Track: San Andrés (Uviéu) - Guanga - Plantón - Grandamiana - Villanueva
Paez ser que ta moda la ruta los tabayones de Guanga, lo cual ye mui d'agradecer ya que paezme una ruta cenciella y mui divertía de facer. Dígolo, porque la casa conceyu d'Uviéu a petición de Somos, quier facer d'esta ruta un atrautivu turísticu.
Personalmente, siguiendo coles entraes de los collacios Cienfuegos, Los de las Claras... faigo mi particular visión d'esti sistema de saltos d'agua, que puen facer les delicies de los senderistes nun día de calor pesáu como'l que tuvimos nós.
Preparaos na ponte sol ríu Trubia (X m)
Saldremos del pueblu de San Andrés, al qu'aportamos dende Xixón pela Y griega primeru y llueu pela A-63 hacia Grau, hasta'l desvíu pal valle'l Trubia. Dempués de pasar per Trubia, llantámonos en San Andrés, preparándonos pa caleyar y saliendo del llau del llavaderu en direición a les cases de la Carrilona.
En plena recta y enantes de siguir carretera hacia Castañeu'l Monte, al contrariu que los nuesos collacios blogueros, salímonos a la mandrecha per un caleyu pindiu con cuerda guía a mou de pasamanos el cual llévanos a un antiguu molín del Regueiru Guanga.
Visitamos el primer tabayón de Guanga
Con pocu más que siguir el senderu, bastante amigable, pasamos del llau d'una cabañina y dámonos de frente col primer tabayón, el cual baxa con fuercia, poro agradecemos les caberes lluvies pa tener esti espeutáculu tan prestoso.
Nesti puntu, debemos cruciar la riega baxo'l tabayón y salir a la manzorga per pindiu tarrén pa xuntanos al senderu que vien dende la carretera desplicáu polos collacios blogueros. La nuesa forma d'entrá-y al primer tabayón fai que la ruta seya completa enforma, poro a vegaes les casualidaes de nun siguir el track furrulen como ta mandáu.
Guapes semeyes col segundu saltu d'agua
Nel senderu, pasaremos per un pequeñu banzáu y siguimos sienda alantre, con tramos mui pindios y dalgo embarraos que faen qu'haya qu'agarrase a lo que podamos pa siguir avanzando. Aún así, avánzamos pente rises dando col segundu tabayón qu'acolumbramos dende lo baxo y dende riba.
La verdá ye que ta prestándonos conocer esta rutina y ye que teníemos xente nel grupu que ficiera la que ta marcada y na que tan sólo ves l'últimu de los tabayones y más conocíu pola so forma de cola de caballu.
Facemos el tramu más transitáu pente'l tercer y cuartu saltu
Dende'l segundu, el senderu faise más cómodu y disfrutaremos de caleyar del llau de la riega de Guanga, la que nun para de saltar con cayíes más curties pero siempre con bon calce. Nel intre, aportamos al terceru de los grandes saltos y como non, toca otra sesión de semeyes pa la xente y de bañu pa Kíla.
Otros minutinos de paséu prestosu a la solombra la viesca y daremos col caberu saltu de Guanga, el más nomáu y más visitáu, lo cual tamién albidramos por mor de dalgún pañuelu y dalguna basoria. Dacuando, val más que les coses nun seyan conocides, pero bono, camiento qu'esta ruta ye un bon atractivu montañeru pal conceyu d'Uviéu.
Ascensión a la Peña'l Castiellu (X m)
Tolo bono fina y tenemos que dexar la viesca y la humedá del regueiru Guanga, pa pasar al calorón y a la solana, demientres facemos un rápidu ascensu hasta la Peña'l Castiellu de X m. Nun ye gran cosa, pero completa'l paséu de los tabayones con vistes de L'Aramu y del Valle'l Trubia.
Dende equí, pa completar una bona mañanera, recomendaría baxar pel camín marcáu p'ascender al últimu tabayón y descender hacia San Andrés, nuna circular bien prestosa, que daría tiempu a metese una farturina en cualesquier llugar del valle.
Entamamos a bordiar la xerra de Guanga
Nós, vamos siguir de ruta, col envís de bordiar tola xerra de Guanga y ascender al so puntu más altu. Pa ello, siguimos una amplia pista que crucia'l regueiru Guanga y garramos un senderín que dirá pente felechales a media faldera de la xerra.
A dicir verdá, guapu nun ye y lo únicu que nos va entreteniendo ye echar un vistazu a les quintanes de la Corredoria y aldovinar qu'hai tres de les llombes más al oeste. Tamos nuna fastera que nun controlamos res y ye que vamos entrando nel conceyu Grau y más en concretu, na parroquia de Sama.
