Pirinéu 2009 - 2010

Del 12 al 15 de Setiembre de 2010

Track: Pireneus 2009 - 2010

Dempués d'un añu montañeru d'un altu valir pa la mio persona, nun podía ser d'otra mena, que finalizalu con unes vacaciones per Pirineos, más que nada pa conocer los sos paisaxes, valles y sobretou montes. Asína que, como yera normal, tocaba siguir los conseyos de Fernan, y preparar unos cuantos díes de montaña, esta vegada pol Ball de Benás en Uesca.

Como los refuxos de Pirineos suelen tar enllenos de xente nel fin de selmana, decidimos entamar de domingu, asína que tocóme partir de Xixón bien ceo, pa xuntame en Basauri colos collacios que compartiríen conmigu 4 díes de montaña: Fernan, Paco ya Ibán.

Fernan, Paco, Ibán y Berto

Magar d'almorzar, tocaba meter tolos trastos na furgoneta de Fernan, y partir nun viaxe llargu, llarguísimu hacia Benás, pero enantes de llegar ficimos una paradina pa xintar nel pueblu de Biescas na comarca del Alto Galligo, que por desgracia será recordáu poles muertes asocedíes nun camping durante una riada.

Magar de la xinta, siguimos viaxe, hasta aportar na comarca de Ribagorza, d'onde ye capital Benás. Desti pueblu, d'actividá económica casi total turística (esquí, montaña, ...) partirán les nueses rutes, pasando unos díes de montaña inmeyorables nos que descubrí la belleza d'estes montañes (anque siga prefiriendo mi Asturies y mis Picos, jeje)

Relaxación con mus y cerveces a la fín de cada día

Munches fueron les hores de convivencia nos refuxos dempués de 3 llargues xornaes de montaña, poro pasamos el tiempu como meyor se podía: unes cerveces y unes partíes de mus, que ficieren más fácil conciliar el sueñu, nos refuxos. Anque sigue siendo la mio asignatura pendiente, esta vegada tuve namái un día de nun dormir res, suerte que coincidió col día más sele de montaña.

Nel tema montañeru, estos son los resúmenes de los 4 díes:

Día 1:

Benás (Uesca) - Refuxu d'Estós

Día 2:

Refuxu d'Estós - Llardana - Refuxu d'Orús

Día 3:

Refuxu d'Orús - Forqueta - Refuxu de Biadós

Día 4:

Refuxu de Biadós - Bachimala - Benás (Uesca)

Na montaña dicir que tou perfeutu en llinees xenerales, esfrutando de cada pasu, de cada ascensión, de cada vista, paisaxes,... poro l'añu que vien tornaré a pasar unos díes pa descubrir otres fasteres desti inmensu país montañosu, que ye Pirineos.

Pero dempués de la montaña, llega tornar a casa y esta nun foi tan plácida, anque entamara perfeutu, dándonos tiempu l'últimu día a durmir nun hotel en Benás (yera bono descansar y escaecer los refuxos, antes d'otru viaxe llarguísimu), con una cena de miércoles coyonuda acompangada d'unes cerveces nun perguapu chigre de Benás, hasta entrada la nueche.

Al día postreru, Xueves, tocaba desayunar y abandonar esti pueblu, el cual dexóme encantáu, ya que ye difícil combinar l'arquitectura tradicional cola mui populosa actividá del turismu, y que'l pueblu nun pierda la so esencia. Equí raramente, algamáronlu, ya que toles cases, caltienen la piedra y madera como ellementos cimeros de la so estructura, ya sean hoteles, apartamentos, tiendes de marques deportives, etc... tou un llogru nos tiempos que cuerren.

Hores de carretera poníanmos, nel momentu de xintar, y esta vegada diba ser n'Iruñea, onde tuvimos tamién un ratín de paséu, pa estirar les pates, ya que nun dibamos tener más paraes hasta Basauri. Ellí, últimos abrazos contando qu'ésta nun diba ser la cabera, y garro'l coche pa tirar pa Xixón, pa dempués d'unos pocos kilómetros dende que dexara Bilbo, a puntu d'entrar en Cantabria, se me va'l coche d'atrás, y doíme una hostia fina contra'l quitamieos, dempués d'un par de trompos.

Que gran manera de finar unes vacaciones, y menos mal que solo fue eso, ya que tuvi la suerte, de llibrala de dalguna manera y nun quedar paráu, nesa puta autovía A8, y salime col coche furrulando pola siguiente salida. Gran momentu pal que lu viera en direutu, jeje, nin la fórmula unu. En fin, un ratín nuna área serviciu, arrancando partes delanteres del coche y vuelta a la A8 pa siguir el viaxe más h.odíu de la mio vida, nes que les siguientes dos hores, a cada gota d'augua que cayía, poníanseme les pelos de punta, alcordándome de les vueltes pola autovía.

Son coses que pasen, pero que nun s'escaecen,... como tampocu quiero escaecer de la mio memoria a un "paisanu" con mayúscules como foi el Sr. Labordeta. Y digo señor, porque a poca xente nesta vida pue llamásele asína. Nun se si foi casualidá, que per primer vegada percorriese la so tierra que tanto defendió, qu'a mi nun me pasara nada tornando d'ella y qu'él morriese pocos díes dempués, pero la so pérdida foi mui sentía por mi.

Paecíame una bona persona, y solo a les bones persones se les d'alcordanza como a esti home...

Dende esti blog, con tol respetu del mundiu, mi pequeñu homenaxe,....

Tornaré a la to tierra pa esfrutar d'ella como se merez, percorriendola pasu a pasu, per valles, caleyes y montes y tamién cantaré a la llibertá en cada cumal porque ye nos pocos llugares onde siéntese dafechu.