miércoles, 16 de septiembre de 2015

La Terenosa (Cabrales) - Vega Urriellu - H.orcaos Roxos - Tiru Casares - Colláu H.ermosu (Valdión)

5 de Xunetu de 2015

Track: Arenas (Cabrales) - La Terenosa (Cabrales)


Tamos na segunda estaya de la Travesera 2014 - 2015 y el panorama que tenemos nel grupu ye pelín murniu, ya qu'aparte de los abandonos ya programaos nel fin de selmana, ún de los collacios que diba facer la travesera entera, Alberto, tien qu'escapar col restu del grupu por mor d'unes molesties na rodieya.

Los demás que continuamos, Fernan, Bittor, César y yo, pel momentu vamos bien, anque yo ya albidro los mesmos síntomes de frayadura nes plantes de los pies, que tuviera l'añu pasáu y que tardara en recuperar más d'un mes.

Partimos del refuxu de la Terenosa (1298 m)

De los qu'abandonen l'aventura güei, un porcentaxe mui alto sofrío munchísimo nel día anterior, pero aún así anímense a facenos compaña hasta la Vega Urriellu onde despedirémonos toos, col envís d'intentar baxar pol H.ou Lluengu, Cambureru y Valcosín hacia Bulnes.

El camín fadrémoslo enteru pente la borrina, hasta aportar a la entrada de la canal de la Celada, nes caberes envueltes hacia la Vega Urriellu, cuando'l Picu Urriellu apaeció de sopitu pa facer l'arribada al refuxu, máxicu dafechu.

Facemos el camín pente la borrina hasta la Vega Urriellu (1954 m)

Cola presencia más imponente de tolos Picos d'Europa enriba nuesa y varies cordaes na Oeste a los que vemos tener que retirase pol vientu del sur, descansaremos media horina y despedirémonos deseyando lo meyor p'ambos grupos.

A les 3 hores de ruta, saldremos del refuxu camín del nuesu oxetivu del día, o d'al menos el míu, conocer el pasu de H.orcaos Roh.os. Pa ello, saldremos per bon senderu hacia'l H.ugu Sin Tierra, pasando pela so gargantada (nome que dase a dellos collaos d'entrada a los h.oos) pa baxar al propiu h.ugu pel qu'avanzaremos cómodamente pela so manzorga.

Travesando l'enorme h.ou Sin Tierra hacia'l de h.ou de los Boches

Cola vista hacia toles cumeres que nos arrodien, dende les piques que cayen dende'l Cuetu la Párdida, hasta los picos d'Arenizas a la mandrecha y la Morra y Campanarios dixebraes pela canal de Llebaniegu a la manzorga, siguimos avance hacia la gargantada Los Boches.

Atrás, dexaremos pasu ente pasu al Picu Urriellu demientres averámonos al fondu del H.u Los Boches, que llevarános a garrar una especie d'espolón que llibra baxo los parés de la Torre Los H.orcaos Roh.os, doscientos metros de desnivel hasta los propios h.orcaos.

Travesamos Los Boches p'ascender hacia H.orcaos Roh.os

Asina metémonos a ello, baxo l'atenta mirada del Picu Tesoreru y les Peñes Urrieles, entamando per un pedreru cómodu hasta aportar a una sucesión de terraces calices, peles que diremos trepando siguiendo en dellos casos unes marques marielles y otres guiyándonos per un cable afitáu.

El cable, pesie a tar nuevu, ta destensáu y ye un peligru usalu, asina que val más fianos de les nueses habilidaes que posar tol nuesu pesu nesi cable guía. Como nota, dicir qu'unos "bollicaos" d'esos fueron a meter a unos neños con peligru de tormenta per esti pasu de H.orcaos Roh.os y cuando digo "pasu" ye qu'hai que trepar de continuu... nun ye un llugar pa meter a neños... llueu too son llamentos si llega asoceder dalguna desgracia.

Continuamos hacia la torre Los H.orcaos Roh.os

Una vegada qu'aportamos al h.orcáu, Bittor decide que ya tuvo abondo colos trepes del ascensu y nun atalanta la posibilidá de xubir con nós hasta la Torre Los H.orcaos Roh.os, la cual nun presenta dengún problema, siendo un senderu cenciellu de xubir hasta la parte cimera de la torre.

