miércoles, 26 de enero de 2011

Isoba (Puebla de Lliyu - Llión) - Les Rapaínes

29 d'Avientu de 2010

Track: Isoba (Puebla de Lliyu - Llión) - Les Rapaínes



Nun fai nin quince díes que tuvi nesta fastera ayerana d'Asturies, y na selmana de vacaciones navidiegues, quedé con Vicen, compañeru d'entrenos na escalada y que ya viniera conmigu al gran ascensu al Corbellosu, pa tornar a la ñeve, acompangaos de piolé y crampones. Nesti casu, tenía yo nel tinteru l'últimu dos mil de Casu, que nun ye otru que'l cumal de les Rapaínes, y debíu a ello, tocó averase al Puirtu Braña y un pocu más abaxo na vertiente llionesa, al pueblu d'Isoba.

Como siempre, pa llegar equí, partimos de Xixón garrando la autovía minera y dempués en Mieres del Camín garramos la autovía A66 saliéndonos na salida de Morea, pa percorrer la As 112, pasando polos siguientes pueblos nel nuesu camín: Morea, L'Escuyu, Los Estrul.lones, Cabanaquinta onde garraremos la AS-253 pasando por L.levinco, Entepenes, Col.lanzo, Yanos, La Pola Vieya, el Pino y Felechosa onde desayuné con Vicen y garramos el so coche, pa empobinamos hacia'l Puirtu Braña pasando enantes por Cuevas, Roseco, Rufríu, El Fielato y La Raya.


Entamando n'Isoba (Llión)

Unos kilómetros más abaxo, daríemos col pueblu d'Isoba (1330 ms), onde preparámonos nuna mañana más bien fría, pa entamar a caleyar pocu enantes de les 9 y media la mañana. Partimos d'una pista, y ya dende l'entamu comprobamos el mal estáu de la ñeve, na que fundíamonos con una facilidá pergrande, poro esperábanos otra ruta llenta y dura nel avance. Los primeros 45' pondríanos nel colláu Pinzón (1520 ms) dempués de caleyar pela ñeve, travesando nun puntu el mesmu ríu Pinzón, que ñaz nel picu del mesmu nome, el cual bordiamos pola so esquierda, a la mesma vegada que vamos dexando la mole del San Justo a la mandrecha.


El Torres presente y averándonos al colláu Pinzón

De xemes en cuando, les ñubes, que cuerríen abondo nos altores, dexábenmos acolumbrar el picu Torres, o dalgún de los que forman les pistes de San Isidro, pero siempre les menos, ya que'l día taba zarráu enforma con ñebla ya inclusu dalgún copín de ñeve dexábase cayer.

D'esti colláu vamos empobinamos a la esquierda, pa caltener casi l'altor pegadinos al picu Pinzón y xubir dempués ganando bien de desnivel hasta aportar al colláu de la Molía d'unos 1820 ms. Dicir qu'esti tramu, praúticamente ficímoslo ensín ver gran cosa, anque paralelos a nós, deberíemos tener como guía, l'arroyu de las Hazas, que ñaz de la Llaguna Negra, la cual tampocu vimos nin por casualidá, jeje.


Aportando a la Molía

El casu ye que debía tar por ahí, pente'l blancor de la ñeve,... Dicir que de la Molía, baxa camín hacia les mayaes asturianes de Vallín y Valdebezón,... pero nun ye esa la ruta que nos tien ocupaos, así qu'entamamos l'ascensión final a la Rapaona. Y equí entama'l misteriu de la Rapaona... Voi desplicame, ya que son coses que solu puen pasar na montaña. Ya te pues matar a mirar mapes y mapes, per interné, papel, gps,... y pónente'l cumal de la Rapaona marcáu a unos 1970 ms nun siendo mui repunantes, y dalgo más cerquino del de les Rapaínes.

Por embargu, poneste a xubir dende esti colláu, cola ñeve dalgo más durino y pindiez abonda, así que garramos piolé y crampones por seguridá, y na qu'entames a sudar a pesar del vientu ya'l fríu, daste cuenta que na primer cume qu'alcuentres ya ties el buzón de la Rapaona, con una cruz horrenda pa nun ser menos d'otros picos.


