Track: San Xuan (Ponga) - Valle del Ponga
Ún día más, la meteo nun ye pa tirar volaores, pero toca salir a dar un patéu enantes de qu'aportare un temporal pa la fín del día. Poro, tocaba restolar pente la carpetina de rutes pendientes y cosiquines a conocer p'algamar una rutina que nos diera pa xintar un menú del día y cellebrar la fín d'añu pal grupu de monte.
Nun mos xuntamos munchos, pero fuimos hasta Ponga con bien de ganes, ya que va más de dos temporaes que nun andábemos per esti guapu conceyu montañeru. Pasaes les 10 de la mañana, aportamos a San Xuan, capital del conceyu y coles grandioses vistes del picu Tiatordos entamaremos a caleyar.
Salimos a pasiar dende San Xuan (730 m)
De frente a les escueles, saldrá'l camín que baxará nun par de guapes envueltes hacia la riega Améu, la cual nos amosará tola belleza pongueta, baxando ésta, con gran caudal, teniendo un puntu importante de guapura na ponte Los Anclos que crucia la propia riega.
Descendemos cruciando perguapes rigues hacia'l Ponga
Siguiremos descendiendo pel camín de Llegoñu, hacia'l tombu la Espinera, quedándonos pocu a pocu a la vista namái que les Ñarices del Malhome de tola peña Tiatordos. Pali, pali, vamos averándonos al rigu Ponga, dándonos cuenta de que'l pasu ye per una foz fecha xustu pente los crestones que cayen dende'l Tiatordos, pela xerra'l Pandu y del Recuengu pel Cantu Cutre, lo cual tien un puntu bien prestosu.
Alternamos guapa viesca, augua enforma y grandes peñes a la vista
El Pontón, sedrá'l llugar de crucie del rigu Ponga, en plena foz, siendo un llugar increyible, una ponte fecha natural nuna especie de sumideru pente dos peñes peles que'l rigu garra un velocidá xabaz. Taremos bon ratu esfrutando d'esti sitiu, siguiendo un ratín hacia'l pueblu de Sobrefoz, pero'l calce anegáu fainos retroceder y dexar pa otra vegada la visita pela vera'l rigu Ponga.
Aportamos al Ponga que vien con un calce brutal demientres les vistes amplíense
D'esti xeitu, nun mos queda otra, qu'escaecer cualesquier opción d'aumentar la ruta, cosa que viendo les ñubes qu'amenacen pel sur, faen que camentemos que lo mesmu tenemos suerte de nun poder siguir. Coles mesmes, encomencipiamos a recuperar altor, empobinándonos per bon camín hacia Llendelestosu, onde alcontramos delles cases perbien conservaes.
Ascendemos cola calma hacia Llendelestosu
Dende equí, ya per carretera, caleyaremos cómodamente hasta un mirador onde aprovechamos pa facer una semeyina al pueblu d'Abiegos, prósimu destín y a la Cruz de Valdoré, monte bien guapu qu'años atrás amestáremos a l'ascensión al cercanu Pierzu.
Siguimos per carretera hacia Abiegos
Con pocu más, aportamos a Abiegos, onde dellos rayos de sol, anímenmos a tomar el vermú na terraza del Cascayu, hostal-tienda-bar nel que decidimos pedir mesa pa xintar magar de ver el menú con delles posibilidaes pa tolos miembros del grupu.
Dende Abiegos daremos un paseín per bon camín hasta San Xuan
Siendo ceo enforma, envede parar a xintar, preferimos siguir camín, llueu del vermú, hacia San Xuan de Beleño, faciéndolo de nuevu baxando a la gueta del rigu Ponga, descendiendo per bon camín hasta la ponte Sotu, que namái cruciar, empalmará col camín que vien dende Cainava, pa siguir el cursu del rigu hacia San Xuan de nuevu.
Magar de mudanos de ropa, sopesamos tomar una na capital, pero tiramos ya cola calma en coche hasta Abiegos, onde tomaremos de nuevu una prexinta y fartarémonos como ta mandáu, pa cerrar esti añu 2019 montañeru, con esti paseín de 3 hores y media, nel que ficimos unos 8,5 km con desnivel acumuláu de menos de 400 m tanto n'ascensu como en descensu.
Camudando'l camín de vuelta per Ponga
No hay comentarios:
Publicar un comentario