Vega Urriellu (Cabrales) - Torre L'Osu

9 de Setiembre de 2014

Track: Vega Urriellu (Cabrales) - Torre L'Osu

Va un par d'años que dexamos los viaxes al Pireneu, compensándo'l gastu de perres nel desplazamientu, con tola diversión posible y preparando ascensiones prestoses, complexes y que nos den esi puntu d'aventura que sólo en Picos se puede alcontrar.

Si l'añu pasáu garrábemos el nuesu campu base nel refuxu del H.ou Los Cabrones, esti añu decidimos pasar tres díes nel de Vega Urriellu al cuál apórtase como siempre pel camín davezu, siendo nel nuesu casu un paséu baxo la lluvia na fastera de la Trenosa.

Preparaos na Vega Urriellu (1943 m)

Magar d'una nueche tranquila, durmiendo como poques vegaes na mió vida, a les 8 la mañana tamos almorzaos y preparaos con tolos trastos necesarios pa dir pola Torre L'Osu. Esti picu ye un de los cumales que forman paré nel H.ou Tres el Picu, que como diz el so nome, tan asitiaos al sur del Picu Urriellu, en direición a la mítica collada Bonita.

Poro, saldremos del refuxu hacia la canal de la Celada, pela cual empobinámonos baxo'l rellume del sol sobre'l nuesu recordáu Neverón d'Urriellu, lo que nos diz a les clares que vamos tener un día perguapu pa trabayar sele l'ascensión al nuesu oxetivu.

Camín clásicu pela canal de la Celada hacia'l colláu La Celada

Aportaremos al colláu Carnizosu (2094 m) col envís de siguir hacia'l de la Celada, viendo en tou momentu una antigua collacia, la Torre Carnizosu, asína como'l nuestru oxetivu del día: La Torre L'Osu con una pinta de mole reonda de difícil accesu.

Pa ello, averámonos pali pali primeru pela sienda hacia la Collada Bonita y llueu desviándonos per un pedreru podre enforma, que tién de llevanos hacia lo que nómase como la H.orcada Bonita, que da pasu hacia'l H.ugu Los Machos y llueu hacia Las Moñetas al igual que la collada.

Ascensu hacia la H.orcada Bonita per una tarrén podre y resbariosu

Xubiremos pasín alantre, pasín atrás, saliéndonos hacia l'espolón drechu que baxa del Osu, pa intentar llibrar les partes más arenoses y de secute escoyeremos un par de canalizos. El de la manzorga llévanos direutos a la H.orcada Bonita (2342 m) y el de la mandrecha llevarános a una h.orcadina que fae de pié de vía pa garrar la vía d'ascensu.

Nós, escoyimos el canalizu de la manzorga y plantámonos na h.orcada hora y media dempués de que salieramos del refuxu y equí ye onde entama l'aventura. Pa entamar tenemos un trepe, cenciellu per una especie de chimenea hasta un puntu nel que o salimos hacia la h.orcadina pela mandrecha d'una aguh.ina o pela manzorga.

Faciendo un "primer trepe" llibrable... con pelín de riesgu

Fernan, inténtalo pela mandrecha y aporta a un puntu, nel que los agarres son febles y podres de roca pudiendo quedase con un agarre na mano y baxar dellos metros rodando. Con esti panorama, sacamos los trastos y preparámonos pa facer un llarguín estra, que requier tirar de coyones ensín asegurar, hasta la h.orcadina de pié de vía.  

Sácolo apretando más de lo que me prestaría y aseguro a Fernan pol hombru hasta'l pie de vía, onde sacamos los croquis y nun somos a pescanciar cláramente que canalizu ye'l bono hasta la primer reunión.

Primer llargu (colloráu bona, azules malas)

Pa mí ye la parte más importante de tola ascensión: nun fallar na entrada al primer llargu. Yo metíme pela llinea azul claro, viendo que si siguía de frente diba alcontrame con dalgún pasu mui cercanu al V y los seguros que metiera hasta ellí yeren más bien quitamieos.

Así que tuve que facer una travesía hacia la manzorga per tarrén dalgo podre hasta poder salir per otru canalizu que ta protexíu con una calaviya. Hasta ellí, llevaba dos friends mui dudosos y agora la calaviya que dame más seguridá, pero nesti puntu col rocie de la cuerda, faíseme imposible progresar.

