jueves, 14 de octubre de 2010

Benás (Uesca) - Refuxu d'Estós

12 de Setiembre de 2010

Track: Benás (Uesca) - Refuxu d'Estós



Dempués del viaxe dende Xixón a Basauri y l'interminable viaxe a Benás, poles carreteres más indómites y enrevesaes del Pirinéu, llegamos en hora a Benás, y teníemos por delantre una xubida hasta'l refuxu d'Estós. Y digo que llegamos en hora, porque dábenmos la cena a les 7 y media sinon m'alcuerdo mal, y necesitábemos apurar les más de 2 hores y media que ponía de ruta, pa llegar a la cena.

Preparaos, llistos, ... YA!!

Asína que, preparamos tolo necesariu pa 4 díes de monte, intentando nun dexar nada que ficiese falta, y pusímonos a les 5 menos dalgo a caleyar, a bon ritmu, p'arriba. Los primeros pasos dámoslos ente'l desfiladeru que lleva al banzáu d'Estós, y d'ellí dexamos la pista formigonada pa metenos n'otra bien amplia que va ganando altor poquín a pocu, pasando pola cabaña de Santa Ana, enantes de dexar a la manzorga'l desvíu que va a los ibones (llagos) de Batisielles, xustu dempués de la fonte de Corones onde echamos un traguín.


Caleyando pola pista

Sin parar muncho más, siguimos dando pasu allegre, demientres sacamos dalguna semeya del preciosu Bal d'Estós, a la mesma vegada que cruciamos el ríu Estós del que recibe'l nome pa ponenos rápidamente na cabaña de Tormo, onde entamarán les xubides más fuertes de desnivel.


Col Perdigueret detrás nuesa

Magar d'un descansín nesta vega del Tormo, ponémonos a cuchillu a facer les rampes más dures al traviés d'unos ciszas, y ya metémonos nuna recta que va amosándonos selemente el refuxu a lo fondu. Un apretón más, y arribamos a él, pocu dempués de les 7 la tarde, colo que teníemos tiempu a una cervecina, ver l'atapecer y cenar con tranquilidá pa dempués tirar pal sobre a sobar.


El refuxu en mediu'l Bal d'Estós

Dos hores y cuartu daben con nós, nel final del primer día, qu'entamaba coles ruedes d'un Subaru Impreza de Xixón a Basauri (275 kms), les ruedes d'una Transporter de Basauri a Benás (400 kms), pa finar coles botes de montaña, al traviés de 8,6 kms y casi 600 ms de desnivel.


Atapeciendo cola vista puesta nel Aneto

No hay comentarios:

Publicar un comentario