jueves, 21 de julio de 2011

Altu'l Fitu (Caravia) - Xerra'l Fitu

25 de Xunu de 2011

Track: Altu'l Fitu (Caravia) - Xerra'l Fitu



Una vegada más mi afán tachador de montes, llévame a aprovechar un finde de camping en Caravia, pa facer dalguna rutina. Nesti casu tábemos nel camping del Arenal de Moris, el cual ye bien recomendable, pa dir de nueche a la mítica Foguera de San Xuan de Caravia.

Asína que como a Paula-y apetecía facer dalgo de monte tamién, ya que yo llevaba unos findes fuera por Picos, preparé dalgo prestosu pa conocer la Xerra'l Fitu. Esta ruta parte del Altu'l Fitu na llende de los conceyos de Caravia y Parres a unos 600 ms d'altor sol nivel d'un cercanu mar.


Semeya de grupu nel Altu'l Fitu (589 ms)

Pa llegar a esti altu, gárrase en Xixón l'autovía cantábrica en direición Santander, y namái pasar la segunda salida a Colunga garramos la AS-260 qu'al traviés de los pueblos de Coceña, Lloroñi y munches más curves dexarános al fin nel Altu'l Fitu.

Son les 10 y cuartu de la mañana cuando aportamos al aparcaderu del Fitu, y Javi, Cris, Paula y yo, preparámonos pa entamar a caleyar, pero nun podemos dar los primeros pasos ensín sacar una semeya hacia Picos, ya qu'esti llugar a pesar de paecer que ta lloñe d'ellos, da siempre la sensación de poder tocalos col deu.


Les vistes dende l'entamu son ablucantes (Picos y Costa astur too xunto)

Con uno de los paisaxes más increyibles d'Asturies, vamos dar los nuesos primeros pasos baxando al colláu la cruz de Llames, pa xubir dempués pel mediu d'un área recreativa, col envís d'emponinaos hacia'l cumal de los Cuetos Coloraos (584 ms), per onde crestiaremos un ratín, pasando al llau del repetidor qu'alberga.

Dende esti altor, va facése más ablucante mirar pa la costa asturiana al norte con un día tan soleyeru como'l que tenemos, y d'otra miente, tendremos al sur, tolos montes más prestosos d'Asturies, dende'l Vizcares, Peñe Crespa, Llambria, Tiatordos, Pienzu, Cantu Cabroneru y los macizos del Cornión y Urrieles en Picos, presidiéndolo too.


Primeros pasos per bon senderu

Nun llevamos un cuartín d'hora caleyando, cuando disponémonos de nuevu a baxar, garrando esta vegada una pista más ancha que se supón baxa hasta Ribeseya, siendo dafechu ciclable en toa la so llargura. Nel nuesu, casu vamos usala un ratín solu y llueu vamos xubir detrás d'una vaca, que va guiyános pel senderu hacia la siguiente cota del día: Les Estaques (551 ms).

Ensín mayores dificultaes ponémonos enriba'l cumal y siguimos camín, dempués de dellos vistazos a tola xerra'l Fitu, la cual ta sorprendíendos con tan bones vistes. Pero nun too diba ser tan bono, y la baxada de Les Estaques va tener dos protagonistes bien dixebraos: El primeru sería un destrepe un poco perru o bordiar la peñona tornando un pelín so los nuesos pasos, pero teniendo qu'enfrentáse al mayor de los enemigos del día de güei: Les Cotolles.


Destrepe baxando de les Estaques

Y ye que nun solo les cotolles van ser serios enemigos sinon, qu'estos entemécense con dellos felechos, que nalgunes ocasiones supérenmos en tamañu. Dende les Estaques, hasta'l siguiente oxetivu, vamos tener el tramu más llargu, nel que tendremos partes de senderu más abiertu y otres nes que'l rabuñase con dalguna cotollina ye dalgo aseguráu.


El Sueve y el Picu Pienzu bien cerquino

Aún así, les vistes y el preciosu día, siguen siendo una inyección d'enerxía positiva más grandes que les propies inyecciones de los pinchos de les cotolles. La verdá ye qu'a pesar del altor modestu de la xerra, ye un privilexu d'allugamientu pa conocer l'Asturies mariñán y l'Asturies montañera.


Bustronci y la Pica Socastiellu y la so xubida

Unos 45 minutinos, vamos tardar ente'l nuesu últimu cumal y el que nos ocupa agora: Bustronci de 538 ms, que dará pasu al colláu de L'Abierta, onde fadremos la nuesa ascensión final al vértice de Socastiellu, cabera cota d'interés d'esta guapa Xerra'l Fitu.


Na Pica Socastiellu (540 ms) descansando

Esta xubida será bien guapa y fácil, superando delles campes de verdi yerba, nes que ye cenciello atopános pastiando dalgún qu'otru asturcón. Como non, los 540 ms del Socastiellu, tornen de nuevu a ser un mirador perfeutu de Picos y de la costa ribeseyana si miramos pal Oriente.


Asturcones cola costa embaxo y Picos siempre presentes

En total, tardamos en facer esta xerra pocu más d'una hora y media, pero vamos entretenenos un puquiñín na cume, porque ya dixe mil vegaes que bien lo merecen les vistes. Ensín más, la baxada será pel otru llau del picu, hasta ganar un hombru, onde camudaremos el sen de la marcha dafechu.

Dende l'entamu de la vuelta, veremos como la Xerra'l Fitu tará marcada per una llínea que va per tola fastera sur y que debería dexános de nuevu nun fácil andar nel colláu de la cruz de Llames, p'aportar al Altu'l Fitu ensín nenguna dificultá.

Pero como siempre, una cosa ye la teoría y otra bien distinta la práutica, poro.... la vuelta al puntu d'aniciu tornóse un infiernu, teniendo que siguir una sienda, esistente sí, pero mui tapecía per miles de felechos y cotolles.

Lo que fuera una auténtica maravilla de ruta d'ocidente a oriente per esta xerra, esfrutando de les vistes tornóse nuna llucha cola vexetación continua y na que les posibilidaes d'esfrutar de vistes foron prohibíes, teniendo la única opción de mirar pal suelu, pa nun tropezar colos miles de raigaños de felechos y cotolles qu'atapecieron el camín.


Baxando del Socastiellu pa facer tola vuelta pola fastera sur de la xerra'l Fitu

Finalmente, rabuñaos, cansaos y pelín desilusionaos llegamos de nuevu al Altu'l Fitu, dempués de percorrer durante 3 hores y media, los casi 8 kms que tien esta Xerra'l Fitu, y superando un desnivel acumuláu de 400 ms.

A dicir verdá, desilusionáu llegué yo, porque nun albidraba que'l camín de vuelta pel Sur tuviera tan mal, y dióme rabia, ya que'l crestéu ye bien guapu de facer, sacando alantre una rutina corta pero con mui bones vistes, y que sería perfeuta si tornamos pela pista que percorre la fastera norte, dende L'Altu'l Fitu a Ribeseya.


Camudando'l Camín dende la xerra'l Fitu

Nesta ruta fusilamos les siguientes cotes de Caravia: Los Cuetos Coloraos (584 ms) que ye segunda cota, Les Estaques (551 ms) tercera cota y la cuarta cota y vértice xeodésicu, La Pica Socastiellu (540 ms)

Ver progresos en: Retos montañeros

No hay comentarios:

Publicar un comentario