Refuxu de Respomuso (Alto Galligo) - Picos de Fondellas - A Sarra (Alto Galligo)

11 de Setiembre de 2012

Track: Refuxu de Respomuso (Alto Galligo) - Picos de Fondellas - A Sarra (Alto Galligo)

Un día más nos Pireneus y un día más que tamos a les 8 menos cuartu con too preparáu. Ye l'últimu día y vamos despedinos del circu de Piedrafita, cola ascensión a tolos picos de Fondellas, los cuales nun queríemos dexar ensín conocer, dando un bon repasu a los tres miles "factibles" d'esta fastera del vall de Tena.

Digo factibles, porque nel camín siempre queden 3 miles alpinos, que pel momentu, sálense de les nueses actividaes y tamién van quedanos otros "non tresmiles", que bien pagan la pena de tornar a estos llares y conocer un pocu más los sos senderos y cumales.

Última salida del Refuxu de Respomuso (2141 ms)

Asína que, vamos despedinos del guapu refuxu, con un almuerzu ensín sorpreses positives y col postre de llantanos na espalda la mochilona col mesmu pesu exautu que cuando partimos d'A Sarra unos cuantos díes enantes.

Paez mentira, que temos xubiendo pel camín de baxada del Pico Os Moros y nin la comida xintada faiga que la sensación de pesu seya menor que'l primer día. Aún así, avanzamos con xeitu, como si nos empobinásemos hacia la Breca Latour, anque a los 2315 ms aproximáu, un cartelu mariellu nuna roca, faínos abandonar esti senderu por otru hacia la manzorga.

Dexamos abaxo'l refuxu p'averanos hacia l'ascensu a las Fondellas

Como saber si vamos bien empobinaos? Pues lo meyor, ye tomar como referencia la primer muria de l'arista Bondidier y siempre tendremos que dir dexándola a la nuesa drecha. Aún así, poques vegaes vamos tener un senderu tan bien h.itáu, lo cual va llevanos esfrutando del ascensu en tou momentu.

Acolumbramos la Cresta de las Fondellas

El día ye inmeyorable y bien ceo tenemos enfrente'l crestéu de las Fondellas, nel cual intentamos pescanciar un puntu feble, onde atacar la so parte cimera. Paez claru, qu'una rampa de drecha a esquierda tien toles papeletes de ser l'accesu. Habrá que dir comprobalo.

Siguimos ascendiendo a bon ritmu al llau de Bondidier

Paez fácil de dicir, pero l'ascensu va camudando poquín a pocu de xeitu y anque nel entamu, dibemos alternando traminos de yerba con pedrerinos, según vamos avanzando, les piedres van faciéndose mayores y tendremos que dir navegando de h.itu en h.itu al traviés d'elles.

Nun dexamos de mirar pa dellos cumales qu'atraen tan soleyeros

Aún así, les vistes son una pasada y al igual que'l primer día los Foratata, Retona, Escarra, Collarada, Pala de Ip... tarán a la nuesa espalda y cuando tócanos garrar aliendu, nun hai nada meyor que dase la vuelta y volver acolumbralos.

Tamién, sírvenos de descansu mirar pa l'arista Bondidier, onde dámos-y al maxín, albidrando víes d'escalada per diedros o pasos alloriantes de cota en cota pela cresta. Paeznos una actividá alpina enforma y sorpréndenos y dános pelín d'envidia, la xente que ye capaz de facer toles coses.

La vía ye una maraviya anque va faciéndose dura

Con más de dos hores d'ascensu ininterrumpíu, vamos meténos nel final d'esta cubeta glaciar formada pelas Fondellas y los sos contrafuertes sureños: L'Arista le Bondidier y el contrafuerte Ledormeur. Nesta cabera parte, les enormes peñes sueltes, camudaránse por pedrerinos de tierra y piedra suelta onde l'avance fadráse en dalgunos casos penosu.

Too ello, sedrá col envís, d'aportar a una evidente chimenea la cual queremos asegurar como vía afayaiza pa encumanos no más alto de la cresta de las Fondellas. Nel intre, nun sabíemos si yera posible, ya que los h.itos piérdense na parte final de la cubeta.

