La Puela (Ayande) - Picu Panl.lón

17 de Febreru de 2013

Track: La Puela (Ayande) - Picu Panl.lón

Dos vegaes tuviemos que venir hasta la Puela n'Ayande, pa poder dar preste al picu más altu d'esti conceyu, El Panl.lón. De primeres intentámoslu, el primer d'Avientu y fuimos xustu dempués de la primer gran ñevada del iviernu y con un tiempu inestable cuanto menos.

La segunda vegada, a pesar de llevar bien de tiempu ñeváu, col mantu nival más estable y de xuru dalgo menos de ñeve, camentamos tener munches más posibilidaes d'ésitu, poro vamos axuntanos un bon garrapiellu xente pa facela.

P'aportar a la Puela, saldremos de Xixón pela autovía A-66, pa garrar la de Grau hasta'l final, onde empobinámonos siempre hacia Cangas del Narcea  pela As-15 hasta unos pocos kilómetros enantes de la capital, onde cruciamos el puentu L'Infiernu, garrando la As-14, pasando pelos pueblos ayandeses de la Ponte L.linares y Ruvena, hasta aportar a la Puela.

Salimos dende Freisnéu (552 ms) y dende la Puela (546 ms)

El primer dia de viaxe, llevábemos a Kíla, bien mocina, poro nun sabíemos lo mal que lu pasaba nel coche faciéndosenos la ruta perllarga, pero cola edá, va notándose más cómoda nel coche, anque ainda esbabáyase de los nervios.

Magar de los almuerzos, onde Rebe, fizonos d'anfitriona nun faltándonos res, preparámonos pa entamar, yendo'l primer día colos coches hasta'l pueblu de Freisnéu, pero'l segundu, con un tiempu más amañosu, decidimos salir dende la propia Puela.

Avanzamos pel valle Freisnéu con un toque serondiegu

N'avientu, dende Freisnéu, siguimos pela Veigarronda, al llau del regueru'l Trabe, hasta tomar un camín mui perdíu, tan perdíu, qu'a pesar de salir nos mapes, nun ye otra cosa qu'un ciertu rastru al traviés d'un enorme felechal. Travesar esti camín, va retrasanos un montón y al final nun alcontramos el bon llugar pa salir a la pista, que va del Bustiel.lu al colláu del Nasín.

Nesta primer intentona, Kíla yera tan pequeñina, que llevábala na mochila de 22 litros, lo meyor protexía que podía. La verdá, que yera tan buena, que nun se movía y tan solo diba goliendo toles rames que-y pasaben delantre la cara. Tenia que tar ablucada al ver tanta ñatura y nun poder correr pente ella.

Xubiremos pel Rebol.lu travesando los praos de Treslacasa

El segundu día, saldremos so les diez de la mañana de la propia Puela y fadrémoslo pela caleya asfaltada que lleva hasta Freisnéu, pero dalgo enantres, desviarémonos hacia les cases del Rebol.lu. Ellí daránmos la bienllegada una reciella perrinos comandaos per un mastín mozu con más ganes de xugar que d'otra cosa.

Al final, saldrá'l paisanu y dexarános siguir pela pista que va penriba los sos praos, pa dempués d'un par d'envueltes abandonar estos, saliéndonos d'un cierre, pa tomar la pista que vien del barriu Los Solares de la Puela, quiciás una opción válida, pa nun molestar al paisanu, a los perros y la propiedá.

Dexamos bien abaxo ya La Puela y acolumbramos el Panl.lón con ñeve

Polo demás, siguimos esa pista, travesando una portiella, un prau y una nueva portiella, baxando agora sí, hasta'l colláu de Bustiel.lu, onde empatamos col primer día que viniéramos tol valle alantre. Agora sí, per camín conocíu xubiremos echando unes rises hasta'l Nasín (874 ms), onde topámonos de nuevu, cola balsa minera d'oru d'antaño.

Ambos díes xubimos sele hacia'l Nasín per pista

Darréu, los que vamos camentando la posibilidá da dános la vuelta, como'l primer día, vamos desdexando tala opción, al ver que la ñeve apaez munchísimu más arriba que la primer vegada. Eso, sigún ascendemos de llomba en llomba, pasando pola Rasa, la Chana los Abedules, el Chanu y dando descansu nel Altu Los Llobos, tenémeslo claru... d'esta vegada tien de cayer.

