iker, mientres que xubieron pela arista detrás mía, Pangua, Iñaki ya Iván.

Parte final al Porru Vallea (1466 ms)

Una hora clavada nos llevó, dar preste a esta parte del cresteríu, y tenemos per delantre más menos otru tantu, asína que con un puquiñín más de tranquilidá, dempués de xuntanos toos na cume del Vallea, vamos siguir avanzando, ente los cairones d'esta cresta, p'averanos al segundu oxetivu del día: Sen de los Mulos.

Peñes Salón y Carriá

Pocu más hai que comentar del crestéu, que ye un continuu trepe-destrepe pero con yerba moyáu y roca resbariosa, y que mientres vamos percorriendo la cresta, entretenémonos mirando pa Peña Salón y Peña Carriá, detrás de la Pica Subes, y pal desfiladeru Los Beyos, que sigue'l so camín hacia'l Puertu'l Pontón.

Más crestéu a Sen de los Mulos

Finalmente, otra media hora, llevónos del Porru Vallea a Sen de los Mulos, dexando a les clares, la diferencia de dificultá d'un tramu a otru, y dexándonos nos 1503 ms del picu, con una fame xabaz.

A la fin, cume del Sen de los Mulos (1503 ms)

En total, 4 hores son les culpables de tar nun sitiu tan guapu, nel qu'agora sí, vemos tola viesca Peloñu, al ocidente, colos sos cumales, Rasu y Zorru, pero pa Picos inda sigue zarráu ya paez que tirará'l restu del día asína.

Baxando hacia'l valle Tolivia

Dempués de xintar el bocata, vamos entamar la baxada, empobinándonos hacia una canal, que baxa enfilada al colláu Viancé, pero nun mos da bon rollu varies coses: lo pindio d'ella, lo llargo y moyáu que ta la yerba, y que nun vemos nengún indiciu de tar pisáu por naide.

Dando la vuelta na cabeza Mimales

Poro, tiramos baxada más seliquino, pol valle Tolivia, pegaos penriba la muria que fai caída ente'l valle y la cuesta Mimales que parte del ríu Resuela. Siguiremos esti cortáu hasta la Cabeza Mimales, onde ya sí, alcontramos pasu y senderu, pa tornar pegaos a la muria, pero esta vegada pembaxo d'ella, pasando per delantre de la Cueva Nabeya, hasta aportar al colláu Viancé (1220 ms).

Pasando pola Cueva Nabeya y nel colláu Viancé

Nesti colláu, veremos la baxada pel canalizu dende Sen de los Mulos, y siguió sin danos bones sensaciones, poro quedamos más bien tranquilos nesi sen, cola escoyeta fecha. Dende equí, podríemos baxar hasta la pista del monte Pedrosu que lleva a Vibuli, pero vamos averanos, hasta'l colláu Grancenu, p'avistar tol cresteríu fechu na ruta.

Tola cresta dende'l Colláu Grancenu

Nel colláu Grancenu (1180 ms), vamos colocar bien les señales, ya que nun se quien sería'l graciosu que mandaba pa Vibuli, na direición contraria, anque bono, nun soi partidariu de señales de camín, pero si tan, que ten bien puestes, que llueu pasa lo que pasa.

Baxando pol monte Pedrosu hasta Viboli de nuevu

Del restu'l camín, pues dicir que siempre en baxada per pista, con tramos de piedra y barru, y otros de formigón, y que fízosenos pelín pesáu, dando un puntu de carga a unes pates que ficieron finalmente una ruta mui prestosa de 6 hores y media, nos que dimos preste a 12, 3 kms y superamos un desnivel acumuláu d'unos 1000 metrinos.

Camudando'l Camín nel colláu Bocoba

Nesta ruta ficimos dos d'esos picos "prestosos" d'Asturies: Pica Subes (1475 ms) y Picu Sen de los Mulos (1503 ms)

Ver progresos en: Retos montañeros

H.uentedé (Llébana) - Torre de las Coteras Roḥas

8 de Mayu de 2011

Track: H.uentedé (Llébana) - Torre de las Coteras Roḥas

Nun se nin como nin cuando, decidimos qu'había que facer dalgo potente en Picos, así que, como siempre fue falálo con Fernan, mirar feches, y decidir un ataque a los Picos de Santana dende la llocalidá cántabra de H.uentedé.

L'acesu dende Xixón a H.uentedé, ye llarguísimu asína qu'avereme'l día anterior hasta Colombres, pola autovía'l Cantábricu y llueu la N-634, hasta aportar a esti pueblu del conceyu de Ribadeva, onde Fernan tien un apartamentu nel que dempués de tomar unes cerveces con él ya Iker, pernoctamos y al día siguiente madrugaremos pa salir de Colombres bien ceo.

