Porrimán (Morcín)

Seronda 2025

Los díes de branu fueron pasando y la llegada de la Seronda, como non, trae díes más curtios y sobretou, el mió cambeu de xornada nel trabayu, fae que nun me de tiempu a averame a seutores más alloñaos y con más camín hasta'l muru, poro, unos pocos díes fuimos hasta Porrimán, quedándonos na parte baxa, onde Kíla tien un pie de vía muncho más afayaizu.

 

Javi probando la Cencerra a la entrada del seutor

Va tiempu probara un 6c a la mandrecha (Pinta en bastos) que ye un dolor de vía enllena de romos y pasos raros, que pringara porque na parte alta cayérame la intemerata de repente y colamos d'ellí, ensin poder trepar más. 

Nestos díes volví, faciéndola al pegue del día y pasámonos Alvarín y yo a montar un 7a+ (Donde esta Iapa), que tuvimos descifrando, teniendo un pasu duru de placa na parte alta. Esi día probamos tamién el Tesoro de Willy, que ta nos croquis de 7b+, sacando los pasos duros de la parte baxa y llueu navegando nel restu la vía pa nun lianos de más, ya que tamién tien un pasín finu na parta alta.

Apretando y al asegure nun par de díes d'esguilada na parte baxa

La siguiente visita, centrárame en Donde está Iapa, entrándo-y fuerte dende'l primer pegue, pero teniendo que meté-y otros dos pegues más pa poder encadenala, cayéndome nel segundu saliendo del pasu y al terceru del día pudiéndome llevala con seguridá, pero apretando, poro a mi mou de ver, el 7a+ paezme afayaizu, más que'l 7a, ya que'l pasu ye llargu y la vía tien el so puntín físicu.

 

Xavi nel pasaxe duro del Tesoro de Willy y Kíla a lo suyo

Al día siguiente nun había munches opciones pa trepar y volvimos hasta Porrimán, na Peña Garcilleru, metiéndome nesta ocasión el supuestu 7b+ (El Tesoro de Willy) que tuve probando con Tolín, mientres Anna y Javi pegábense con Donde está Iapa.

Finalmente, al tercer pegue del día, como n'anterior vía, pude encadenala, poro decidime a que nun llega a 7b+ la vía, paeciéndome más bien 7b, ya qu'esi estilu físicu d'entamu nun ye mi estilu y personalmente un 7b+, ye mi puntu de proyeutar serio y suelen llevame nel intervalo de la decena de pegues. 

 

Los croquis de la Peña Garcilleru tenéislos pa consultar, allugaos nel chigre MoNa en Llugar de Riba onde podéis collaborar colos equipadores de Morcín (Club Asturvertical, GM Xuan de la Borrina,...).  

---------------------------------------------------------

Entepenes (Ayer) - San Xulián - Cueva L'Ablanu - Peña Solengues - Valdeveneru

25 d'Ochobre de 2025

Track: Entepenes (Ayer) - San Xulián - Cueva L'Ablanu - Peña Solengues - Valdeveneru

Dempués de la ruta dende la Polavieya al Cualnegro, apeteciónos tornar pel conceyu d'Ayer una vegada más, yéndonos nesti día hasta Entepenes, onde tantes vegaes viéremos la foz d'entrada al valle de San Xulián y como nun lo conocíemos, preparamos una rutina pa sacar alantre nun día bastante murniu y con toques amenazantes a lluvia.

Partimos del pueblu d'Entepenes (505 m)

Asina que magar del almuerzu en Mieres, tiramos hasta'l valle d'Ayer y pelín dempués de les 10 de la mañana, tábemos preparaos, pa entamar a caleyar a la entrada de la foz de San Xulián. Sacamos semeya al llau del rigu y entamamos a caleyar cómodamente pente guapos paredones valle alantre, hasta dir algamando vistes a les Peñes Negres, previu a la nomada Penamea.   

