martes, 28 de septiembre de 2021

Caldes de Boí (Alta Ribagorça) - Cavallers - Pic de Comaloformo - Estanys de Gémena

 5 de Setiembre de 2021

Track: Caldes de Boí (Alta Ribagorça) - Cavallers - Pic de Comaloformo - Estanys de Gémena

Primer día d'actividá nesti viaxe pel Pirinéu 2020 - 2021 y como siempre, la ruta que teniemos pensada d'entamu, camudámosla por mor del conocimientu de Fernan, decidiendo salir dende Caldes de Boí, anque seyan más metros de desnivel que dende Cavallers, pa completar una circular a posteriori, dafechu maraviyosa.

Almorzaremos nel Camping Boneta de Barruera, a los que-yos daremos les gracies milenta vegaes pol bon tratu y enantes de les 9 la mañana, entamaremos a caleyar hacia'l banzáu de Cavallers. Fadrémoslu per un guapu senderu, nel que vamos dir atopando pontes que llibren la riega Noguera de Tor, dalgun campamentu de mocedá y milenta bloques de granitu que dan preste al fanatismu bloqueru d'esta fastera d'Aigüestortes.

Partimos del aparcaderu de Caldes de Boí (1482 m)

Nun soi nin munchu menos, bloqueru, pero hasta mí dábame ganes de garrar la colcho y esfrutar del paixase colos collacios, compartiendo pegues, rises y un mullíu prau onde tirase a descansar ente pegue y pegue. La verdá ye que tol camín pente Caldes de Boí y Cavallers ye seliquino de caleyar y los 300 metros de desnivel que vamos ganar, nun mos pesen demasiáu.
 
Al aportar a la base del enorme banzáu (embassament) de Cavallers, desviáremos hacia'l barranc de Comalesbienes y superaremos los últimos metros de desnivel per cómodes envueltes, hasta travesar el propiu banzáu penriba la muria, averándonos al entamu del senderu hacia'l nuesu oxetivu: El Pic de Comaloformo.
Facemos averamientu hasta l'estany de Cavallers 

Al final del banzáu, alcontraremos un senderín que pente delles plaques d'una escuelina de deportiva, nos dirá faciendo xubir hasta'l nomáu "Pass de l'Osso", una chimenea que termina nun bloque empotráu, teniendo que pasar pembaxu d'él, quitándonos les mochiles, anque sin denguna dificultá, típicu pasu más vistosu que difícil.
 
Llueu del pasu, escaeceremos cualesquier trepe y entretenimientu vertical y tocará ponese en mou montañeru, siguiendo'l claru senderu, tapecíu per arandaneres y frambueses que van sirviendo d'almuerzu, demientres ganamos desnivel hacia una clara colladina que darános pasu hacia los estanys de Comaloformo.
 
Salimos pel "Pas de l'Osso" hacia la parte alta del Estany de Cavallers

Na colladina, daremos un descansín merecíu, ya que llevamos 3 hores de patéu ya y coles increyibles vistes de la Punta Alta de Comalesbienes y dellos estanys de Tumeneia, vamos dir negociando camín más pedregosu hasta aportar al primer estany de Comaloformo, onde entamamos a ver lo que quédanos per delantre, que ye una pedrera infame de bloques de mediu tamañu, que faen l'avance pelín abegosu.
 
De primeres fai gracia dir pegando saltos de morrillu en morrillu, siempre que nun te pegue'l sustu de movese, pero cuando lleves así más d'una hora, eches en falta una traza de senderu más curiosa. De toes formes, toca xubir y vamos faciéndolo, ganándo-y tarrén al Pic de Comaloformo y vistes tamién al Estany Glaçat.

Continuamos ascendiendo pasando pelos estanys glaçat de Comaloformo

A falta d'unos doscientos metros de desnivel pa l'arista que nos llevaría al cumal, vamos alcontrando xente, viendo a unos mozos baxar per una forcada más averada al Pic y otra pareya que baxa más cerca del Besiberri Sud, los cuales tienen un sustu, zampando un fogón el mozu al que nun-y llevó un morrillu per delantre de milagru.

