jueves, 25 de julio de 2013

Vega d'Ariu (Onís) - Torres de los Cabrones - H.errera - Caín (Valdión)

7 de Xunetu de 2013

Track: Vega d'Ariu (Onís) - Caín (Valdión)


Alborecemos en Vega d'Ariu, ensín durmir n'escesu precisamente. Amás, sigo rucando la tiesta, coles males sensaciones d'ayeri, poro nun les tengo toes conmigo y camiento que viendo'l tercer día de Travesera, tengo que tener güei unes sensaciones contrapuestes a les del primer día de travesera.

L'almuerzu, como siempre, aída un pelín más a dir garrando fuercies y camudar el sentir. Aún así, coles pates pelín cargaes del día anterior, vamos preparando la mochilona, estirando un ratín y despidiéndonos de collacios, traveseros que faen otru camín al nueso y de la primer baxa de la travesera, Haritz.

Semeya de grupu con Monchu y familia na Vega d'Ariu (1620 ms)


Con bon xeitu, Haritz, prefier nun forzar nesti día y nun va decidise per nenguna de les opciones, yendo el solu hasta los Llagos d'Enol, onde tien el coche de Pangua pa colar pa Xixón. Los demás, col infiernu de mochila nos hombros otra vegada, despedímonos de Pau, Rebe y Pangua, que van conocer la Peña'l H.ultayu, y lo que va ser más duro, la canal de Trea.

El tucu del grupu vamos averanos hacia la Vega d'Aliseda onde tuviemos delles vegaes los últimos años. Como yera d'albidrar, el tarrén hacia esta escondida vega, nun ye cenciello de siguir y equivocámonos un pocu, averándonos de más a la fonte y picu de Gustureru, enantes de garrar el bon camín hacia Aliseda.

De camín a la Vega d'Aliseda cola vista puesta nos nuesos "cabrones" oxetivos

Durante tol camín, diremos acolumbrando dellos cumales, a los que tenemos ganes como la Peña Blanca y Robriza y tamién a los nuesos oxetivos de güei, que nun son otros que toles cotes de les Torres de los Cabrones.

Una hora y media echamos en dar cola vega y casi media hora perderemos en garrar augua de la so fonte. Poro, picar dalgo y siguir camín, ye lo que vamos facer yendo pel camín davezu, travesando ñeveros y llambries, hacia los collaos de los Tiros y el H.orcadino.

Magar del descansu n'Aliseda empobinámonos hacia les Torres de los Cabrones

Y digo estos dos collaos, porque Tito y Simón, que nun conocen la Verdilluenga, van empobinase hacia ella, demientres los demás, meterémonos per una fastera, qu'una vegada fuímos a conocer pero non nes meyores condiciones... l'intentu a la Punta Gregoriana.

Falando de Tito y Simón, pues según pallabres dellos, ficieron una ascensión disfrutona y mui rápida, al nun tener que cargar coles mochiles. Los demás, fuímos restolando les meyores víes d'ascensión llibrando los ñeveros como meyor pudimos.

Tito y Simón avéranse a la Verdilluenga la cuál teníen pendiente

El camín yera claru, pero teníemos un problema perimportante enfrente nuesa: un ñeveru pergrande con unes ribayes de dimensiones más grandes inda. Magar de da-y munches vueltes al maxín, albidramos la posibilidá de metenos pela ribaya de la manzorga hasta la muria que d'accesu a la parte alta.



Coles vistes a la Robriza, entamamos l'ascensu pela ribaya
Asína lo ficimos, alcontrándonos con un canalizu con malos y romos agarres nel que la so verticalidá dificultaba abondo la salida p'arriba. Dempués de superar como pudimos, dellos de nosotros el pasu, decicimos aseguralo pa los demás que veníen per detrás.

Nun solo, lo aseguramos pa ellos, sinon que dempués d'agüeyar l'estáu de ñeve del camín que teníemos previstu, decidimos albuertar los planes de xubir los cumales de los Cabrones y baxar pela H.orcada Miguel hacia'l colláu Llombreras.