Ascendiendo a la "cume de la Rapaona" de 1949 ms

Te dices,... pues val, pensé que yera más llargu, así que saques semeyes pente la ñebla, y vas poner el puntu nel gps y mires l'altor y... 1949 ms,... y dices pero que coño ye esto, jaja. Pues na, que-y den vamos siguir, así que tires p'alantre, y ves que'l siguiente cumal ta más alto, y el siguiente un pelín más,... y ya agora si que pienses, pero quien coño puso'l buzón allá abaxo.

Mires pol gps, y apaecen los Peñones del Violosu a 1969 ms d'altor,... y otra vegada, pues hala!!, va ser que la Rapaona nun ye la cuarta cota de Casu, ya que'l Violosu ta más alto, así que sigues ascensiendo pente la ñebla, y les pantasmales aguyes que xurden de cada canal de la nomada pareá de la Rapaona, y ya a la fín a unos 1972 ms, tornense en baxada los nuesos pasos, poro dexo costancia d'esta costa másima.


Nuna de les pindies canales nos Peñones del Violosu

Nesti momentu, paez ser qu'ente la ñebla somos a acolumbrar ya que la paré va suavizándose hacia Asturies, y facemos cota mínima enantes de xubir otra vegada a unos 1943 ms. D'equí l'ascensión nun va danos problemes, sacante un pasu, nel que nun vemos claro como llibrar una llábana tendía, que daríanos pasu a un cumal y d'ellí ya.... nun sabíamos lo qu'había, así que decidimos baxar hacia una canal, y facer el so final nuna guapa ascensión a bas de patada y piolé.

Sin muncho más, aportamos a una llomba de más de 2000 ms, na qu'aparte de finxos de provincia, nun atopamos res que paeza un buzón. Y digo que nun atopamos nada, porque nun veíemos una mierda por nengún llau. Así qu'aprovechando que'l vientu dexaba d'azotar por un ratín, xintamos dalgo y preparámonos a facer la semeya de rigor a unos 2020 ms d'altor.


"Cumal de les Rapaínes", va ser que non, jajaja

De sopitu, namái guardar tolos trastos, ábrese un furaquín pente la ñebla, y vemos una peñina, unos 20 ms más allá y unos 5 ms más altos que nós. Dempués de les rises, tiramos hasta ellí a sacar la semeya anque seya simplemente por vergoña, jaja. Entre pitos y flautes, yeren casi 4 hores de ruta, con fríu, ñeve blando nos baxos, y dalgo xelu nos altos, poro cansanciu si que llevábemos y tamién fame, asína que teníemos que baxar cagando plomu, pa poder nes vegues más protexíes del vientu, xintar el bocata.


La Peña'l Vientu que picaba por segunda vegada pero yera tarde

Darréu, baxamos en llama al colláu de les Aguyes o al menos averámonos a él, pa continuar restolando la meyor ruta ensín baxar y xubir desnivel poles continues llombes qu'hai nel camín, hasta dar col arroyu de l'Aliviada. Enantes como non, la Peña'l Vientu qu'amosóse gayolera pente la ñebla, susurrábenos a la oreya que la xubiésemos tamién, pero les obligaciones d'un maríu y pa (como Vicen... que pensábeis), nos ficieron baxar dafechu.

Xintamos cerquina l'arroyu, y llueu lo cruciámos pa xubir hacia les vegues de l'Aliviada onde hai dalguna cabañuca que ya conocíemos gracies a la propia ruta de la Peña'l Vientu. D'equí ya báxase por pista hasta la carretera pa caleyar varios kms (quiciás demasiaos) hasta Isoba.

Del anterior tramu de camín, comentar, que sin ñeve debe ser fácil y rápidu de llevar a bon puertu, pero con munchos centímetros y n'estáu blandón, solo puédese alcontrar torgues y más torgues nel camín, ya que nun ves si pises enriba d'un escobón o una cotolla o yo que se lo qu'hai embaxo.

Tamién quisiera dar (nel track póngolu), una variante de baxada que camiento más pretosa ya que nun pierde altor dende'l arroyu de l'Aliviada hasta les cabañes de las Hazas, onde baxa dafechu a Isoba per otru camín. El por qué, de nun garrar esti acesu más ñatural pa una ruta de montaña envede la carretera, foi l'estáu de la ñeve, que diba facenos perder munchísimu tiempu, y esti nun mos sobraba precísamente, pero encamiento a que lu faigáis asína, ya que la carretera foi dura, dura, y hai muncho mandril esquiador que te pasa col coche xiblándote l'oreya.

