La Foceicha (Teberga) - Picu Las Piedras

29 de Payares de 2015

Track: La Foceicha (Teberga) - Picu Las Piedras

Ayeri anduviéramos Pau y yo de monte con dellos collacios blogueros d'Asturies y Llión y nel día de güei, tocaba dir col GM Xuan de la Borrina a la ruta escoyida pa esti añu por Zori, llevándonos esta vegada a tierres teberganes. Los nuesos pasos tienen de llevanos a conocer parte de les maraviyoses brañes teberganes peles que cuerren dellos PRs asturianos.

Poro, saldremos de Xixón pel camín davezu hacia'l valle del Trubia, primeru pela autovía Y griega, garrando n'Uviéu l'autovía que va pa la Espina, saliéndonos nel desvíu hacia'l Trubia, travesando los conceyos de Santu Adrianu y Proaza, siendo nel pueblu de Caranga Baxu, onde tomamos direición a Teberga entrando n'él pol pueblu d'Entragu, hasta parar na capital tebergana de La Plaza.

Magar del almuerzu n'Aladino como siempre, siguiremos hacia'l puertu Ventana pasando pelos pueblos teberganos de Las Veigas, Riel.lu, El L.lanu y Parmu onde debemos salir a la mandrecha hacia'l guapu y fríu pueblu de La Foceicha. 

Puntu de partida en La Foceicha (1078 m)

Cuando digo lo de fríu, ye porque diónos la sensación de que n'iviernu nun debe pegar el sol más qu'unes poques hores y eso paecía ser un bon motivu pa nun ver nin una presona per ellí en tol día, aparte de vendese munches cases.

Preparámonos y salimos a escape hacia onde pegase'l sol liándome un pelín pa salir del pueblu hasta alcontrar el bon caleyu pela Cuesta Rica, los Tablaos y el Posafueches cola intención d'ascender pel valle de Cuevas, dalgo más desconocíu que'l de la Cundia Negra que sal de Torce.

Los tabayones de Cuevas allegren el camín per esti valle

Asína que diremos ascendiendo primeru per pista formigonada hasta pasar a un ampliu camín qu'averaráse a la riega Cuevas onde tendremos un preciosu camín empedráu dende'l qu'esfrutaremos de los tabayones que salten con fuercia de resalte en resalte d'esti preciosu valle.

El camín ponse pindio enforma y tresfórmase nuna sucesión de peldaños, pelos qu'avanzamos hacia la cabecera del más altu de los tabayones, saliendo magar d'hora y media a un pequeñu mayáu que va danos pasu pente plaques de ñeve xelaes hasta la braña de Cuevas baxo los paredones de la Peña Negra.

Aportamos a la braña de Cuevas baxo la Peña Negra

Equí perderemos dellos minutos en decidir cuala ye la meyor escoyeta pa bordiar la Peña Negra, ya que los tracks dan una llarga envuelta pa entrá-y al Puertu de Cuevas pela manzorga. Nel intre, toparémonos col únicu paisanu del día y entrugámos-y que nos encamienta.

Diznos qu'a la mandrecha, que ye la opción más curtia, había un camín pero que tará zarráu y que será difícil pasar, pero diz que facer la envuelta llarga pela manzorga tampoco va tar muncho meyor, así que decidimos facer atayu y como siempre nun hai atayu sin trabayu.

Salimos de la braña pente los piornos hacia'l Puertu Cuevas

Menuda llucha colos piornos, d'un tamañu como poques vegaes ví na mió vida, teniendo que dir en munches ocasiones a cuatru pates pembaxo de les rames que cruciaben el senderu, faciendo'l pasu casi imposible. Y digo bien, senderu, porque Canta, Benjamín, Kíla y yo, fuimos per un claru senderu que traviesa en dos llargues envueltes l'espolón que baxa pela mandrecha de los puertos de Cuevas, pero ta dafechu tomáu.

Los demás, camiento que fueron más llistos y garraron la fastera más nueva de piornal, onde malpenes superen l'altor del cadril y xubieron a lo xole de frente, anque pol tiempu que tardaron la llucha sedría asemeyada. Lo nueso, personalmente fué una auténtica batalla jeje y los brazos esgatuñaos asina lo confirmaron, cuando a la fín xuntámonos toos enmediu l'hombru del espolón.

Salimos del Puertu Cuevas hacia'l Picu Las Piedras... cola única ñeve a pisar

Dende equí, col camín pelín más marcáu y más llibre, avanzaremos aína hacia la parte alta, saliendo a la parte norte del Puertu Cuevas onde entamaremos, per tarrén cenciellu nuna llarguísima ascensión de casi 200 m de desnivel, hasta la cumera del Picu Las Piedras que pesie a ser una llomba enorme, tien unes vistes estupendes dende los sos 1930 m.