Metémonos nel canalizu d'accesu a la cresta

Finalmente, la evidente chimenea, sedrá la opción bona y a les 2 hores y 45 minutinos dende que saliéramos del refuxu tamos na cresta, dempués de poner un pocu les manes na fría y frañada roca de la chimenea y de tar sollertes de nun azotanos nenguna ún al otru colos pies.

A la fin, tamos na cresta cimera de las Fondellas

Les diez y media la mañana y tamos enriba de la escombrera que ye esta parte de las Fondellas. A escasos metros de la cume central, vamos dexar les "putes mochiles" y caleyaremos sele hacia les cumes cimera y norte. Digo sele, porque cualquier piedra que toques sal esnalando hacia la chimenea pela que xubimos y anque sabemos que naide vien detrás, la tiesta siempre va col mou seguridá ON.

Con pocu más, que baxar a una brechina con caídes hacia'l xeleru de Fondellas y posterior trepe nun bloque de granito, vamos aupanos a la montonera piedres que ye'l Pico de la Fondella (3052 ms... pocu fiable los gps ya que paez el de más altor) onde facémonos una primer semeya de cume.

Facemos cume nel Pico de la Fondella (3052 m)

Diba comentar dalgo so la mierda de moda de les banderes tibetanes.... pero solo ocúrreseme que como nun les pongan pa llimpiase'l culu, por si éntrate un apretón nun lo entiendo. Nin tibetanes, nin cristianes, nin relixoses, nin paganes, nin atees... los símbolos y figurines nos cumales tan de sobra dafechu. Nun son más que morralla y basoria.

Facemos el tramu d'ida y vuelta a la Fondella Norte (3057 m)

Probáblemente si tuviera n'Asturies, diben pa la mochila y llueu pal contenedor, pero como habrá bonos montañeros llocales pa facelo, ehí quedaron y empobinámonos otru tramín de crestéu, nel que tuviemos que travesar dellos canalizos que xubíen de l'arista le Bondidier, pa encumar el picu de la Fondella Norte de 3057 ms.

Equí, echamos un guapu vistazu al Pico Os Moros, pel que nun somos albidrar la baxada hacia la breca Latour, ya que paez imposible baxar por asemeyáu paredón SO. Dexamos esto, pa echar mediu vistazu hacia la baxada al corredor que xube dende la brecha hasta'l colláu ente la nuesa posición y l'aguh.a Cadier y como nun vemos trazos de la vía, decidimos dexar esi tresmil pa prau.

Descansu na Fondella Central (3053 m)

Ensín más, dexamos la Fondella Norte y desandamos de nuevu'l camín hacia les mochiles, colos vadíos de canales y trepes y destrepes de bloques graníticos, pa facer un nuevu tresmil cola Fondella Central (3053 ms), magar de recoyer la mochila unos metros enantes de la cume.

Con unes 3 hores y media de ruta, camentamos que ye un bon momentu pa picar dalgo y garrar enerxía, ya qu'inda sabemos que quédanos un picu más de las Fondellas y sobretou una llarguísima baxada hasta l'A Sarra, onde dexamos el coche cuantayá.

Vista del Pico Os Moros, Aguh.a Cadier y Fondella Norte, asina como d'ibones d'Arriel

Dempués d'unos venti minutinos asoleyando y descansando, decidimos seguir alantre al traviés de la cresta, pa dexala al altor de lo que paez el so puntu más altu de lo que resta, un torreón que superará los tresmil ms d'altor.

Como nun vien nos llistaos de tresmiles, nun-y faigo casu y baxamos pel so contrafuerte, l'arista Wallon, la cual nel intre, ta na so parte más amplia y cenciella, poro nun tendremos problemes pa meténos nel faldéu de tola cresta de las Fondellas.

Alcontramos el pasu pela faldera de las Fondellas

Ye más, vemos la guapa travesía que tenemos por delantre hasta la Fondella SO y facémosla cómodamente, hasta la parte final d'ella onde alcontrarémonos con dalgunos bloques enormes de granitu, que tocará bordiar o trepar y destrepar dependiendo de como lo veamos.

Y así, ensín más, vamos plantanos na base de la Fondella SO, la cual supónse'l primer tresmil más occidental de tolos Pireneus y últimu tresmil d'esta visita a Pireneus 2011-2012. Como ye normal, dexamos les mochiles y tirámonos a por él, sabiendo que se suel arrodiar de norte a oeste pa ganar el final de la cresta Robach y facer cume.

