jueves, 16 de febrero de 2012

Vibañu (Llanes) - Peñe Llabres - Peñe Villa

15 de Xineru de 2012

Track: Vibañu (Llanes) - Peñe Llabres - Peñe Villa



Domingu d'un finde realmente feu no qu'al tiempu refierse. Paecía nidiu que venía un frente potente coles primeres ñevaes series pa tol país astur, poro desdexamos una vegada más la ruta al Nogales y viendo que pudiera facése dalgo pel oriente, tirámonos a por un vértice de Llanes, la Peñe Llabres.

Como daben la llegada'l temporal pal mediudía, madrugamos un pelín, cosa que fizo que sólo nos animásemos Carlos, Pangua y yo. Salimos de Xixón pola Autovía del Cantábricu y paramos na cafetería de la gasolinera de Caravia a da-y de beber al coche y de pasu p'almorzar.


En Vibañu (41 ms ) col Benzúa detrás nuesa

Magar del desayunu, siguiremos autovía alantre, hasta la salida de Posada, pasando per esti pueblu y siguimos pela As-115 travesando'l pueblu de Turancia, pasando al llau de Rales, final d'una ruta tan brutal como guapa, Viña (Cangues d'Onís) - Mofrechu - Benzúa - Rales (Llanes), pa dempués d'un ratín más de carretera aportar al crucie de Vibañu, onde metémonos dafechu a la gueta d'aparcaderu.


Partimos de Vibañu col valle d'Ardisana detrás nuesa

Mudaos de ropa, entamamos a caleyar unos minutos enantes de les 9 y media de la mañana y lo fadremos penmediu del pueblu de Vibañu pa garrar un ramal a la esquierda que nos llevará pol barriu de Mediavilla hasta una pista que va empobinanos al pueblu de Rusecu.

El día sigue murniu enforma pero al menos paez qu'aguanta y dános un pelín de visión del valle d'Ardisana sigún vamos xubiendo hacia Rusecu, asína como de xerros costeros como'l del Benzua o'l picu Hibéu que sirvió d'entamu a esti blogue.


Travesaremos el pueblu de Rusecu

En pocu más de venti minutinos tamos travesando'l pueblu de Rusecu, que paez tener poca vida a estes hores de la mañana, hasta'l so final onde siguiremos un camín qu'avérase a la riega de Rusecu, lo que va llevános a perdénos un pelín pente milenta siendes que xuben a un camín hacia les cabañes de la Pradería.


Aportando al Dornayu

Namái que pasamos pela esquierda d'esta cabaña, vamos meténos ya nuna fastera de cotolla y monte baxo, que diremos sortiando, siempre en direición sur col envís de pasar al otru llau del valle formáu pola riega de Rusecu.

De lo malu, nun tardaremos demasiáu en facer esti tramu, al nun tar mui zarráu, y aportaremos al guapu mayáu del Dornayu, onde queden restos de cabañes de pastores y onde tenemos per primer vegada una bona vista del Cornión, o al menos de los cumales que son a dexános ver les ñubes.


Vistes del Corníón dende'l Dornayu

Equí somos a pescanciar lo guapu d'esti llugar si tuviéramos bon día, pero como nun ye asína, preferimos seguir alantre. Dende'l Dornayu, tendremos un fácil andar, per mayaos que xúntense con dalgún h.ou típicu d'esta caliza oriental.


Caleyando pola fastera de la Batalla

Esti llugar nel qu'abunden los caballos xabaces, ta inda bien cuidáu y da gustu caleyar per él. El nome ye la Batalla. Supongo qu'al igual que nel cercanu Cuera, les griesques de la guerra civil foron perimportantes n'esta fastera.


Caberos pasos a la Peñe Llabres

Llevamos una hora y media caleyando al abellugu d'estos h.oos y mayaos cuando vamos al alcuentru del nuesu finxu del día, la Peñe Llabres. Pa ello, saldremos a unos praos más abiertos y tendremos que trepar un pelín pela caliza a la gueta del vértice xeodésicu qu'afita los 688 ms d'altor del cumal.


Peñe Llabres (688 ms)

Xintaremos un puquiñín y taremos selemente nel cumal unos diez minutos, pero como'l día nun ta munches hestories, ponémonos aína a baxar de nuevu hacia'l colláu de Peyín, que darános pasu al ascensu a la cota más alta de Llabres, la Becerrera de 693 ms y que tien meyores vistes sola costa llanisca que'l cumal anterior.


Averándonos a la cabeza la Becerrera

De la Becerrerra, vamos dir baxando pela cresta, pero lo caóticu del tarrén, faénos pensalo meyor y ceo damos casi mediu vuelta, pa ganar los mayaos de la Caleya y d'estos baxaremos cenciello pola sienda La casa'l Cura, hasta les cabañes a lo fondero'l valle, cerquina ya del colláu la Prida, onde axúntase la Peñe Llabres cola Peña Villa.


