viernes, 7 de enero de 2011

Iondokorta (Arratia-Nerbioi) - Gorbeia

12 d'Avientu de 2010

Track: Iondokorta (Arratia-Nerbioi) - Gorbeia

 
Dempués d'una nueche en refuxu, como ye normal nun durmí demasiáu, pero aún así, tenía tovía'l bon tastu de la cena ya'l día anterior na tiesta, poro llevantéme con meyores fumos que n'otres ocasiones. Eso sí, quedéme con ganes de tirá-y una zapatilla a César, cuando a los 5 minutos de metenos nel sacu ya taba bufando como un ñú, a él, sumáronse durante la nueche dellos más,... completando la orquesta. 
 
Nota pal añu 2011: metéme rutes de 15 hores con tal de nun durmir en refuxos o... entamar a fumar porros pa ver si sobo una migaya anque seya... Escaeciendo la nueche, l'almuerzu foi completamente brutal, una vegada más nuesos collacios ofreciéronmos una maravilla de desayunu, sobretóu alcordarémonos d'unos bizcochos que traxo Mariano, los cuales yeren tan densos, que la lluz nun escapaba al traviés dellos y de su cantidá d'azucre y chocolate, jaja. En fin, caxigalines mañaneres que te llevanten l'ánimu y dan fuercies por coyones. 
 
 
Semeya de grupu hacia'l Gorbeia
 
Magar de recoyer y adecentar el refuxu, fueron aportando los nuevos refuerzos pa la siguiente ruta de montaña, ya que viniero a saludanos una pareya que ye un exemplu a siguir por toos nós, Bea y Josean, colos cuales ya pierdo la cuenta de los bonos momentos na montaña que pasamos nun añín, y dotramiente, llegó la mocedá montañera afitada por Iker ya Ibán, colos que tamién compartí delles rutes potentes. 
 
Toos xuntos, preparámonos, y dempués de despedir a Mariano, que dexábanos con nueses xeres montañeres, demientres él tiraba pal txoko a echar un gabitu a tola xente que teníanos preparáu otru bon homenaxe en Galdakao, ponémonos en marcha al travíes de los primeros metros de pista formigonada, que diben calecer les pates poquín a pocu. 
 
 
Entamando a calecer pates
 
Son d'estes rutes, como l'anterior, que nun voi fixándome en tolo que m'arrodia, faciendo por da-y potencia a la ruta, o por que la xente que va conmigo vaya cómoda,... simplemente déxome llevar, esfruto de cada pallabra, de cada comentariu, de cada persona con la que falo,... voi en cabeza un ratu, déxome otru ratu más atrás p'acompangar a otru,... esfrutar por esfrutar, caleyar por caleyar,.. nun ye mi xeitu montañeru davezu, pero tamién sé sacá-y partíu... nun piensu, nun hai esmolición polos tiempos, los aéreos, les trepaes, les dificultaes,... namái doi un pasín tres otru sele, charrando como si toviera tomando un café,.... ye otra montaña. 
 
 
Vamos dexando tarrén atrás y ganando altor
 
Sin danos cuenta, finamos la parte de pista pa meténos ya en fastera praos, a partir de les cabañes d'Arimekorta, y nesi momentu entamaremos a arrodiar, la cresta ocidental del picu Aldamin, el cúal dexaremos pa xubir dempués del nuesu oxetivu cimeru, el Gorbeia. 
 
Darréu, vamos dir viendo espoxigar la cruz que corona'l Gorbeia, y nel intre, xúnome a l'ascensión con Bea y Josean, los cuales, supongo que nun llevan ya, nin la cuenta de les vegaes que tienen xubido a esti monte, ya que suelen dir cada quince díes. Supongo que ye su monte por escelencia, y casi su monte particular, nel que tienen una pequeña tradición, que prestóme pola vida conocer, y ye que tocóme esperar con Jose, nes últimes rampes del monte, ya qu'esti nun pue llegar al cumal enantes que Bea. Perguapu... 
 
 
Ascensión al Gorbeia col Aldamin al fondu
 
A la fin, vamos aportando toos los que formen el grupu, a los 1480 ms del Gorbeia, y ellí alcontrámonos tamién con Paco, otru collaciu de rutes, que llevábanos esperando casi media horina pegáu a esa xigantesca cruz. Por respetu (nel mio país, nun respeto na, jeje), voi obviar mis camientos al respeutu... 
 
 
Nel cumal del Gorbeia Mendi (1480 ms)
 
Asína pues, facemos el nuesu segundu míticu monte vascu del finde, y pa da-y un toque personal a tala ascensión, facemos les semeyes de rigor, cola ikurriña vasca, y l'asturina (ya tradicional de mis andances), y como non, como bonos asturianos, sacamos a pasear media caxina sidre que llevábemos repartía pente les mochiles, jeje, y pusímonos a escanciar unos culinos pa convidar al grupu. 
 