En resumen, ruta prestosa, non demasiáu dura, que llevónos durante dalgo más de 6 hores y media, al traviés de 14,3 kms y nel que pa facer estos cumales, tuviemos que superar un desnivel acumuláu de 1050 ms, colo que nun tuvo nada, nada mal.


Camudando'l Camín nel verdaderu cumal de les Rapaínes (2025 ms)

Nesta ruta ficimos la 2 cota y 2000 de Casu: Les Rapaínes (2025 ms) y la cuarta: La Rapaona (1972 ms)

Ver progresos en: Retos montañeros

martes, 25 de enero de 2011

Meyor blogue n'asturianu 2010

Nun pensaba da-y munches más vueltes a esta prestosa iniciativa de los blogueros astures, pero merez la mayor difusión posible, así qu'entradina nel mio blogue pa que sepáis que la xente que naguamos porque la llingua asturiana seya normal en toles xeres de la vida, na blogosfera ta siéndolo dafechu.




Asína que votái, al blogue n'asturianu que más vos preste, y si ye'l miu meyor que meyor, jeje.

Camudando'l Camín

Yernes (Tameza) - Picu L'Oral

27 d'Avientu de 2010

Track: Yernes (Tameza) - Picu L'Oral



Dempués de la fartura de caleyar del día anterior, Pangua dexóme solu pa dir de montaña,... menos mal que tenía a Vero, collacia de Mieres que conocí durante'l finde santu, nel que Fernan y yo dimos bona cuenta de la Peñasanta d'Enol y de la Peñasanta Castiella. De la que baxábemos reventaos de facer Peñasanta d'Enol y les dos Torres (nun ye la peli del señor de los anillos, son la de la H.orcada y d'Enmediu), alcontrámonos a dos moces soles pol monte (cosa rara,...) y llueu taben tamién nel refuxu de Vegarrionda, sofriendo les roncaeres de la xente. El casu ye que'l carallibru sirve de xemes en cuando pa dalgo y topámonos na rede y ya va bona que convidárala a venir de monte y hasta agora nun se dió.


Yernes ñeváu a sus 690 ms

Asína pues recuéyola en Trubia, cola intención de xubir a los puertos de Marabiu por Teberga, pero una vegada que nos ponemos a ella, l'estáu de la carretera, failo imposible, asína que toca dar una vuelta llarga, llarga, mui llarga, hasta'l plan B, facer el picu L'Oral dende Yernes, ya que'l plan A, yera Caldoveiru y lo que saliese por delantre dende riba los puertos,...

Asína pues, llegaremos a Yernes dende Grau, al cual aportaríase fácilmente pola y griega dende Xixón, y na ronda d'Uviéu garraríemos la A-63 hasta esti pueblu moscón. D'equí tomamos la carretera As-311 pola que travesamos el pueblu de Llantrales y pocu dempués de pasar una ponte, garraremos a la nuesa manzorga una carretera que nos llevará hasta Yernes dempués de pasar polos pueblos de Rañeces, la Figal, Pandu y Panicera.

Al final, col asuntu la carretera y les vueltes, ponémonos a caleyar pasaes les 12 la mañana, y enriba too, por primer vegada dende cuantayá, voi volver a facer una ruta ensín l'aida del gps, namái que pa orientame. Damos, como siempre, los primeros pasos pel pueblu pasando por un área recreativa y siguiendo una carretera, hasta una curva de dereches na que siguiremos de frente per un camín, que xube al Tintal, pa llueu tomar direición a esquierdes y caltener l'altor paralélamente a la carretera que dexáremos enantes.


Bordiando'l monte Braniella

Dempués de facer la falda d'esti monte, pente la ñeve y la vexetación, llegó un momentu nel que decidimos entamar a xubir a güevu, ya que veíamos a les clares, que la xubida natural al picu L'Oral va pola pista asfaltada, y esta entamaba a facer envueltes más alantre, averándose hacia la nuesa posición. Poro, fuimos ganando-y altor poquín a pocu, non sin esfuerzu pola cantidá tan grande de ñeve qu'había y fuimos aportar al monte Braniella de 1136 ms, nel cual ya vimos el nuesu oxetivu y el percorríu que debíemos tomar p'abordalu.


