jueves, 28 de octubre de 2010

Sotu Sayambre (Llión) - Cantu Cabroneru

19 de Setiembre de 2010

Track: Sotu Sayambre (Llión) - Cantu Cabroneru



Dempués d'una temporada 2009 - 2010 interminable, y nun ye que quisiese que s'acabare, entamamos 4 díes más tarde de tornar de Pirineos, la temporada 2010 - 2011 con una ruta que quedáranos pendiente, el Cantu Cabroneru n'Amieva.

Pa ello, tenemos que facer un llargu camín hasta'l pueblu Llionés de Sotu Sayambre, pero enantes había que desayunar y si yera en compañía de los nuesos collacios vascos, pues muncho meyor. Siempre ye un placer dir de montaña con Bea y Josean, ... de Fernan taba dalgo fartucu ya de Pirineos, jeje.

Asína pues, el plan yera quedar nel Puente Vidosa p'almorzar, por tanto, salimos bien ceo de Xixón en direición a Cangues d'Onís pola autovía cantábrica, y d'ellí garramos la N-625, pasando pelos pueblos de Cañu y Tornín, pal cruciar el puente Dobra, entrar nel conceyu d'Amieva, onde travesaremos los pueblos de Buxil, Corigos, Pervís, La Vega Pervís y los Grazos onde topámonos col ríu Ponga nesti casu, y siguir camín pasando por Santiyán, Precendi, Les Vegues, Campurriondi, Ceneya y Rañes. Equí meterémonos nel conceyu de Ponga onde ya'l siguiente sitiu a parar será'l Puente Vidosa.

Dempués del cafetín, onde nos xuntamos cola xente Basauri, con Pangua, que venía a so bola como siempre, y con Diego y Pilar, que facíen más de lo mesmu, Simón, Canta, Raul y yo, montamos en coche otra vegada, pa en caravana, facer el trechu que faltaba pol desfiladeru de los Beyos. Así que, pasamos el puente Agüera, y ya ensín parar de xubir metémonos nel país llionés en direción a Oseya Sayambre, pero nun crucie mui zarráu hacia la manzorga garraremos la carreterina que nos dexará a la fín en Sotu Sayambre (905 ms).



Semeya de grupu en Sotu Sayambre

A la fín, dexamos los coches y mudámonos pa la ruta, la cual siendo tantos aventúrase sele, pero'l día merezlo asína. Les diez menos venti, venos caleyar travesando les cais de Sotu, siempre presidies dende l'altor pola Peñasanta llionesa, y dir xubiendo poquín a pocu per una pista ancha, que forma parte de la mítica senda del Arcedianu.


Sotu p'abaxo y Peña Beza p'arriba

Y ye qu'aína taremos ya en disposición d'agüeyar el pueblu de Sotu Sayambre dende riba, a la mesma vegada que tendremos enriba, la Peña Beza, qu'amuésase como dalgo más, qu'un aperitivu pal Cantu Cabroneru. Nun andar sele, garramos un cruce a la manzorga en Valdelosciegos, xustu dempués de cruciar la riega Los Barrios, pa empobinanos mediante varies curves, al entamu de la xubida a la collá de Beza.


Xubiendo hacia la collá de Beza

Hai que cuntar que'l camín nun ye'l más cortu si siguimos l'Arcedianu, así que nuna curva d'esquierdes tenemos que garrar puxu y xubir pel pasu que dexa la Peña Beza y el H.urcuetu. Les senduques son mui diverses, pero a la fín dexaranos nel nuesu finxu, la collá Beza a 1500 ms. Dotramiente, bordiaríamos pela pista'l H.urcuetu, que ye una escoyeta válida, pero fadríanos perder dalgo de tiempu.


Averándonos a la canal de Misa

Nesta collá, ponémonos en hora y media aprox. y tan solo col intentu d'albidrar un pasu na muria de Peña Beza, pescanciámonos cual sería esti: La Canal de Misa. Darréu, ponémonos a facer ciszas pelos praos, pa metenos na propia canal, la cual supérase ensín mayor dificultá, ya que ye mui cortina.