Ya ye la segunda vegada que toi nesti monte, pero esta vegada tuve tiempu pa tar relaxadamente nel cumal, cuando la primer ascensión, viniera corriendo con Kíla dende los Bígaros, pasando per Carbacedín, Las Piedras y L'Aguil, pa completar una circular de cumales del Puertu La Mesa.

Cumal del Picu Las Piedras (1930 m) col macizu Penubina tres de nueso

Con esto, quiero dicir que siempre se puede facer dalgo dafechu distintu col mesmu fín y que seya nuevu y motivante... tan sólo hai que buscar alternatives pa qu'un monte vuelva a ser encumáu con tantu ánimu como la primer vegada.

Cuando dellos sabios dicen que'l cumal por sí mesmu, nun ye nada, sinon que la importancia tienla'l camín que facemos hasta aportar a él, sedrá por dalgo. Güei, esta cita tien más xacíu que nunca, ya que ye imposible facer comparanza d'una ascensión completa como la fecha dende la Foceicha, a facer el picu Las Piedras como un paséu complementariu a una ruta pel camín de la Mesa.

Coles increyibles vistes pasaremos per Carbacedín hacia las Navariegas

Llueu de la xinta mirando cumales tan prestosos como los nomaos Bígaros y Muñón al oeste, Michu y Pena Prieta al norte y sobretou tol macizu de Penubina al sur, siguimos tranquilamente hacia la siguiente llomba, la del Carbacedín (1895 m), echándo-y una güeyada a la so faldera onde asítiase la braña Carbacéu. En X tiempu tamos nel so cumal y vamos avanzar pela cuerda'l cordal hacia L'Altu Las Navariegas (1820 m) onde buscaremos la meyor forma de descender hacia la braña Las Navariegas.

Cola vista puesta nel Picu La Ferreirúa, muncho más cercano de lo que pensábamos, alcontramos el senderu perfeutu nel colláu X, pa baxar cómodamente nuna amplia envuelta pela faldera del Altu Las Navariegas, pa siguir aténtamente unes buelgues qu'asemeyábense a les d'un bardión. Nun ye que seyamos espertos nin muncho menos, pero ya son unes cuantes vegaes que vemos buelgues d'osu nes nueses rutes y estes na ñeve paecíen claramente d'un bon exemplar.

Baxamos hacia Las Navariegas con dalguna buelga sospechosa

Ensín más, paramos nas Navariegas a descansar un ratín, echándo-y un vistazu a les cabañes topándome cola cabaña na que va unos añinos Raúl, Simón y yo, a menos 3 graos baxo cero, fuéramos a picar dalgo de chocolote enantes d'escapar d'ellí hacia Cueva Güerta de nuevu. Esta vegada nun fai tantu fríu, pero ta claro que nesti valle al igual que nel de Cuevas, les temperatures nun son mui altes precísamente.

Coles mesmes, entamaremos el descensu, con curiáu ya qu'alcontramos xelu penriba los praos, la tierra y sobretou demientres cruciamos la riega La Verde, que poquín a pocu va medrando'l so caudal hacia ún de los mayores espeutáculos del conceyu de Teberga: los Tabayones del Xiblu.

Baxamos al llau la riega La Verde hacia los tabayones del Xiblu

Llegará un momentu, nel que separámonos de la riega a la que vemos desapaecer nun rápidu qu'a lo postreru veremos como precipítase nel primer saltu del Xiblu.Puede que poques vegaes nos coincida'l tabayón con un caudal asemeyáu, asina que tuviemos paraos a cada puntu del descensu en que teníemos la suerte de velos.

Ficimos milenta semeyes esfrutando de cada ún de los tres saltos que formen el Xiblu y siguimos camín dexándonos llevar nel guapu descensu pel fayéu de la Ferviencia, hasta ver más cercana la fín de la ruta.

Fayéu y agua per tolos llaos y el Tabayón del Xiblu

Con cansanciu y poques minutos de lluz más, aportamos a la Foceicha onde nun mos alcontramos con absolutamente naide, nin humanu nin animal y onde la temperatura paez ser tan baxa a les 5 de la tarde como a les 10 de la mañana cuando saliéramos.

Abúltanos estrañu nun topar nin un perru sueltu nel pueblu, pero bono, entainamos a mudar la ropa porque nun hai quien pare de fríu y baxamos colos coches hasta Parmu onde tomar una cervecina o un caldín depende lo gayoleros qu'anduviésemos de temperatura en cuerpu.

En resume, una nueva ruta nel conceyu de Teberga, onde nun sólo esguílase nes sos peñes, Sobia y Gradura, sinon que podemos caleyar per llugares increyibles enllenos de vida y collores, pa ello como siempre... dalgo d'esfuerzu y ganes de lluchar cola vexetación en dalgún momentu de les 7 hores y media de ruta nes que percorrimos 13.5 km y superamos un desnivel de 1110 m.

Que vos preste!!!

Camudando'l Camín nel conceyu Teberga