Llagu La Ercina (Cangues d'Onís) - Verdilluenga - Trea - Caín (Valdión) - Culiembru - Ostón - Vegamaor - Arnaedu- Belbín

21, 22 d'Agostu de 2021

Track: Llagu La Ercina (Cangues d'Onís) - Verdilluenga - Trea - Caín (Valdión) - Culiembru - Vegamaor - Belbín

Findes de bon tiempu n'Agostu, nos que toca aprovechar y tirar pa Picos. Esta vegada, llevaba Carlina, diciendo de preparar un finde y dempués d'aldericar qu'opciones sedríen les meyores, viendo que nun conocía denguna canal de Picos, decidime a repetir dalgunes estayes de Traveseres d'antaño.

Llagu La Ercina (1115 m) sedría'l puntu partida

 

Una de les más guapes estayes pel Cornión, llevónos dende'l Llagu La Ercina hasta Caín, magar de facer tola cumera dende la Verdilluenga hasta la Peña'l H.ultayu, pa baxar per Trea a Caín. Poro, nun hubo muncho más que pensar y más coles ganes que tenía de pasar un finde nel Albergue de Caín, onde ya lloviera de les últimes aventures con Ana.

Facemos camín hacia la Vega d'Aliseda per Tolleyu

Partimos pocu dempués de les 9 la mañana, travesando pela mandrecha'l llagu La Ercina, col envís d'empobinanos pela Canaleta hacia la Vega'l Paré. Magar de travesar esta guapa vega, salimos hacia Tolleyu onde restolaremos una fonta, desistiendo y garrando agua penriba la Vega'l Forcáu.

Travesamos tolos H.oos de Carbanal hacia'l Colláu Los Tiros

Dende equí, tarrén más que conocíu a la par que llaberínticu pelos H.oos de Carbanal, hasta la guapa vega Aliseda, onde xintamos daqué y entamamos l'ascensión hacia'l colláu Los Tiros, algamando eses vistes del central y del restu del Cornión tan ablucantes como yéramos a imaxinar.

Cume na Verdilluenga (2133 m)

 

Segunda vegada que toi nesti cumal, viendo munches alcordances daquellos tiempos, onde too yera nuevu y desconocíu. Nel intre, miro a tola redolada y tengo ascendíos tola cumales de la redolada, lo que nun quita que esfrute d'igual mena que daquella primer vegada.

Crestiamos dende la Verdilluenga hasta la Peña'l H.ultayu

Pa Carla ye nuevu tou y va entrugando por cada cumal, por cada canal, por cada colláu y faciéndome sentir como un güelu, nomando en 360º tolo que somos acolumbrar. Batalles aparte, quédanos camín tovía, entainando a facer el restu'l cresteríu hacia la Peña'l H.ultayu, pasando pela Torre la Celada y el Cuvicente mientres el borrín tien a bien metese a xugar nel nuesu camín.

Averámonos hacia la Canal de Trea pa descender a Caín

Encumamos tolo que se nos pon por delantre y descendemos ensin perder munchu tiempu hasta'l colláu les Cruces, boquera d'entamu de la canal de Trea. Nesti puntu, miro pa Carlina, que va un pelín na reserva, pero con ganes, asina que tiramos p'abaxo a bon ritmu camentando pa min, que siempre baxé esta canal y enxamás tocóme xubila, asina qu'habrá que facer por ello.

Entreteníu descensu per Trea, un ambiente de bochornu y humedá

Por enésima vegada damos colos nuesos cansaos pies na senda'l Cares, teniendo na memoria lo mui reventáos que llegamos dalgunos fai diez años a esti mesmu llugar, dempués de conocer Trea. Güei, tovía somos a aportar al Albergue de Caín, con una sorrisa, ganes d'una cerveza y con dalgo más de 10 hores de camín nel bolsiellu, casi 18 km de percorríu, 1560 m d'ascensión acumulada y 2150 m de descensu.