Nel primer intentu la ñeve fízonos dar la vuelta

Daquella, un pelín enriba d'esti altu, tuviemos que dar la vuelta, ya que'l fríu intensu y la cantidá de ñeve, diome a entender que pa la perrina yera demasiáu. Poro, demientres Haritz y Pangua ficieron cume nel Mosqueiru, Rebe, Pau y yo, decidimos dar vuelta hacia Freisnéu, pel mesmu camín.

Esta vegada, Kíla va corriendo dende la cabeza'l grupu a la cola y así durante tola ruta, y anque'l día nun ta apetecible del too y la moyadura que lleva ye abonda, paez qu'aguanta bien. Dos meses y mediu más, nótanse pero bien.

Pero na segunda vegada pudimos xubir muncho más ensín ñeve

Ensín más, entamamos a peganos cola ñeve y fadrémoslo cola ascensión al Mosqueiru, pero envede xubir direutamente, preferímonos meter un pelín hacia'l Val.licón de Freisnéu, col envís de ver na so parte cimera'l Pozu'l Chau, que ye un pequeñu llagu d'orixe glaciar.

Durante tol ascensu al Mosqueiru, tendremos la ocasión d'acolumbrar tola llargura de la xerra de L.lagos, semada d'eólicos a la nuesa manzorga y tamién acompañándonos nel ascensu tendremos el picu Panl.lón, que paez tar esperando a que vayamos a por él.

Averámonos pente la ñeve hacia'l Pozu'l Chau dando vista al Panl.lón a la mandrecha

D'esta miente, vamos dir xubiendo y xubiendo con mayor cantidá de ñeve nel nuesu camín, tanta que con bon esfuerzu diremos aportando hacia les antenes d'El Mosqueiru, non sin antes tener qu'enfrentanos con un enorme trabe de ñeve, xustu na cumera'l picu.

Tramu final dafechu disfrutón con un trabe de ñeve enantes d'encumar el Mosqueiru

Caún al so ritmu, vamos dir faciéndonos colos 1403 ms d'El Mosqueiru. Los primeros n'aportar serán Simón, Canta y Rolo, que de tantes ganes que teníen de monte lleven tol día tirando fuertes. Pau y yo, llegaremos los últimos, ya que'l putu abductor de Pau, sigue dándo-y problemes nes ascensiones y ye un sufrimientu continuu lo suyu.

Nel cumal del Mosqueiru (1403 ms)

Magar de casi 4 hores d'ascensu, que dícense pronto, siguimos alantre pela pista de los eólicos y col mesmu mal rollu de siempre, que da caleyar baxo les sos aspes, abandonamos esta pa entamar l'ascensión al Panl.lón.

De primeres, camentamos que lo meyor será avanzar poles lloses de pizarra, pa escaecer un pelín la ñeve, pero bien ceo, vemos que lo moyáo d'estes faénles pocu encomendables. Poro tirámonos a abrir buelga de nueu pela ñeve, faciéndose la travesía pela faldera'l Panl.lón hacia la so cume, llarga, llarguísima y casi inacabable.

Baxamos al Altu Fresnéu p'ascender al picu Panl.lón

La verdá ye que cuando tábemos nel Altu'l Panl.lón, colláu pente'l Mosqueiru y l'entamu del ascensu al propiu Panl.lón, pensamos que dibemos tardar muncho menos n'encumalo. Pero les lloses resbarioses, los tramos d'escobón con ñeve profundo y dellos tramos de ñeve pela qu'abrir buelga, ficieron qu'aportar a los 1409 ms del picu Panl.lón, fora un bon esfuerzu.

A la fín nel cumal ñeváu del Panl.lón (1409 ms)

Como ya dixe, el día nun yera pa tirar voladores, pero daba pa facer ambos cumales. Otra cosa yera intentar aguantar dalgo de tiempu nel cumal, ya qu'eso yera dafechu imposible, por mor d'un vientu perfríu, que fízonos echar la semeya de rigor y escapar d'ellí esnalando.

Pero enantes d'ello, tuviemos que facer dellos intercambios de material de mochila en mochila, pa dexar sitiu pa meter a Kíla na mía. La perrina, taba tiritando de fríu detrás d'una montonera peñes nel cumal, y como vila empapadina y xelada, tocaba secala cola ropa que tenía y metela na mochila pa que baxase gran parte del camín hacia la Puela sequina y que se recuperase.

