Val.le (Somiedu) - L.lagu del Val.le - Picos Albos - L.lagos de Saliencia

18 de Xunetu de 2009

Track: Val.le (Somiedu) - L.lagu del Val.le - Picos Albos - L.lagos de Saliencia - Val.le

Increible ruta por Somiedu que poca xente fae, dalgo que nun comprendo ya que o van a unos llagos o van a otros pero poca xente xunta les dos rutes. Al final ficímosla nunes 8 hores y media nun día perfeutu pal monte, ya que tuvimos nubláu ensín calecenos el sol en demasía y pudimos agüeyar el l.lagu del Val.le, ascender a los Albos y baxar a ver los l.lagos de Saliencia, vamos que más completa imposible.

Semeya de partida de ruta en L'Outeiro

Partimos del barriu de L'Outeiro nel guapu pueblu somedán del Val.le por una pista de tierra al traviés del valle del ríu Val.le que nos empobinará con dalgún repechu curiosu al L.lagu del Val.le nel que ya tuviera fae añu y picu na dómina iverniega del añu, colo que pude esfrutar del l.lagu xeláu y d'unes vistes increibles. Caleyamos un pelín pela pista hasta llegar a un cruce nel que podemos escoyer tirar pa los l.lagos de Saliencia, pero nel nuesu casu esa otra pista será pola que tornemos al pueblu.

Cruce de pistes nel val.le somedán

Como yera la segunda vegada que tábemos nesti val.le ficimos tol camín hasta'l l.lagu en menos d'una hora. Ye un de los sitios más guapos d'Asturies y nun ta nada masificáu, cosa que pa picos nun ye asína, poro se disfruta de cada pasu y de cada vista que mos ofrez esti llugar. Durante'l camín hacia'l l.lagu pasaremos pola braña de la Cobra con un teitu bien conserváu y onde poder contemplar viesques y praos bien guapos.

Caleyando pola pista con Peña y Torre Orniz al fondu

Dos detalles: Teitu de la Cobra y cartelu nun prau, cola amenaza de Brinco

Amás, podremos agüeyar los distintos picos que forman esti val.le: a la nuesa mandrecha tan el Faspaxún (1927 m), el Canalón (1897 m), La Fana (1842 m) y detrás dellos la Peña Chana (2067 m) y a la nuesa manzorga tenemos La Minga (1756 m), Peña Chabana (1879 m) y el Corralón (1875 m). Por últimu al fondu ya tendremos el circu glaciar qu'asienta'l l.lagu del Val.le formáu por Los Albos (2000 m aprox), el paisaxe llunar de las morteras con Pena Orniz (2176 m) y Torre Orniz (2192 m) detrás y Picos de la Mortera (2026 m) y Peña'l Miro (1905 m), de la manzorga a la mandrecha.

Pena y Torren Orniz (2192 m) y Pena L.lana (2067 m) nun ratín ensín ñubes

Una vegada qu'arribamos al l.lagu del Val.le, el más estensu d'Asturies podemos parar a xintar dalgo pa recuperar fuercies na so fastera más central al llau d'unes cabañes, dende les cuales entamaremos la xubida a los Picos Albos.

Cartelu nel L.lagu del Val.le

L.lagu del Val.le y el val.le col pueblu al final

Equí nel Pedregal, al fin, entama la diversión y encomencipiamos a xubir al primer Albo, el central o más conocíu como Picu Rubio, pol collor qu'amuesen les sos peñes cimeres. Pa ello arrodiamos un pelín pola so mandrecha xubiendo por una senderu na zona de las Duernas pa nuna continua ascensión algamar una trepada final hasta'l picu. Hai que dicir que de los 3 albos el Picu Rubio (2048 m) ye'l más complexu de toos, pola so morfoloxía y porque dende él a los otros dos malpenes baxamos 100 ms pa tornar xubilos.

Picu Rubio onde tiraba l'airín consideráblemente

Del Rubio vamos xubir agora al más averáu que ye'l Albo Ocidental de 2060 ms, y pa ello namás tenemos que baxar unos metros, eso sí, estremando la precaución ya que'l Rubio tien delles peñones con bona caída, y una vegada que tamos nel colláu la xubida será bien fácil viendo ya'l l.lagu Cerveriz de Saliencia.