Fernan equipáu coles víes de xubida y baxada detrás

Allá que vamos y siguiendo unos h.itos, aportamos hasta una canal a pie de muria, que paez xubir dende nun se sabe onde. Baxamos a ella, con un pasu llateral y posterior destrepe y dientro d'ella, nun agüeyo posibilidaes de continuar, teniendo de frente una llábana pindia, que podríase xubir n'adherencia.

Xubo los primeros metros y a pesar de que se podría algamar, me paez mui espuestu y un resbariu llevaría a esnidiar en tobogán hasta la canal y de la canal, rodar per ella, hasta los cortaos qu'hai nel so fín. Nun me presta una mierda y dende la mio posición soi a ver un cordinu al final de la llábana, qu'alienda a nun facer el fatu.

Hacia esi h.itu colgáu tenemos que dir...

Destrepo con curiáu y pa cuando-y comento la xugada a Fernan, él ya viera la vía d'ascensión nun h.itu colgáu sol vacíu. Resultáu: paez ser que tenemos vía de baxada rapelando y una posible vía d'ascensión a probar, siempre y cuando, garremos el material pa ello.

Pues na, tornamos a les mochiles, ponémonos los arnéses, el cascu, amestámos a la espalda una cuerda de 30 ms caún y dalgún trastín más pa descender y a por ello, anque solo de mirar el h.itu, mete mieu pela cabeza.

Y equí, nestos casos... nin 6a's en deportiva nin su puta madre... la esperiencia ye un grau y d'eso Fernan sácame años lluz. Tira p'alantre poniéndose col pasu llateral hacia'l h.itu y aporta hasta esti, con un clásicu "va bien".

Pasu aéreu y acoyonante del ascensu

Voi detrás y métome nel pasu, viendo que tolos pies tienen cayía hacia'l canalizu y d'ehí a tomar vientos y que les manes qu'hai, son como xugar a la ruleta rusa, siendo tolos agarres poco fiables, so llábanes que múevense na so mayoría, dando impresión de querer cayer al vacíu contigo.

Col mayor de los equilibrios y ensín apoyame de más, llego al h.itu onde ta Fernan y confirmo'l so "va bien"... pel momentu. Darréu paez que tenemos una sucesión llarga de trepaes, nun mundiu de peñes granítiques sueltes, colocaes de cualesquier manera. Al menos, nun hai patios y podemos dir trepando, asegurando bien los agarres... este sí, este nin de coña. 

Sucesives trepaes prestosines y más calmaes

Sigún vamos xubiendo, voi tranquilizándome, anque tengo na tiesta, que si tenemos que destrepar pol pasu llateral del h.itu, vamos pasalo pelín mal. Ye más, de la que diba pasando, alcuérdome de ver un cordino, como p'asegurar el pasu y too. Hai qu'alcontrar el cordino de la llábana inclinada y rapelar como sea.

Con un pocu de per equí non y per equí sí, y otru pocu de nun te garres d'ehí que se mueve y píllate d'esa que ta bien, siguimos dellos h.itos y acabamos faciendo cume na Fondella SO nos sos 2998 ms d'altor... el gps dando por culu otra vegada jeje. 

La cresta de las Fondellas y nós nel cumal SO a 2998 ms

Sí,... tamos nel picu más difícil que ficimos en tolos díes y nun llega a los tresmil metros, ye una putada. Aún así, pocu más qu'una semeya penriba d'un d'esos bloques que tanto mieu nos ficieron pasar y otra pa tol crestéu de las Fondellas y de l'afilada parte que llega hasta equí y p'abaxo, qu'esto inda nun acabó.

Nestos instantes ye cuando de verdá, prestaría tener un aparatín pa desapaecer del cumal y apaecer na base del picu, pero nun ye así y toca ponese a pensar na baxada. El cumal ta fechu y pocu tiempu quisimos tar n'él esfrutando, ya que lo importante paecía venir darréu.

Descendemos a la gueta del rapel que viéramos na xubida

Ponémonos a baxar y l'ambiente ye ablucante, colos llagos d'Arriel mui pembaxo nuesa, diciéndonos tolo que nos queda hasta ellos. Destrepamos, con munchísimu curiáu, de tocar les piedres más estables y aportamos a un puntu nel que paeznos hora de guetar esi rapel.