Na canal de Misa, y acolumbrando'l Cabroneru

Equí ye un bon momentu pa tomar aliendu, xintar daqué, y decidir que va facese. Bea y Josean, que tienen l'oxetivu del Cabroneru prefieren dir ganando-y tiempu, y los demás vamos xubir a Peña Beza, pela propia cresta, pasando de la xubida normal, que taría partiendo del colláu qu'hai pente la propia peña y la muria de Cebolleda, que fai de rede de tenis ente'l Cabroneru y Beza.


El Cantu Cabroneru

Nel nuesu casu, la peña Beza fairános una ascensión dalgo durina, al traviés de sucesives terraces de yerba, que dexaránmos unes vistes de Vegabañu precioses, y al final de regalu, tendremos una trepadina, pa encaramanos al cumal de la peña (1964 ms).


Ascensión a la Peña Beza (1964 ms)

Un sucesives foleaes, diremos aportando toos a esti inmeyorable mirador del Cornión, onde facemos les semeyes de rigor y casi cola guiyada, algamo a que tornen a andar otra vegada, ya que llevábemos ya 3 hores, y quedába inda muncho por facer. Ye lo que tien en parte, ser muncha xente, y que llevemos munchos de nós tol branu sin venos.


Cornión y Cabroneru dende Peña Beza

Poro baxamos, hacia la Cebolleda, con unos destrepes al aniciu, y llueu depués d'un preciosu prau, pondrémonos, demientres sigue'l bon ánimu falador, a facer una prestosa trepada al cumal de Cebolleda (1892 ms), onde tendremos ya enfrente nós, al Cabroneru, y a Bea y Josean, que tan mirando por onde ascendelu.


Baxando de la Peña Beza n'ascensión al cumal de Cebolleda

Magar, de llamar a Josean, de que la vía de xubida nun yera la más adecuada por onde taba restolando, escoyimos arrodiar la paré vertical que teníemos enfrente pola manzorga, y facer la xubida sele, hasta atopanos na metá de los dos cumales del Cantu.


Trepando al primer cumal del Cabroneru

Una vegada que tamos casi nel primeru de calter yerbosu, facemos una travesía, metíendonos de llenu en varios pasos de roca, dalguno d'ellos pelín aéreu, pero nada d'esmolecer, pa facer cume a la fín, nos 2006 ms que marcóme'l gps. Ye graciosu ver como un gps pue ponete un altor y otru na mesma posición nun llegar a los 2000 d'ehí que Diego, p'algamar los 2000 ms tuviese qu'atalu a un palu y ponelu n'altu, a ver si llegaba, jeje... Esto de los satélites ye asína.


Aportando a la cume del Cantu Cabroneru de más de 2000 ms, jeje

Desti preciosu cumal, nel que tamos dempués de 4 hores y 15', pocu más que decir que sentáse a xintar el bocata ye un de les coses más prestoses que pues tener na montaña. Nesti casu, camiento que'l gastu de fuercies en comparanza cola belleza de los paisaxes ye bien pequeñu, ya que'l Cornión preséntase en primer planu como una semeya.


Tiatordos y Cornión

Ye tan fácil como mirar d'esquierda a drecha y señalar: Cotalba, Canal Vaquera, Poyones, Requexón, Cume Cebolleda, Torres de Cebolleda, Peñasanta d'Enol, Torre de la H.orcada, Torre d'Enmediu, Canal Parda, Tres Maríes, Torcu y Peñasanta Castiella nel horizonte. Y delantre na masa grisácea que correspuende a Amieva, pue descubrise la Torrezuela, Cabra Blanca, Diente, Estribos, Garitas,...


Grupu nel Cantu Cabroneru (2006 ms)

Quiciás, patear tolos picos posibles nel tiempu que la vida te da, ya intentar conocer cada requexu de lo que t'arrodia, da un plus en sitios como esti, ya que dixebrar cada relieve de cada picu, cuetu, torre,... qu'acolumbres, dame al menos a mi, una tranquilidá de tar faciendo les coses bien, un bon trabayu na montaña, enantes y dempués.