Avilés (Avilés) - Costa de Castrillón - Altu'l Pravianu - El Prau'l Marqués (Castrillón) - Piarnu - Miranda (Avilés)

24 d'Ochobre de 2025

Track: Avilés (Avilés) - Costa de Castrillón - Altu'l Pravianu - El Prau'l Marqués (Castrillón) - Piarnu  - Miranda (Avilés)

Dempués de la selmana anterior onde salíemos de ruta costera en BTT pela fastera occidental de Gozón, esta vegada vamos empatar les costes d'Avilés y Castrillón col envís, de tornar pelos sos altos, tachando ambos techos de conceyu, dando-y d'esta mena un bon repasu a ambos conceyos tanto na costa como nel so interior.

Pa ello, aportaremos al aparcaderu del centru Niemeyer n'Avilés, so les diez y media la mañana, preparándonos de mochilles, dalgo de xinta y les bicicletes, cruciando la ría d'Avilés y saliendo pel paséu "marítimu", a tramos pela carretera y otros pela acera, hasta metenos nel muelle de Raíces, onde vamos caleyando hasta aportar a San Xuan, onde averámonos hasta la punta'l Gallu pa ver el faru San Xuan, onde tuviéramos va una selmana.  

Partimos del centru Niemeyer n'Avilés (3 m)

Dende equí meterémonos pela sienda pente les dunes que va paralela a les sableres de San Xuan y L'Espartal, averándonos pali pali a la población costera más importante de Castrillón, como ye Salinas, pudiendo continuar pel paséu a ritmu seliquino, pa nun molestar a los caleyantes y tamién pa esfrutar de tan guapes vistes que llevamos teniendo nesti primer tramu seliquino de ruta costera.

Santolaya (Morcín)

Branu 2025 en Solavilla

Dempués de visitar el branu anterior el seutor del Sidrán na parte baxa del picu La Llera, faláremos con Sergio y los sos collacios, activos equipadores na zona de Morcín y falando d'un muru superior, que siempre vimos penriba de Santolaya, díznos que tien metíes 5 víes, pero que camienta que les víes que resten per equipar, ya van tener graos más altos y que nun se diba meter nello, poro anímanos a continuar col so trabayu.

D'esti xeitu, aportamos por allí y echar una güeyada y alloriamos col muru de Solavilla, coles chorreres y col tipu de roca que tenemos delantre, mui asemeyada al seutor del Sidrán y tamién al tipu de Frechura, en cuanto a les plaques, pero esta vegada tenemos delantre chorreres y desplomes con llinees con una pinta estupenda, nel que tendremos que trabayar.

Les vistes de Santolaya  y del picu Figares dende'l camín a Solavilla

D'entrada metémonos Dani y yo, a llimpiar camín, abriendo senderu na parte alta del camín antiguu que vien dende Santolaya, animándose Fon tamién a meter dalguna vía, pero como siempre Dani ye una máquina equipando y pa cuando queremos entrar a trabayar ya tien dalguna metida nes chorreres y métome a equipar una línea que me prestaba, qu'a lo postreru quedaría nel primer octavu del seutor.

El branu fue pasando y díbemos combinando la escalada de les víes equipaes, cola apertura de nueves dexando al final del branu un total de 17 víes equipaes nel seutor. Tamién, logramos acondicionar les víes de Sergio, limpiando una repisa dende la que salien casi toes, montando un pasamanos pa subir hasta la repisa y entamar les víes sin peligru de cayida de piedres.

Los equipadores de la segunda fase de trabayu en Solavilla

Asina mesmu, tamién dexamos trabayu pa la temporada que vien, ya que tenemos oportunidá de siguir equipando víes más plaqueres a la manzorga que preferimos dexar pal branu que vien, ya que terminamos un pelín cansaos de tanto trabayar y llimpiar esti seutor qu'espero-yos preste a los que la visiten.

No deportivo, fuimos atacando vía tres vía, encadenando les víes de Sergio, demientres probábemos les nuestres, tando d'alcuerdo colos graos propuestos pol so equipu, disfrutando muncho d'elles ya que son víes llargues y bien guapes con bona continuidá en tol so percorríu, asína que mil gracies pol trabayu porque son una pasada.

