Track: Les Cuerries (Ponga) - La Crespa - Tarañes (Ponga)
Cuantayá que tenía ganes de conocer l'escobiu Les Cuerries en Ponga, cuantos reportaxes miraos, cuantes crítiques al cartelu de "ruta turística", camiento que camudáu pol "accesu y ruta mui peligroses" d'anguaño, jeje y a la fín decidime a facer la travesía pente Les Cuerries y Tarañes, camentando que diba ser una llucha xabaz colos ellementos y la ñatura.
Asina que, tamos preparaos pa caleyar pocu más allá de les 10 de la mañana nel PK 10 de la As-261, ye dicir na mecedura del rigu Les Cuerries col Ponga, onde hai un pequeñu apartaderu onde malpenes entren un par de coches. Atrás quedó, l'almuerzu en Cangues y la loxística pa mover una furgo hasta'l pueblu ponguetu de Tarañes onde daremos por finada la ruta.
Salimos dende la mecedura del rigu Les Cuerries (294 m) col Ponga
Con un día húmedu por mor de les lluvies cayíes na nueche anterior, encomencipiamos a caleyar per un camín cláramente pocu usáu y al altor d'un tabayón, vamos facer una envuelta p'ascender pel Escaleru, que como'l so nome diz, ye un tramu escalonáu, pindiu y dalgo resbariosu que nun tien mayor problema sobretou n'ascensu.
Ascendemos pel Escaleru y siguimos rigu alantre hacia Les Cuerries
Aportaremos a una colladina (356 m) con unes cuantes cuerries, como non, pa entamar un guapu camín con bona armadura que dirá ganando altor sol calce'l rigu, demientres les vistes de frente sol crestón que baxa de la xerra Inobiu abluquen, teniendo pocu más alantre que descender de nuevu al rigu.
Esfrutando de paisaxe xabaz pente les canales de Corina y peña Calera
Travesarémoslo per primer vegada, metíendonos nos praos de Les Cuerries, dalgo enllamargaos nesta dómina del añu, viendo como tola fastera de la canal de les Cuerries que xube al colláu Inobiu, tovía echa fumu por mor d'un incendiu. Perpasamos el prau y siguimos el cursu'l rigu casi siempre pela mandrecha.
El llugar nun puede ser más guapu, ya que vamos empozaos pente los pares que cayen de les canales de Corina y de la Peña Calera. Son d'estos paisaxes que pagan la pena conocer y nos que les semeyes enxamás faen xusticia cola xabaz belleza de Les Cuerries.
Averámonos a los parés que caen dende'l picu Porru
Sacante de dalgún bastonazu a escayos, el senderu pel momentu alcuéntrase bien y nun hai problema pa ver per onde va'l trazáu y cuando debemos cruciar a una vera u otra. Pali, pali vamos aportando al final, zarrándose un pelín el camín escontra un paré que cae dende'l Porru, xusto cuando el rigu desapaez, aprovechando pa crucialo una vegada más.
Equí, aparte d'alcontranos col altar del rei Llión, pasaremos per un tramu pente altos parés, onde seguimos ensin notices del augua, entamando al pocu un tramu de guapu ascensu, pa travesar dempués per última vegada'l rigu a la manzorga, onde al traviés d'un sedu, sacaranos al final del escobiu pasando penriba d'un tabayón con ciertu altor.
Entramos a tarrén más ampliu enantes d'una última xubida pa salir de les Cuerries
Saldremos de Les Cuerries per una portiella, no que nómase como'l Colláu y ya entraremos na viesca la Solana, onde podremos navegar pente los milenta senderos que tienen que dir llevándonos hacia la parte alta de la viesca. Nel intre, albídrase que'l sol aprieta fuerte, pero siguiremos munchu tramu a la solombra, esfrutando d'un paisaxe realmente guapu.
Navegamos pel monte La Solana hacia la pista de Tarañes
Siempre digo que Ponga enxamás defrauda y otru día más ye así. Quedamos a gustu conociendo Les Cuerries y cuando a la fin aportamos a la pista que vien dende Vallimoru, más a gustu quedamos entá, ya que dexaremos de xubir y caleyaremos cola calma hacia la collada Tarañes, onde tenemos pensáu parar a picar dalgo dempués de 3 hores y pocu de ruta.
El camín hacia'l puertu Tarañes nos amuesa les meyores vistes
Nos 1096 m de la collada Tarañes, les vistes ábrense nun sabiendo mui bien pa onde mirar. Tengo tantes alcordances de grandes rutes, que les Peñes Santes, casi pasen desapercibíes, el Pierzu, La Llambria y Peña Tarañes enriba nuesa, la Peñe Recuengu per detrás de Tarañes... milenta montes increyibles.
Ascendemos per un guapu crestéu hacia'l Picu La Crespa
Ye prontín y paez que sabe a pocu la ruta, asina que decido que voi dir hasta'l Picu la Crespa, p'algamar un pelín más de vistes pal sur. Ensin pensalo tol grupu anímase, entamando por ascender a la llomba de la Cuguruta pa siguir nun prestosu crestéu hacia La Crespa (1172 m).
Cumal del picu La Crespa (1172 m)
La verdá ye que nun contábemos con ello, pero'l crestéu a la Crespa fue'l toque final a la ruta ya que los pasos con pelín de patiu hacia'l valle'l Ponga, les vistes al pueblu de Carangres, asina como acolumbrar les vallines que baxen hacia Les Cuerries bien pagaron la pena, al igual qu'a la vuelta l'apertura de paisaxe hasta'l Picu Zorru y Peñe Ten y Pileñes detrás fue una pasada.
Desdendemos cola calma hasta'l pueblu de Tarañes
Con curiáu desandaremos tol crestéu dende la Crespa (bon nome), faldiando esta vegada pela manzorga la Cuguruta, hasta aportar de nuevu a la collada onde garraremos la formigonada pista, pela que tan sólo tenemos que dexanos llevar hasta'l pueblu de Tarañes, onde na terraza'l chigre daremos por terminada esta prestosa travesía.
En resume, ruta imprescindible, na que con bregar mui puquiñín nes Cuerries, tendremos la oportunidá de conocer un requexu mui ponguetu, xabaz y onde paez que nun pasó'l tiempu, una foz que val más que siga siendo "mui peligrosa". Pa ello, unos 11 km de percorríu y casi 1000 de desnivel positivu en 5 hores y media ye pocu peaxe pa un día tan disfrutón de monte.
Camudando'l Camín faciendo'l babayu
No hay comentarios:
Publicar un comentario