lunes, 11 de enero de 2010

Camudando'l..... nome

Como siempre, pasín a pasu, voi camudando ciertes coses na mio vida, y una delles yera tornar el mio nome y apellíos al asturianu. Nun hai muncho más que decir, namái qu'agora ya soi Berto Xuan envede Alberto Juan, y simplemente camudé Rodríguez por Rodrigue ya que'l mio primer apellíu vien de Soria, asína que pocu se podía facer nesi aspeutu.

L'interés, o'l pocu interés que tien esta entrada ye personal, pero tamién ye p'animar a tola xente, que tea con ganes de facelo. A mi paezme dalgo perimportante pa la normalización de la nuesa llingua. Simplemente, con que t'entruguen nalgún sitiu'l to nome, tas arguyosu de dicilu y si tracamúndiase repíteslu más arguyosu inda.

Nun ye ser más o menos asturianu, simplemente ye dar visión a tola xente, de que l'asturianu ta vivu, que nun muerre, y qu'anque sea una pih.ada, equí ta ún que ta por siguir p'alantre con ello, y dar amuesa de que tien que ser dalgo normal.

Tres cuartos de lo mesmu, pásanos col nome del Grupu Montaña: Xuan de la Borrina. A la fin, ta formáu y llegalizáu, y nun veas lo que-yos cuesta estes coses a muncha xente de la capital y ciudaes. Xuan con X?? Non, si quies ye con... joer ye que nun pescancio que con que pudiera ser, jeje o tamién con Borrina, puen ponete Gorrina, como nel caxastur, Xuan de la Gorrina, jeje. La verdá que tamién ta prestósu'l nome.

A otra xente-y presta'l nome enforma. Nun conocíen a esti ser mitolóxicu de la montaña y paezvos bien orixinal el nome, y quiciás más que seamos un grupu de montaña de xente mozo, el que lu pusiera.

En fin, son cosuques, caxigalines, pero personalmente paezme un mou más de normalizar lo que tanto defendemos, como ye la llingua, pero llueu danos mieu a amosar rialmente, que tamos por ello y que somos a usala ensín vergoña a diariu pela cai, nos nuesos papeleos y en cada estaya de la nuesa vida.

Sin más, animáivos porque nun ye un cambiu de nome, ye una torna llegalizando ambos nomes, el castellán que ya teníes y l'asturianu, por tanto nun hai que dempués camudar tolos papeles que tengas fechos, eso lo vas faciendo poquín a pocu, cuando sea.

Pa ello, namás hai que:

1- Pidir la torna a la academia de la llingua, que mui amablemente te mandarán a casa dempués de falar con ellos, o simplemente por mail tamién t'atenderán rápidamente.

2- Pasase pol rexistru civil nel xulgau, onde en 5 minutos daránte la partía de ñacencia.

3- Certificáu d'empadronamientu de la casa conceyu na que vivas la cual faen (al menos en Xixón) nel momentu.

4- Tornar al xulgao y entregar los 3 papeles, y ellos mesmos te faerán la carta que presenten al xuez pa poder tornar el nome a l'asturianu.

5- Dempués d'un tiempín (15 díes), mándate a casa los papeles cola partía de ñacimientu y el permisu pa camudar el nome.

6- Con ello dir pa la comisaría onde se faiga lo del DNI y ellí facer el nuevu colos papeles que vos dieron, más les dos semeyes tipo DNI. Vamos lo típicu de renovar el dni, anque paez ser que tienen que facer nun se que tipu d'identificación que tarde un par de díes en dátelo.

Pensé que diba ser un procesu abegosu, pero l'academia mándate en 3 díes la torna, y el xulgáu nunos 15 díes mándate la carta cola autorización del xuez, col que finalmente vas a camudar el DNI y a los dos díes ya ties el DNI col to nome n'asturianu, así que merez la pena.

Eso sí, anque Xixón sea oficial toponímicamente, sigues viviendo en Gijón y ñaciendo en Gijón, sinon te pones un pocu burru, porque paez ser qu'hai xente a la que-y ufrecen la toponimía n'asturianu y a otros non, como a mí y enriba dícente que nun se pue, cuando hai xente que si la tien. Así que tar sollertes y pidilo porque tienen el deber de date esa oción.

9 comentarios:

  1. Xuán de la Gorrina, jajaj, éso tuvo bono. Deben pensar que ye un paisanín con visera

    ResponderEliminar
  2. Ehí la tuviste. La mesma paisana del Caxastur, que si Xuan yera con X, a ver con que sinon, y llueu miro y pusiera Xuan de la Gorrina, la verdá ye que tuvo simpáticu l'asuntu

    ResponderEliminar
  3. Norabona pol to apueste personal por caltener l'asturianu nel to nome. Yes un exemplu (como tantos otros, claro). Un saludu y lo dicho, quítome'l sombreru.

    ResponderEliminar
  4. norabona pola decisión y la coherencia

    ResponderEliminar
  5. Tengo un amigu que quier facelo y nun ye quien... nun taría mal que ficieras un "tutorial" de los pasos a siguir pa la xente que lo quiera facer!

    Hai años teníenlo medio puesto na páxina del PAS, pero habrá qu'actualizalo

    ResponderEliminar
  6. Voi actualizar la entrada colos pasos pa que quede más nidio lo qu'hai que facer.

    Un saludu

    ResponderEliminar
  7. Norabona pola to prestosa iniciativa. El mio compromisu pa esparder el camudamiento los nomes al asturianu.

    ResponderEliminar
  8. Norabona pola to escoyeta favoratible al asturianu. La mio muyer que yá tien el so nome n'asturianu va poner tamién l'apellíu na nuesa llingua. La xunión fai la fuercia.

    ResponderEliminar
  9. Gracies a toos.

    Como dixi na entrada, ye una forma más de normalizar y mui prestosa pa la propia persona que lo fae.

    Saludos

    ResponderEliminar