 

Encadenando Chocolate Biscuit (7a) y Javi nos pegues d'encadene de la Remington Hostil (8a)

Nes nuestres, Dani, como bon equipador de la mayoría de les víes, fue faciendo les primeres, destancando la triloxía del Chakra (El Chakra-cha del Tren (7a), los Santos Chakramentos (7a+) y el Imperio contra'l Chakra (7b)), llevándonos más collacios pocu a pocu esta triloxía, continuando pela mió parte con dalgunes víes más bloqueres na fastera zorga del seutor, tocando dacuando los tres cuernos qu'equipé, tando dos tovía ensin encadenar y casi ensin probar.

Tuve la suerte de ver a Carlos Cue y Javi Solares probando la Remington Hostil, primer vía qu'equipé en Solavilla, de la que namás hai un encadene que yo sepa, la primera de Javi, que tuvo qu'esforzase más de lo normal, pa dexala con propuesta de 8a, anque según les sos pallabres, ye una vía pelín old school, poro nun va ser una vía cenciella d'encadenar, esperando que dalguien más seya a poner una muesca más.

 

Probando les víes de Sergio en Solavilla

Les otres dos víes qu'equipara, tan dafechu de proyeutu, dexándoles pal branu que bien, teniendo claro que voi mover Matar Jipis en les Tolves, un pelín más a la mandrecha viendo si dexo la variante esquierda y Cadera Perpetua, queda pendiente de probar, pa ver si sal o non y que podemos facer pa nun perder una llínea tan guapa.

Pel momentu, quédenme varíes víes per encadenar de Dani (Honey Bum, Rayas y Centollos, Licor 53) pero aportando l'iviernu va ser un pelín penoso esguilar nesti seutor, ya que veolo más pa tiempos más cálidos, al tener solombra a partir de les 2 y media de la tarde, poro nun ye mala opción pal branu.

Que vos preste!! Nós, siguiremos trabayando la prósima temporada pa sacar dalgunes víes más. Respetái l'entornu y collaborar llimpiando'l camín y la broza que vaya espoxigando nel muru. 

 

Los croquis de Santolaya tenéislos pa consultar, allugaos nel chigre MoNa en Llugar de Riba onde podéis collaborar colos equipadores de Morcín (Club Asturvertical, GM Xuan de la Borrina,...). 

-------------------------------------------------------------------

Peñes (Gozón) - Verdicio - Cabu Nigru - Xagón - San Xuan de Nieva - Les Tablaes - Vioño - Bañugues

17 d'Ochobre de 2025

Track: Peñes (Gozón) - Verdicio - Cabo Negro - Xagó - San Xuan de Nieva - Les Tablaes - Vioñu - Bañugues

Cuantayá que nun espublizaba una costera nel blogue y aprovechando dellos díes de vacas y mi vuelta a la BTT va unos meses, partimos Suco y yo hacia'l puntu más septentrional d'Asturies nel Cabu Peñes, onde tengo l'envís, de continuar la costera de Gozón de la que ya ficiera la fastera oriental caminando va munchos años.

Daquella, percorriéremos dende Antromero hasta'l cabu Peñes, nuna ruta de casi 20 km de costa y darréu, tamos preparando les bicicletes, sabiendo que tenemos per delantre la costa occidental, pero con una vuelta pel centru del conceyu pa conocer el Techu de Gozón y volver a Peñes, que lo suponemos que llevará una bona kilometrada.

Partimos del Cabu Peñes nel puntu más nortiegu astur (103 m)

Montámonos nes bicicletes dando la vuelta al faru de Peñes, onde ya tacháremos el vértice xeodésicu n'anterior parte de la costera asina como fuéramos a la punta Gaviera, saliendo esta vegada a la manzorga per senderos, que van llevanos pegaos a la costa hacia les llagunes del cabu Peñes, puntu d'acolumbramientu d'aves, que travesamos sin problemes al tar seques, hasta que vemos a la nuesa manzorga, el vértice de La Granda (115 m).

Peña Salgueiro (Morcín)

Seronda 2025

Munchos son los díes que llevo pasando delantre de la cantera la Naval, viendo milenta coches d'escaladores aparcaos y ye que la Peña Salguerio nos últimos años, na so faza inferior, diónos hasta tres sectores nuevos gracies al trabayu incansable del Puntu y dellos compañeros más. 