Ellí, tendremos un pequeñu pasu aéreu llateral sol canalizu perpindiu qu'asciende dende la fastera sur de la torre, pero igualmente nun ye nada del otru mundiu, siendo esta cota, ún de les más ascendíes na redolada, ya que l'accesu dende'l Cable ye de malpenes una hora y media aproximáu.

Torre Los H.orcaos Roh.os (m)

Nos 2500 m de la torre, saludamos a decenes de grandes montes del central... destacando les cercanes Santana y Peña Vieh.a y Tesoreru al llau contrariu, hasta les más alloñaes como'l Llambrión y Palanca o tol seutor del Torre Cerredu.

Tamos nun mirador ablucante del Central, pero tenemos a Bittor embaxo y baxamos de nuevu casi corriendo hasta él, eso sí, dempués de sacar una semeyina a vista de páxaru del refuxu de Cabaña Verónica.

Baxamos hacia Cabaña Verónica... onde xintamos con calma

Descansaremos media horina en Cabaña Verónica, onde axuntámonos con un collaciu palentinu col que coincidiéramos en Vega Urriellu y que saliera dellos minutos enantes que nós. Lloñe de facé-y un favor guiyándo-y pelos Urrieles, prestónos abondo conocer la so aventura de dir dende Llanes hasta'l pueblu de so má, travesando Cuera, Picos y cordal cantábricu hasta'l monte palentín... una pasada.

Aprovechando la ocasión, entrégo-y al refuxeru de Verónica un exemplar del Pallabreru del Monte y la Escalada al igual que ficiera col de la Terenosa, anque esti ya lu tenía na pequeña biblio del refuxu, lo cual prestóme enforma.

Travesamos los h.oos Sengros... tramu téunicu calizu y téunicu enforma

De Verónica, con 7 hores de ruta ya, les primeres intenciones yeran conocer la collada Blanca y xubir per Tiru Calleh.u al Llambrión, baxando a H.ermosu per ehí, pero la cantidá de ñeve cayida esti iviernu, fainos decidir que quedará esa ruta pa otra vegada, ya que recomienden piolé y crampones ainda y nun tenemos ganes de marrones innecesarios.

Asína que repetiremos como na travesera del 2010 - 2011 faciendo camín peles resquiebres calices de los h.oos Sengros. Dicir como avisu, qu'esti tarrén ye de los más complexos, accidentaos y peligrosos qu'hai nesta fastera de Picos... y pa enriba... los refuxeros pretenden llevar a turistes nel nomáu Anillo de Picos.

Facemos el tramu de ñeveros pente'l Tiru Casares y la Collada Ancha

Nun quiero ser un repunante, pero toi a la escontra de la espublización d'esti tipu de maniobres turístiques nes que animamos a la xente a conocer Picos como si de caleyar per Pireneos con bones siendes marcaes fuera.

Collacios... esto ye Picos y equí, fai falta físicu, preparación y conocer per onde nos movemos, sinon pasa lo que pasa y alcuéntreste con un foriatón en camiseta ensin mangues, pantalón curtiu y botes coronel Tapioca, rabilando con una tableta ensin saber per onde andaba siquiera.

Paez ser qu'esti rapaz saliera cuantayá de Colláu H.ermosu col envís d'aportar a Cabaña Verónica y taba tovía na collada Ancha a les 5 la tarde. Lo pior ye que nun sabía nin onde taba, asina que dirixímoslo pel llugar correutu y avisamos a H.ermosu a la nuesa llegada pa qu'avisaren a Verónica nun vaya ser que se matase pela fastera de los H.oos Sengros, pente Casares y Verónica.

Facemos l'entreteníu ascensu a la Torre la Collada Ancha (2355 m)

Dicir que pente'l Tiru Casares y la Collada Ancha, tendríemos un ñeveru d'amplies dimensiones y mui pindiu, qu'a ver como negociaba'l rapaz. Nós, na Collada Ancha ficimos un ascensu más hasta la Torre la Collada Ancha, el cual entamó per un ñeveru curiosu, pa pasar d'una pedrera a una trepadina bien entretenida hasta'l cumal.

Nel cumal de 2355 m, les vistes de la Vega Lliordes y Peñas Cih.uentes tomen el mayor de los protagonimos, al igual qu'un calor infernal, que va dexándonos poquín a pocu más cansaos y lo que ye pior, va machucándome aún más les mios plantes de los pies.

