Vegarredonda (Cangues d'Onís) - Torcu - Les Tres Maríes

29 d'Ochobre de 2016

Track: Vegarredonda (Cangues d'Onís) - Torcu - Les Tres Maríes

Madrugada brutal y vuelta al Cornión, esta vegada, en compaña de Pepa y Jose col envís de facer una actividá qu'al igual que l'anterior al Porru Bolu y Llagu, ye un amiestu pente'l montañismu y l'alpinismu.

¿Como dixebrar delles actividaes tan lligaes? Pues pa min, nun hai manera, así qu'apaecerá n'ambos apartaos, porque bien lu merez y porque al menos l'ascensión a la Torre'l Torcu nun requeriría obligatoriamente de cuerda, anque por seguridá que nun quede.

Caleyamos col alborecer hacia'l Cornión

Como dixi, madrugada perimportante y tamos col alborecer en Pandecarme, p'ascender como siempre hasta Vegarredonda. Ellí, enllenamos la cantimplora y salimos p'arriba hacia la Llampa Cimera, pa desvianos hacia'l colláu la Fragua, onde'l sol apreta enforma.

Paez mentira que teamos a finales d'Ochobre, ya que va fadiándome hasta'l pantalón llargu. Jose que ye pelín frioleru, va cocíu col forru polar y paramos a echar un traguín, quitar ropa y rellanzar l'avance hacia'l H.usantu a través de Les Barrastroses.

Facemos camín hacia'l H.usantu con vistes increyibles

El camín ye perconocíu, fícelo milenta vegaes, pero siempre sorpréndeme la belleza d'esti llugar y voi faciendo alcordanza de los cumales qu'arródienme y que ya fuí ascendiendo col pasu los años, entamando pola Peñesanta d'Asturies, Torre la H.orcada, Torre d'Enmediu a la mandrecha'l H.usantu y Picu Los Asturianos, Torre la Canal Parda y Torre los Traviesos a la manzorga.

Enfrente, como non, tenemos la Peñasanta Castiella, onde Fernan se supón que dábame'l relevu, pero tovía siguimos faciendo les mesmes coses y nunca tuve que xubilo yo a él jaja. Al final, cuando hai que ponese a trepar sigue moviéndose como cuando dixérame aquelles pallabres va unos añinos ya.

A la fín conocemos la fonte Las Balas de camín hacia'l Torcu

Cruciamos el H.usantu y de tolos cumales que lu arrodien tan sólo quédame por encumar la crestería de la Torre'l Torcu a Les Tres Maríes, asína que p'allá vamos. Pasamos pel colláu de la Canal Parda, con vistes hacia'l Boquete y Los Urrieles, que tan abandonaos tengo esti añu y baxamos a lo fondu'l h.ou onde alcontramos por casualidá y dempués de muncho oyer falar d'ella... la h.uente Las Balas.

Dende la fastera sur del H.usantu, travesamos de la h.uente hacia la baxera de la torre'l Torcu, viendo'l canalizu carauterísticu pel qu'asciéndese, pa ganar la h.orcadina que lu separa de les Tres Maríes.

Trepamos peles llambries hasta entrar nel canalizu

Treparemos delles llambries, viendo qu'hai varies opciones, que con mayor o menor dificultá y siguiendo unos h.itos u otros, tendrán de dexanos nel entamu del canalizu. Nós, salimos a la mandrecha de más y tuviemos que facer una travesía pa ganar el canalizu, pel que siguimos xubiendo na so primer parte sin mayores dificultaes.

A la metá, aproximádamente, paramos pa poner el cascu, ya qu'había piedres en delles repises y había qu'andar sollerte de nun faceles esnalar. La parte final, caltendrá les mayores dificultaes con dalgún pasu de III, los cuales pueden protexese con dalgunos llazos en pontes de roca y dalguna reunión intermedia que podría servir pa rapelar.

Finalizamos la parte final del canalizu onde concéntrense les dificultaes

Nós, fuimos esfrutando de tolos trepes, qu'anque verticales en dalgún puntu, siempre tienen bones preses, poro tando de movese nestos llugares y metíos nun canalizu, sin sensación aérea, nun deberíen suponer dengún problema a montañeros avezaos.

Metíos na h.orcadina coles Tres Maríes, dexamos les mochiles y entamamos l'ascensu a la Torre'l Torcu per una especie d'anfiteatru o canaliza grande, que tien de dexanos n'arista cimera aportando a un primer cumal.

Trepamos l'arista final al naguáu Torcu

Dende esti primer puntu, onde Jose para a echase un cigarrín, tan sólo quédanos una cenciella y amplia arista, con un destrepe y trepe enmediu, pa finar col puntu más altu de la Torre'l Torcu con un altor de 2456 m.