Cruzando y trepando la ribaya pa salir enriba, ganando delles vistes

Cuando llegaron hasta nós, Tito y Simón, indicámos-yos que dexaren los mochiles embaxo, que díbemos ascender y descender pel mesmu llugar, pa baxar hacia'l H.ou d'Oliseda dende'l H.orcadino. Colos planes claros ya ensín mochiles, namái quedaba xubir superando un par de ñeveros, ún d'ellos pindiu, hasta'l tercer cumal de les torres de los Cabrones.

Esti cumal... ye esáutamente al qu'aportamos na intentona a la Punta Gregoriana y que de mala manera nomélu como Cabeza Llombreras, y digo "mala manera", porque na realidá la Cabeza Llombreras que vien en dellos mapes, ye'l cabezu que ta xustamente enriba del colláu Llombreras, separtáu d'esta cume por un h.orcadín importante.

Xubimos per fácil tarrén hasta la cuarta cume de los Cabrones o Picu Llombreras (2240 ms)

En realidá... tol pequeñu macizu de los Picos de los Cabrones, tan formaos por 4 cumales, que nin siquiera sepártense unos d'otros per un colláu de 30 ms, poro siendo xustos coles mios considerances so les montañes, nun deberíase namái que nomar al picu o torre más alta de los Cabrones.

Aún así, xubimos a esti cuartu cumal de los Cabrones, al que vamos nomar Picu Llombreras, per tar enriba del colláu y de la Cabeza Llombreras y siguimos alantre, baxando'l colláu hacia la segunda cota de los Cabrones, a 2261 ms y qu'en dellos mapes vien como Punta Gregoriana, pero eso nun ye así.

Perguapu paséu del segundu cumal (2261 ms) a la Punta Gregoriana (2269 ms)

Dexaremos, la segunda torre de los Cabrones, y con otra baxadina y posterior xubida taremos n'ansiada Punta Gregoriana. Esti ye un cumal guapu, planín con dos cumales ximielgos, separtáos per una aristina mui prestosa y amplia de caleyar.

A la fín, tamos na verdadera Punta Gregoriana de 2269 ms, que tanto costónos algamar por mor del mal tiempu en delles ocasiones, anque a lo postrero, la culpa foi nuesa por aventuranos en tales condiciones meteorolóxiques.

Xubida final hasta la Torre de los Cabrones (2291 ms)

Nun la esfrutaremos muncho y ya tamos siguiendo hasta l'últimu y más altu de los cumales de los Cabrones, pal que namái que tenemos que baxar un collaín y ya taremos per una pala cómoda nos 2291 ms. Perguapes vistes tenemos en toos ellos, pasando peles agrestes Peña Blanca y Robriza, les increyibles puntes de Piedralluengas y como non toles aguyes que van en crestería hasta la reína de Picos, la Peñasanta Castiella.

La vuelta, va ser pel mesmu llugar, intentando nun xubir de más a tolos cumales, pero práuticamente tócanos facer de nuevu caún dellos. Personalmente, baxo encantáu de conocer esta fastera de los Picos de los Cabrones dexando claro, nes mios llibretes los cumales que componen esti pequeñu macizu.

Baxamos con curiáu pelos ñeveros hasta la cuerda afitada que montamos


Sacante de la primer parte del descensu, sortiando lo meyor que pudimos les cotes ascendíes, había que tener curiáu col primer pindiu ñeveru al Picu Llombreras y dempués tocónos andar con güeyu, hasta la cuarda qu'afitamos, ya que la piedra nesti tramu ta mui roto.

Magar de baxar ún a ún pela cuerda, Fernan y yo, camudamos el bloque que laceáramos con dos cordinos por un puente roca, escondíu nel que ya podíemos dexar tan solu un cordinu curtiu. Daquién, en meyores condiciones pal ascensu, supongo que lu llevará... así que... que-y preste.

Baxamos dende'l H.orcadino per amplios ñeveros hacia'l H.ou d'Oliseda

Con casi 6 hores de ruta y bona fame, fadremos un bon descansu pa xintar y siguimos camín pel H.orcadino, hacia'l H.ou d'Oliseda. La primer parte baxarémosla per un pedreru cómodu, hasta qu'agüeyamos una forma rápida y cenciella, baxar pelos ñeveros hasta que pusiéronse demasiaos pindios.