Salimos de H.uentedé nel conceyu de Camaleñu (1086 ms)

Ye de nueche inda, cuando arrancamos de Colombres pola As-344, en direición Panes, pasando enantes polos pueblos de San Juan, Villanueva y Andinas pertenecientes a Ribadeva y por Narganes y Sieḥo de Peñamellera Baxa.

De Panes garraremos la N-621, que nos llevará pol desfiladeru del ríu Deva, y que personalmente fadráme conocer pueblos cántabros como La Hermida, Potes, Espinama (onde algamamos un sitín abiertu pa desayunar) y finalmente H.uentedé.

Vamos ganando altor pol senderu del Hacheru

Son pocu más de les 8 en H.uentedé y preparámonos nel parking, pa tolo que pudiera acontecer, demientres miramos l'ablucante muria, pela que xube'l teleféricu, a la gueta del primer oxetivu del día, facer el senderu del Hacheru, que n'envueltes dexarános na caseta del Cable.

Pa garralu bien, averámonos a una viesca a la nuesa manzorga, y compartiremos con dellos montañeros más, parte de la sienda, hasta qu'ésta sepártase empobinándose hacia la canal de la Ḥenduda, la cual conoceremos de primer man a la baxada de la nuesa actividá.

En grandes envueltes vamos averándonos al muru del cable

Nel nuesu casu, la sienda tomará sen hacia la mandrecha, col envís de facer una envuelta pergrande, pasando per delantre d'una vieya caseta, y llibrando un paredón, hasta que nel pasu más espuestu del senderu, camudaremos el sen, pa dirixinos nun tramu de balcones, pembaxo del cable'l teleféricu.

Que más pudiera dicir d'esti senderu,... pues namái, que paecióme preciosu. Nun tien preciu, poder alcontrar nuna muria, un requexu tras otru requexu, pa siguir avanzando y superando unos 800 ms de desnivel en 1 h y 45 minutinos.

Embaxo'l cable, colos robezos como compaña

Simplemente, esfrutamos como nunca de cada pasu que dimos y ye que fízose de lo más sele, dir superando'l desnivel, poro nun pescancio mui bien, que pue llevar a un montañeru a xubíse a un trastu pa llibrar parte y puede que la más guapa, de lo que rialmente ye la ruta. Fernan, tenía en mente dende cuantayá facer l'Hacheru, asína que nel cable, paecióme que taba más que satisfechu pasara lo que pasara nes prósimes hores.

Xubiendo del Cable a la Ḥorcadina Covarrobres

Lo que foi pasando ye qu'entamamos con varies capes de ropa, que llueu fuimos quitando na xubida, y magar de salir al Cable, sentimos bien nidiu, cual podría ser el mayor problema del día, el vientu fríu qu'azotaba nes altures. Y ye que, demientres caleyamos protexíos poles parés d'altes peñes como la Olvidada o Vieḥa, nun tuviemos mayor problema, pero aún así, no alto xixilaba l'amenaza de fuertes vientos.

Pasando pola Vueltona p'arrimanos sele al muru de Ḥorcaos Roḥos-Santana

El nuesu andar, llevónos per un camín (casi paez una autopista), que nós fizo dir protexíos pola Sierruca hasta la ḥorcadina Covarrobres, au sal otra pista hacia los puertos d'Áliva, anque la nuesa, llevaríanos pegaos a les parés de peña Olvidada hasta la Vueltona. Hasta equí, l'ascensu ye sele y rectu, pero darréu, vamos alcontrar aparte del pedreru típicu de Picos, una cantidá pergrande de ñeve, pa la dómina del añu na que tamos.

Averamientu al colláu de la Canalona

Ensín muncha dificultá, vamos dir avanzando a bon pasu, llevando a unos cuantos montañeros más, como foron unos collacios cántabros, que taben faciendo les sos primeres incursiones pel territoriu xabaz de Picos. Como nun teníen mui nidiu, cual yera'l so oxetivu, ufrecímos-yos venir con nós, y aceptaron de bon tastu, dándonos una bona compaña, a Iker, Fernan y yo.

Descansando un pocu mientres Fernan sigue al so ritmu incansable

Son les 11 y media de la mañana pasaes, y aportamos xusto al puntu, onde'l camín dixébrase en dos opciones: xubida hacia cabaña Verónica (manzorga) y xubida al colláu de la Canalona (mandrecha). Nós, tenemos la intención de xubir a los Picos de Santana, asína que ponémonos a ascender penriba la ñeve pola Canalona, y lo qu'oyemos pa la so fín, nun espierta mui bones sensaciones en mi.