Xubimos pelín a pinchu hacia'l Plantón
Ensín muncho onde rascar, siguimos ascendiendo pel senderu, hasta qu'aportamos a una especie de vallina, per onde Charly y yo decidimos ascender a pinchu, alcontrando traces de senderu hasta'l propiu cumal.
El restu'l grupu decide dir hasta una colladina más al sur, pa tener que tornar so los sos pasos y acceder per esa fastera sur hasta los 751 m del cumal más altu d'esta xerra de Guanga, nomáu como'l Plantón y anque nun soi favoratible de los buzones, el del Plantón ye bien guapu.
El Plantón (751 m)
Llevamos x hores de ruta, poro decidimos tiranos a xintar cola mayor de les calmes y ye qu'hai que dicir que l'averamientu al monte nun ye pa tirar voladores dende que dexamos el regueiru de Guanga, pero les vistes de tol valle'l Trubia, Grau, L'Aramu... paguen la pena como pa tar un bon ratín.
Llueu de la fartura y casi siesta, baxaremos hacia'l colláu que da pasu a la carretera que tira dende Castañeu'l Monte a Llinares, xusto a l'altor de la fonte Las Fileras y ellí, Richar anímase a xubir al monte más altu de Santu Adrianu... el picu Grandamiana.
Gafienta ascensión al picu Grandamiana
Pa ello, ascenderemos un pelín pela carretera empobinándonos hacia Llinares, hasta que vemos un camín que sal a la mandrecha, per onde nos meteremos col envís de da-y la vuelta al monte y entrar per fuera del prau.
Nun tien munchu que desplicar ya que ye más xubir per onde se pueda. Ye más nin siquiera soi a encomendar l'ascensión a esti montucu enllenu de broza, escayos y cotolles. Llamáime repuntante, pero ye hasta una pena qu'esti monte tenga sus 50 m de colláu en tola redolada, porque taría encantáu de dexalu como un hombru y qu'otru monte pasara a tener esi privilexu.
Cotoyal nel Grandamiana (808 m)
El casu ye que xubímonos a esti cumal de collecionistes totalmente y baxamos d'ellí per onde meyor podemos. Que pena que'l Plantón nun seya un pelín más altu, porque al menos sí que tien bona presencia como cota superior de Santu Adrianu y de tola xerra de Guanga.
Ensín más, escaecemos esti monte y plantámonos en Llinares a la gueta d'un camín col que descender hacia les mines de la Parva. A la fín, alcontrámoslo per detrás d'unes cases y pasando al llau d'unos depósitos.
Caleyamos per guapa viesca pasando peles mines de X
Lloñe de meténos en dengún xardín vamos alcontrando cada vegada meyor camín y conocemos una viesquina bien curiosa que va penriba de la riega de Sabadía, xuntándonos al cabu d'un ratín cola pista que fai un PR alrodiu les mines de la Parva.
Paez ser qu'estrayíase fierru asína qu'echámos-yos un vistazu y tiramos aína hacia Castañéu'l Monte, dándonos cuenta que malpenes tamos cien metros pembaxo del cumal del Plantón. Menuda vueltona dimos hasta'l Grandamiana... tela.
Pequeñu percorríu pente Castañéu'l Monte hasta Villanueva
Perpasamos Castañéu y baxaremos per un caleyu pindiu enllenu basoria, pa enllazar nuna cómoda pista que xune Villanueva con Cuallagar. Nun tenemos más que dexanos dir valle abaxo dexando a la manzorga la vega Sabadía y dempués d'una envuelta pasaremos pembaxo de los parés de la escuela de Villanueva onde tantes vegaes esfruté de la escalada.
Con kilómetros nes pates y un secañu perimportante paramos nos chigres-tienda de Villanueva a tomar una cotollina y nun mos quedará otra que zampar tola sienda l'Osu al meyor ritmu que mos dan los nuesos pies cansaos.
Cansín tramu de la senda l'osu hacia San Andrés dende Villanueva
Los más de 6 km faesen pesaos enforma, pero al menos el calor baxó, aportando a San Andrés magar de 8 hores y media de patéu, con un percorríu de 20 km y un desnivel acumuláu de 1485 m, lo cual así de primer man... nun contaríemos con ello.
En resume... ruta interesante más bien pa facela nuna mañanera colos tabayones de Guanga y la Peña'l Castiellu, pero bono si queréis facer más llarga la ruta, pues l'ascensión al Plantón paga la pena y el Grandamiana pues como dixi... pa coleccionistes.
Ta la próxima....
Camudando'l Camín col agua como protagonista
Guapa ruta Berto, yo fíceles delles vegaes y en poco tiempu, pero yeren salíes a la fotografía principalmente y por ello quedamos colos saltos d'agua y el Castiellu. Vós la ampliásteis col Plantón y el Grandamiana, eso tuvo perbién.
ResponderEliminarUn saludu