La verdá, ye que con crampones, tola baxada pel H.ou d'Oliseda diba ser rapidísima, pero como nun tol mundiu los tenía, preferí nun usalos y baxar colos que nun los teníen. La solución, foi dir llibrando los tramos más pindios de ñeveru, poles ribayes, saliendo semeyes tan prestoses como la de Simón baxando a los infiernos blancos, jeje.

Llibramos de la mayor manera posible ñeveros pindios ya inseguros

Pali pali, vamos baxando desnivel, unes vegaes pelos ñeveros, otres peles pedreres que van al llau y otres peles llambries que faen les ribayes al ñeveru. Esto ye así... Picos ta nunes condiciones nivales, fuera de lo común pa esta dómina del añu.

Travesaremos el H.ou d'Oliseda baxo los paredones de la Verdilluenga, Torre la Celada y el Cuvicente, col envís de qu'al entamar la canal de la H.errera desapaeciera tola ñeve, pero non... inda diba tocános baxar per llingues de ñeve un bon tramu.

Esto será mas menos, hasta l'altor de les últimes muries que caen dende la Peña Blanca, cuando ya entramos nun tramu más ampliu de yerba, nel que vemos los Cabritos a la nuesa manzorga y tamién el camín a Mesones y a los puertos de Cuba a posteriori.

Metémonos nun tramu herbosu ermu de ñeveros empobinándonos a los sedos d'Oliseda


Esti tramu ampliu de yerba, será nel que liémonos de más, echándonos un pocu a la mandrecha y llueu teniendo que tornar a la manzorga de la canal, pa empobinanos correutamente hacia los sedos d'Oliseda. Nel intre, ya tenía claru, que la canal yera un auténticu pestiñu pa baxar, ya que paez alcontrase siendes per tolos llaos y eso fai perder el tiempu enforma.

Camiento, que lo meyor ye caltenese, tanto pa xubir como pa baxar esta canal, lo más pegáu posible al cursu de la riega la H.errera, pero colos ñeveros tan pindios nun yera la meyor opción y eso fízonos facer envueltes d'una llau a otru, con perda de tiempu.

Travesamos con curiáu los aéreos sedos d'Oliseda

A la fín, cruciaremos la propia riega, garrando un senderu más marcáu que baxa per praos hacia los sedos d'Oliseda. La verdá ye que lleendo hestories per interné, pues facete una falsa sensación de dificultá pa con estos sedos.

Impresiona un pocu su accesu, ya que vas viendo como l'espolón pel qu'hai que baxar va tomando vaciu per tolos llaos, pero'l camín ye evidente. Llueu, falando no que téunicamente pudieren tener, hai que dicir que'l pasu más espuestu ta na primer parte y tien mui bonos agarres, cosa que nun ye así na parte baxera del sedu, anque tando más cerca del suelu, ya ye menos d'esmolecer.

Per esi espolón, baxen o xuben los sedos, demientres vixílenmos dende riba
Dalgunos nervios como yera de suponer, pero tol mundiu superó tolos pasos ensín mayores problemes y al mio entender, foi la parte más guapa de tola canal, jeje. D'equí p'abaxo, el senderu sacante nun par de tramos, ta más visible, anque albidro una más que posible desapaición en pocos años.

Durante'l restu de baxada, que va penriba la riega la H.errera, caleyaremos pelos altores nun perguapu senderu, hasta baxar a crucianos cola propia riega, nun pequeñu tabayón. Dempués, tornaremos a travesala ya per una ponte, que va meténos nuna pista, pelín cansina que dexarános en Caín d'Abaxo ensín pasar pol barriu d'arriba.

Simón fuimos adelantámonos esta parte final y dibemos con camientos negativos so la duración nel tiempu d'esta canal. Ye una pena que nun tea señalizada, como otres de Picos, pa que los senderos calténganse, ya que nin siquiera cruciámonos con denguna cabra que faiga tal llabor.