El primer seutor, que visité años atrás, cuando taba recién equipáu fue la Cueva, más nomáu como'l Sectorín, un pañu de roca que recordóme na so parte drecha a Cuanxú, míticu sector de Grau, pero na so manzorga, aportaba 3 víes de sestu con chorrera, que fadría les delicies pa la xente de grau mediu onde podría esfrutar de la esguilada de chorrera.

Vistes del murazu de Chorreras na Peña Salgueiro

Sicasí, nun volví, ya que l'accesu pela carretera, chupando fumo nel túnel, más daquella un espolón d'entamu a trepar con cuerdes afitaes, nun me prestó pa la mió perrina, ya mayor n'aquel momentu, na que dicir agora que ya tien 13 añinos. 

Pasó un branu, tando yo enfotáu na reequipación de Fuentescala y en mis llargos pateos al seutor, ya veía'l siguiente proyeutu del Puntu, como yera un gran seutor con víes llargues de chorrera, como pocos hai n'Asturies y menos en Morcín, viéndose'l paré bastante moyáu en toes ocasiones, poro'l trabayu tuvo que ser increyible pa sacar alantre esi murazo que se curraron.

Orlando y Silvia probando víes nel seutor Chorreras

Fai delles selmanes, tuve de vacaciones per casa y aprovechando un par de díes que nun tenía a Kilina, averéme per ellí a conocelo, alloriando cola currada nel accesu, ya con escalones nel espolón d'entamu y con tola nueva travesía hacia'l seutor de Chorreras, teniendo a mediu camín otra obra mayestra, como siempre de Fer, sacando otru seutor de Placas nel Salgueiro, nel que tovía siguen trabayando.

Esta vegada tiramos hasta Chorreras, onde'l primer día pude llevame'l primer llargu de Camino Primitivo (6b+/c), Homo Prejubilator (6c+) y La Miseria (7a) paeciéndome toes una pasada, sobretou la Miseria, un rutón de 30 y picu metros de navegada chorreril.

La segunda visita sería más esprés de tarde, antes del cambeu d'hora, subiendo a la carrera faciendo de nuevu Camino Primitivo, pero hasta'l segundu llargu que sale un 7a bien guapu, completando la tarde con otru pegue al flash a No Puedo dejar el Rock, onde apretamos enforma nel tramu final de chorrera, pa poder llevala pal bolsu. 

 

Los croquis de la Peña Salgueiro tenéislos pa consultar, allugaos nel chigre MoNa en Llugar de Riba onde podéis collaborar colos equipadores de Morcín (Club Asturvertical, GM Xuan de la Borrina,...).

------------------------------------------------------------------------------- 

La Polavieya (Ayer) - L.larín - Cualnegro - Freneo - La Furacá - La Mornera - Col.lá Cebarón - Felechosa

5 d'Ochobre de 2025

Track: La Polavieya (Ayer) - L.larín - Cualnegro - Freneo - La Furacá - Escuciarréu - Altu Vallina - Felechosa

Continuamos la temporada 2025-2026 un pocu perezosos en cuanto a participación, pero siempre qu'haya dalguien motiváu salimos, poro, xuntámonos en Mieres p'almorzar y siguimos hacia'l valle d'Ayer col envís d'entamar la ruta nel pueblu de la Pola Vieya, pel que tábemos fartos de pasar, pero qu'enxamás tuviéremos de puntu de partida nestos años.

La idega yera conocer dellos pinganones na fastera oriental del valle, ascender al picu Cualnegro y continuar hacia la llende pente Ayer y Sobrescobiu ensin un oxetivu claro. Preparámonos nos coches y pelín enantes de les diez de la mañana, tamos echando una güeyada el cartelu informativu de la circular al picu Cualnegro.

Partimos de la Pola Vieya (600 m)

Siguimos peles cais de la Pola Vieya, viendo como pali pali, van recuperándose les cases del pueblu, atopando a la salida dellos cartelos de maera, dando indicativu de les distintes rutes, lo que sorpréndenos enforma, anque a dicir verdá, nos últimos años, vemos como'l conceyu d'Ayer ta enfotándose en facer valir toles posibilidaes senderistes y montañeres de tan guapu conceyu.