Fernan, duda del camín más direutu hacia'l Comaloformo que llevamos y decide averase hacia la forcada más alloñada del cumal, llevándose a Mario que nun va mui finu cola altura. Yo tiro hacia'l cumal diréctamente con Dani, parándonos a charrar un bon ratu con un par de rapazos de Vic que veníen faciendo tola arista los Besiberris, quedándome cola copla pa otra vegada.

Metémonos dafechu nuna pedrera infame hasta la cresta los Besiberris

La verdá ye qu'hai ambiente pel monte y eso siempre presta y ver a dos mozos faciendo actividá potente con vivac incluyíu más entá. Ensin más, aportamos a l'arista de los Besiberris con cuidadín de nun tirar piedres y quedamos a la espera de Fernan y Mario, que terminen por arribar al cumal del Pic de Comaloformo baxando un montón pela otra fastera, demientres percorrí la cresta dos vegaes buscándolos... coses que pasen jaja.

Facemos cumal nos 3033 m del Pic de Comaloformo

A les 3 de la tarde, facíemos cumal nos 3033 m del Pic de Comaloformo, llueu de 6 hores y cuartu de ruta, poro descansaremos un pelín, xintaremos dalgo y esfrutaremos de toles vistes, con tola crestería de los Besiberris y paisaxes que sólo Fernan ye capaz de descifrar ya que pa min ye la cuarta vegada nel Pirinéu, pa Dani la segunda y Mario la primer vegada... poro too ye dafechu nuevu y desconocíu.

Garramos descensu direutu del Comaloformo hacia los Estanys Gelats

Magar, d'una charra animada, semeyes varies y que Mario, recuperase un pelín ya que l'altura ta pasándo-y factura, vamos descender pela fastera contraria, col envís de garrar un canalizu que fainos baxar mui direutos hacia los Estanys Gelats, na base de la Punta Senyalada, monte que Fernan ya xubiera y nin s'alcordaba jaja.

Terminaremos el descensu pel canalizu, munchu güeyu coles peñes que podemos tirar al d'abaxo y enllazaremos col senderu de la normal al Besiberri Sud, pudiendo algamar ya un ritmín de descensu munchu más curiosu y entrando nuna llocura de paisaxes que nos faen parar a sacar la cámara cada tres pasos.

 
Quedamos ablucaos cola belleza del descensu hacia los Estanys de Gémena

Tamos saliendo de los Estanys Gelats a los Estanys de Gémena y vamos ablucaos cola belleza del llugar. Sin duda, Fernan sabía porque allargar la circular pa descender per Gémena, nun lo damos a sacar semeyes, pero como siempre velo en direutu ye otru rollu completamente.

Pasaremos pel estany de Gémena de Dalt, guapu enforma y baxaremos al de Gémena de Baix, nel que ya quedes ensin pallabres, camines al so llau y sólo pienses en traer la tienda campaña y quedar al so llau una bona temporada.

Dexamos atrás tola guapura de Gémena pa descender pel Barranc de Sallent hasta Caldes

Tamos ya nun tarrén mui andáu, pero vamos recoyendo xente que xubió hasta¡l Besiberri o simplemente hasta los llagos, así que'l camín dexa baxar casi corriendo, aportando a la mecederu de los barrancos de Sallent y Estany Roi onde garramos senderu permarcáu que baxa a la vera la riega de Sallent y pente un pinar non mui atrautivu too seya dicho.

Ensin mayor novedá, que baxar los nueso cuerpos cansaos lo más apriesa posible, diremos terminado'l descensu del barrancu hasta aportar a Caldes de Boí, onde naguábemos per una cervecina, pero costónos tanto alcontrar el bar nel balneariu que decidimos tomala en Barruera, onde ya punxímonos en mou relax, con duchina nel camping, cerveces artesanes y una potente hambuergues nel propiu camping.

En resume, circular de 15 km con 1670 m de desnivel p'ascender al Pic de Comaloformo, monte non especialmente atractivu, pola so formación y estructura rota y pedregosa, que ralentiza l'ascensión, llevándonos 10 hores y 20 min pero la so redolada enllena de estanys ye impresionante.

Camudando'l Camín esfrutando de los Estanys del Parc d'Aigüestortes

No hay comentarios:

Publicar un comentario