Dempués de los preparativos baxamos hacia Braniecha los más aina posible

Asína que, vamos p'alantre y decidimos baxar hacia Braniecha, p'algamar un abellugu onde poder xintar dalgo ya que llevamos 5 hores de ruta y nun paramos en condiciones a meter dalgo pal cuerpu. Colos 15 kilos de Kíla enriba, entamamos la baxada hasta un collaín onde topámonos con una pista d'esquí onde adelantar a base de baxar de culu.

Al fríu y cansanciu, hai que ganalo con un plizcu de rises, poro la meyor opción yera baxar cuantos más metros posibles lo más aína y divertíu posible. Al entamu, pensé na perrina ya intenté baxar pasín a pasu, pero al final decidime a baxar resbariando como los demás, hasta que ví que la perra, m'adelantaba pela esquierda... puta que la parió, saltó de la mochila.

Xintamos na Braña Braniecha (1032 ms) con fríu y lluvia

A la fín, aportamos a la braña Braniecha onde xintamos embaxo d'un orbayu y un fríu permolestos. A pesar d'ello, repartimos tolo repartible entre toos, con Kíla, metíendose pal gargüelu tolo qu'alcontraba de pasu y ponémonos en marcha, picando daqué de camín.

Baxamos al alcuentru del ríu Nisón cola vista puesta na Puela

Llueu de partir de Braniecha, garraremos una pista práuticamente recta, na que caún va garrar el so ritmu, cola vista puesta na Puela. Na parte baxera d'esta, fadremos unes cuantes envueltes, metíendonos hacia un guapu valle, pel que baxa un regueru con bona fuercia, que desembocará nel ríu Nisón.

Al igual que'l regueru, nós tamién, vamos empobinanos a la marxe drecha del Nisón, onde ya por pistes formigonaes, pasaremos peles cases de Cuervo y Chera, p'aportar a la Puela, con una de les pingadures más gordes nos últimos tiempos de montaña.

Namái réstanos pasar el menor fríu posible de camín a la Puela

Les casi 7 hores y media de ruta, los 15,5 kms de percorríu y los 1150 ms de desnivel positivu acumuláu, amuesen a les clares, que la nuesa propuesta d'ascensión al Picu Panl.lón, nun foi dengún paséu, al igual que'l Picu Panl.lón, tampoco dexóse facer cenciello.

Con estos datos, la moyadura y el fríu, solo quedábanos mudanos de ropa, secar a la perra de nuevu, dexala nel coche calentina envuelta nuna manta y dirnos a tomar un míticu café-cerveza. El café pa espabilar y calecer y la cerveza pa recuperar líquidos y cellebrar una ruta de montaña más.

Kíla entamó a Camudar el so Camín en tierres ayandeses

Nesta ruta ficimos les dos cotes más altes d'Ayande: El Mosqueiru (1403 ms) segunda cota y el Panl.lón (1409 ms) primer cota y vértice xeodésicu d'Ayande

Ver progresos en: Retos montañeros

Busfríu (Cuideiru) - Llan de Cubel

9 de Febreru de 2013

Track: Busfríu (Cuideiru) - Llan de Cubel

Sábadu pela mañana y somos tres los qu'animámonos a dir de monte. Nun tocaba ruta del GM Xuan de la Borrina, pero amenaza'l mal tiempu pa una bona temporada y preferimos nun perder un finde ensín salir al menos a dar un paséu.

Poro, Pangua, Kíla y yo, vamos dir conocer una d'eses rutes que teníemos na tiesta va un tiempu y nun ye otra cosa qu'ascender hasta'l míticu Llan de Cubel. Nun ye que sea un monte ablucante nin muncho menos, pero como'l grupu folk que lleva'l nome d'esti monte, si que ye míticu, pues el propiu monte algama la categoría de míticu tamién.

Partimos de Busfríu (648 ms) col Llan de Cubel al fondu

Saldremos de Xixón orbayando, en direición occidente astur y enantes de la salida de Somao, adelantaremos al bus del Sporting que diba xugar a Lugo, pitándo-yos en mou pacón y devolviéndonos un rafagazu'l chofer, jeje.

Pararemos al llau de la N-632, en Piñera, a desayunar daqué y siguimos camín hacia Samartín de Lluiña, onde tomaremos la As-222 hacia Brieves, desviándonos a la mandrecha al pocu, pa xubir per una guapa carretera que fadrános pasar pelos pueblos de L'Acebu y Brañaseca, hasta finar en Busfríu.