Saldremos pela plaza Corro, charrando con un paisanu comentándo-y lo guapu que tienen el pueblu y diznos que llevamos per delantre a grupos numberosos de montañeros. Tiramos camín alantre, pasando al llau dela mina la Naval y siguimos direición al crestón calizu de Castro, al que vamos desvianos pa conocer el guapu pinganón de Castro, bien marcáu con cartelos de peligru en casu de riada. 

Mildón (Valle Altu Peñamellera) - Foz de Mildón - Riega Collantes - Senderu Collantes - Oceño

28 de Setiembre de 2025

Track: Mildón (Valle Altu Peñamellera) - Foz de Mildón - Riega Collantes - Senda Collantes - Oceño

Magar de día anterior tornando a les Carreres pel Monte, nel trail de la Pica Torbina, xuntámonos dellos collacios del GM Xuan de la Borrina, pa entamar la temporada 2025 - 2026, con una salida moderada en tiempu y llargura dle percorríu, pero perguapa en belleza y xabacismu montuno, como ye vezu nel nuesu grupu monte.

Pa ello, aprovechando que taba nel día anterior n'Arenas allugáu, quedaremos a una hora prudente p'almorzar y salir hacia'l Valle Altu de Peñamellera, desviándonos a l'altor de Mildón hacia'l pueblu d'Oceño, llugar onde aparte de la escalada, tamién tuviemos varies vegaes de monte. 

Partimos de la contorna de pente Mildón y el pueblu d'Oceño (278 m)

A dicir verdá, la ruta que vamos facer, ye un amiestu de dos rutes que ficiéremos va tiempu na redolada d'Oceño, conociendo per primer vegada la foz de Mildón teniendo que pegar una vueltona grandísima, por nun atopar manera d'enllazar con Tajadura y de la sienda Collantes que disfrutáremos nuna travesía preciosa dende Trescares.

Esta vegada vamos empatar la foz de Mildón cola sienda Collantes, pasando pela riega Collantes, de la que nun tenemos denguna referencia, asina que como ya dixi, un pocu d'aventura yera asegurada, sumándose al tarrén conocíu, que nun ye precísamente un percorríu domingueru, nin muncho menos.

Trail Pica Torbina (Valle Altu de Peñamellera)

27 de Setiembre de 2025

Track: Trail Pica Torbina (Valle Altu de Peñamellera)

Dos años y mediu ensin tornar a les carreres pel monte, dende'l trail de Cuevas en Soria, onde partí definitivamente, anque ya saliera mui tocáu de Resistencia Nembra. Dende entós, pruebes varies, resonancies y la certeza de que tenia'l cadril drechu cambiar por artrosis, ensin dengún remediu qu'operar y poner una prótesis.

Penmediu, abandono total de correr, dalgo de bici y monte con dolor y muncha escalada, ya que nun me molestaba demasiáu, aportando a facer el mió másimu grau esi mesmu 2023, pa tener un 2024 onde ya me volvía a picar facer monte, pero taba coxeando de más pa poder caminar y entamaben a fadiase otres partes del cuerpu.

A la muerte xubiendo pel entepechu vertical

Tocó tomar la decisión d'operame, los trámites y n'Avientu de 2024 camudamos el cadril, faciendo una recuperación rápida, tornando a les escueles d'escalada al mes y mediu d'operar y a facer dalgo de monte a partir de los 2 meses, teniendo en branu perbones sensaciones per Picos, continuando con rutes pel monte cada vegada más potentes, faciendo dalguna baxada corriendo pa probame.

 

Asina fue como decidime a buscar una carrerina lo más tiesa posible, montañera y curtia como pa non sofrir con grandes distancies trotando, asina que'l trail de la Pica Torbina, yera la meyor opción. Apuntéme y plantéme na salida con menos de media hora de carrera continua per llano en dos años y mediu y munchu mieu a mancame o nun tar faciendo les coses bien.  