Na cume'l Albo Ocidental col día dalgo murnio

Más de lo mesmu, agora con una baxada muncho más fácil y taremos nel Albo Oriental de 2100 ms en mui poquiñín de tiempu, eso si, dempués d'echar una güeyada a les simes qu'hai na baxada.

Simón no altu del Picu Albo Oriental

Se podría parar a xintar nel picu pero taba dalgo friu polo que camentamos meyor baxar a xintar entre los l.lagos de Cerveriz y Calabazosa, asína que sin tener mui nidio si la baxada sería fácil o non, decidimos baxar pol llau contrariu a la xubida pa facer un rodeu hacia una canal de non mucha pendiente pero con muncho pelligru por culpa de la cantidá de piedres qu'habia, de tamañu pequeñu y que faen resbalar con facilidá y poner en peligru a los demás del grupu. Así foi, que de milagru un morrillu este vegada bien grande casi se lleva per delantre a un compañeru que taba muncho más abaxo.

Baxando al l.lagu Calabazosa y canal peligrosina de baxada

A la fin, abaxo pudimos echar un ratín la siesta demientres xintábemos y disfrutábemos de tolos l.lagos de Saliencia: Tanto'l Calabazosa como'l Cerveriz, los más grandes, que teníemos al llau y el de la Cueva, al que tuvimos que facer dalgo de xubida a un altu pa poder velu y baxar al llau de lo poco que queda de la l.laguna de la Almagrera más o menos tan secu como'l l.lagu de Cebolléu, poco más allá del Cerveriz.

Siesta y xinta ente los l.lagos


L.lagos Calabazosa y Cerveriz

L.lagu de la Cueva

Dende los l.lagos ya solo mos queda la vuelta al traviés de les inmenses vegues de Fresnéu y Camayor allancadas ente la fastera Oriental del val.le colos picos enantes nomaos y los picos del Cantu l'Almagrera, Las Porzanas, Peña Concrespu y el Tarambicu. Nesta primer vega de Fresnéu podremos contemplar la Peña'l Sapu que nos amuesa Carlos na semeya d'abaxu.

Peña'l Sapu en Fresnéu y la gran vega de Camayor

Dempués d'esta última vega tan solo nos quedaría baxar a la vega de Sobrepeña pa garrar ellí la pista que nos devuelva al pueblu del Val.le. Pa ello hai qu'arrodiar el picu La Minga ya sea pola mandrecha o ente esti picu y la Peña Chabana. Nós, ficímoslo polo mandrecha baxando per una riega, y gracies a ello perdimos una cámara, si dalguien l'alcuentra que nos pase al menos la tarxeta ya que la cámara nun creo que tea pa munches osties, jeje.

Camudando'l camín dende'l Picu Rubio col L.lagu del Val.le al fondu

Suponemos qu'anque se de más rodeo pola otra oción, de xuru que ye más segura y nun se lía ún, pero nós si nun nos salimos del posible track y la liamos nun quedamos tranquilos.

Espero que vos preste, tanto como a nós, yo agora si despídome de la montaña hasta setiembre, agora toca bici y escalar. De xuru que tenemos novedaes pa entós.

Nesta ruta ficimos 3 dosmiles de Somiedu: Albo Central o Picu Rubio (2048 ms), Albo Ocidental (2060 ms) y Albo Oriental de 2100 ms
Ver progresos en: Retos montañeros

Vuelta al Conceyu de Xixón (Xixón)

4 Xunetu de 2009  

Track: XVI Vuelta al Conceyu de Xixón (74 km aprox.)

 

Ya tenía yo conocimientu d'esta prueba xixonesa organizada por la peña BTT Pelayo que facía esti añu su cumpleaños númberu XVI cola collaboración de la casa conceyu xixonesa. Asína que nos dispusimos a participar con un bon ánimu, pero torciósenos el tema, ya que taben toles places reservaes y nun pudimos tomar parte nel eventu. Pero como nos apetecía igualmente facer la ruta, pues como siempre me descargué'l track de la vuelta al conceyu xixonés y dempués de contautar cola peña organizadora y que nos retrucaren que nun podíemos dir a la mesma vegada por temes del seguro de la prueba, pues decidímonos a salir un par d'hores más tarde qu'ellos.