Un h.itu, a la nuesa mandrecha paez marcarnos el camín, poro destrepamos en travesía hacia él y alcontramos el bloque onde tenemos llaceáu'l cordino. Buah.... que tranquilidá al ver un bon cordinu, del que poder rapelar.

Primeru Fernan y llueu yo, vamos facer un rapel prestosu, mui prestosu... tan prestosu, que facemos semeyes, echamos unes rises y esfrutámoslo a tope pa quitar del maxín, el destrepe aéreu del h.itu... menos mal.

Cellebrando que tamos abaxo!!!

Magar de recoyer cuerdes, averámonos a les mochiles y ellí, dámonos un abrazu y xubímonos a una peñona, pa facer la semeya más importante nuna ascensión, la de la base al baxar. La verdá ye que tamos felices, foi un retu a cada pasu y sobretou a cada agarre, esta Fondella SO y alcordarémonos d'ella por muncho tiempu.

Y agora que?... Pues agora tenemos un descensu de casi 1500 ms hasta A Sarra que se diz pronto, pero faíse mui pesáu, poro val más llevalu por partes. La primera hasta los ibones d'Arriel onde decidimos que será l'allugamientu perfeutu pa xintar.

Eternu descensu hacia los ibones d'Arriel

Ponémonos a ello, teniendo ún de los descensos más pesaos que tuve nunca, per una faldera de piedres de considerable tamañu, pente la cresta Robach y l'arista Wallon, que ficiéronmos dir tol tiempu como si nuna pantalla del Mario Bros tuviéremos.

Asína que, de saltín en saltín y de h.itu en h.itu, baxaremos unos 800 ms durante casi una hora y media, hasta los ibones d'Arriel onde a la fín, podremos facer un bocata qu'amatague la fame y quitar les botes, anque seya por un ratín pa descansar los pies, d'esta llocura de baxada.
 

Descansamos nel nuesu pasu pel ibón baxo d'Arriel

Magar del descansu, vamos siguir camín al llau de los ibones, hasta garrar el senderu del barrancu d'Arriel, onde alcontramos dalgo de vida humana dempués d'un día pelos altores. Fadremos el tramu de descensu, agüeyando con atención a los tabayones qu'escurrense de los ibones d'Arriel hasta les augües del Aguas Limpias, camentando que con muncha augua tien de ser impresionante.

Baxando hacia'l senderu que vien de Piedrafita

El senderu retuércese pela paré, que baxa de la cresta Robach y a la so vez del Fondella SO y protexíos per dalgún árbol del vientu, sentimos como'l calor pega con fuercia y l'amenaza de tormenta sigue presente nel ambiente.

Nel crucie, col senderu que baxa del circu de Piedrafita y del nuesu campu base de Respomuso, vamos parar un ratu pa beber augua, ya que defechu, la baxada ta faciéndose más dura ya inda, quédanos gran parte d'ella.

Caleyando hacia A Sarra cola Peña Foratata al fondu

Con 9 hores de ruta enriba'l cuerpu, vamos pasar a la sienda que baxa al banzáu d'A Sarra, la cual muncho más tendida na so baxada, va servir ya pa ponese a caminar en mou muñecu, siendo les torcedures de todiellu una constante en tol resto de baxada.

Cola tranquilidá del llabor bien fechu y un tastu a ésitu una vegada más per tierres pirenáiques, vamos aportar al coche con casi 10 hores de ruta, una ascensión acumulada de 1400 ms y 12,4 kms de patéu, pero lo más duro del día, foron los 2075 ms baxada acumulada que tuviemos que soportar.

Les cerveces nel chigrín d'A Sarra, dempués de moyanos un pelín nel ríu yeren más que xustificaes y la nuesa cara de cansanciu amuesa bien l'esfuerzu fechu... nun queda otra que despedise hasta l'añu que vien de los Pireneus.

Camudando'l Camín y Ortzamendiren Sua xarreando cerveza

Nest últimu día pirenáicu ficimos "cuatru" 3miles: Pico de Fondellas (3052 ms), Fondella Norte (3057 ms), Fondella Central (3053 ms) y Fondella SO (2998 m)

Ver progresos en: Retos montañeros