 

 

Parte final de la xubida pelín más seliquina

Salgo atrás del tou, llueu de trotar un pelín peles cais, xubiendo per pista col trote cochineru clásicu, que faime adelantar bastantes posiciones y ye que correr p'arriba veo que pueu facelo bastante bien, hasta qu'aportamos a los tramos de camín onde sigo adelantando xente y na vallina vertical doime cuenta, que toi pasando a dalgunos nomaos corredores de siempre, al restu perdime y nun conozo a casi naide. 

Nesi puntu me digo, tira p'arriba fuerte que na baxada va tocar caltener lo que se pueda y puntu, asina que sigo, pasando pel aguya ya coles posiciones más espaciaes y salimos a la parte alta de Cuera, onde toca navegar pelos tarrén calizu típicu, faciendo la xubida final a la Pica Torbina, con dellos corredores colos que voi falando, alcontrándome realmente bien y sobretou disfrutando al apretar la máquina tolo que pude

 

Tramu correnderu de camín na parte media de la baxada

A la baxada ya voi viendo que la estabilidá del cadril nun ye'l que yera, pero buenu con menos d'un añu de la operación nun se puede pedir más, toca garrar más fuerza de cuadriceps si queremos facer esto unes cuantes vegaes al añu. Ensin más, sabiendo lo qu'hai, voi baxando al mió ritmu, dexando pasar a munchos corredores que van más finos y allegres baxando, pudiendo caltener ritmos nos tramos más téunicos, pero nos más correnderos, tengo mieu a forzar el cadril y déxome dir bastante, perdiendo más posiciones.

Finalmente, facemos el tramu final correnderu en baxada hasta'l pueblu de Rozagás y entro en meta en 2 hores y 5 minutos, teniendo un másimu de 3 hores pa completalo, poro doime cuenta que pueu tar contento, ya que nun entrené, nin fice na, sacante patiar pel monte y aprosimar pa escalar, poro nun toi pa quexame precísamente.

 

Descensu a fueu... faciéndoseme hasta llargu dempués de tanto tiempu

Mudámonos de ropa y esfrutamos d'una cervecina tranquila nel pueblu, teniendo paella pa tolos participantes, nun pueblu que vuélcase cola carrera, qu'al final ye lo que siempre prestóme d'estes actividaes, meter caña a la maquinaria y conocer pueblos enfotaos col monte y el deporte, lloñe de los tiempos, de les posiciones y de muncha parafernalia qu'abunde nes carreres de monte.

Les ganes de volver a correr, pues a dicir verdá la selmana siguiente, tuve más bien cero, ya que los dolores de cuadriceps y el cadril cargáu, me ficieron pensar muncho si paga la pena intentar volver a correr, pero pasáu esa selmana el cuerpu fue absorbiendo dolores y ver veremos si caltenemos el plan de facer carrera cada dos meses más o menos. 

Hasta la prósima o non... ya veremos

Como siempre mil gracies a la xente del pueblu de Rozagás, que trató a tolos participantes con munchu ciñu y a los voluntarios animando y fotógrafos (Dansolmar, Lastra, Ramón Gutierrez, Tres Picos, Fotopicos) por sacar el sufrimientu nes nueses cares y ye qu'esta carrera ye dura, dura y montañera como tien de ser... asína que si la maquinaria lo permite tornaré a sufrir na xubida a la Pica Torbina.

Las Vegas de Sotres (Cabrales) - Puertu Áliva - Colláu Cámara - H.oracón de la Miel

 15 de Setiembre de 2025

Track: Las Vegas de Sotres (Cabrales) - Puertos d'Áliva - Colláu Cámara - H.oracón de la Miel

Últimu día asitiaos per Sotres y llueu de los pateos pelos Urrieles colos Campanarios y per Andra con H.idiellu, alborecemos con un día pelín ñublu, cola borrina xugando y con una previsión de lluvia pa la tarde, lo que créanos munches duldes de cara a facer dalguna actividá y aprovechar un pocu la mañana.