Xubimos hacia'l Cuetu, per delles siendes estraes de cotolles

Entamaremos camín, casi a les 10 y media la mañana y fadrémoslo pela carretera que vinimos hacia l'Altu la Recorva, anque enantes d'averanos siquiera, alcontramos un camín que paez xubir direutu hacia la xerra los Baos.

Foi un pelín d'erru, ya que sienda si qu'había y munches, pero taben práuticamente zarraes peles cotelles y aparte de pinchanos, tuve que garrar en brazos a la perrina, ya que fozar pente los pinchos, colos güeyos al mesmu altor, nun tien que prestar muncho.

El cabu Vidiu y  la Paradiella dende'l Cuetu (789 ms)

Sacante d'esto, en media horina, paez mentira pero tardamos muncho pa na, ficimos la nuesa primer cota del día, El Cuetu, que ye colos sos 789 ms, la más alta del conceyu de Cuideiru y ta asitiada na xerra de los Baos, que tiénenla estrozada con eólicos d'una punta a la otra.

Casi ensín parar, siguimos xerra Los Baos alantre, pasando per un minicolláu con una pequeña llaguna, qu'avéranos a la fastera de las Penas del Vientu. Enantes d'encumar lo que queda de las Penas del Vientu, averámonos al travíes del Altu'l Cordel, hasta'l Picón (801 ms), puntu más altu de la xerra Los Vientos.

Siguimos caleyando peles xerres de los Baos y los Vientos

Cuando digo lo que queda, ye porque les pistes pa plantar los eólicos, casi llévense per delantre tol Picón, quedano namái una paletada de Picón, a la qu'aporto pente cotolles más altes que yo. Dexo, esta cota, que nun me servía pa tachar, ya que pertenez a Valdés al completu y metémonos de nuevu pela pista pa cotar las dos Penas del Vientu.

La primera tien 765 ms y xúbese cenciello, pero la segunda, dempués de bordiar pela manzorga una peñona, costó muncho más de cotar ya que, yera un marabayu de peñes, arbusto baxo y cotolles, nel que nun se veía onde se pisaba.

Kíla nuna de las Penas del Vientu

Enriba too, Kíla empeñose en seguime, envede dir con Pangua y tuve que trepar con ella hasta los 755 ms de la Pena'l Vientu sur. Dempués de saca-y la semeya, tocóme garrala de nuevu y baxar en direición contraria, faciendo malabarismos pa nun danos un fostión.

La verdá ye que la perra nun brazu, y cola otra intentando agarrame a lo que podía pa destrepar, nun foi lo meyor de tol día y más, si cuando póneste a echar cuentes col track a posteriori, ves qu'estes cotes nin siquiera llevanten 30 ms dende'l colláu col Cuetu. Trabayu de baldre... 

Metémonos nun auténticu quebrapates pasando de los Vientos a la xerra del Pumar

Menos mal, qu'acabáronse los problemes y lo que nos quedaba per delantre yera una sucesión de llombes, nes que poder dir apriesa cotando y esfrutando d'un día, que polo menos taba portándose y nun amenazaba lluvia.

Asína ficimos, pasando primeru por la Siella (760 ms), pa dempués d'ascender a los Picones (759 ms) escaecer d'una vegada los molinos de vientu y entrar nuna nueva xerra como ye la del Pumar, onde magar d'un tramu más llargu de camín, completamos les 4 cotes de Cuideiru col Picu La Bordinga (698 ms). 

Dexamos les cotes más altes de Pravia atrás y per delantre'l... Llan de Cubel

Nun solo facemos la última cota de Cuideiru, sinon que fadremos la primer cota de Pravia, cola Bordinga. Y d'ella, pasaremos per un hombru, Picu La Uz, pa baxar pegaos a la fonte col mesmu nome, que tien de danos pasu a l'ascensión a la segunda cota de Pravia, el Llanu Sangreña.

Kíla pasando pol colláu del Llan de Cubel

Equí, toparémonos con un garrapiellu caballos, a los que Kíla, va tener entreteníos un ratu lladrándo-yos y baxaremos al colláu de Llan de Cubel, onde aparte de les vistes a Ouviñana, tendremos muncho más cerca'l nuesu oxetivu del día, el picu Llan de Cubel.