Mapa de la XVI Vuelta al Conceyu de Xixón (semeya de la organización)

 

Como resumen inicial dicir, que la ruta taba bien marcada en tou momentu, y tenía completamente de too, baxaes téuniques, otres más rápides por pistes de tierra y asfaltu, xubides dures, pasos téunicos, ... ye dicir yera una ruta bien completa pa tolos tastios, eso si, y hai que dicilo al altu la lleva, hai que tar mui bien preparáu pa completala, asína que s'abstenga de facelo los que nun tean mui muncho d'andar en bici. Yo pueu considerame un deportista completu y toi en bona forma, a lo mesmu que los mios compañeros y dicir que sofrimos lo indecible col terrén quebrapates, pol que se foi, e inclusu tuvimos qu'arrodiar la cabera dificultá porque nun teníemos fuercies p'afrontala. Eso sí, llegamos a casa camentando que lo dimos too y felices por algamar facela entera a pesar del esfuerzu y los malos momentos. 

Perfil de la XVI Vuelta al Conceyu de Xixón (semeya de la organización)

 

Nuestra ruta partío a les 11 de la mañana del parking d'enfrente l'hotel Silken a la entrada de Xixón y a traviés de varies cais xixoneses empobinámonos pola playa San Llorenzu hacia la Providencia y más tarde al altu de Somió onde tomamos una baxada bien téunica que nos dexaría na senda del arroyu La Ñora, la cual facemos entera travesando barru, charcos y riegues hasta tornar a xubir al campu golf de la Llorea, onde xintamos dalgo. 

 

Un par de semeyes borroses del arroyu La Ñora

 

Esti paisanu cruciando l'arroyu La Ñora

Dempués de cruciar la carretera tócanos xubir en direición al monte Deva na primer dificultá seria d'ascensión, pa baxar posteriormente con cierta dificultá pero corta en L'Arquera, siguiendo dempués pol Cordal de Valdornón, con dalguna xubida hacia Caldones y más baxaes tanto teúniques como rápides, dalguna demasiáu que casi fae que Diego s'estampe contra una muria, jeje, hasta algamar Vega de Riba onde tuve que mercar piles ya que'l llistu de mi nun cargó como debiera les piles pal gps, eso sí, menues piles alcalines que me vendieron, jeje. 

 

Final de la baxada de L'Arquera (Diego con más problemes por culpa'l frenu delanteru inesistente)

 

Andando foi como dimos cola parroquia de Caldones, la cuesta superónos ampliamente a Diego y a mi, Jose como non p'arriba ensín problemes

Dempués de xintar dalgo y mercar más líquido ya que taba ya faciéndose durina la ruta, nos empobinamos hacia La Camocha pa facer l'ascensión al Picu'l Sol. Pa ello fuimos arrodiando'l picu pola so mandrecha y xubimos a vegaes por sendes imposibles de xubir, ya sea pol desnivel o pola cantidá de vexetación qu'habia, otres por pistes más afayadices y na parte final en pista d'hormigón, eso sí, siempre con una dureza importante.

 

  Jose, esperándonos a que llegásemos medio frayaos al Picu'l Sol

 

Al fin, nos tiramos a morirnos un ratín nel picu xintando'l bocata y tolo que pillamos, porque tanto Diego como yo, nun teníemos una migaya de fuercia siquiera. Cola metá del recorríu fechu, supusimos que ya pasáramos lo pior, pero como diz un collaciu montañeru, lo pior ye lo que queda por facer, y así asocedió. Dempués d'una pequeña baxadina tuvimos que tornar a facer un esfuerzu importante p'arrodiar el Picu Samartín y dempués baxar por varies pistes a la carretera que va al altu la Madera, onde camentamos seriamente, baxar en direición de casa, pero al final l'echamos güevos y siguimos p'alante, hasta llegar al pueblu sierense de Santiso, onde tuvimos otra guapa baxada per una viesca con cierta dificultá baxando'l nível d'altor de forma preocupante, ya que tolo que xube baxa. Y como non, asina foi, y a partir d'equí hasta l'embalse de San Andrés de los Tacones, tuvimos un infiernu en forma de xube baxa pola parroquia de L'Abadía Cenero, con otra camentable retirada al atravesar la autovía AS-II en Veranes, onde sabíamos que tábemos cerquina de la ciudá. Aún así, siguimos adelantre hasta llegar coles fuercies mui minaes al embalse. 

