Pirámide del Fontún: Espolón Asturianos (Vil.lamanín)

Branu 2017

Una vegada más, axuntábemos Dani y yo pa intentar facer dalgo d'alpina y si soi sinceru, toi siendo yo'l que ta costándo-y más poneme en serio a ello, ya qu'ando permotivau cola deportiva y metese a esguilar con seguros y probando cada peña que toques, cuando tas d'apretar enforma nes escueles deportives, pues ye otru rollu mental.

Croquis de la vía por ADN Astur

Aún así, fuimos a decidinos a facer dalguna actividá y como non, siempre-y dexo a Dani que seya quien escueya, ya que tien una llibretina de pendientes y yo déxome llevar, como bon compañeru de cordada, que va col envís de deprender tolo posible.

D'esti xeitu plantámonos en Llión y dempués de la charra-averamientu, onde xurden tou tipu de temes, aportamos al pié de vía, onde echaremos una güeyada pa centrar l'oxetivu. Como siempre, primer llarguín pa Dani, que solventa con dalguna dulda inicial y cambeu de turnu.

Averamientu rápidu y pindiu hasta'l Fontún

Tuve la suerte, a dicir verdá, de facer los únicos dos llargos d'escalada real, ya que montamos una primer reunión baxa y llueu empatamos lo que pa nós fue'l segundu y terceru. El primeru navegable con spits y el segundu más apretón con un murete final hasta aportar a una repisa con dos spits de reunión.

La calidá de la roca pues nun ye que sea pa tirar voladores con munchu mugor y poques repeticiones que den a alcontralu llimpín, pero esguilase con ciertos prestor. Aporta Dani hasta mí y entramos nel momentu de la indecisión, ya que sabíemos d'una travesía hacia un pasu de tercer grau o una más direuta de V... pero tenemos enriba la tiesta un cordino con un clavu... pero pinta de V nun se yo.

Segundu y tercer llargu del tirón... mui disfrutón

Tiro p'arriba y refuerzo con un friend qu'entra bien, pero desploma de coyones y casi cuando toi arriba veo que nun hai agarres curiosos como pa nun fallar. Nun tengo ganes de volar sobre un clavu, con un posible fallu d'esti y tola carga sobre una reunión con dos spits con una pinta... más bien vieya y fea.

Pasando... destrepo... y Dani aliviáu que ta, poro desdexamos esa salida de la reunión, que sedrá 6b como mínimu y entamo una llarga travesía ensín meter na, hasta ver una plaquina onde creyemos que debiera tar el clavu.

Na segunda reunión y final de la escalada seria

Nun lo atopo y tampoco ye qu'entre gran cosa, así que sigo travesía y métome na trepada de III, hasta dar cola tercera reunión (en nuesu casu). Un par de tirones pa Dani sepa que tamos, ya que nun mos oyemos bien y tira p'arriba con tranquilidá.

Ensin ver a Dani, sé que va probar esa placa y cuando lo veo asomar, diz qu'alcontró'l clavu pente una mata. Bono, al menos camiento que menos mal que nun mos metimos nel desplome ya que yera claru que de V nun tenía na de na.

Dani a la salida del pasu de V del clavu escondiu y siguiente llargu de matu

Echamos unes rises na reu, diciendo'l telar si llego a salir pel posible 6b, ya que tuviera que destrepar hasta la reunión que quedaría a la so manzorga y la pena del clavu del V que nun ví. Facemos cambeu de primeru y tira p'alantre un llargu de xardinería con dalgún pasín de III, onde hai que tar más atentu a les piedres sueltes y la yerba qu'a denguna otra cosa.

Tamos na primer parte d'una chimenea y cuando la cuerda ta pa terminase, monta reunión y xubo hasta él, recoyendo dalgún aniellu llaceáu a mou de seguru. Sentámonos nun planu cómodu y decidimos quitar los gatos y siguir con playeros de treking ya que'l restu del chimenea ye más matu y más trepaes de segundu.

Tramos trepada y aseguramientu d'un pasín de IV

Al final de la chimenea, tendremos los momentos más montunos, teniendo que pasarnos al espolón, con trepes bastante espuestos y onde la navegación pa superar les distintes aguyes pelo más cenciello ye lo más importante.

Esfrutando de trepes y destrepes montunos, siguimos alantre hasta dar con una forcadina onde tendremos la última dificultá, que nun ye otra que plaquina de 4 grau, pa la que volvemos a poner gatos y sacamos dalgún trastu p'asegurar el pasu.

Cume na pirámide del Fontún

Dámos-y preste al pasu, apretando un pocu más de lo pensáu y sigo alantre con una trepada continua de III hasta un blocón onde monto reu con un aniellu y mando a Dani p'arriba, ya que nun s'aprecien más dificultaes hasta'l cumal.

Tiramos coles cuerdes al llombu hasta la cume y ya col atapecer amenazando cellebramos una vía más que tachamos xuntos. Una vía, que ye totalmente de coleccionistes, mui montañera, pero con una toque especial, pola escalada anicial y los posteriores trepes y navegación pel espolón.

Dani rapelando pela cara contraria

Y que coño, col nome d'Espolón de los Asturianos, había que dir facela, sobretou cuando dempués de la escalada, pues dir a esfrutar d'un par de cañes n'Ezequiel poniéndose fino d'embutíu, mientres mires per onde anduviste engoláu dende la propia terraza.

Esti añu, munches más y meyor... esperemos!!!