Les vistes son impresionantes, destacando la Peñasanta llionesa, pero tamién dende equí, ver tol cresteríu de les Tres Maríes, Torre d'Enmediu, Torre la H.orcada y la Peñesanta d'Asturies ye una pasada... un caos calizu increyible de formes.

Cumeee na Torre'l Torcu (2xxx m)

Al oeste, préstame ver tola xerra Mercader col Camperón y alcuérdome de l'ascensión pelos Sedos d'Ozania, anque tamién sálenme los picores pendientes cola torre La Cabra Blanca, que nun pudimos facer Fernan y yo meses atrás por mor del mal tiempu que nos entraba.

Magar del pitín de Jose y les semeyes de rigor, decidimos descender pel mesmu sitiu hasta la h.orcadina, onde picaremos dalgo de chocolate, ya que a lo tontu llevamos un total de 4 hores d'actividá dende Vegarredonda y ye qu'hai que dicir que l'accesu hasta la base del Torcu ye perllargu.

Descendemos del Torcu y preparámonos pa la primer María

Darréu, tamos enfrente de la primer y mui desafiante María. Echamos un vistacín a los croquis d'El Maquis y tamién al llibru de Carlos "Llambriales" pa agüeyar cuala ye la meyor opción y decidimos poner los gatos y asegurar el pasu.

Jose pónese al llabor y camienta que sedrá menos espuestu, facer la esguilada saliendo pela manzorga del techín, que tien enantes d'aportar a l'arista. Dellos croquis, ponen de III- saliendo pela mandrecha del muru y pa nós, el pasu pela manzorga sedrá de IV como mínimu, pero con un friend protéxese bien, anque hai que dir finu de pies y con gatos muncho meyor... les semeyes de la placa falen soles.

Facemos el llarguín de la primer María per una placa fina

Llueu del primer llarguín, salimos a l'arista cimera de la primer María, con dalgún pasín sueltu de II y ya ensin encordar facemos cumal nos 2408 m. Facemos semeyes pa un llau y otru, ensin menease muncho, ya que les caídes sobretou pal H.usantu son d'ablucar y avanzamos un pelín más pela arista hasta alcontrar un bon rapel.

El rapel, ye de 30 m clavaos y quédase un pelín curtia la cuerda, poro andai sollerte ya que dexarános en mediu d'una llambria la cual tendremos d'acabar de destrepar. Rapelamos por turnos y xuntámonos na h.orcada cola segunda María, viendo qu'esta primer María ye dafechu llibrable caminando si nun mos da por llevar trastos p'ascendela.

Facemos el restu d'arista, cumal de 2xxx m de la primer María y rapel p'abaxo

La segunda María va tener el mayor calter montañeru del día, faciéndose ensín asegurar pero coles mayores cayíes al vacíu del día. Tamos falando d'una cresta increyible, finísima en dalgún pasín, pero con una calidá de caliza en xeneral perbona.

Saldremos nun primer momentu, con una remontada cenciella pa ganar el filu de l'arista y llueu siguiremos casi siempre "caleyando", trepando y destrepando penriba, faciendo dalgunos pasos mirando pa la fastera del H.ou Les Poces, hasta algamar el cumal de 2401 m.

Trepe finu pela segunda María hasta'l so cumal de 2xxx m

Dende'l cumal de la Segunda María, tocará descender metiéndonos na parte más fina y aérea del cresteríu. El vuelu sin motor p'ambos llaos ye p'alloriar, pero la verdá ye que con gatos, práuticamente fice tolos pasos penriba del filu sin problemes.

Pepa y Jóse, saliéronse nun destrepe aéreu hacia'l H.usantu y fué lo más espuestu del día, ya qu'esa fastera ye norte y la peña caltenía xelu tovía, pero como dixi con confianza val más siguir pel filu faciendo equilibriu a lo funambultista.

Destrepe espuestu y vamos a poles 3 aguyes de la tercer María

Llevamos una horina y cuartu de cabalgada sol vacíu, trabayando caún de les Maríes y quédanos la última, la Tercer María, formada por tres aguyes tamién. Pudiéramos dir a pola más alta y acabar cola crestería, pero ta faciéndose hasta curtia asína que decidimos atacar les tres.

Fina, fina la crestina de la segunda maría

Pero enantes, echamos un vistazu atrás, pa ver con impresión, como afílase la segunda María na so parte final, lo cual comentamos animaos y sin danos cuenta, travesamos la primer aguya a media altura y metémonos na h.orcadina entre elles.

Lo normal, sería ascender esta primer aguya del tirón, dir a la segunda y volver pa llueu rapelar dende la primer aguya a la h.orcada. Pero bono, nun mos dimos cuenta y preferimos dexar mochiles na h.orcadina y trepamos a la primer aguya dende ella teniendo un pasu de IV que nun mos dió por asegurar.