 

 

 Les cares lo dicían too, Diego, Jose y Berto fuimos los valientes

 

Dempués de les semeyes correspondientes nel embalse nos introducimos na parroquia de San Andrés onde xusto dempués de cruciar les víes enantes de llegar al pueblu de La Melendrera, el nuesu collaciu Diego dixo basta, si daba una pedalada más caíasenos de la bici. Como diría Perico n'estos casos llegó'l tio del mazo y sacudió-y pero en tolo alto, jeje. 

 

 

Diego intentando descansar del paxarón que-y dio y como queden les pates dempués d'hores de bici

 

Dempués de da-y a Diego tola comida que nos quedaba, garramos puxu pa la cabera dificultá del día, que xústamente teníemos delantre nuesa, la xubida al monte Aréo. Dempués de xubir hasta la Melendrera y baxar hacia la mandrecha arrodiando'l monte, vimos la pista pela qu'ascendíase y decidimos que nun podía ser, que nun lo díbemos a dar y pa finar xubiendo andando, escoyimos la oción de rodíar el monte yendo pola carretera parándonos en Montiana na parroquia de Fresno y desbalixando una máquina espendedora con tol chocolate qu'habia. Ya nun tábemos pa munches hosties y l'humor venía y se diba por momentos. Pa finar decidimos tornar al track orixinal garrando la carretera de Puao paralela a Arcelor y na rotonda de Veriña facer l'esfuerzu d'averanos al Empalme onde garramos ya la carretera que nos llevaría paralelos a la central Térmica y a la guarrería de la ría d'Aboñu. 

 

 

Sabíamos que'l final taba cerca y tábemos con meyor humor

 

Namái, quedábamos cruciar el túnel d'Aboñu y paseanos pol Musel hasta'l llavaderu de coches de L'Arbeyal onde dexamos les bicis en condiciones óptimes pa nun volver a garrala na puta vida, jeje. Dempués de la llimpieza de bicis simplemente nos quedó dar pedales pol carril bici de Cuatrocaminos hasta Moreda y d'ehí a traviés de la ponte naranxa al carril bici de la Avd. Portugal pa llegar a la fin a casa. Yeren 9 hores enriba una bici, la ruta más llarga que facía y delles dificultaes abegoses nun terrén abondo duro. Poro convirtióse al final en dalgo más d'arguyu y mental que físicu pa llograr arribar a casa. Como diximos al final, l'añu que vien costaranos muncho menos de xuru, pero esti... pa su puta madre.

Vía Verde La Camocha - Senda Fluvial del Piles (Xixón)

29 Xunu de 2009 

 Track: Vía verde La Camocha - Senda Fluvial del Piles (Xixón) (35 km ida y vuelta)

 

uta simplemente pa rodar un pelín cola bici, y de paso conocer los barrios xixoneses qu'inda nun estrozó la señora alcaldesa, o al menos parte d'ellos. Yo particularmente salgo del "carril bici" que pasa por Carlos Marx, na llende ente la fastera central de Xixón y el barriu del Polígono, anque lo que verdaderamente importa ye algamar l'entamu de la Vía Verde de La Camocha. Pa ello siguiremos por esti carril bici xubiendo a la manzorga por la Avd Portugal, hasta que tócanos cruciar la cai del Borbón (que se lo coma un tiburón, jeje) penriba'l puente p'a posteriori doblar depués del polideportivu de Pumarín a la mandrecha. Per esti camín siguiremos hasta alcontrar un túnel que crucia la Y, y así siguiremos hasta alcontrar una pista de tierra, con un pivote de madera o lo que queda d'él. Per ella llegaremos a un campu de fútbol que bordiaremos por abaxu alcontrando a la fin l'entamu de la Vía verde, antiguu ferrocarril que mos lleva hasta la mina la Camocha, que sigún dicía un cantar llega hasta la mar, eso nun lo se inda, jeje. Esta vía faínos atravesar siempre en continuu ascensu la zona industrial de Roces y Porceyo, los barrios de Mareo, La Pedrera y Llorio y a la fin Güerces y si siguimos al final de la vía onde hai un merenderu de descansu taríamos en La Camocha, vien visible pol pozu mineru qu'hai nella.