La ñeve entama a ser una protagonista mui seria na Canalona

Nos altos, paez que la furia del vientu ye descontrolada, y nun presta res, sentir el so ruxir escontra les parés de roca. Paez talamente, que ta con ganes d'esculpir nueves formes na roca de la Torre de las Coteras Roḥas (mandrecha) y de los Picos de Santana (manzorga).

Xubimos fuerte, adelantando a otros montañeros, hasta una roca grande, onde descansamos, y vemos que la pendiente tórnase más pindia, sumándose-y tamién, que la ñeve paez más dura al pisar. Poro, decidimos poner los crampones, teniendo qu'abandonar la xera los collacios montañeses al nun llevalos.

Apretando fuerte pa facer buelga na Canalona

Despedímonos d'ellos y mientres baxen caleyando pela ñeve, pa xintar el bocata en cabaña Verónica, vamos ponenos a xubir otra vuelta, hacia una especie d'huracán, que tenemos unos cuantos metros más arriba.

Pemeque, nómase efeutu Venturi, al encaxonamientu del vientu nun pasu estrechu, faciéndose esti más rápidu, y eso mesmu sofrimos nel retorcíu final de la Canalona, faciéndonos nun poder dar nin un pasu, sin que te lleváse ensín control hacia arriba.

Picos de Santana y aguḥa la Canalona y Torres de las Coteras Roḥas

La verdá, ye que si fuera por mi, dábame la vuelta, pero Fernan, que sabía como yera'l colláu, adelantónos, y púsose a la tiesta, pa xubir casi esnalando. Ye lo que tien conocer un llugar, a sabiendes de que nun había cortáu peligrosu al final de la canal, tiramos con confianza tres d'él arribando a los 2450 ms del Colláu la Canalona.

Xubiendo a la Torre de las Coteras Roḥas con peña Vieḥa detrás

Que descansu foi aportar al colláu, paez que'l vientu nun yera tan furiosu, y pudimos apartanos de la boca de la canal, pa protexenos pola torre de las Coteras Roḥas, la cual pola so cara norte, nun supuso dificultá nenguna, pa xubila en 5 minutos.

Torre de las Coteras Roḥas (2501 ms)

Aún así, l'ascensión ficímosla con munchu curiáu, y cuando asomamos el focicu nel cumal de 2501 ms, casi tuviemos que facelo, sentaos ya que'l vientu azotaba con ganes.

Les vistes dende esti cumal, dícen que son mui prestoses, pero nós, tan solo pudimos acolumbrar parte de lo que ya víamos na xubida, Peña Vieḥa, Picos de Santana, Aguḥes de la Canalona y Bustamante, too ello pente un pasar de ñubes a toa velocidá.

Entainamos la baxada col envís, de cruciar el colláu de nueu y alcontrar un refuxu del vientu nel otru llau, onde poder xintar ya que ya que ye la 1 la tarde y hai ganes de picar daqué. Anque xusto enantes, na baxada tuvimos un pocu de circu, con Fernan corriendo pela ñeve detrás de la gorra, la cual emburriada pol vientu, perdíose na baxada hacia Las Morteras, ensín capacidá de rescate.

Baxando al colláu de Santana de nueu

Pa cuando acabamos de xintar, yo personalmente ya tenía na tiesta, nun intentar más cimes nestes condiciones, ya que sabía de bona tinta, qu'una de les cumes de Santana yera aérea, y pa solo poder facer la otra, nun me pagaba la pena arriesgase.

Nin 30 segundos tuviemos d'alderique pa ver que camentábemos lo mesmu los tres, y a ello animónos sobremanera, pasar un fríu tremendu a la hora de meter dalgo pal cuerpu.

Pasándoles un pelín putes por mor de la fuercia'l vientu

Asína que tocaba pasar de nueu pol infiernu de la parte final de la Canalona y esta vegada diba ser col vientu de frente, puxando de cara envede per detrás. Nun quedaba otra que parapetase con guantes, goretex, gorru, capucha, piolé y crampones pa baxar con seguridá.

Fernan ya Iker, baxaron aína, pero a mi al dir l'últimu del grupu, tocóme pasalo mal, por mor, de raches de vientu fortísimu, que nun me dexaben dar nin un pasu, y amenazáben con azotame contra les parés xelaes. Nun me quedó otra que tirame unos minutinos, sentáu y agarráu al piolé claváu na ñeve, a la espera de qu'amainase dalgo.