Y digo enantes y dempués, porque los preparativos que faigo, pa cada ruta, llevanme a buscar alternatives, mirar nomes de picos, collaos,... y dempués d'ella estudiar les semeyes y el track pa facer cada entrada con un mínimu de rigor en delles estayes: tiempos, camín, toponimia,...


Un momentu de baxada col Cabroneru detrás

Ya podía prestáme tanto'l mio trabayu como preparar una ruta na montaña, jeje. En fin,... nesta ruta, aparte de tomar el sol, charrar, echar unes rises, y facer un par de montañes bien guapes, tuvimos una baxada cenciella, dexándose llevar pel meyor sitiu, hasta aportar a la collá Beza, onde tamién algamamos una baxada más cierta, que la xubida que ficiéramos pola mañana, y ye que dende riba vese too más fácil que dende baxo, quiciás por eso prefiero tar más tiempu nes altures que nel rasu.

7 hores y cuartu daben con nós, en Sotu Sayambre, nel qu'esfrutamos d'unes cañes nuna terraza, demientres falamos de mil hestories, recientes o non, escaeciendo dafechu, los casi 15 kms y más de 1330 ms de desnivel positivu. Y ye que cuando acábase una ruta munches vegaes nun se fala d'ella sinon de cuando ye la prósima, onde nos va llevar y que retos va aportanos.

Retos como tolos que tuvimos la oportunidá de facer nel añu ya, que cumplimos de xuntanza astur-vasca.

Gero arte collacios


Camudando'l Camín dende Amieva

Nesta ruta ficimos un dosmil del conceyu d'Amieva: Cantu Cabroneru (2006 ms)

Ver progresos en: Retos montañeros

lunes, 25 de octubre de 2010

Refuxu de Biadós - Bachimala - Benás (Uesca)

15 de Setiembre de 2010

Track: Refuxu de Biadós - Bachimala - Benás (Uesca)


Caberu día de montaña nel Perinéu oscense, recién desayunaos casi da pena dexar esti maravillosu refuxu, pero teníemos una gran ruta por facer, asína que Fernan y yo, ponémonos en marcha a les 8 menos cuartu de la mañana. Ibán y Paco, con dalgo menos de fuelle, salen un pelín más tarde ya qu'ellos van facer la travesía dende Biadós a Benás, pol puertu del Chistáu, mientres que nós, vamos empatá-y un par de montes más a la xera, xubiendo'l Gran Bachimala y so cresta hacia la Punta del Sabre.


En Biadós, preparaos pa salir

Asína pues, partimos a bon ritmu xubiendo per una viesca paralela al barrancu de Loriele, dexando poquín a pocu'l refuxu bien abaxo nuesa. Magar de salir a a zona más abierta, les vistes de los picos fechos los dos díes anteriores acompangaranos durante tola ascensión.


Ganando altor al valle, coles vistes d'ayeri

Nestos momentos ya vamos caleyando per praos bien pindios, que dirán faciendo trabayar de más a les pates na so parte posterior, y qu'amosaranmos que tola ascensión va ser llarga y de resistencia, cosa que tamién nos dexa a les clares, lo lloñe que veíase l'oxetivu a dar preste, el Gran Bachimala.


El Gran Bachimala al fondu, y una collacia valiente

Nesti caminar hacia la señal de Biadós, dame por pensar no alpino d'esta ruta si tuviera con bona cantidá de ñeve y lo prestosa que sería así, anque cuando quiero dame cuenta y non, ya tamos nel colláu nomáu señal de Biadós (1 h 45'), y entama otra parte mui distinta de l'ascensión, como ye bordiar pola so manzorga, tol murallón que ye esti picu, travesando pedreros y más pedreros, hasta metenos na arista que con un crestéu cenciellu dexaranos nel cumal del Gran Bachimala (3178 ms).


Interminable pedreru y Fernan na cresta al fin

La verdá ye que nun tien muncha dificultá la xubida, sacante'l desnivel y la resistencia como ya dixe, y ye que'l tarrén va faciéndose más pindiu a cada tramu que vamos dexando atrás, hasta dar cola cresta final, onde alcontrámonos a un montañeru d'avanzada edá, el cuál aparte de dexanos ablucaos col so estáu de forma, diónos dellos detalles de la cresta que díbemos facer a continuación.