 

 

Vía verde La Camocha (www.gijon.info)

 

Xustu enantes de finar la vía, sal un camín de tierra recién fechu con un cartelín que pon Camín del Arroyu Llantones, pol que siguiremos el nuesu paséu, agora casi too en baxada. Na ida, nun mos desviaremos en nengún de los cruces qu'hai hacia otros caminos, poro siguiremos rectu pasando del camín del arroyu Llantones al camín del Molín, que toma nome del nomáu Molín de Payares, pa finalmente garrar el camín del Piles, que nos llevará p'embaxu de los viadutos de la ronda hasta llegar al guapu parque remozáu del Piles en Viesques. 

 

Indicador hacia'l camín del arroyu Llantones (http://sendafluvialgijon.blogspot.com/)

 

Nesti parque daremos una vueltina hasta'l final delli, y namás llegar a la carretera de Viesques daremos la vuelta garrando un camín que va penriba del ríu o al revés, si vinimos pola parte alta. La vuelta ye esáutamente igual pero cuando lleguemos al cruce del camín de L'Aliseda Pantanosa lu garrarremos pa dar una vueltina pol so circuitu zarráu viendo la charca qu'hai nel mediu del circuitu.

Indicador del camín circular de L'Aliseda Pantanosa (http://sendafluvialgijon.blogspot.com/) 

 

Llueu tornamos al mesmu cruce dempués de dar la vueltina y siguiremos siempre n'ascensu hasta llegar al camín de los Güertos d'Ociu, el cúal podemos tomar pa echar un güeyu a los güertos que la casa conceyu pusu a disponibilidá de los ciudadanos na parroquia de Llorio. Sinon siguiremos pel camín cimeru pa facer bon tastiu d'un repechu empináu que mos devuelve a la Vía Verde de la Camocha, pola que ya en baxada contínua tornaremos a la ciudá de Xixón. Ye un rutina pa facer con xeitu de rodar un ratín sin prieses, ya qu'a una media de 20 km la hora, en menos de dos hores faise ensín problemes, ida y vuelta. Amás ye una ruta del colesterol que-y llamo, ya que ta perllena de xente caleyando, poro hai que llevar una velocidá axustada pa nun da-yos nengún sustu a naide nin llevalo porque se te crucie daquién.

Altu San L.lorienzu (Teberga) - Torrostigu (Babia)

23 Xunu de 2009

Track: Camín de la Mesa: Altu San L.lorenzu - Torrostigu  (21 km a Torrostigu)

Esta entrada bicicletera va servime pa esplicar un pelín, porque faigo les entraes como les faigo. Ye dicir si veis, nun me presta poner tiempos o dificultá a la hora de facer una ruta. ¿Por qué?, pues quiciás porque caún ye caún y k2 una piragüa que se diz n'Asturies. Ye más inclusu, un mesmu ta de forma mui diferente y con un xeitu distintu dependiendo del día, poro préstame más comentar sensaciones en cada momentu de la ruta que non poner dificultá media, baxa, dura, etc...

Nel Altu de San L.lorenzu enantes d'entamar la ruta

A mi mou d'entender, esto foi lo que nos pasó, al facer esta ruta. Sacamos el track d'un grupu de collacios de BTT, los asturcones Asturcón BTT. Un saludu pa ellos dende esti blog y d'un nueu aficionáu a la bici de montaña. A lo que díbemos, lleímos un pocu p'enriba la ruta que ficieron y bono poníenla como media, y como somos un pelín echaos p'alante, allá nos fuimos cola tarde per delantre pa facela, cuando ellos tuvieron tol día con tranquilidá y enriba son abondo pros, jeje.

Ya de primeres, tardamos en salir una barbaridá colo que nos plantamos a les 5 y media nel altu de San L.lorenzu (1347 m) dempués de cargar increiblemente 3 bicicletes y 3 paisanos nun Skoda Octavia, con dos coyones si señor. Si nun llega a ser porque llevaba'l gps, nun la facíemos de xuru, ya que taba'l día con borrina zarráu enforma, poro nun vimos nada en tola ruta, y eso que la fastera del parque de Les Ubiñes y La Mesa ye preciosa.

