miércoles, 23 de diciembre de 2009

Grupu Montaña Xuan de la Borrina

Ún de les coses que préstame más dar anuncia, ye la formación del nuesu propiu grupu de montaña. Llevamos una añinos nesto de peleanos pel monte, facer rutes y como nun somos de siguir el camín marcáu polos demás y menos yo, decidimos facer un grupu propiu, envede entrar nunu ya formáu.

Así, podremos continuar colos nuesos cafetinos d'enantes y dempués de la ruta, les cagaes na creación de les rutes sobre papel, les discusiones en plena ruta, los bonos momentos cuando too sal bien, y demás hestories que nos faen deprender pasín a pasu a caleyar el camín, el monte y tamién a camudar esi camín de la nuesa vida.

Dempués de munchos papeleos, notarios, conseyeríes, esti mes sedremos un grupu más na federación de montaña d'Asturies, col cual podremos federanos y formar parte de la familia montañera asturiana, dando amás un toque asturianu y un tanto desconocío al poner al grupu'l nome d'un ser mitolóxicu como Xuan de la Borrina.

Esti paisanu, que nos protexe d'un de los más temíos contratiempos na montaña, como ye la borrina, ñebla, neblina, ñublina.., ye'l personaxe sobrenatural más invocáu polos pastores pa que'l peligru de perdese pel monte, pase y s'espeye'l camín a tomar.

Xuan de la Borrina, tamién nomáu Xuan Blancu, Xuan de Madruga, Xuan de Riba o Xuan Barbudu preséntase polo xeneral acompangáu d'una perra llanuda y de la so muyer, que dicen que tamién tien barba. (Nun quiero pensar nel enguedeyu de barbes en momentos cariñosos, jeje).

Por tanto, a partir d'agora tendremos un cantar que recitar, cuando les coses tórnensen peligroses pola neblina:

Escampa, nublina,
de valle en vallina,
regueiros abaxo,
canales enriba,
qu’ehí vien Xuan Blancu
xurando y votando
que te ha de comer,
cola sua muyer barbuda,
y la sua perra llanuda.

Escampa neblina,
valle, vallina,
comieron los llobos
la cabra cornina;
comieron los güesos,
dexaron la cecina.
Ehí va Xuan Blancu
col perru blancu,
la muyer desnuda,
la perra cozcorruda.
Ehí va Riaño
xurando y votando
que te va a cortar un calcañu.

La info foi sacada de la siguiente páxina: Sobre Leyendas: Xuan de la Borrina


Ehí vamos entos, con esta nueva aventura qu'espero y deseo seya pa munchos años, dalgo que nos mantenga xuníos a tolos collacios que formamos parte d'esto, los cuales anque puquiñinos de momentu, merecemos ser toos mencionaos, a continuación:

Xunta Direutiva:


Berto Xuan (Presidente)


Simón (Vicepresidente)


Charly (Secretariu)


Pol (Ayalgueru)


Rolo (Vocal)


Mino (Vocal)

Miembros del GM Xuan de la Borrina:


Pilar


Paula


Canta


Rico


Diego


Bea y Toni


Diego Pangua

Un saludu a toes y toos, y dende esti blog daros les gracies pola xera montañera que llevamos y pola que quedanos por disfrutar.


La nuesa páxina web:
Grupu Montaña "Xuan de la Borrina"

Mail de contactu: gmxuandelaborrina@gmail.com

5 comentarios:

  1. Gracies Fernan, ya sabéis que sois nuestra primer delegación estranxera, jaja. Un abrazu

    ResponderEliminar
  2. Norabona!. Esta si que ye una bona noticia. El toque asturianu si que va rescamplar pente esa familia montañera. ¿Sabíes que, pela contra, cásique tolos grupos d'espeleo d'Asturies tenemos nomes n'asturianu como Gorfolí, L'Esperteyu, Diañu Burlón, Escar... faciendo amás usu normal de la nuesa llingua pente nós y énte les instituciones?. Siempre defendí que la nuesa forma de trabayar y de "ver el monte" ensembre, como dalgo deportivo-ambiental-cultural, nun habría ser esclusiva de nós y sedría bien arriquecedora si s'espardiere al ámbitu la montaña. Pero los esperimentos d'averanos a la "oficialidá" montañera per esa vía nunca nun fueron granibles. Anímovos a que sigáis trabayando y afondando nel vuestru llabor. Anque nun lo creyáis, seique vais ser quiénes p'aportar muncho y bono a la montaña asturiana. ¡Un abrazu!.

    ResponderEliminar
  3. Munches gracies, poles tos pallabres. Ganes y ánimu nun mos falta.

    Un abrazu

    ResponderEliminar