Picu L'Oral y colláu Fancualla

Dende equí riba, quedónos nidiu, que la xubida que ficiéramos diba ser muncho más guapu, qu'andar pela pista tol tiempu, así que, ensín perder tiempu baxamos al colláu Fancualla, nel qu'hai un pequeñu llagu, y abriendo buelga pela ñeve, coles pates cargaes del día anterior fuimos dando-y pocu a pocu, hasta ganar l'arista del Picu L'Oral, que nos dexaría nel so cumal de 1246 ms.


Macizu d'Ubina y L'Aramo dende L'Oral

Ta'l día pelín murniu, y les vistes queden dalgo tapecíes poles ñubes, pero aún así paga la pena, l'ascensión a esti picu. Eso sí, val más acolumbrar los cordales más orientales, porque pal ocidente, entamen a desesperar los putos eólicos en munches xerres. Y ye que n'Asturies ya tamos a pocu de facer tan afamada la fras de "Eólicos NON", como ya foi la de "Ocalitos NON". D'otra miente, dame un pelín de pena, nun controlar tanto la fastera ocidental d'Asturies, y ye que cuéstame munchísimo dixebrar dellos montes o picos,... poro habrá qu'averase más de continuu, qu'Asturies tien muncho por conocer inda.

Fai friu, asína que siguimos alantre, y baxamos pela arista Sur del L'Oral, hacia'l colláu la Carabina (1130 ms) bien cerquino de Cuallagar, onde talantamos si, baxar hacia la pista ya o facer un cumal más. Nun fai falta convencer muncho a Vero, y ponémonos a la xera, nuna ascensión pelín más abegosa, polo desigual del tarrén, y pente una pequeña canal con vexetación enforma, damos cumal al Cantu la Flecha, dende'l cual vemos a les clares montes que quedarán pa otra incursión por Tameza, como son el Caldoveiru y el Tórzanu.


Cantu la Flecha (1264 ms)

Son les 3 y media, y como diz la canción de Nuberu: "atapez... la tardi ta ya apigazando", y ye que ta dalgo oscurín ya, asína que ponémonos a baxar cola ñeve pela rodiella, lo más rápidu que podemos hasta empobinanos dende'l colláu, pola pista hasta'l Puertu, onde xube otra pista hasta'l colláu de Fancualla, no que sería l'ascensión normal al picu L'Oral.

Nós, demientres falamos de mil temes, munchos dellos políticos y culturales, siguimos baxando metros, hasta llegar a les brañes de la Senra, onde entretenémonos agüeyando delles cabañes, como la del grupu moscón de montaña,... ya nos prestaría a los Borrinos tener un refuxu propiu dalgún día, jeje.


Cuerria en Cuallagar y baxando pela pista hacia Yernes

Magar de les cabañes, va desapaeciendo parte de la ñeve y xelu que cubría l'asfaltu, y los pies, van quexándose de la dureza del firme, faciéndose pelín pesáu tolos kilómetros finales de la ruta. Ensín más, apaecémos de nueu pola parte más alta del pueblu de Yernes, el barriu la Reguera, y nel coche mudámonos de ropa rápidu porque'l friu yera importante.

Xustu enantes de colar, alcontrámonos con un paisanu, que por casualidá, faláremos con él, al entamu la ruta, y al final, entrúganos que tal nos foi, quedando impresionáu de que xubiéramos tamién al Cantu la Flecha, ya que nun les tenía toes con él, de que fuéramos llegar al Picu L'Oral siquiera, jeje.

Como resumen, dicir que'l total foron 5 hores y 10 minutos pa facer los 12 kms de ruta superando un desnivel acumuláu positivu de 780 ms, lo que-y da puxu a esta rutina corta que fízonos conocer un pelín más, el pequeñu conceyu de Yernes y Tameza.