Baxando hacia las Fuentinas cola Corona Cantiellu nel güeyu

A lo tonto, llevamos ya 3 hores de ruta y de la que tamos baxando nun paramos de mirar pa un picu que tenemos más al oriente y que ta encumáu per un garrapiellu d'antenes. Nun sabemos mui bien que facer, anque les opciones son clares: siguir tol valle Llabres de vuelta a Vibañu o meté-y un patéu a la Peñe Villa.


Entamando la xubida dende'l valle

Son les doce y media y hai tiempu de sobra, anque nun seya l'horariu lo que nos esmoleza, sinon el temporal que ta por venir. Charly diz que ya fizo bastante y déxanos a Pangua y a mi, que tiremos si queremos a los altores de la Peñe Villa.

Magar de picar dalgo, asína lo facemos y entamamos a xubir hacia'l picu de les antenes, que nun ye otru que la Corona Cantiellu, demientres vamos perdiendo de vista a Charly que sigue camín al traviés de les Cabañes de Llabres.


Xubiendo altor col valle de Llabres y la Peñe a la vista

L'ascensu faise perduru, solo hai que pensar que fai dalgo más d'una hora tábemos raspiando los 700 ms d'altor y agora tamos pembaxo de los 300 y tócanos recuperar más menos lo mesmu. Tamién tenemos na tiesta, que nun queremos facer esperar de más a Carlos, ya qu'anque camine sele, aportará muncho enantes que nós al pueblu.

Unos 40 minutos va llevanos xubir l'amplia canal que llévanos a la Corona Cantiellu, dende la que tendremos guapes vistes de la costa, asína como del cordalín que separtáu un pelín del Cuera escuende la Llosa Viangu.


Encumaos na Corona Cantiellu (667 ms)

Nun tenemos más tiempu que perder, ya que'l día ta poniéndose cada día más feu y tamos mui, mui lloñe de Vibañu, tando más al oriente de lo que pensábemos cuando entamamos a ascender al Cantiellu.

Poro, vamos salir casi corriendo pela pista que xube dende L'Altu la Tornería, p'abandonala hacia'l colláu de la Comuña, onde acolumbramos pasar, pocu más abaxo, la carretera que va pal pueblu d'El Mazucu, entamu de la ruta a Peña Blanca.


Guapos mayaos nel camín hacia'l Cabezu Radosa

D'esti colláu (528 ms), saldremos a fueu p'arriba bordiando pela mandrecha una cota de 617 ms, pa ganar el mayáu d'Arriba'l Soldán, que darános pasu a la fastera de les cabeces del Trigu, onde alcontrámonos con una llaguna con bones vistes a la mar, dende la qu'aportaremos al calizu cumal del Cabezu Radosa.


Nel Cabezu Radosa (707 ms)

Esti cumal de 707 ms, sedrá'l puntu más altu del día y dános pasu a pensar si queremos siguir alantre pela peñe Villa hasta'l so final en Culobardón o abandonamos tal paliza. Son les 2 de la tarde y tenemos claru que'l nuesu compañeru tará a pocu d'acolumbrar el pueblu dende riba como mínimu.

Pol momentu, tomamos un pelín de rumbu norteñu, más que nada por salir de la caliza y baxar pelos praos, hasta qu'aportamos a les cercaníes del mayáu d'El caballu, onde podemos agüeyar a les clares cuanto de peñe quédanos inda y sobretóu la xubida al Cantu Texéu, que pue facésenos dura y llarga enforma.


Baxando de la Peñe Villa a la Vega Llabres

Nun-y damos más vueltes, ya que dende esti mayáu vemos embaxo nuesa, la Vega Llabres y eso tamién anímanos a desistir de siguir a contrarreló pel cordal alantre. Llamámos a Charly y diznos que ya ve'l pueblu, asína que tiramos a la Vega Llabres en llama.

Defechu, dámonos cuenta de qu'algamar la Corona Cantiellu, quitónos el tiempu necesariu pa siguir tol cordal hasta l'estremu más occidental, anque quedamos igualmente a gustu cola ruta. Aparte, nun hai mal que por bien nun venga y así conocemos la Vega Llabres que pue ser prestosu de ver.


Pasando de la Vega Llabres a Rabuzurra

Nun hai más, asína que baxamos per un senderín hasta la Vega Llabres y descubrimos como nun siempre ye too tan guapu como pue camentase, ya que la vega en sí, tien cabañes bien conservaes y ye guapa, pero la cantidá de basura y mierda qu'hai na redolada, quítanos les ganes de tar muncho más per ellí.

Poro, avanzamos lo más aína posible que podemos hasta aportar a otra vega, la de Rabuzurra, na cual parte una pista qu'en baxada va dexános a la entrada del pueblu de Santoveña. Esta pista foi la introductora del grupu Xuan de la Borrina nes carreres de montaña, ya que pa nun tener a Charly esperando, Pangua y yo, baxamos como si d'una carrera d'eses fuera, jeje.


Baxada a fueu hacia Santoveña

Ensín más, apaecimos pel mediu de Santoveña corriendo coles mochiles, hasta qu'alcontrámonos col nuesu collaciu, qu'asperábenos ya camudáu de ropa y cola vista puesta nes ñubes qu'allugáranse enriba de la Peñe Llabres col envís de ñevar, por mor del color blanquecinu.