Pasamos pela primer aguya de la tercer María

Cuando tamos toos na primer aguya de la Tercer María (vaya líu jeje) crestiamos un pocu hacia una mínima h.orcadina pa dir por turnos hasta la ínfima cume de la segunda, onde posa Pepa encantada d'andar per estos desventíos.

Volveremos los tres a la primer aguya onde facemos la semeya estúpida del día a lo "Ángeles de Pepa" cola muria de la aguya mayor de la Tercer María como telón de fondu. Equí, quedaba destrepar esi pasu de IV o rapelalo dempués de llacear el cumal con un cordino que dexamos pa la posteridá.

Facemos tamién la segunda aguya y a la h.orcadina de nuevu

El destrepe sería en cara norte y con una cayida a los infiernos nel H.usantu y nun tenemos ganes d'esponenos de más, tan cerquino del final. Asina que rapel en turnos y preparámonos pa la cabera ascensión del día cola cota más alta de la Tercer María y de tol cresteríu.

Tendremos de salvar una pequeña escalada que sal per una fisura vertical, con tendencia a la manzorga, dexándose protexer pero con una calidá de roca pelín podre, asina qu'hai que mirar bien onde metemos trastos y comprobar cada pasu.

Llargu aseguráu y cresta finísima na Tercer María

Llueu de la fisura en diagonal, fadremos un cambeu de sentíu per un canalizu más tendíu que de forma cenciella déxanos nuna reunión dende la que poder asegurar al restu de cordada. Dende equí y col cumal a la vista, metémonos nuna afilada crestina hasta los 2416 m de la Tercer María.

Pepa na Tercer María (2xxx m) cola Peñasanta Castiella de fondu

Les lluces del día van cayendo y Jose va a lo suyo y nun para a facer semeya nel cumal, así que Pepa posa pa la posterioridá cola Peñasanta llionesa al fondu y avanzamos en descensu pela fina arista hasta alcontrar el montaxe del rapel que servirános pa descender d'esta torre.

El rapel, sedrá más cortu que'l de la primera, pero tien un puquiñín de voláu al entamu, asína que debemos dir controlaos y llevar ñudu de seguridá pa llevar un rapel seliquino y disfrutón hasta lo más fondu del canal, que tien de servinos pa descender a pie hacia la H.orcada L'Alba.

Rapel de la Tercer María y canalizu podre pa descender

Fadremos el rapel y enantes d'entamar el descensu final, decidimos picar dalguna barrina más y un pocu chocolate, calteniendo en tola baxada l'atención ya que'l canalizu tien muncha piedra suelto y dalgun qu'otru destrepe d'escalones verticales.

Encomiendo a siguir col cascu tol canalizu hasta abaxo, por mor de les piedres y llueu saldremos a una llerona sol H.ou Les Poces y baxo les paredes de la Torre d'Enmediu, pel que baxaremos poquín a pocu hasta dar col "senderín" qu'aporta a la H.orcada L'Alba y sigue hacia la H.uente Prieta.

Paséu coles últimes lluces hacia la H.uente Prieta y colláu Les Merines

Esti tramu fechu en delles ocasiones, anque la que más aseméyase nel percorríu, sedría nel nuesu ascensu a la Torrezuela, facémoslu con calma, a sabiendes de que por muncho qu'entainemos va tocar sacar el frontal.

Aún así, ponémonos como bon tiempu, aportar al refuxu ensin tener que sacalo y cumplímoslo, magar del paséu típicu dende la H.uente Prieta al colláu Les Merines, baxando pela Cuesta Cebolleda hasta'l Llanu Los Pozos y d'ehí pela Llampa Cimera too p'abaxo hasta Vegarredonda.

Pepa y Jose despidiéndose nel atapecer de les Peñes Santes

Nel refuxu, de nueche y nun día que nun fai nin gota fríu, faciendo tola actividá en manga corta, paramos a merendar el restu de la comida que llevábemos y a tomar un par de cerveces pa cellebrar tan guapa actividá.

Aún nos quedaría tol camín hasta Pandecarme, nuna de les nueches más estrellaes que viera en tiempu, tanto que dacuando apagábemos el frontal pa poder dir mirando pal cielu embobaos, demientres pasaben los minutos y les vegues, hasta aportar a l'aparcaderu de la h.uente Verdayes.

En resume, actividá de calter alpinu, que sálese un pocu de la categoría montañera y nel que los trepes, destrepes y "paseos" xueguen col vacíu en tola crestería, faciendo que tuviéramos un total de 9 hores y 40 min d'actividá, percorriendo un total de 12 km y superando un desnivel de 1190 m, a lo que debemos sumar los datos típicos de xubida y baxada entre Pandecarme y Vegarredonda sinon pernoctamos.

Anque como siempre... los datos son lo de menos... ya que les sensaciones son úniques.

Camudando'l Camín na Torre'l Torcu