Facemos el tramu final penriba la riega la H.errera hasta que somos a cruciala pa baxar a Caín


En resume, finamos con sensaciones dafechu contraries a les del primer día, esta segunda estaya. En total percorrimos 12,5 kms y superamos un desnivel positivu de 910 ms, siendo el más importante'l de baxada con 2040 ms, fechos nun total de 10 hores y 55 minutos.

Gran día de monte, per llugares muncho menos conocíos de Picos, que tuvieron la mayor de les recompenses al alcontrame con Paulina, al aportar a Caín. Que pasada llegar tan cansáu del monte y tener un abrazu de tu compañera, que tamién tuvo un día de monte impresionante y taba esperando a que llegase.

La odisea de Pau, Rebe y Pangua, baxando la canal de Trea, dempués d'ascender a la Peña'l H.ultayu, tuvo dimensiones apocalíptiques, como lo fue'l "paséu" pel Cares hasta los coches. Son unes grandes y lo saben... la montaña rusa d'emociones que vivieron esi día, tan sólo pué dase nos Picos.

La retirada pel Cares, nun foi sola de les "neñes de la Borrina", tamién Simón, Carlos y Ainara, tendríen de facer esi camín hasta Poncebos. Los demás... Fernan, Bittor, Tito, Pangua y yo, quedaríemos nel albergue de Caín, onde duchámonos, tomamos cerveces a punta pala y descansamos lo que nun descansaremos el día anterior.

La tercera estaya taba ehí... y diba ser durísima....

Camudando'l Camín col Cares de fondu

Na segunda estaya d'esta Travesera Picos, xubimos les 4 cotes de les Torres de los Cabrones: Picu Llombreras (2240 ms), Segunda Torre de los Cabrones (2261 ms), Punta Gregoriana (2269 ms) y la Torre de los Cabrones (2291 ms)
 
Ver progresos en: Retos montañeros

6 comentarios:

  1. Has cogido carrerilla, me parece que me voy a apuntar a ese carro, porque se me está haciendo más duro iniciar las entradas a mi blog que a las propias etapas de la Travesera.
    Esa 3ª que viene, dura de veras, pero con esos nombres tan sonoros: Tranvia, Cuesta Duja, Cuebre, Turonero, Piedra Bellida, enseguida a por ella.

    Un abrazu




    ResponderEliminar
    Respuestas
    1. Nun me paez que seya tan duro escribir como caminalo, pero ehí qu'ándense, jeje. A ver si vas entainando y escribes daqué al menos.

      La tercera ya ta nel fornu, a ver si da tiempu a sacala güei a la lluz

      Eliminar
  2. Este día si que lo pase realmente mal.
    Bebí bastante agua y pese a ello estaba deshidratado y hubiera necesitado beber un tonel de agua más.
    La tensión de los neveros de la parte alta de la canal me pasó factura.
    Gracias por apoyarme en este día que tuve tan malo.

    ResponderEliminar
    Respuestas
    1. Aupa Bittor. 4 traveseres y 4 vegaes que nun perdiste nenguna. Hai que quedase colos buenos momentos, pasalu un pelín mal, siempre ye lo normal... pero nel recuerdu siempre queda'l global de la actividá.

      Aparte, que pa facer una travesera... les condiciones de Picos, nun yeren nin mediu normales esti añu.

      Un abrazón

      Eliminar
  3. la verdad que fui justito tol día y pa encima tornar a poncebos......llegamos de nueche al coche. Y a xixón a la 1, fundido y un puquitín más. Y a les 7 en pie pa llevar a la peque a la guarde..... Pero mereció la pena (aunque salga en to les semeyes con el putu pañuelu pal pescuezu que vaya pintes. Y los sedos pa mi que baxe fundíu y que nun me gusten los derribadorios ......nun fueron cenciellos. Vosotros tais avezaos a coses más complicaes.
    Pero el añu que vien más.

    ResponderEliminar
    Respuestas
    1. Na, Símon, baxaste muncho meyor de lo que pienses... un pocu de nervios nos sedos y pocu más. Sois unos titanes... el Cares dempués roza ya la épica jeje

      Un abrazu

      Eliminar