Namái ponenos a dexar los trastos nel coche ya entamó a orbayar y pa cuando tábemos dientro col envís de tomar un cafetín caliente en dalgún llugar, púsose a esbatiar como si nun hubiese díes, jeje. Polos pelos...

En resumen, ruta guapa y qu'inclusu sedría digna de facer con un bon día y esfrutar de les vistes de Picos dende ambes peñes, Llabres y Villa. Nel nuesu casu, nes 6 hores que duró fuimos a caleyar 17,5 kms, teniendo que superar un total de 1365 ms d'ascensión acumulada.

Encamientos: Nun quiero dexar d'encamentar la visita a esti blogue: El karst de la Peñe Villa, Llabres y los Resquilones onde podréis siguir tola xera que lleven los espeleos asturianos nestes peñes. Ablucante enforma!!!


Camudando'l Camín nel cumal de la Becerrera na Peñe Llabres

Nesta ruta per tierres llanisques ficimos: Peñe Llabres (688 ms) vértice xeodésicu de Llanes

Ver progresos en: Retos montañeros

10 comentarios:

  1. Hola Berto, buena ruta hicisteis, el CErro Llabres lo hice hace muchos años y no me apetece volver, no me gustó nada. Hace poco estuvimos siguiendo una ruta que tu hiciste a Peña blanca desde El Mazucu y desde esa ruta lo vimos y a pesar de que entra para este concurso de la FEMPA, como no tengo pensado acabarlo este año, pues esa será una de las que queden.
    De todas formas me gustó la opción de ampliarla con esas otras cumbres.
    Un saludo

    ResponderEliminar
  2. La verdá ye que nun ye pa tirar voladores esti cumal, pero con un pocu de ganes, pues ampliala pela peñe Villa y queda más prestosa.

    La de Peña Blanca tuve viéndola y más de lo mesmu que la mía, ñebla y caos de caliza p'aportar al cumal, jeje

    Un saludu

    ResponderEliminar
  3. Fueron 1300m acumulaos? Nun pensé que fora tanto, menuda palizuca que nos dimos pa una mañanera...
    A min prestome enforma la ruta. Munches veces ye too un xuegu d'espectatives: si vas con elles muy altes, ye más fácil decepcionase, y viceversa. Yo a esta ruta diba na modalidá "lleváime que yo camino lo que mandéis" y la guapura de la sierrina esa sorprendiome. Nun esperaba unes vistes tan guapes como les que tuvimos d'Ardisana y de la rasa costera, y disfrutelo muncho.
    Súmome al homenaxe a los espeleólogos asturianos. Son unos cracks.

    ResponderEliminar
  4. Foron bonos metros acumulaos, si señor. La pena'l día poles semeyes sinon, diba tar guapu, guapu.

    ResponderEliminar
  5. Casi siempre pasa lo mismo, como no hace buen tiempo ponemos esos montes como última opción y se junta eso el mal tiempo y montes de bajas expectativas y como resultado queda la satisfacción del deber cumplido simplemente. E ir con los amigos.
    Pero esos montes con sol y baño al final en la playa, ya es otra cosa.

    Bueno, un abrazu collaciu

    ResponderEliminar
    Respuestas
    1. La verdá ye que pa una mañanera con bañu en dalguna de les guapes playes de Llanes, nun diba tar nada mal, non

      Un abrazu Fernan

      Eliminar
  6. Berto, pues a la contra de Monchu, a mi apetezseme conocer Peña LLabres y además prestome asgalla esa idega de xuntala con Peña Villa, xerra que llamárame la atención cuando anduvimos por la Llosa Viangu. El terren caótico, imaxínomelu, porque el díi de la Llosa tornamos pol altor de la xerra que la separa la rasa Llanes y aquello ye malo malísimo, asina que será más de lo mismu.
    Un saludu

    ResponderEliminar
    Respuestas
    1. Pues nun te creas Cienfuegos que ye tan malo. Hai munchos más mayaos de lo que podíemos pensar ya inda queda llabor ganadero poro ta mediánamente llimpiu y cuidáu esti peñón calizu.

      Nun ye tan malo como'l Cuera y como supongo que será la xerra d'enriba la Llosa Viangu.

      Un saludu

      P.d: iguau l'enllaz que me comentasti

      Eliminar
  7. Buenon hombre,no te pongas asi,no nos va a salir todos los dias perfecto,ademas no va a ser todo impresionante,asi disfrutaras mucho mas de otros lugares.
    Un abrazu.

    ResponderEliminar
    Respuestas
    1. Mi ma, paez que puse la ruta a cayer d'un burru, jeje. Nun foi tan mala, solo pelín guarru la Vega Llabres y poco más, si fuera nun día espeyáu, les vistes del Cornión serien increyibles al par de ver tola costa llanisca.

      La peñe ensín nun ta nada mal.

      Un abrazu Juan

      Eliminar