Camudando'l Camín nel picu L'Oral


Nesta ruta ficimos la 3 cota más alta de Yernes y Tameza: Cantu la Flecha (1264 ms) y la cuarta y vértice xeodésicu d'esti conceyu: Picu L'Oral (1246 ms)

Ver progresos en: Retos montañeros

jueves, 20 de enero de 2011

Viña (Cangues d'Onís) - Mofrechu - Benzúa - Rales (Llanes)

26 d'Avientu de 2010

Track: Viña (Cangues d'Onís) - Mofrechu - Benzúa - Rales (Llanes)




Afayaivos al primer episodiu de llocura montañera by Berto and company. Si dalgún día dígovos, que toi de vacas y tengo na tiesta dalguna travesía, ruta o ascensión p'aprovechar el tiempu, fuxir de mi como si fuera'l degorriu, jeje. Si dalgún aventáu apúntase, pue llegar a facer una ruta de 9 hores y media nel domingu con menos lluz de tol añu, jaja. Pangua sábelo bien.

Asína pues, llevantámonos un domingu a les 6:30 hores dempués de les fartures navidiegues, métome un ducháu rápidu, y con too preparáu garro'l coche y tiro pa Colunga, onde na estación de serviciu quedé con Pangua pa desayunar a les 7:30 la mañana. Por mala suerte, nun tenemos a la camarera de rigor... y tiramos colos dos coches, en direición a Posada de Llanes, pola autovía del Cantábricu, hasta garrar dicha salida onde metémonos en Posada, y siguimos pola As-115 travesando'l pueblu de Turancias enantes de llegar a Rales, onde dexamos el coche de Pangua na metá'l pueblu.

Tresvase de trastos, y pal coche míu, onde facemos la vuelta atrás, hasta salir de l'autovía en direición Cangues d'Onís, saliendo por Lloviu pa empobinanos pola N-634, dexando atrás los pueblos de la Vuelta la Ribera, Santianes, Omedina y Fríes como caberu pueblu de Ribeseya, y el pueblu cangués de Llordón, enantes de metenos nun cruce a la manzorga pa entrar en Viña, onde dexaremos el coche a la vera l'arroyu la Viña.


Pola mañanina a puntu salir asegurándonos en que volver, jeje

Dalgún minutín pasa de les 9 la mañana y tamos dando fín a los últimos preparativos, como nun escaecer les llaves del coche de Pangua, que nos tien que traer de vuelta, por exemplu. Aparte, de la que venía conduciendo hacia Viña, fui dándome cuenta lo lloñe que ta Rales del puntu nel que nos alcontramos, asína qu'entamamos a caleyar a ritmu, per una pista prestosa, que siempre en xubida va dexanos na braña de Llirón.


Asturies ñevada (Pierzu, Tiatordos,...) y perguapa ascensión al cordal

Darréu, escaeceremos pista dalguna, p'aniciar el tramu d'ascensión más duru de la xornada. De primeres, tendremos qu'averanos al Porru pola so mandrecha, y pa poder bordialo, tocarános saltar una allambrada, pero d'ehí p'alantre, tendremos el camín más nidiu, y les vistes de l'Asturies qu'ábrese ante nós, si miramos hacia atrás, y la sensación caliza de los Cuetos Blancos enfrente, faénos pensar tar en fasteres más agrestes como Picos.


Embobáu acolumbrando les vistes. Ex: el Sueve ñeváu

Y ye qu'en pocu más d'una hora que llevamos, aparte de superar más de 600 ms desnivel, dímonos cuenta, de que la ruta al Mofrechu dende Viña, ye una auténtica pasada y anque tea siendo dura por mor del ritmu,... les vistes, el día y el tarrén pol qu'avanzamos fae más que valoratible la decisión de facer esti monte en travesía.

Estos camientos siguíen alendándonos sobretou cuando aportamos a la vega la Teya (768 ms), no que podría ser l'entamu del crestéu, y onde'l cielu azul ya'l rellume del sol fundíase cola ñeve que tábemos pisando, nun de los díes más frios del añu. Nel intre, ya nun sabíes mui bien pa onde yera más guapu mirar, si pa la costa asturiana con Ribeseya embaxu nuesa ya'l Sueve ñeváu hacia'l oriente o diréutamente, zarrar un pelín los güeyos p'acolumbrar baxo'l sol tolos cumales del Cornión o montes como'l Pierzu, Tiatordos,...


Picos pa un lláu, y la mar con Ribeseya pal otru... esto ye Asturies

A la fín, vemos tol cordal de Cuana que tenemos que superar, y tirámonos con muncho más esfuerzu agora al traviés de la ñeve hasta dar cola so primer cota, el Cantu la H.orcada de 793 ms, que supón facer más de 750 ms de desnivel en hora y media, lo cual anque nesti momentu nun tomáramos cuenta, a posteriori pasónos factura. D'equí con un pocu más de crestéu, aportaremos a un pasu ente los dos cumales del Cantu Arriondu (794 ms), el cúal si supón el primer finxu del día.