Primer llargu abegosu de lleer y segundu más cenciellu

Por más qu'intento lliberar la cuerda del rozamientu nun soi a ello y toi nel pasu clave pa salir a una repisa, anque nun veo reunión denguna. Aviso a Fernan, y decídese a xubir unos metros n'ensamble pa lliberar cuerda, algamando movilidá y sacando un pasín duru (IV de xuru) hasta la repisa.

Llueu d'esti mal tragu, restolo pela repisa, hasta alcontrar la reunión (ponte roca y calaviya) unos 3 ms más baxo que yo y muncho más a la mandrecha. Sabiendo que metime n'otra vía, pero que ya tamos a salvo, Fernan recupera los seguros y xube per onde tien de ser... ascendiendo con tan sólo afitase coles manes en dalgún pasu.

Tercer y cuartu llargu con un toque alpinu tan prestosu como guapu

Garramos aliendu un ratín na reunión y sigo alantre faciendo una segunda tirada perllarga, per un canalizu evidente, que sal un pelín a la mandrecha. Aporto a la segunda reunión, nuna ponte roca pergrande y Fernan xube esfrutando de la trepada ensín llegar al III grau siquiera.

El tercer llargu sigue nun tramu más curtiu, hasta un diedru tumbáu, onde otra reunión (ponte roca pequeña y calaviya) da pasu al cuartu que ye'l más téunicu per una placa tumbada que caltien agarres bonos, pero da que movese en tol anchu hasta un trepe final d'una barriga pa dar cola cabera reunión enantes del cumal.

Cume de la Torre L'Osu (2463 m)

Finamos la vía d'ascensu a la Torre L'Osu (2463 m) con un par de marrones nel primer llargu y accesu al pié de vía, pero con otros tres llargos d'esfrute fonderu, nel que tan sólo hai qu'autoprotexese pa quitar mieu, durante una vía y un picu, con un toque alpinu ablucante.

Nin que decir tien, la presencia a la nuesa espalda de la sur del Picu Urriellu, qu'observó atentu los nuesos avances. Nel pequeñu cumal, nun facemos otra cosa que danos un abrazu, relaxanos y acolumbrar cada cota que nos arrodia d'esti paraisu de la peña calizo.

Descendemos esfrutando de cuatru rápeles

Casi dos hores y media de vía, anque los erros fueron los que quitáronmos munchu tiempu y toca descender faciendo cuatru rápeles tan guapos como divertíos, anque güeyu col tercer rapel que ronda los 30 ms de llargura quedando la cuerda de 60 m xusta dafechu.

Namái finar los rápeles, tirámonos un ratu llargu xintando y oyendo voces na este del Picu. Tamos ante ún d'esos díes, qu'hai cordaes per ende les 4 cares del Picu y la tensión en dellos pasos óyese a cientos de metros na redolada del Urriellu.

Baxamos pela manzorga de l'aguh.a de la h.orcada bonita

Nós, fartucos y col trabayu fechu, baxamos con calma esta vegada, pel canalizu correutu dende la h.orcadina hacia la pedrera que baxa hacia'l colláu la Celada y como tenemos tiempu de sobra, anque les ñubes paecen amenazar, averámonos hasta'l colláu Carnizosu pa facer otra vegada la Morra Carnizosu y mirar pa la este del Urriellu y norte dende los sos cumales.

Primeru, facemos la cenciella y amplia arista hasta'l cumal de más altor (2118 m) y llueu empobinámonos con dalgún destrepe y trepe hacia'l cumal norte (2074 m) que cuelga so'l camín que xube hacia la vega Urriellu.

Damos un paseín pelos cumales de la Morra Carnizosu (2118 y 2074 m) antes de baxar a la Vega Urriellu

Magar d'echar un vistazu a una aguh.a que sal hacia'l norte d'esti propiu cumal y ver que nun tien la entidá suficiente, al igual que los dos cumales de la Morra Carnizosu, decidimos baxar pela canal de la Celada hacia'l refuxu d'Urriellu dando por termináu un bon día de monte y un meyor día d'escalada.

En resume, ascensión téunica que conlleva'l manexu de cuerdes tanto pa esguilar n'autoprotección, como pa rapelar nel descensu. En pasos sueltos, nun tien muncha dificultá sacante de posibles enmarrones, pero'l toque alpinu y vertical en dellos llargos aconseya nun tomala al debalu.

Con muncha tranquilidá y pérdides de tiempu, ficimos esti guapu cumal de los Urrieles, en 8 hores y media, faciendo un desnivel acumuláu de 830 m y percorriendo namái que 5 km pela redolada del H.ou Tres el Picu.


Ta la próxima...