Birra, cena y descansu nel Albergue de Caín

Col cuerpu denscansáu, magar de la bona cena del día anterior y el bon tratu nel nuesu campu base particular nel Albergue de Caín, llevantámonos con calma, preparamos trastos y despedímonos de Alfonso y Diana pa tornar hacia'l Cares, onde la canal de Culiembru esperábanos colos brazos abiertos.

Salimos hacia la Canal de Culiembru pel Cares

Pese a ser les 10 de la mañana, topámonos con bien de xente que fai la so particular aventura pel Cares. Siempre faime gracia ver les sos cares, porque nun son a atalantar, el mundiu que piérdense por nun subir per estes canales p'arriba, pero bono casi que meyor o al menos eso pensamos dempués de saludar a una centena persones nel nuesu camín.

Entamamos la canal de Culiembru con ganes

Con un día menos calurosu que l'anterior y más ñubláu tamién, aportamos a Culiembru, saliendo penriba les cabañes, dexando atrás cualesquier contactu humanu y en realidá, eso ye lo guapo de Picos, nel que puen tar falándote de masificación mientres cuentes colos deos a cuanta xente pues cruciar, saliéndote de los caminos davezu.

Esfrutamos de la guapa canal de Culiembre hasta Ostón

Vamos faciendo camín per Culiembru, ente dalguna quexa de les patuques, por mor de la soba d'ayeri, pero mirando los tiempos van respondiendo bien, teniendo tiempu a facer visita na cueva de Culiembru y esfrutando de les últimes envueltes enantes d'aportar a Ostón, onde punxera puntu final, l'anterior vegada que xubiera esta canal.

Daquella vegada, xintáramos daqué y baxaremos pela canal de la Raya, pero a la escontra, llueu de tomar l'almuerzu, siguimos camín hacia la parte alta de la Raya, pa siguir el so cursu al traviés de les marques de GR que tienen de llevanos hasta la Vegamaor.

 

Esti tramu ye nuevu pa min y voi esfrutando de cada pasu, del final de la canal de la Raya, del valle La Texa y sobretou de la entrada a Vegamaor, al traviés de la non menos guapa Vega Los Corros. La verdá ye qu'alloria alcontrase con un llugar así enmediu de los Picos, enllenu de vida y ganadería, saliendo al pasu como non, un cachorrón de mastín qu'acompáñanos adulces per tola travesía per Vegamaor.

Increyible llugar el de Vegamaor de pasu pente los demás mayaos ganaderos

Saldremos de Vegamaor, pasando al llau del Pozu Los Texos, entamando una pindia cuesta hasta'l colláu Xerra Buena, onde'l borrín taba esperándonos al entrar nesta fastera Oeste. Dacuando, alcuentres pequeñes ayalgues que nun conocíes y ya paga la pena tol esfuerzu, pero tengo que dicir, que diba prestame ver un pocu más de tol descensu hacia'l Llagu La Ercina.

Continuamos de mayáu en mayáu pente'l borrín, destacando Arnaedu y Belbín

Por dar unos datos, descendimos hacia'l mayáu d'Arnaedu, ensin ver res, hasta topar les cabañes, pa siguir camín pelos H.oos de la Lleñe y las Inh.iestas hasta Los Reguerones, continuando'l cursu la riega hasta'l colláu'l Padre, onde desviámonos hacia Belbín.

Birra final nel chigre de la Ercina pa finar un finde montuno xenial

Dende Belbín, camín más que conocíu, anque nun viéramos nada, que tien de llevanosen cuesta hacia la fonte la Texa, pa siguir pela Llomba hasta la pista que va pa Buh.errera, onde desviámonos prau alantre hacia'l Campu la Tiese, llugar d'aparcaderu del Llagu La Ercina.

Nesti segundu día, sumáremos otros 18.5 km de percorríu, 1250 m de desnivel acumuláu positivu y unos 400 m de negativu, nun total de casi 7 hores de camín, qu'en mayor parte percorre un GR, pero que camiento, nun ye mui repetíu y que quiciás debería tar más y meyor indicáu, como tolos caminos y siendes de los Picos d'Europa.

Carlina camudando'l so camín pel monte