Pirinéu 2011 - 2012

Del 8 al 11 de Setiembre de 2012

Track: Pireneu 2011 - 2012

Otru añu mas, otru branu que pasa y otra vegada que toca averase a facer monte pel Pireneu d'Uesca. Esta vegada, vamos facer el completu Fernan y yo, pero por suerte va acompañanos Tito nos dos primeros díes, lo cual ye mui d'agradecer.

Lo más guapu de mis viaxes al Pireneu, ye que cada añu, voi conociendo un nuevu valle y nesti casu diba conocer el Val de Tena, que t'asitiáu nel Alto Galligo, con guapos pueblos como Sallent de Galligo y Escarriella. 

Como siempre, madrugón fino de sábadu y el Impreza y yo salimos en llama hacia Basauri, perdiéndome nos ramales de la A-8 xusto en Bilbo, pero finalmente aporté a la cafetería del complexu deportivu de Basauri, onde esperábame una grata sorpresa.

Y ye qu'hai que dicir que la suerte de collacios que tengo fechos n'Euzkadi nun pue ser meyor. Nun ye normal, qu'un sábadu pela mañana, nel que caún tien los sos asuntos, plántense a almorzar conmigo Fernan y Tito que veníen de monte, pero tamién Mariano, Paco y Raquel, que nun teníen porque venir a despedinos.

Mil gracies pol detalle. Sois los meyores.

Magar de meter dalgo pal cuerpu, salimos en dos coches hacia Uesca, con dalgún control metralleteru de los picolos, pero ensín mayor novedá que la paliza de viaxe y dalgún tramín d'autovía más nuevu, que ye bien d'agradecer nesti mui llargu viaxe pa mi, dende Asturies.

Sobraos de tiempu, paramos a tomar una caña en Puente de la Reina y un pocu de gasofa pal coche y siguimos hasta'l pueblu d'Escarriella, onde vamos xintar un menú bien prestosu y ya dexaremos reserváu hostal pal últimu día, onde descansaremos de les palices montañeres, hasta'l día siguiente qu'entamaremos el viaxe de vuelta.

Lo siguiente ya son estos 4 díes de monte:

Día 1: A Sarra (Uesca) - Refuxu de Respomuso (Uesca)

Día 2: Refuxu de Respomuso (Uesca) - Pico Os Moros 

Día 3: Refuxu de Respomuso (Uesca) - Pico Vachimanya  

Día 4: Refuxu de Respomuso (Uesca) - Picos de Fondellas - A Sarra (Uesca)

Magar de les perbones actividaes de montaña, tuviemos tiempu a facer un pocu turismu en Sallent de Galligo y de relaxanos n'Escarriella, con delles cerveces y una cena nel Hostal el Sarao onde tuviemos aloxaos con un tratu estupendu.

Al día siguiente, llueu d'un espeutacular buffé d'almuerzu, otra vegada agarrámonos al volante con tola tranquilidá, camentando'l viaxe llargu hasta Xixón. Menos mal, que paramos un ratín en Chaca, a conocer la parte más guapa d'esti activu pueblu y dempués ya tiramos del tirón hasta Basauri onde tuve otra vegada la oportunidá de xintar colos mesmos collacios que vinieron a despedinos.

Ye una maraviya sentíse queríu, por xente que conocémonos dende malpenes 3 años. Gracies otra vegada a Paco y Raquel, al gran Mariano y a Bittor qu'averóse a los cafés, pa que pudiéramos contá-yos que tal nos foi a Fernan y a mí.

Con esti bon tastu a bona amistá, ya solo quedóme facer el regresu orbayando tol camín hasta Xixón, nel que tuve la oportunidá de ver el furrulamientu de la tiesta humana, ya que con tan solo l'alcordanza del accidente de va 2 años, el pie del pedal dexó de pesar casi hasta tierres astures, jeje.

 

Camudando'l Camín nos Pireneus por tercer añu

El próximu añu más y meyor...

P.D: Paco esa camiseta tengo que conseguítela por coyones...