El día anterior, teníalo clarísimo, cola idega de conocer les canales de la fastera de Fresnidiellu y baxar pel Fresnedal o dalgo asina, pero pa cuando queremos arrancar, recoyendo un pocu los trastos na furgo, ya tenemos la borrina metida nes peñes. 

Partimos de las Vegas de Sotres (1060 m)

Otra idega, ye dar un pateín a la Cabeza Sonllanu que pel momentu taba despeyáu, pero dame un pelín de pereza ya que fícela nun va muncho, asina que decidimos dir hasta Fresnidiellu en furgo y ver nel sitiu, como preséntase'l tema. Cola mesma, aparcamos y miramos les canales, cola borrina ya a mediu altor, quitándones les ganes de navegar per vallines herboses nestes condiciones.

Asina que decidimos dar un patéu hacia'l Puertu Áliva, al menos por estirar un pocu les pates y porque vemos que pal sur tenemos el cielu más claru y si toca moyase que seya tornando per pista y non engolaos en canales herboses. 

Sotres (Cabrales) - H.idiellu - Traviesas - Grah.al - H.unciana - Andra - Fuentesoles

14 de Setiembre de 2025

Track: Sotres (Cabrales) - H.idiellu - Traviesas - Grah.al - H.unciana - Andra - Fuentesoles

Dempués de la xatada del día anterior cola ruta a Los Campanarios, el grupu diba mermase sensiblemente pasando de díez a seis, los animosos montañeros que díbemos atacar la clásica canal de H.idiellu, que nun conocíen entá. Poro, llueu del almuerzu mañaneru, más relaxáu que'l día anterior, vamos salir caleyando peles cais de Sotres a les 9 la mañana.

 

Partimos de Sotres (1030 m) con un día preciosu

Baxaremos pela carretera, hasta la Curvona, onde'l parque de Picos tien un control de los coches qu'acceden y continuamos caleciendo les patuques pela pista en direición a las Vegas. El día preséntase preciosu y podemos esfrutar de tola contorna de canales y peñes, destacando como non, la visión de les peñes de Fresnidiellu, quedándome con ganes de patiar les canales que les envuelven. 

Pandébano (Cabrales) - La Vega Urriellu - Llebaniegu - Campanarios - Collada Bonita - H.ou Carnizosu - Las Moñas

13 de Setiembre de 2025

Track: Pandébano (Cabrales) - La Vega Urriellu - Llebaniegu - Campanarios - Collada Bonita - H.ou Carnizosu - Las Moñas

Tornamos dellos díes a Picos, dempués de la Travesera Picos del mes de Xunetu, yéndonos varios díes hasta Sotres, pueblu cabraliegu que tomaremos como campu base pa les nueses andances. El día anterior ya fuimos a dormir a Sotres, alcontrándonos con unos horarios pocu avezaos al estilu astur de vida, piesllándose les cenes bien ceo, por teníemos de tar sollertes pa nun quedar ensin cenar.

D'esti xeitu, a les 8 la mañana, viénenmos a buscar dellos taxis que súbenmos a fueu hasta Pandébano, puntu de partida de la ruta del primer día. Siempre fui mui d'autoxestión en tolos asuntos alrodiu'l monte, pero pillar el taxi a Pandébano y nun andar dando por culo colos coches propios, paezme una opción de lo más sensata y sostenible, pa evitar caleyar más d'una hora por pista dende Sotres.

Partimos de Pandébano (1120 m) bien ceo

Sicasí, caún ye caún, pero llenando los taxis, los seis euros, tan perbien gastaos, pa nun fadiar la furgo pela pista, poro aportaremos a Pandébano, col almuerzu na boca, llueu del viaxe, pero preparaos a les 8 y media la mañana pa entamar a caleyar, con un día pelín más tapecíu de lo que daba la meteo.

Entamaremos camín hacia Pandébano, dende'l aparcaderu, toos xubiendo pela parte llarga faciendo más envuelta, menos yo, que tenía que dexar un recáu y tiré pel atayu, pa xuntános toos na parte alta, siguiendo camín hacia la Trenosa, onde cargamos dalgo más d'agua, dalgunos de nós y siguiemos caleyando hacia la Vega Urriellu.