Frechura (Mieres)

3, 5 y 11 d'Abril de 2024

Un añu más, entra'l calor enantes n'Asturies y la vida llévanos hasta Frechura, onde los perretes vieyos tienen un patéu más amable y munchu prau pa tar tumbaos, asina que decidimos qu'al menos un día a la selmana, vamos averanos a dir llimpiando hasta onde puédase esta téunicu, dura y guapa escuela, onde nun regalen nenguna vía dafechu.

El primer día de visita, tuve la suerte de prebar Tayuc (6c+), pringando nun pasín mui arriba, por nun ver una regleta y al segundu ya salió ensin problemes, quedándome claro, que ye la vía más agradecida que probara, sobretou viendo a Andrea bregando con Desarrollo Sostenible hasta que la pudo facer, ya que'l bloque resultába-y mui incómodu pal so esguile más estáticu y téunicu.

Al día siguiente, ya compartimos vía, metíendonos a facer metros na variante del Reencuentro y Tírate a la Cabra qu'amesta dos llargos de 6c y 6b+ de casi 50 metros, que vien-y dan el 6c+, tocándome facer un testeu mental nel segundu llargu a vista con unos pires d'alloriar qu'acabaron por tumbame, faciéndola tamién al segundu del tirón, pudiendo esfrutala muncho más, pero non tanto como Andrea que la enchufó al primer pegue, quedándose mui a gustu.

 

Plaquines de pies infames de Frechura

El tercer día, tocó metese en Atácala que ya cae (6c+) que fué la que menos prestóme del seutor, pel momentu, teniendo que facela de nuevu al segundu pegue, llueu d'un primer pegue atroz de calor y esnidiaes de pies y manos, con pasos llaterales que nun me dieron más.

Andre a lo suyo, faciéndola a vista y rematando cola Vagoneta (7a) tamién a vista, que ya la tenía yo y recomendésela, algamando un día perfeutu, hasta qu'avísenme otros escaladores que reventárenme la ventaniella la furgo, robándome la cartera y liándome tola selmana pasada y ésta, dalgún cabronazo que tien pilláu'l puntu del aparcaderu de Frechura, más averáu a la carretera.

D'esti xeitu, avisái, de que'l tipu en cuestión ya lleva tres robos nesi aparcaderu y anque ta denunciáu y deberíen pillalo, porque ta grabáu nun gasolinera porque mui llistu nun yera, pues que lo mesmu, tovía tien güevos a siguir faciendo'l rata colos vehículos de los escaladores, así qu'andái con güeyu que dalgún personaxe llocal ta fadiándonos les nueses tardes de tranquilidá per Frechura.

--------------------------------------------------------------------------------------

31 de Marzu de 2023

Tornábemos una vegada más hasta Frechura, esta pequeña escuela de pies finos, preses romes y escalada téunica, mui afayaiza pal branu, ya que tien solombra peles tardes, anque'l calter rudo y desagradecíu de la so escalada fai que nun seya mui visitada pela mayoría de los escaladores asturianos.

Hai que dicir, que los graos más baxos son 6b altos y rancietes, así que ye normal la poca afluencia d'escaladores de grau mediu-baxu, ya que tamos falando de víes nes que toca afrontar, pisar, moverse, entender los pasos y apretar al empar y por qué non, pasar un pocu de mieu.

 

El llugar de Frechura... un llugar especial pa la esguilada

D'esti xeitu, volvíemos hasta Frechura, col envís d'avanzar nesto de la escalada y ye que camiento qu'esta escuela ye necesaria pa cualesquier escalador que quiera meyorar, que quiera deprender a movese a entender de que va esto de la escalada, lloñe d'agarrar cazos en desplomes y preses de collores nos rocómodros.

Asina que l'añu pasáu, por mil motivos tán sólo fuimos un día per ellí, llimpiando Ya era hora, un 6b+/c a la mandrecha, que taba un pelín inaccesible y qu'esti añu volvimos a repetir, encontrándolo un pelín gochete, pero da pa escalalo sin munchos problemes.

