Track: Gobezanes (Casu) - Peña Busllar - Prieres (Casu)
Siguimos col aportar de la primavera, nun añu de poca carga de ñeve nos montes, munchos díes de sol y l'amenaza ya bien presente del coronavirus. Nesti día, teníemos una ventanina de bon tiempu pal sábadu, poro decidimos facer una ruta qu'entrase nel intervalu que manexábemos y como non, tornar pel parque natural de Reres siempre ye perbona opción.
Salida del grupu dende Gobezanes (627 m)
Nesti casu, magar del almuerzu de rigor na entrada'l parque en Rusecu (Sobrescobiu), vamos siguir hacia Casu, desviándonos dempués del banzáu de Tañes, hacia'l pueblu de Gobezanes, onde tendremos el puntu de salida. Aparcaremos na plaza d'esti guapu pueblu y col suelu moyáu de la lluvia de va unes hores, entamamos a caleyar hacia la Cima'l Pueblu.
Salimos pela Cima'l Pueblu hacia'l mayáu de Panizales
Nun caleyar relaxáu, saldremos per cómoda pista pasando pela Pumarada, p'abandonar al pocu la pista, que siguiría hacia la collá Arniciu, siguiente per camín empredráu hacia l'Arquera primeru hasta entrar de llenu nel Valle, onde dexaremos esti camín y entraremos en fastera de monte baxo y praos viendo les cabañes de Panizales pocu más alantre.
Topámonos coles primeres pingarates de ñeve nel Valle'l Picu
Siguiremos avanzando pel Valle, siempre topándonos con senderinos a siguir dacuando pel mesmu cantu que xube hacia'l monte Busllar. Pali, pali diremos ganando desnivel hasta entrar dafechu na ñeve que cubre tola parte alta del monte, faciendo pelín resbariosu'l nuesu avance.
Entramos en fastera de ñeve paposa y tarrén amestáu hacia la Peña Busllar
Aún así, sin mayores problemes, siguimos avanzando, dexando atrás la parte más herbosa del Valle'l Picu pa metenos en tarrén calizu per una amplia vallina, pente los picos de Caón y el Rosellón. Con pocu más, saldremos a un hombru, nomáu como'l Llanu'l Llobu pa entrar defechu nel tramu final hasta encumar los 1234 m de la Peña Busllar.
Cume na Peña Busllar (1234 m)
El día sigue murniu, sobretou pal sur, asína que tampoco tenemos grandes vistes, poro garraremos l'arista NO de la peña pa restolar un descensu y de pasu aprovechar los claros al norte p'acolumbrar montes como la Xamoca y tol cordal de Peñamayor tres d'ella.
Siguimos crestéu hacia Les Llames pa descender al Llanón
Magar d'un pequeñu ratín pel crestón calizu, damos con un senderín que descenderá en varies envueltes hasta los praos del Llanón onde fadremos un cómodu reagrupe ya que caún baxará al so ritmu. Toos xuntos, vamos descender per una vallina direutos hasta la Cabaña, pa siguir per un amiestu de camín-regatu qu'empobinarános al traviés de la Llosona y Llosica hasta los praos d'Arriba de Prieres.
Baxaremos per una vallina hacia la Cabaña onde garraremos camín hacia Prieres
La otra opción más cómoda, sedría dir hasta'l colláu Miraoriu y garrar pista per Faba, La Pría y la Cantera pa dar tamién a Prieres, onde tuviemos al solín xintando un pinchín tan guapamente. Saldreos al pocu de Prieres y garraremos un camín que xube a pinchu hacia la peña, alcontrando rastros de senderu que nos dirán llevando poquín a pocu hacia la Foz de Gobezanes.
Aportamos a Prieres con paradina pa siguir hacia la peña de nuevu
La idega ye evitar garrar carretera al salir de Prieres y somos a algamalo, esfrutando d'una baxada per monte baxo tendida y sin mayores dificultaes que dirán dexándonos, nun tramu pelín más abegosu de descensu nel camín empedráu que crucia la Foz de Gobezanes unos 100 d'altor so la carretera.
Garremos senderu na base de la peña pa travesar la foz de Gobezanes
El camín ye guapu enforma y mirando dende riba, nun somos bien a albidrar dende onde se garraría con mayor comodidá, ya que paez salir d'una vallina nomada la Llampaza que vien dende unos praos. Esfrutaremos con calma d'esta auténtica maraviya inxeniera d'antaño hasta dar cola carretera, pa siguir per ella unos pocos metros garrando un pindiu camín que dexaranos en Gobezanes pa finar la ruta con un solín bien prestosu.
En resume, ruta mañanera que diónos pa conocer un pelín meyor Reres, que con un día llimpiu de cielu tendría unes vistes privilexaes, faciendo en pocu más de 5 hores, unos 8 km de percorríu con un desnivel acumuláu positivu de 750 m.
Camudando'l Camín en Casu
No hay comentarios:
Publicar un comentario