Nel cumal del Gran Bachimala y Monte Perdido

Por tercer día consecutivu'l tiempu nun podía ser meyor, poro tuvimos un bon ratín xintando dalgo y mirando pal horizonte en cada direición de la rosa de los vientos. Tamién intentamos ver a nuesos collacios xubiendo al puertu de Chistáu, pero nun hubo forma, asína que pusímonos la mochila otra vegada, dempués de les semeyes de turnu, y con 3 hores y media enriba, ponémonos a crestiar en direición a la Punta del Sabre.


Na cresta a la Punta de Sabre

Otra vegada que m'alcuentro nuna cresta en Pireneus, y ye aérea, y con una roca descarnada, qu'anque sin grandes pasos difíciles, faete dir atentu a cada pie que pones. Aún así, tengo la sensación que cuando entamé cola montaña, tenía-y más respetu a los aéreos pero como too nesta vida, camiento que pue entrenáse y avezar la mente y cuerpu a ello, algamando unos resultaos más que satisfactorios.


Na Punta del Sabre (3134 ms) cola Tuca Llardana detrás

Satisfación que siente ún, al tar n'otru tres mil más de Pireneus, pero tamién esmolecimientu, al ver la interminable baxada que teníemos que llevar alantre, ya que dende la nuesa posición acolumbrábemos a les clares: la Pleta d'Añes Cruces, entamu de la xubida hacia'l Puertu de Chistáu. Y ye que la ruta nun yera solo, estes dos "tuques", sinon que teníemos que xubir a un pasu de más de 2500 ms dempués de baxar más de 1000 ms pa garrar el senderu que lu fadría posible.

Otra torga yera la baxada natural,que nos dexaría pola continuación de la cresta na señal de Biadós, poro tábemos retrasándonos más aún. Solución?? Tiranos abaxo a güevu, como amuesa la semeya anterior. Agora fríamente, nun sabría dicir, si dalguien más tuvo la ocurrencia de baxar hacia la pleta per esta vía, ya qu'en mui pocos momentos vimos rastru de tar pisáu nengún tramu.


¿Abriendo baxada de la punta del Sabre?

Que decir d'esta baxada? Pues que llevónos nin más nin menos qu'una hora y cuartu da-y preste, pasando quiciás los piores momentos de tolos díes per estes montañes pirenáiques, y ye que foi una baxada dura, incómoda, con zones de yerba, que dificultaba saber onde pisábemos, cola posibilidá de torcedures, etc... Son estos momentos onde suelo dexar de falar, y enciérrome nuna mala hostia interior, que llévame a pensar en odiar a la montaña, a mi afición por ella, y a un montón d'entrugues más,...

Menos mal, que siempre ta Fernan ehí, pa dir delantre mía, poniendo ritmu ya intentando que mi mente, dexe esos pensamientos escuros y recupere mi estáu d'ánimu allegre y positivu. Pue dar fe d'ello, porque namái que llegamos a la pleta, creo que ficimos una ascensión a Chistáu de llibru a un ritmu brutal, recoyendo "calabres españoles", a cada pasu que dábemos. La esplicación a esto, ye que tuvimos que dir adelantando a soldaditos que taben de maniobres pela zona, hasta qu'aportamos al propiu puertu de Chistáu (2578 ms), onde ya tocaba parar a zampar el bocata y descansar ya que les 7 hores de ruta taben a puntu de cumplise.


Fernan nel Puertu de Chistáu

Nun mos demoramos demasiáu na xinta, ya que nun dexábemos de pensar, que Paco ya Ibán, tuvieran que tar munchu tiempu esperándonos en Benás, así que bocata, chocolate y les poques sobres que quedáben na mochila esapaecieron, y baxamos esnalando pel senderu del GR 11 que pegáu al riu Estós, pondríanos dempués d'una hora nel propiu refuxu d'Estós, onde compartimos unos frutos secos, colos collacios madrilanos qu'al igual que los malagueños coincidieron con nós nos refuxos tolos díes.


Sorpresa nel parking, onde tan los collacios??