Ascendemos al Llan de Cubel, acolumbrando'l Islla la Deva y la costa pixueta

Nun tenemos mui clara, cual ye la meyor canción pa tal ascensu, pero namái que facemos cume nos sos 683 ms, y asomámonos penriba d'una corona cotolles que tien na cima, vamos poder agüeyar con claridá parte de la costa pixueta y enmediu la mar, el Islla la Deva, dándonos el tema perfeutu pa cellebralo.

Cumal del Llan de Cubel (683 ms)

Equí tamos, 3 hores dempués nesti míticu monte que dió nome a la más mítica banda de folk d'Asturies. Y eso, que toi acompañáu como casi siempre pol gaiteiru y xiblateru de Felpeyu, que ya ye muncho dicir y la mio perra nómase Kíla, que-y vien de la grandísima banda irlandesa. Nun podía ser más folki esta ruta, jeje.

Media horina, bien merecía tar nesti conu casi perfeutu que ye'l Llan de Cubel. Poro tuviemos sentaos protexíos del vientu, pola cotollada y magar de la xinta, pondrémonos en marcha, pero esta vegada cansaos de tanto xube-baxa y de tanta cota por tachar vamos garrar toles pistes que faldean les xerres col envís d'aportar lo antes posible a Busfríu.

Baxamos del Llan de Cubel, pa bordiar por pista tol valle del ríu Uncín

A dicir verdá, la ruta taba planiada pa tener dos coches: unu en Busfríu y otru en Teixidiel.lu ganando con ello, nun comer pista a dolor a la vuelta y sobretou conocer, les brañes vaqueires d'ambes fasteres del valle del ríu Uncín.

D'estes brañes, 3 tan práuticamente embaxo'l Llan de Cubel, La Puerca, Folgueirúa y Teixidiel.lu, y la siguiente al sur d'esta fastera, La Bordinga, vamos tener la suerte de ver les sos cases ya esbarrumbaes dende'l L.lanu la Muela, embaxo'l picu del mesmu nome.

Acolumbramos los altos ñevaos de Miranda y Somiedu

Del L.lanu la Muela, bordiaremos pel sur Los Picones, pol camín de los Asturianos, pente una viesca de pinos madereros y saldremos pelín cansaos al Posadoiru, magar de bordiar pel norte, La Siella. Nesti puntu, baxo los eólicos otra vegada, aparte de ver el pueblu abandonáu de L.lendepín, taremos al fin, más cerquina de Busfríu.

Enantes de dexar estes xerres estraes de xigantes que nel intre, alloquecen a ún, por mor de la velocidá a la que van les aspes, vamos tener la suerte de que les ñubes llevántense un pocu y ver tolos montes de Mirando y Somiedu con una bona ñevada.

Fadremos lo más aina posible'l traviesu de les xerres baxo los eólicos

Agora sí, pasaremos baxo las Penas del Vientu, garrando un camín que baxa faldiando per dientro'l valle d'Uncín, la xerra los Baos. Esti camín, sacante de tener que trepar pela muria d'una casa pa superar una portiella imposible d'abrir, dexarános nun sele descensu en Busfríu.

A la fín, aportamos al coche, onde demientres mudámonos de ropa, ponemos l'últimu discu que cuantayá ficieren Llan de Cubel y quedamos naguando porque dalgún día decídanse a sacar otru nuevu. Espero poder xubir dalgún día, dende'l valle Sangreña, escuchando'l discu.

Aportamos a Busfríu de nuevu dempués d'un llargu tornar

En resume, ruta que bien pudiera ser una mañanera con fartura si la ficiésemos en travesía. Pero a nós, llevónos 5 hores y media completar los 17,3 kms de percorríu, contando tamién, que puédense escaer munches cotes, pa nun acabar superando los 775 ms de desnivel acumuláu que ficimos.

Camudando'l Camín nel Llan de Cubel

Nesta ruta folki peles llendes de Cuidieru ficimos: El Cuetu (789 ms) vértice xeodésicu de Cuideiru y primer cota, La Siella (760 ms) segunda cota, Los Picones (759 ms) tercer cota y el Picu La Bordinga (698 ms) cuarta cota de Cuideiru y primer cota de Pravia; Tamién cayeron el Llan de Cubel (683 ms) y el Llanu Sangreña (682 ms) segunda y tercer cota respeutivamente.

Ver progresos en: Retos montañeros