Primeres cotes del cordal de Cuana y Pangua y el Cantu Arriondu

Dempués de baxar del más altu d'ellos, va tocános baxar y perder altor hacia la Venoria, onde miraremos atrás un segundu, pa descubrir lo guapu del Cantu qu'acabábemos de dexar atrás. Pero tamos, nuna ruta na que'l tiempu ye'l mayor enemigu, asína qu'entainamos al traviés del H.u Chicu y H.u Grande, pa encumar nel Mofrechu y sus 902 ms a les pocu más de 2 hores y media de ruta.


Cumal del Mofrechu (902 ms)

Tamos no que podemos dicir, l'oxetivu cimeru del día, anqu'esti a estes hores ya convirtiérase en pasalu bien y finar nel coche, jeje. Solo hai que ver, que tenemos el coche onde cristo perdió la zapatilla, y quédanmos munchos kms por facer. Poro, un pocu chocolate, cuatru semeyes y a correr, hacia'l prósimu monte en facer, el H.oyandongu.


El H.oyadongu y Pangua na so cume a 877 ms

Casi ún hora más, llevónos dar colos 877 ms d'esta segunda cota de Ribeseya, y ye que nesti tramu, tuvimos que travesar dellos h.oos cola ñeve más blanda de lo que tuviemos durante'l día. Hasta equí, teníemos la tierra conocida, y ye que'l Mofrechu y H.oyadongu, fuera ún de les mios primeres rutes, pero dende'l colláu d'Ixena, anque como daquella nun tenía'l blog nin les marcaba col gps.... tenía que tornar...


Macizos del Cornión y Urrieles dende'l H.oyadongu

Nun paga la pena dicir que quedáse munchu tiempu mirando pal ablucante paisaxe yera dalgo obligáu, pero nun taba permitíu nesti día, asína que siguimos caminando enfotaos nel siguiente cordal col que peganos. Por delantre, tenemos una llarga baxada hasta'l colláu del Tornu (533 m), per onde traviesa la As-340 que va d'Ixena a Nueva Llanes, y nel camín tendremos que pasar por delles brañes, ya casi ensín ñeve, superar dalguna llomba con antenes y el propiu Altu'l Tornu de 591 ms.


Nel Altu'l Tornu de camín al Cuetón

Nesti puntu de la narración de la ruta, veóme col xacíu d'aconseyar que se fine la ruta equí. Camiento qu'una travesía prestosa sería dende Viña hasta'l colláu del Tornu, onde hai sitiu pa dexar el coche. Seríen más de 5 hores yendo a bon ritmu y cola dureza más que suficiente pa quedáse ún satisfechu al 100 %, ya que les vistes dende esti cordal de Cuana, pudieran ser les meyores d'Asturies.

Hai que dicir, que nós llevábemos 4 hores y 45 minutos, y a estes altures, ya tábemos dexando atrás el cordal de Cueva Negra, ruta que ficiérase dura enforma, naquella dómina del nuesu haber montañeru. Anguaño, a pesar de los 11 kms andaos, nun mos faltaben les fuercies nin l'ánimu pa siguir tola cresta del cordal del Benzúa, na que la xente que mos veía pasar casi corriendo y entrugaba d'au veníemos quedaba alloriada.


Pangua trepando y desquiciáu de camín al Benzúa

Fuimos pasando les siguientes cotes del cordal: el Cuetón (al que tuviemos que trepar, por nun arrodiar), Muezcachica, Cabezu la Llamera y Altu'l Cogoyu, enantes de baxar un pelín hasta'l colláu Los Cordones, onde garramos puxu, pa facer l'ascensión al cerru Benzúa de 724 ms. Esto pue contáse así de rápidu, pero nun foi de tal manera ya que les dos hores corriendo pol crestéu, ficieron que nos desplomásemos nel cumal d'esti monte, y decidiéramos parar 15 minutos pa poder xintar el bocata, y relaxanos cola visión integral del macizu de los Urrieles y el so mayor h.itu, el Picu Urriellu, que nos xixilaba dende la so posición privilexiada.


Completamente namoráu de los Urrieles dende'l Benzúa

6 hores y media, teníen la culpa, de nun poder movenos muncho y yeren les 3 de la tardi ya. Paez mentira pero'l descansu yera más que necesariu, anque magar de la xinta, na mio tiesta tan solo había dos coses: la primera yera que... pa que coño ficimos el cordal del Benzúa, si esti monte nun tenía vértice xeodésicu que tachar (erru míu na confeción de la ruta) y la segunda y más importante, nun queda otra que llegar, y tenemos el tiempu pegáu al culu.

Asína pues, despedímonos del Urriellu, Torrecerréu y demás compaña,... ya qu'agora solo valía mirar pal suelu y caleyar lo más rápidu posible. Pero nun ye solu, da-y a les pates, ya qu'alcontrámonos na baxada del Benzúa con una cresta de lo más pestosa que pudiéramos imaxinar. Cayía guapa pa los dos llaos, roca con cotolles,... y lo pior, que veíamos tolo que nos quedaba inda.


Pero inda quédanos tola cresta esta?

Nun se como, pero algamamos la H.orcadina, sitiu onde xúnese'l Benzúa, cola cordal del Picu Cuanda, y equí otra bona decisión, sería baxar al pueblu de Doradiellu y d'ehí a Los Carriles pa garrar carretera hasta Rales (o dexar el coche de fin nalgún pueblu d'estos),.... pero non, siguimos al pasu que nos dexen les fuercies, y demientres el Benzúa tápanos a Llorenzu, somos a dar cumal al Cantu Braos (cota más alta del Cuanda (467 ms)).


Cu-cu, siguimos vivos nel Cantu Braos y el Benzúa na oscuridá

Ún hora más nesti puntu dende'l Benzúa, y sin parar, siguimos hasta'l Cuanda, pa baxar hasta'l colláu de La Concha (209 ms), onde tuvimos pensando en como baxar hacia'l pueblu L'Acebal y continuar por carretera, ya que veíase más bien pocu, pero.... cola esperanza de que'l Castillu Rales (280 ms) sonaba a últimu esfuerzu y l'enfotu en que d'ehí namái sería baxar por praos, siguimos alantre.


Rales dende'l Castillu al fin, jajaja

Del final, casi quítenseme les ganes de falar,... y ye que la entamada de baxada que tuviemos per delantre, bufff.. ya que de praos verdes y facilinos nada de nada, una maraña de praos enllenos de cotolles dieron pasu a otros estraos d'escayos y cercaos por allambraes que ficieron perder casi ya les poques fuercies y los nervios que quedaben dientro nuesa, p'aportar finalmente a Rales de nueche.

Por primer vegada, voi facer una especie de resume por tramos, con sensaciones namái:
  • Viña (Cangues d'Onís) - Mofrechu - Altu'l Tornu: Ablucante, travesía preciosa y perfeuta
  • Altu'l Tornu - Benzúa: Guapa, les vistes hacia los Urrieles pagan la pena
  • Benzúa - Cuanda - La Concha: Coñazu pestosu, con cresteos poco agradables en xeneral
  • La Concha - Castillu Rales - Rales (Llanes): Infiernu nada recomendable con praos desdexaos
A pesar d'esto, la ruta en sí prestó, pero la so escesiva dureza déxala en pocu recomendable na so totalidá. Como datos de la xatada que nos metimos dicir qu'al final foron 22 kms de distancia en 9 hores y 15 minutos, nos que superamos un desnivel acumuláu de 1700 ms.

La pinta nel Corquieu, en Ribeseya dempués de recoyer el coche en Viña, taba más que xustificada o que??... En fin, estes rutes aparte de pa foguease físicamente dan pa conocer les tos llendes mentales y de comportamientu ente dos persones, que disfrutaron les primeres 6 hores pero nes que les 3 siguientes namái ficieron que sufrir.... un diez Pangua.


Camudando'l Camín dende'l Benzúa

Nesta ruta ficimos les 3 cotes más altes de Ribeseya: Mofrechu (902 ms), H.oyadongu (877 ms) y Cantu Arriondu (794 ms), asína como'l vértice xeodésicu del Mofrechu de Ribeseya.

Ver progresos en: Retos montañeros