Baxando más sele cola aguḥa Bustamante enfrente

Finalmente, llogré salir d'ellí, y meteme nuna fastera más tranquila de la baxada hasta topáme colos collacios que m'entrugaron que me pasara, y nun yera a oyer lo que me decíen, porque inda tenía'l ruiu de la capucha azotada pol vientu nes oreyes.

Nun foi un ratín mui agradable,... pero menos mal, qu'al dir ganando la pista que vien de Cabaña Verónica y Ḥorcaos Roḥos, ya'l sol asomó un ratín y pudimos calecer ya inclusu quitar dalgo de ropa, pa baxar otra vegada poles parés que bordeen el H.oyo Sin Tierra.

Tornamos so los nuesos pasos hacia'l Cable

Tol baxar foi esáutamente igual que la xubida, pola Vueltona, hasta qu'aportamos a los Pozos de la Llorza, lo cuales preferimos visitar envede arrodialos, empobinándonos poquín a pocu al entamu de lo que sería, la baxada final a H.uentedé, la canal de la Ḥenduda.

Desviámonos pelos Pozos de la Llorza

Aportamos a la so boca, y magar de baxar echando un vistazu a picos tan impresionantes como Torre d'Altaiz, Madeḥuno, Tiros Tirso, Torre Blanca,... tócanos centranos en descansar al solín nun ḥou a la entrada de la canal, onde acabaremos el bocata que dexáremos a medies pol friu nel colláu de la Canalona.

Entamu de l'ablucante canal de la Ḥenduda

Son les 3:45 de la tarde y llevamos de ruta más 7 hores, poro tar cansaos, nun ye nenguna disculpa, pa nun baxar esta canal bien sollertes, ya qu'a pesar de la so ablucante puesta n'escena, con un corte pente altísimes parés, nun tamos pa dexanos impresionar y debemos mirar más pal suelu que pa l'altor que nos estrapalla a cada pasu que damos.

Pente les sos altísimes parés

Digo esto, porque la cantidá de piedres sueltes qu'hai en tol percorríu, ye peligrosu y hai que tar espiertu a la hora de poner cada pie, nun vaya ser que faigamos escorrer una piedra y acabe de regalu na tiesta de dalgún compañeru o de dalgún grupu de montañeros más abaxo.

Resalte pelín fastidiáu

Polo demás, ye una canal disfrutona, qu'al tar tan peliaguda pola roca descompuesta, faísenos una baxada más corta, que si fuera quiciás una canal más abierta y pesada.

Amás, tien l'amabilidá de regalanos un resalte con destrepe, que supongo faíse más fácil pa xubir, aupándose nuna cuerda, que pa baxar que ties que confíar más nella de lo que nos prestaría defechu.

Vemos la lluz al final

Esti resalte, ya va coincidir casi, cola apertura d'esti canalón onde la pallabra estrechez toma un nueu significáu, y nel que veremos la lluz al final del camín, al empar que H.uentedé apaecerá embaxo los nuesos pies una vegada más.

Salimos de la Ḥenduda con H.uentedé embaxo nuesa

Ensín parar muncho más, saldremos de la Ḥenduda, y pa sorpresa toparémonos, nel empate cola senda'l Hacheru, colos collacios cántabros, a los cuales diéramos información sol senderu, pa que nun ficiesen otra vegada esta canal, ya qu'ellos sí xubieran per ella.

Baxando a H.uentedé ensín prises

Dempués de contar les esperiencies de cáun, aportamos a los praos que nos dexen nel aparcaderu de H.uentedé, onde mudámonos, pa tar dalgo más cómodos, y garramos los coches hasta Espinama, pa tomar una cerveza toos xuntos, enantes de salir del too d'esa rialidá alternativa que ye Picos.

Semeya del grupu astur-eusko-cántabru

La otra rialidá, la que nun queremos tener de frente, taba a unos cuantos kilómetros de carretera revirada hasta Colombres, y a unos munchos kilómetros más d'autovía hasta Xixón.

Finalmente, la ruta tuvo una duración de 8 hores y 45 minutos, nos que percorrimos unos 16,7 kms y superamos un desnivel acumuláu de 1642 ms, pa nun poder cumplir los oxetivos cimeros (Picos de Santana), y quedanos cola Torre de las Coteras Roḥas y más ganas de volver a Picos, como oxetivos secundarios.

Camudando'l Camín nel colláu de la Canalona

Nesti rutón, quedámonos con un oxetivu secundariu como foi: Torre de las Coteras Roḥas (2501 ms)

Ver progresos en: Retos montañeros