El muru impresionante de Frechura con una escalada fina

Tamién, probara l'añu pasáu Vagoneta, un 7a tamién a la mandrecha, mui guapu, con un tramu fino ensin reposos, qu'esti añu, monté nun primer pegue, pa encadenalo al segundu, dándome cuenta d'esti puntu agónicu nesi tramu de tres chapes en sin bonos pies nin reposos, hasta salir a la repisa central.

Llueu ya toca reposar y centrase na increyible placa final prieta con pasinos placa per güeveras y preses ablucantes, dando-y un puntu final a la vía bien guapu. La verdá ye que prestóme muncho esta vía y dióme ganes de siguir prebando y tachando víes nesta escuela, así qu'esperamos alcontrar con quien dir a pasar un pelín de mieu jeje.

Frechura
 
Croquis modificaos por mi de la escuela d'escalada de Frechura, por mor de la Asociación de Escaladores Astur Vertical. Gracies y col so permisu. 
--------------------------------------------------------------------------------------------------------------------------

 17 de Xunetu de 2021

Díes de calor y prohibiciones paxareres en seutores onde solíemos dir, pues toca arrimase hasta la solombra asegurada como ye en Frechura. La escalada de placa y recia nun ta de moda nestos tiempos, pero dacuando hai qu'asumir y bregar en graos "aparentemente" factibles como si tuviéramos proyeutando con too.

Anna evolucionando por Miedo Ambiente

Cuanto menos, el paseín cómodu y el allugamientu fresquín del llugar de Frechura, ye un plus pa caltener la motivación, quitar la presión ya intentar llevar pal bolsiellu cualesquiera de les víes d'esti planchón que namái velu ya impresiona polos guapos collores y el corte de la caliza.

Vistes de Valmenor en Baíña... habrá que visitalu

 

Ensin más, nun par de visites, el primer día, Andrea y Anna tuvieron trabayando Miedo Ambiente, un 6b+ con pasu finu de bavaresa, que fai de les delicies de cualesquier cabeza que nun furrule al 100%, poro toca centrase na escalada y pisar fino demientres apretes les preses como si te fuera la vida nello.

Andrea probando la dureza de les plaques de Frechura

Yo probara va tiempu Desarrollo Sostenible, una increyible vía téunica que la cabera vegada, tirábame lo guarro del primer bloquín, pero esta vegada, más seco, pucimos cepillar bien y sacar a la lluz un presa de pinza que yera puru mufu.

Esfrutando y sufriendo en Desarrollo Sostenible

 

Nun bon pegue na segunda visita, gracies a qu'Anna montó la vía, pude encadenar esti 6c+ reciu, que dexa un tastu a rutón 5 estrelles. La verdá ye que nun se puede unu despistar nin un momentu nesta vía, ya que na parte alta, tamién hai munches papeletes de pringar y eso que ya superara'l primer bloquín d'entrada y el bloque del techín a pocu menos de metá de vía, que ye'l pasu más esixente cláramente.

Bloquín d'entrada a la vía

Facía tiempu, que nun me prestaba tanto la escalda en Frechura, así qu'habrá que volver a facer más cosines, aprovechando que dalguien tamién tuvo quitando escayos pa lliberar les víes de la parte baxa de la muria.

--------------------------------------------------------------------------------------------------------------------------

15 de Payares de 2020

Otru día de vacaciones nel que salimos a esguilar cola amenaza de lluvia a partir de les 3 más menos. Poro, nun tenemos munchu tiempu pa xubir a sectores de llargu averamientu y alcuérdome de Frechura, al cual llevo más de dos años ensin dir.

Daquella, lo reciu de la escalada punxéranos nel nuesu sitiu, al menos a mi, que nun fuera nin a encadenar nin un 6c, magar de da-y varios pegues. Esta vegada, vamos pasar la mañana con Anna y si'l día anterior tocóme a mí montar les víes, esta vegada decídise ella a entamar y eso qu'esti paré, nun ye mui amigable y cuesta decidise a entrá-y con bon xeitu.

Magar d'una llucha brutal, nel últimu bloque la compañera nun ye a sacar un pasu y tócame a mín, meteme n'El Reencuentro, un 6c téunicu y finu como toles víes de Frechura. De sorpresa, soi a encadenalu al flash y nun sigo al segundu llargu de 6c+ porque nun llevo cintes y el día ta tornándose prietu, como pa facer el fatu y dexar cintes en segundos llargos.

Terminamos el día, con un par d'amagos de lluvia, teniendo Anna que desmontar la vía, enantes de que se punxera serio, con pasos en moyao y dalgún vuelín con caña incluyíu. Nel intre, quitéme'l sombreru pola brenga de la neña a la hora de xugase vuelos, innecesarios por mor d'acerar abaxo con too moyao, con tal de da-y solución a un bloque que nun yera a descifrar nel pasu clave.

Habrá que tornar...

---------------------------------------------------------------------------------------------------------------------------- 

20 Xunu de 2018

Frechura ye un d'esos sitios a los que-yos ties respetu cuanto menos, tan sólo diera un paséin per ellí y ya viera que les plaques teníen una pinta dura de coyones. Pero, dalgún día tenía que ser y esti branu, siempre pente díes de lluvia y con amenaces de tormenta fuimos per ellí, un par de vegaes, a ver que se cocía.

El primer día, dempués de desbrozar el pié de vía, calentamos motores y cabeza con un 6b+, con tramos moyaos y una babaresa nel que nun pases más mieu porque nun se puede. Colos Testarrosa,  nuevos, manda güevos y daba cosina pisar con fe pa dar el siguiente pasu, jeje.

Túnel de Frechura

Esi mesmu día, probara tamién un 6c/+ durete pero mui guapu a la mandrecha del túnel, teniendo les tres primeres chapes mediu pingando pero podía llibrase, anque nun fuí a encadenalo. Al día siguiente, con amenaza total de tormenta volví a montalo y ya nun me dió tiempu a da-y otru pal encadene ya qu'entamó a esbastiar y tuvimos que colar corriendo pal túnel.

Llueu, dempués de que parara, desmontamos les víes como pudimos y pa casa, que pintaba que nun diba quedar la cosa así. En plenu procesu de desmotivación, nun volví pela escuela, asína qu'espero tornar dalgún día enantes de que torne'l mal tiempu pa encadenar al menos la única otra vía que probé.

--------------------------------------------------------------------

11 de Marzu de 2016

Siguimos de paséu pela fastera de Morcín y esta vegada averámonos hasta la llende con Mieres, onde podemos alcontrar el Monte Frechura. Nesti casu, tendremos que caleyar pela antigua caxa del ferrocarril que diba dende La Perea hasta Lloreo y alcontraremos nel tramu final el paré onde allúgase la escuela de Frechura.

Enantes, toca dir col coche hasta La Vega San Pedro, dexando esti casi nel crucie cola carretera pa xubir hasta'l pueblu a garrar esta sienda, pela que trespasaremos un túnel bien prietu, na que nun ta de más un frontal, viéndose a la salida, el paré al llau d'otru túnel.

Saliendo del túnel prietu hacia Frechura

Ye un llugar estrañu, en mediu de la nada, nuna sienda verde con pocu ésitu, por mor de nun tener continuidá. La verdá ye que nun sé si la cantera de Peñamiel ta zarrada o non, pero'l día que seya asína, bien pudiera destapiase l'últimu túnel y siguir hacia'l valle de Morcín y Riosa, dándo-y más entidá a esta sienda verde y un percorríu bien interesante.

Paré de Frechura y un pequeñu detalle enantes del túnel

No que cinca al tema d'esguilar, l'equipamientu de la escuela vense en bon estáu y anque les víes anden del grau mediu p'arriba, paga la pena la visita, paeciendo mui téunicu y d'agarres xustos l'estilu d'esta escuela, pero nun se pue pedir too nesta vida.

Tremendu pié de vía con mesa pa la xinta incluyía

Tener un pié de vía, con una mesa pa llevar la tortiella, unes botelles de sidra... y que les víes pa enriba seyan facilines... yera pedir demasiáu. Pel momentu, habrá qu'esperar a que seque y diremos ver que tal se da, como ye'l tastu de la roca y si'l llugar ye tan tranquilu como nos paeció nesti día.