Echando una güeyada al gps, nun vaya ser que...

Namás salir del altu, tocanos calecer piernes con una bona rampa, en direición a la venta de Piedraxueves, pa siguir xubiendo pasando a la manzorga de la Peña Michu (1765 m) y llegando a un másimu d'altor nel Col.lau del Xuegu la Bola (1620 m), pa posteriormente baxar un pelín en direición a la braña de la Corrá o Cuérragu (1560 m).

Descansando na braña de Cuérragu o la Corrá

A dicir verdá, esta braña foi de les poques coses que pudimos esfrutar, ya que la borrina nun mos dió oción a ver práuticamente nada. Equí nes semeyes podéis ver los nomaos teitos, mui comunes nesta fastera asturiana. Per debaxu nuesa tamién teníemos un par de brañes bien guapes como son la de Murias y Urdiales, pero como ya dixi nun veíamos más de 10 ms delantre nuesa.

Siguimos un pocu más alantre manteniendo l'altor dexando les nomaes brañes embaxu nuesa y enriba tendríemos Peña Prieta (1830 m), pa más tarde tornar a xubir otru pelín hasta llegar al altu de la Granda Blanca (1672 m). Esta xubida como en casi tol camín hai qu'andar baxándose de la bici pa superar delles dificultaes, ya que faise imposible superales. Esto ye enforma molesto ya que nun avances res y enriba les posibles caídes poles piedres, riegues y milenta hestories avegoses, se suceden una tres otra.

Baxando pela pista que nesti sitiu taba en bon estáu

Agora tornaremos a perder altor dexando a la nuesa manzorga l'altu la Cuguruza y dempués el Cerru'l Pedrosu hasta llegar al col.lau La Madalena (1542 m) nel que faeremos ya la llarga ascensión final al traviés del Val.le Caranga pasando pola Braña La Mesa (1660 m), el L.lanu El Muñón, bien averáu al Picu Muñón de 2036 m hasta llegar al fin a los Güesos (1785 m) que ye'l sitiu de mayor altor na nuesa ruta onde podremos garrar agua de la fonte del mesmu nome.

A la fin, tamos na llende ente Asturies y Llión, así que d'equí hasta Torrostigu será too baxada, con una pista meyor de lo que tuvimos en tol camín, poro casi nun mos tendremos que baxar de la bici hasta'l pueblu, cosa a la que tábemos poco avezaos hasta entos.

Semeyes nel pueblu babianu de Torrostigu

Dicir que nun pudimos agüeyar muncho'l pueblu ya que yeren les 9 menos cuartu y tábemos a l'otru llau del cordal colo que la ruta fízosenos dura, avegosa y llarga pa nun ver nada, y nun esfrutar de munchos momentos de dar pedales, por culpa de les continues xubies y baxaes de la bici pa sortiar los distintos pasos.

Magar de decidir que nun díbemos llegar per nenguna otra pista a Samartin de Teberga onde teníemos l'otru coche, nun mos quedaba otra que xubir el puertu Ventana, ensín saber los kms esautos de xubida que yeren, asína que sabiendo que mos quedaba una hora y media aprox de lluz, empobinámonos a xubir el puertu Ventana.

La cara de fríu diz tolo mal que tábemos pasándolo

Dempués d'una xubida de 5 o 6 kms a una media d'un 6% de desnivel llegamos a la fin a Asturies, dempués d'unos 2 últimos kms insufribles, cola borrina calando los güesos y un fríu ca vegada mayor. Un vegada equí, dempués de sufrir abondo pola mio parte, ya que nun xubiera un puertu na mio vida, dispusímonos a baxar el puertu con lluvia incesante y friu ablucante durante unos 20 kms hasta llegar a Samartín de Teberga.

Conclusión final: nun vimos res en tola ruta, la cual ta en munches partes del camín imprauticable pa la bici y el friu final de xubida y baxada del puertu Ventana, nun meyoró les coses precisamente. Pero como siempre, l'esfuerzu y el sufrimientu pasáu presta pola vida cuando al fin garres el coche y tires pa casa rondando la media nueche, disponiéndote a duchate y pa la cama.