La baxada del refuxu al aparcaderu de Benás onde teníemos la furgoneta, carez d'interés, sacante los cabreos de Fernan, nun intentu por contactar con Paco ya Ibán, lo cual foi completamente ermu. Nun se si comentar muncho la xugada, porque nesti momentu tornáronse los roles, y tuve yo que tranquilizar a Fernan, al ver que nun taben na furgoneta, y que nun teníemos llaves pa cambianos nin pa nada.

Al final too solucionóse perfeutamente sin llegar la sangre al ríu, dempués de facer más kms de los esperaos, a la gueta de los nuesos collacios, jeje. Así que, ensín contar esto la ruta finalmente foi de 10 hores, nos que percorrimos 27 kms, superando 2400 ms de desnivel acumuláu positivu y 2830 ms de baxada, convirtiéndose nuna ruta mui dura en términos de resistencia.


Camudando'l Camín despídese de Pireneus 2009 - 2010

Nesta ruta ficimos otros dos 3 miles de Pireneus: Gran Bachimala (3178 ms) y Punta del Sabre (3134 ms)Ver progresos en: Retos montañeros

viernes, 22 de octubre de 2010

Refuxu d'Orús - Forqueta - Refuxu de Biadós

14 de Setiembre de 2010

Track: Refuxu d'Orús - Forqueta - Refuxu de Biadós



Tamos a martes, 14 de Setiembre, y toi llevantáu a les 8 la mañana, dempués d'una nueche ensín dormir nin un plizcu. El mio humor, mal estar, cabréu ye completamente brutal, sumándose'l cansanciu, asína que desayuno sin mediar pallabra, y prepárome pa la xornada intermedia de Pireneus. Ye'l día más sele, y agradezse, porque nun tengo la mente afayaiza pa dalgo complicáu o duru en cuanto a hores.


Alborecer nel refuxu del Forcáu (2050 ms)

Paco ya Ibán adelántanse, y van descaminando'l camín, que ficiéramos dende'l Ibón de Llardaneta ayeri, o lo que ye lo mesmu, xubir tolo que baxáramos. Fernan, ya me va conociendo y sabe de los mios despertares, y espérame pacientemente, a que me sienta más positivu. Menos mal que facía una mañana preciosa (ver semeyes d'arriba) y fui animándome y garrando ritmu rápidu.

Entainamos, y enantes d'aportar al crucie de la canal Fonda, ya tamos en grupu con Ibán, y dos montañeros malagueños, nomaos por nosotros como los "lagartijos", porque según ellos mesmos, asína ficieron el pasu míticu del Aneto dos díes enantes, jeje. La verdá ye que foron xente bien simpática y la so compaña nestos díes foi mui d'agradecer tamién.


Xubiendo hacia'l Ibón de Llardaneta

Caleyamos un pelín más, y damos con Paco al borde del Ibón de Llardaneta, alrrodiu del cual, con tar silente un ratín, escuchas y ves marmotes por tolos llaos, lo cual paezme dalgo qu'esmolez pola sensación de sobropoblación d'estes. Pasamos de les marmotes y de los robezos (sarrios equí) y bordíamos el ibón pola so mandrecha, pa empobinanos nuna ascensión per un pedreru al collaú d'Eriste (2859 ms), faciendo 2 hores y cuartu de ruta.


Ascendiendo al collaú d'Eriste

Esti colláu ye'l puntu de pasu hacia'l Barrancu de la Ribereta que nos dexará en Biadós, pero enantes tenemos una cresta a la drecha, qu'empata'l Diente Royo y el picu Pavots cola cresta del Espades y a la esquierda, la Forqueta, que será'l nuesu destín de güei. Magar de dexar les mochiles nel colláu, pa facer l'ascensión un pelín más llibre de pesu, Fernan, Ibán y yo damos-y poquín a pocu pela cresta, ensín mayores dificultaes, hasta casi'l cumal norte de la Forqueta, pero escoyemos dexalo pal últimu por ser el más averáu a la baxada.


