Track: Pendilla (Los Argüeyos) - Picu Tresconceyos
Primer ruta del 2020 y magar d'una ñevadina dalgo curiosa, decidimos da-y un intentu a dalgunos dosmiles del conceyu d'Ayer qu'entá quedábenme per ascender. Los díes son curtios enforma asina que desdexamos l'averamientu dende Asturies y averámonos hasta Llión, pa entrar a la fastera d'Arbas pel puertu Payares, tomando como puntu de salida el pueblu de Pendilla a 1315 m.
Día perfríu na salida dende Pendilla (1315 m)
La ruta ye cenciella d'entamu, teniendo'l camín de la Carisa como llargu calecimientu de pates de cara al ascensu del Picu Tresconceyos que ye'l nuesu destín. Y digo calecer con tol xacíu, porque poques vegaes se me verá caleyar col plumes en cuerpu pero ye que les temperatures baxo cero al aportar a Pendilla faen qu'haya que salir con tol equipu.
Caleciendo cuerpu pel camín de la Carisa a la gueta'l sol
Sicasí, el día ta preciosu, espeyáu y anque'l fríu seya intensu, na que nun podamos soportar caleyando cuesta riba pel camín de la Carisa. Esta amplia pista, que percorre parte del valle de Bustamores, dirá amosándonos pasín a pasu tol cordal de Casomera ñeváu de frente, asina como la Pasos d'Arbas col Cel.lón como vieyu conocíu per detrás.
Aportaremos a la col.lá Propinde onde entama l'ascensu al Tresconceyos
Siguiremos ascensu, saliendo de la fría solombra y tomando los rayos de sol como un auténticu agasayu, qu'al pocu de facer las Revueltas que nos lleven hacia la Col.lá Propinde, toque quitar delles capas de ropa pa nun cocer. Aún así, tando a les 11 la mañana en Propinde, puntu d'entamu a l'ascensión al Tresconceyos, el calor tampoco ye pa morrer, anque agradezse enforma.
Entamamos l'ascensu al picu Tresconceyos
Tamos a casi 1600 m d'altor, nesta guapa collada, que d'accesu a la fastera asturiana del cordal de Casomera siguiendo'l camín hacia la faldera'l picu La Boya, qu'acendiéramos va años con una ñevadísima brutal. Nel intre, toca entamar l'ascensu per un tarrén estráu de brezu altu, poro bregaremos durante un bon tramu hasta garrar al altor d'un cuetu de 1800 m una fondura de ñeve perfeuta pa poner los marañones.
Marañoniamos un ratín hacia'l cumal del Tresconceyos
Entiendo que ya que cargamos con ellos, vamos a usalos, pero nun yeren necesarios ya que'l estáu de la ñeve yera perfeutu, ya incluso con della pindiura facíesen dalgo peligrosos si nun somos avezaos nel usu d'esti preséu montuno. Pali, pali, diremos abriendo buelga y tol grupu al abellugu del cordal, aportaremos a los 2016 m del picu Tresconceyos nuna guapísima ascensión.
Cume nel picu Tresconceyos (2016 m)
Nun taremos muncho tiempu nel cumal, ya qu'un fríu vientu del norte, trae ventisca y azótanos la ñeve per tol cuerpu, siendo tal qu'hasta Kíla siéntase y acurrúcase protexíendose del vientu. Les vistes son brutales pero ya vemos les ñubes apaecer dende L'Esturbín, asina que decidimos descenser aína hacia'l col.láu de la Mortera (1929 m), onde tol grupu, por mor del fríu deciden descender hacia'l valle Bustamores.
Kíla y yo siguimos hacia'l Picu Pisones o Camparón
Sicasí, como siempre, tengo más ganes de caña, asina que dempués de quitar los marañones, decido siguir hasta'l cercanu picu Pisones a la carrera. Nun hai meyor entrenu que metese una bregada abriendo buelga corriendo pel ñeve, poro facemos tol crestéu rapidín y ascenderemos la pala mediu xelada del Pisones a fueu, aportando a los 2046 m del Picu Pisones en media horina dende'l Tresconceyos.
Picu Pisones o Camparón (2046 m)
Coles mesmes, feliz pol esfuerzu baxu la ventisca, descendemos corriendo hacia la col.lá la L.lana'l Puertu, onde protexíos del vientu, esfrutaremos d'un descensu téunicu pegaos a la riega'l Camparón, con tramos de ñeve pela rodiella, hasta amestanos al cursu de la riega las Vegas en plena cabecera del valle Bustamores.
Descendemos tol valle Bustamores al alcuentru del restu del grupu
Navegaremos pente la ñeve, alcontrando un senderín que siempre a la mandrecha'l rigu dirá empobinándose valle abaxo, hasta aportar a la vallina que baxa de la Mayá Vieya, per onde baxaren el restu de compañeros, colos que continuaremos el descensu hacia'l camín de la Carisa que nos devuelva tranquilamente hasta'l pueblu de Pendilla.
Sele descensu hacia Pendilla pela Carisa
Coles ñubes metiéndose dafechu, aportamos a Pendilla, mudándonos de ropa apriesa pa dir tomar unes cerveces más relaxaes al llau de la estufa nel bar Castellum. Otru d'estos llugares que paga la pena conocer, pol bon facer de la dueña, poles ganes de que nun muerran los chigres d'un pueblu,de dar visibilidá y vida al pueblu... prestónos pola vida.
En resume, 5 hores y media de ruta bien agradecida na que con un percorríu de 14,2 km y un desnivel acumuláu positivu de 800 m pudimos ascender un par de dosmiles ayeranos que sinon toi equivocáu, dan preste al conxuntu de dosmiles d'esti conceyu que me faltaben.
Camudando'l Camín entamando'l 2020
No hay comentarios:
Publicar un comentario