lunes, 20 de abril de 2020

Ruayer (Ayer) - Pena Reonda

9 Febreru de 2020

Track: Ruayer (Ayer) - Pena Reonda



Magar de sopesar les distintes posibilidaes pa dir de monte y viendo que llibrábemos meyor pa la fastera central, que pal oriente onde teníemos tamién dalguna ruta nel tinteru, decidimos tornar, varios años dempués, a ascender a la Pena Reonda.

Esta vegada, queríemos xubila dende Ruayer, a la escontra de les mítiques ascensiones dende'l Pino y ye que tamién facía años que nun visitábemos esti preciosu valle, más en concretu dende una ivernal a la Fitona nun preciosu día, non como'l que nos ocupa nel intre.

Partimos de Ruayer (820 m) col día pelín murniu

Dexamos los coches a la entrada, ya que metese en pueblu ye pelín abegosu pesie a contar con una placina curiosa y travesarémoslo con calma, garrando a la salida la pista qu'empobínase hacia'l Puertu Vegará. La pista nun tien denguna perda hasta la Campona onde faise la primer gran envuelta y onde nós deberíemos siguir de frente pa dexar el rigu Ayer a la mandrecha y ascender hacia la Corraína.


Ascendemos sele pela pista de Vegará hacia los praos de la Felguera

Pero andábemos apanoyaos y siguimos pela pista ascendiendo hacia la Corra y teniendo a lo postreru que descender pela Costona de nuevu hacia'l rigu Ayer, travesándolo per un maderu qu'alcontramos, ya que'l caudal yera curiosín. Magar de la pifia, ascenderemos per senderu pocu marcáu hacia la Felguera onde atopámonos col camín que tendríemos de llevar.

Pasamos a bon camín hacia la Vega'l Pozu

En tou momentu, Anna y yo, nun podemos de parar de mirar pa las Crespas, dellos pliegues de roca, que podríen dar muncho de sí pa una posible escuela d'escalada, qu'al empar diese un poquín de vidina a esti preciosu valle dalgo escaecíu al mió mou de ver. Sicasí, los nuesos compañeros, Benjamín y Carlos, nun miren tanto pa ello y dan zapatu pel cómodu camín, que n'ascensu tien de llevanos dende la Camperina hasta la Vega'l Pozu.

Xubimos hacia la Pena Caniel.la dando vista a la fín a Pena Reonda

Na Vega'l Pozu, per detrás d'una cabañona, garraremos un senderín que va dir averándose a la Pena Caniel.la, la cual siempre dexaremos a la nuesa manzorga, hasta aportar al altu onde alcontremos una canalina pa travesar la peña y dar vista a la fína a la perguapa Pena Reonda.

Ensin más, siguiremos camín alantre averándonos a la Pena Reonda y enantes dela mítica llerona que cae pela so fastera sur, pararemos aprovechando unos rayinos de sol a picar daqué. Llueu de tomar aliendo, perpasaremos siguiremos pela llera alantre hasta pasar un espolón de roca con delles covaches y al alcontrar la primer canal, Benjamín se me pon nerviosu y diz que si nun se puede xubir per ehí.

Ascendemos per una prestosa canalina direuta a la cume

Echo una güeyada dende baxo y digo, pues vamos, asína que tiro p'arriba con Kíla per tarrén pindiu ya herbosu, hasta que les opciones son menos abiertes y tocar metesene nuna canalina perpindia. Carlinos d'esta abandona que nun se ve seguru y Benjamín y Anna siguen detrás como dos titanes, demientres vamos resolviendo incógnites pasín a pasu.

Tramos d'amestáu herbosu y calizu con patiu perguapu

De los tramos más herbosos na parte intermedia de la canalina, pasaremos a navegar trepando per caliza, alcontrándonos dellos fitos na parte alta, onde más pasos aéreos tendremos pero mui prestosos d'algamar hasta dar a l'arista cimera xusto a la mandrecha del cumal de la Pena Reonda.

Cume na Pena Reonda (1837 m)

Con cara de satisfacción de los compañeros, echamos un traguín d'agua y sin bones vistes pa tar más tiempu, abandonamos los 1837 m de la Pena Reonda, demientres echo un vistazu a la canal de los Agriles per onde xubiéramos va unos añinos ya nuna ascensión ablucante. Coles mesmes, fadremos tol crestéu hasta'l colláu cola Pena Panda y baxaremos pela canal que fai de ruta normal a esti monte que sí que ye ún de los más guapos d'Asturies ensin dubia denguna.

Descendemos pela ruta normal hacia la Panda

De primeres pegaínos a les muries de la Panda y dempués faciendo una envuelta al sen contrariu, llibraremos un escalón de roca y baxaremos hasta los praos onde ta esperándonos tomando'l solin Charly. Reagrupaos y con bon tastu de l'ascensión, siguiremos caleyando tranquilamente hacia los collaos de Cabuezu.

Baxamos pelos collaos de Cabuezu y la Focel.la

En Cabuezu, hai que tener cuidáu porque los senderos más marcaos van llevanos pal valle de L'Intrueyo y este diba dexanos más baxos de Ruayer, anque tampoco habría muncho problema. Nós, la liamos un pocu pero somos a descender tol monte hasta la Focel.la pa garrar pendiente sur hacia'l valle del Reguerón.

Últimu tramu abegosu de siguir dende'l Camperón hacial valle'l Reguerón

Perder los senderos ye lo más normal, pero lo meyor ye empinase valle adientru pelas Cabas, hasta Cupín onde garraremos bon camín que pegaos al Reguerón tien de dexanos nas Terronas, onde una cabera envuelta tien de dexanos nos caleyos de Ruayer otra vuelta.

Dende equí, travesaremos el pueblu y viendo que'l supuestu chigre que diba abrir cuando lo vimos años atrás, sigue más menos nel mesmu estáu, continuamos hasta los coches dando por terminada esta ruta d'unes 7 hores y media, que diónos pa percorrer 11.7 km con un ascensu positivu de 1070 m.

Camudando'l Camín na Pena Reonda

No hay comentarios:

Publicar un comentario