Siguimos camín con munchísimu calor hacia Las Colladinas

Na Collada Ancha, preparámonos de nuevu pa facer la parte final del día, que llevarános hacia Las Colladinas, pasando pembaxo de les muries qu'esconlinguen dende'l crestéu de la Torre Blanca hasta la Torre de las Minas de Carbón, pasando Tiru Tirso y Llambrión.

Abaxo dexaremos el Llagu Cimeru y tamién munches de les fuercies que nos diben quedando, ya que'l sol ta pegando fuerte, anque seyan más de les 6 de la tarde, cuando aportamos a las Colladinas (2180 m).

De las Colladinas hacia'l Colláu H.ermosu, el camín aparte de perconocíu ye una auténtica maraviya en cuanto a vistes, ya que nun día típicu en Picos, tendremos tol mar de ñubes nos valles, col aumentu significativu de la guapura de vistes hacia'l macizu del Cornión.

Facemos camín pela fastera las Colladinas hacia Colláu H.ermosu

Ensín más, caún garrará'l so ritmu, adelantándose Fernan hacia'l refuxu, al notase dalgo deshidratáu y los demás diremos sele, pasando de colladina en colladina, parándome yo a ascender 3 o 4 cotes, que nun tienen  mayor interés que'l de saber cual merez el nome de Torre Las Colladinas, siendo pa min, la primer de toes elles, penriba'l llagu Cimeru y enfrente la Torre Las Minas de Carbón.

Ensin da-y más importancia, sacante lo bonos miradores que son, xubiré cota tres cota, superando collaos de menos de 30 m d'altor hasta que doi vista al refuxu de H.ermosu, puntu nel que xúnome a Bittor y César qu'esperaron por mí y siguimos hacia la fonte onde refrescanos, beber agua y llavanos un pocu enantes d'esfrutar de les mui merecíes xarres de cerveza en H.ermosu.

En resume, travesía clásica pente les fasteres d'Urriellu y H.ermosu, nel que dimos preste a unes cuantes cotes de los Urrieles, caleyando durante 11 hores un total de 15,5 km, con una ascensión acumulada de 1970 m y un descensu 1275 m.

Otru día llargu y cansáu y quedaben otros dos...

Camudando'l Camín nel mar de ñubes

4 comentarios:

  1. ...la primera va ser canyera, però esta no és queda enrere jejeje, espectacular.
    Totalment d'acord amb tu, pareix que ara a la muntanya hi ha que anar lo més "minimal" possible, dimarts passat, al Garmo Negro, en un dia en que la boira fa fer acte de aparició i desorientar-se era lo més fàcil, ahí anaven, una parelleta, amb bambes, pantalons curts (lo més curts possible), manega curta, i una motxil·la tan diminuta que tot lo més que cabria serien un parell de barretes energètiques, estic segur que no portarien ni un miserable impermeable...en fi, després quan passa quelcom ens fiquen a tots els muntanyencs al mateix sac...

    ResponderEliminar
    Respuestas
    1. Yo nun ye que menosprecie Pireneus, nun muncho menos, pero nos últimos tiempos alcuéntrome con grupos y xente, que tan d'andar per siendes balizaes, amplies, difíciles de perder... y claro, vendemos Picos como dalgo asequible... fai l'anillu de Picos... ven de refuxu en refuxu... y hosties... el tarrén de Picos ye de los más difícil y traicioneru que pues alcontrar... hai que saber movese, orientase y conocer cada nome de cada h.ou, h.orcada y colláu y sobretou de los cumales que t'arrodian pa saber onde te tas moviendo... sinon pues metete nel problema de to vida.

      Tu ya lo conociste un pelín... jeje

      Eliminar
  2. Hola Berto

    Como no se otra forma de ponerme en contacto contigo, aprovecho esta ventana para ello.
    El día 22 de Noviembre, se va a realizar en el Puerto de Aralla, (León), una reunión de blogueros de Asturias y León. Haremos una pequeña ruta y una comida de confraternización para conocernos personalmente los que aun no tenemos el gusto de ello. Si estas interesado en asistir o en obtener más información te puedes poner en contacto con el autor del Blog "Cotoya Pindia" a través del correo cotoyapindia@gmail.com.

    Un saludo, Manuel

    ResponderEliminar
  3. Bones Xistras:

    Mil gracies por convidame... prometo poneme en contautu col blogueru de Cotoya Pindia ya que me paez una idega estupenda.

    Un abrazu

    ResponderEliminar