 
Escanciando sidre asturiano nel monte Gorbeia
 
Nun hai que dicir, que tola ascensión a esti monte, foi en mediu d'una continua procesión de xente, y xente, y más xente. Nun vimos una cosa igual na nuesa vida, colo que ratifícome nes mios pallabres de la entrada anterior. Al monte n'Euzkadi váse, por cultura, una cultura dafecho ablucante. Poro, fuimos a xuntar la cultura vasca montañera, cola cultura por ñatura d'Asturies: la sidre y el chigreo, jeje. 
 
 
Empobinándonos al Aldamin
 
Faíse tarde, y baxamos nun tris al colláu ente'l Gorbeia y l'Aldamin, y ellí despedímonos hasta dentro d'un ratín de Carlos que lleva'l collaciu, h.odío coles angüeñes, y va baxando con Bea y Josean, hasta'l puntu d'alcuentru, nuna zona de cabañes y ermites pocu más abaxo. Nós, xubimos casi a la carrera hasta'l picu Aldamin, onde hai una montonera piedres, y paez tradición poné-y más,... así que azotámos-y otra p'arriba, sacamos una semeyuca y toos p'abaxo que güel avinagráu, jeje. Vamos que tamos col horariu en culu. 
 
 
Nel picu Aldamin (1372 ms)
 
Axuntámonos, dempués d'un cresteín en descensu con dalguna destrepada entretenía, a los collacios que decidieron non xubir, y demientres falamos un puquiñín, ya con menos vientu que na cume del Gorbeia, pue escanciáse les botelles que quedaben y xintar dalgo chocolate o lo qu'hubiese peles mochiles. 
 
Dempués, de conocer un nuevu términu de catarru, el "catarru culeru": dízse del que gárrase al tar sentáu nel prau húmedu,... tiramos p'abaxo, pasando delantre d'un montón de refuxos de montaña, que comparten dellos grupos... cosa que déxanos pelín esmolecíos, por si de verdá tienen dalgún sentíu, tando tan baxos d'altor y tan cerca los pueblos,... pero vémoslo más como cabañes a reservar, pa pasar los findes y dexamos de da-y vueltes, demientres vemos pasar xente, moces, pareyes,... Eso, sinceramente sígueme dexando ablucáu. 
 
 
Delles semeyes nel descensu
 
El restu del camín, faise per una ruta pelín escaecía, pela que nos lleva Fernan, al travíes de guapes viesques centenaries, hasta aportar al refuxu del Baskonia, onde camudamos la ropa sucio, y disponémonos a dirixinos en coche a Galdakao, onde tendríemos otra amuesa a les clares, de la hospitalidá vasca.
 
La Mari del Anboto
 
Nun quiero ser pesáu, pero la xinta nel txoko, foi una auténtica pasada. Se de sobra, que toos lo esfrutamos enforma, y que tamos más agradecíos y en deuda, con toos vosotros. Espero que nun se m'escaeza naide, pero... gracies a Mariano que diónos de cenar el sábadu, de desayunar el domingu, aidó pa la xinta del domingu,... tela con Mariano. Otru abrazu a la familia de Fernan. 
 
Mil gracies al cocineru Juan Mari, que fízonos prebar coses riquísimes (yo quédome con esa pera al arroz con llechi,... buff sin pallabres) y tamién enseñónos como furrula un txoko. Gracies. Otru abrazu pa Itxaro, Anne ya Iker pol trabayu nel txoko. Asína como a Raquel y Paco que tuvo a Simón entreteníu y casi vuelca por xintar al so llau, jaja. Bebió como un señor, y xintó como tal tamién, jeje. 
 
Finalmente, un abrazu a Óscar (que lu conocimos nel txoko), y a tolos montañeros y collacios que nos acompangaron: Germán, Bittor, Tito, señora y neños, Bea y Josean (como siempre más qu'un placer, sois un exemplu pa nós), Ibán y mocina (di-y que te dexe venir más por Asturies, jeje),... Camiento que nun se m'escaez naide o que nun puse nengún nome mal... ah coño, Fernan, jaja. Un auténticu privilexu dir contigo al monte y deprender de ti, y ya si enriba vamos pa to país y tratáisnos así... nun hai nota pal finde que pasamos. Un abrazu pa toos y toes... siguiremos Camudando'l Camín onde nos dexen y hasta que nos dexen. 
 
 
Camudando'l Camín con denominación d'orixe 100% astur

3 comentarios: