Track: La Fresneda (Amieva) - Xerra de H.aces
Seguimos Xuntanza 2015-2016 con ganes de facer otru día de monte, anque la resaca faiga dalgo d'efeutu negativu. Llevantámonos na Ponte Bidosa y magar d'un almuerzu curiosín, tirarémos hasta'l pueblu de La Fresneda.
Si fuéramos dende Xixón, lo de siempre, autovía'l cantábricu hasta Lloviu y llueu N-625 hasta Cangues d'Onís pa siguir pelos pueblos de Cañu y Tornín, cruciando la ponte Dobra entrando nel conceyu d'Amieva, onde perpasaremos los pueblos de Miyares, Corigos y Pervís, onde tomamos una guapa carreterina hasta la Fresneda.
Partimos del pueblu de la Fresneda (350 m) n'Amieva
Güei tamos con dos baxes (Carlos y Ana) por problemes físicos de la ruta d'ayeri, pero entren en xuegu Zori y Benjamín, asína que tamos el mesmu númberu de collacios pa facer la ruta, que de primeres ye un pelín a l'aventura como facíemos antaño.
El nuesu envís ye conocer la xerra de H.aces pero dende'l pueblu de la Fresneda, pa facer una circular curiosina, lloñe de la típica ascensión dende'l colláu de L'Andrín. Soi repunante y nunca me prestaron les rutes de xube baxa pel mesmu llugar.
Salimos dende la Fresneda hacia'l valle d'Orisquies
D'esti xeitu y dempués de falar con un paisanu de la Fresneda, salimos del pueblu hacia la parte alta, empobinándonos per caleyos hacia los praos y cabañes del Valle d'Orisquies. Ensín mayores dificultaes diremos ascendiendo, hasta una cabaña enmediu d'un prau onde falaremos tranquilamente con otru ganaderu que desplicanos per onde tenemos senderu claru p'ascender hacia la cumera de la xerra de H.aces.
Siguiendo les indicaciones, xubimos hasta la cabera cabaña del prau, pa siguir un senderín que xurde penriba de la cabaña en direición suroeste, hasta aportar a una cabaña dafechu solitaria. Ellí salimos per una portiella hacia una fastera de monte baxo, onde siguimos lo meyor que se puede les traces de senderu hasta topar con otru más claru que vien dende'l colláu de Parcia al sur.
Dende la cabera cabaña entramos na fastera de monte baxo
Nesti senderu, vamos ensin pérdida hasta un pequeñu claru, dende'l que podemos atacar la parte cimera de la xerra de H.aces. Debemos salinos del senderu nel claru, porque sinon faldearíamos tola xerra saliendo al final d'esta casi nel Picu Caxigos.
D'esta mena, xubimos hacia la mayada Tebrandi onde alcontrámonos con dellos caballos y entamaremos la parte más guapa de la ruta, metiéndonos nel típicu tarrén del oriente de pastu y calizu enrededor, con dalgún surtíu de h.oos p'adecerar el conxuntu y un toque de cotolla pa que tenga'l picante.
Empobinámonos per Tebrandi hasta'l Cantu Dobros
Con pocu más qu'escoyer la parte más llimpia del tarrén, diremos avanzando pasando pel H.orcáu Dobros y de secute aportaremos pente'l borrín a los 851 m del Cantu Dobros, puntu más altu d'esti subcordal a mou de crestón que ye'l Cantu Dobros.
Semeya de grupu nel Cantu Dobros (851 m)
Ye'l momentu, de sacar el cartelu de la campaña de "Donantes d'Altura", un guapu eventu nel qu'anímase a los montañeros a donar sangre, promovíu pola Fempa y Cruz Roxa. Como non, nos díes siguientes a estes rutes fuimos a donar y collaborar con toles ganes.
Entama'l tramu más aéreu y prestosu del crestón de Dobros
Dende'l Cantu Dobros, entamaremos la parte más prestosa de la ruta, con un crestéu d'amiestu herbosu y calizu con predominiu d'herba y con dalgún pasín aéreu. Si a tou esto súmas-y el borrín xugando cola arista cimera, l'ambiente y emoción taben aseguraes.
De toes formes, dicir que tolos pasos son llibrables pela fastera oeste si nun s'anda mui sobráu nesti tarrén, pero si tamos con ganes de diversión y teniendo un pelín de procuru, nun fadremos más qu'aumentar la diversión al percorrela pela mesma cumera.
Averámonos hacia'l Picu Caxigós finando la crestina
Sedrá una especie de xube-baxa continuu pasando pel h.orcáu Campuxu, xubiendo al Cantu la Muezca y descendiendo a la fín al h.orcáu Caxigos, onde aparte de finar la cresta, punxose a llover enforma de cara a l'ascensión final de la llomba del Picu Caxigos.
Picu Caxigos (850 m) baxo la lluvia
Quicías tan sólo fueron venti minutinos de lluvia, pente qu'ascendimos, sacamos la semeya de Donantes una vegada más, nos 850 m del Caxigos y descendimos de nuevu al h.orcáu, pero ya valiónos pa garrar una pingadura d'ordagu.
Nel h.orcáu, buscamos la meyor forma de descender y topámonos con un senderín que baxa hacia'l valle de la Fresneda, parando primeru nun hombru, a la manzorga d'esti, pa devolvenos al valle, al traviés d'una envuelta y una bona baxada hacia L'Alisal, onde topámonos cola primer cabaña del valle.
Facemos el descensu hacia la Riega La Fresneda
Más tarde, los caminos tórnaranse pistes y caleyaremos pente verdes y bien curiaos praos, notándose como la ganadería aún pervive nesti requexu del conceyu d'Amieva. Cola riega la Fresneda, acompañándonos el restu'l camín y acabaremos por dar a la carretera, pela que xubiremos unos cien metros hasta'l pueblu de nuevu.
Caberos pasos per pista hacia'l pueblu de la Fresneda
En resume, ruta na qu'algamamos esa circular que buscábemos, poniendo un pelín nel mapa a esti pueblín d'Amieva, que pocos montañeros paeciónos que taba avezáu a ver. El percorríu de 6,3 km, los 600 m de desnivel acumuláu y les 3 hores y 40 min de ruta, lloñe de paecer poca cosa... dexen con un tastu de gran ruta, mui entretenida y nun día con unes bones vistes... sería la mañana perfeuta.
Que vos preste, tanto como a nós la ruta y la fartura posterior!!!
Camudando'l Camín nel Cantu Dobros
No hay comentarios:
Publicar un comentario