Nel cumal de la Forqueta Sur y les vistes del Espades y Llardana

Poro, siguimos crestéu, per un pasu dalgo aéreo, hasta'l cumal sur de la Forqueta, onde nos alcontramos con Paco, que llevaba ya un tiempín arriba, y ye que güei taba con ganes y apretó fuerte dende'l Ibón de Llardaneta en solitariu hasta la propia Forqueta. Unes ablanes y un puquiñín de chocolate dempués dexamos esta cume sur de 3004 ms, pa tornar so los nuesos pasos, y facer la trepada final al cumal Norte de la Forqueta, que ye tres metros más altu (3007 ms).

La baxada ficímosla sele, ensín prieses, esfrutando de les vistes, y sobretou Fernan y yo, agüeyando con sorpresa y almiración cada filu y pasu de la cresta de Les Espades, que tuviéranos tan entreteníos el día anterior y agora teníemos enfrente nueso. Una hora y cuartu llevónos en total l'ascensión a la Forqueta, la cual yera perfeuta pa completar un día de "transición", nel qu'inda nos quedaba una baxada perllarga por completar.


Descansando nel colláu d'Eriste

Asína que, dempués de descansar n'Eriste, y falar con otros montañeros madrilanos, que cuidáranmos les mochiles, sustituyendo a los malagueños, demientres tábemos nes altures, ponémonos a pensar na baxada y la primer sensación que me da ye de baxar una canal tipu Mesones en Picos, por mor de ver a lo lloñe'l final pero que nunca llegue, jeje.


Primeres andaes na llarguísima baxada al refuxu de Biadós

Anque'l paisaxe a la fin ye bien dixebráu a elli, ya que demientres tamos baxando tenemos a la nuesa mandrecha l'ablucante muria de Pavots-Les Espades, y a la manzorga ábrese un camín qu'empobínase a los Ibónes de Millares y Leners, de los cúales despréndense dos tabayones faciendo tola baxada una postal de Pireneus perguapa.

Y ye qu'esta baxada que forma parte del GR-11.2 va tresformando'l paisaxe poquín a pocu, pasando de la roca rota d'Eriste, a dir abriéndose hacia un valle más ampliu alrrodiu del Barrancu de la Ribereta ya enmediu d'una viesca enllena de verdor y humedá.


Xintando nuna "postal" de Pireneus: Cascada de Leners

Dempués de 6 hores de ruta ya tocaba parase a xintar, y a echar un pigacín si podíase, poro restolamos un sitín de prau onde poder tirase, y con tola tranquilidá, descansamos ya a pocu tiempu del refuxu.


Aportando al refuxu de Biadós

Dalgo más de media hora dempués, tábemos otra vegada na xera y baxamos ya del tirón hasta la ponte que traviesa'l riu Cinqueta d'Añes Cruces, onde Fernan dióse un bañín "frescu", y los demás preferimos dexalo pa otra ocasión. Magar de la ponte, ya metémonos nuna zona de cabañes (Bórdas de Biadós) que nos dexarán nel refuxu (1725 ms) que tanto nagúabemos.


Semeya col fondu de Les Espades
atapeciendo


Nun tengo más que pallabres d'agradecimientu pa esti edificiu, rexentáu por una señorina bien agradable, que con indicale Ibán la mala nueche anterior, metiónos a los cuatru nuna habitación solos, na que al menos yo, pude descansar perfeutamente, dempués d'una bonísima cena, ducha, etc...

Y ye que tengo que dicir, que me prestaría volver a esti llugar, camentando que ye un sitiu casi máxicu, nel que dempués d'una ruta de montaña, sentáse nel portal tomando una cerveza (por fin nun yera cruzcampo) y relaxase col soníu llonxanu de los tabayones y l'atapecer col rellume del sol, sobre los pliegues xeolóxicos de Les Espades y Llardana, nun tien preciu o eso me paez a mi. Si el preciu foron 8 hores y 15 minutos, nos que percorrimos 13 kms, superando 1125 ms de desnivel positivu y casi 1500 de negativu, a mi paecíome baratu enforma.


Camudando'l Camín na Forqueta Norte

Nesta ruta ficimos otros dos 3 miles de Pireneus: Forqueta Norte (3007 ms) y Forqueta SE (3004 ms ) toos ellos nel macizu de Posets-LlardanaVer progresos en: Retos montañeros