Oseya (Sayambre) - Picu H.ariu

28 d'Agostu de 2016

Track: Oseya (Sayambre) - Picu H.ariu

Siguimos en Sayambre y dempués de palizón de la vuelta al Niah.u, del día anterior, ta costándonos llevantar del sobre. Muncho tien que ver, que la nueche anterior, magar de la cena, lliáramosnos nun chigre tomando cerveces y chupitos y falando col dueñu hasta bien tarde.

Esa mesma nueche, ya decidiéramos que la xubida al Niah.u nun diba ser, porque la baxada pela pista dende Llaete fízosenos pesadísima. Asina, que suena'l despertador y al mal cuerpu súmase un borrín densu en tol valle que vemos dende la ventana l'habitación.

Partimos d'Oseya (753 m) en Sayambre

Trail de Sayambre (Sayambre)

2 d'Ochobre de 2016
Track: Trail de Sayambre (Sayambre)

Web del Trail: Seronda Trails - Sayambre
Clasificaciones: Clasificaciones 2016  

Primer carrera de la temporada 2016-2017 y nesta tengo decidíu dir en condiciones, non como nel Quebrapates que fue un horrorosu final de temporada, anque ya llevaba xugando nes últimes carreres ensin dir preparáu nin física nin mentalmente... lo que vien ser dir por dir... y así non se disfruta.

El finde de la carrera pintaba perinteresante, con espicha bloquera nel Indorwall de la que colé pa casa tan cansáu como con cerveces enriba. Esti llocal d'escalada ye un peligru, xuntes la comedia con esguilar y na bono pué salir d'ello.

Así que'l sábadu plantéme n'Amieva a trepar colos collacios con un cansanciu supremu, con dolores nes manes y el pié que lleva fadiándome dende Agostu. Pasamos un día estupendu, pero casi durmíame asegurando asína qu'en cuanto yera hora pa la tienda a sobar hasta'l día siguiente. 
 

Xubiendo al H.ariu a bon ritmu

Madrugón y pa Oseya de Sayambre, pelos Beyos p'arriba, onde alcontrámonos con Alberto, que vino col parte del grupu monte p'ascender al H.ariu, per onde díbemos pasar tamién los corredores, asina qu'al menes dalgo d'animación díbemos tener.

La carrera entama llanzada cuesta baxo y tenemos dempués un tramín quebrapates visitando los pueblos sayambriegos de Vierdes, Pío y Ribota, p'ascender hacia unos ivernales, onde tenemos la primer gran xubida, na qu'Alberto nun da más de sí, por mor d'una sinusitis y tiro en solitariu, pasando de grupu en grupu según voi alcontrándome cómodu de ritmu.

Alcanzo un grupín numberosu y caltengo la velocidá de baxada per pista hacia Sotu, demientres voi charrando con un participante. Normalmente, suelo parar abondo nos avituallamientos, pero sigo'l xeitu del grupu, garro agua y a siguir corriendo hacia Vegabañu, nun ascensu preciosu per fayeos.

Ruben, Alberto ya Illán... menudes vistes

Pa cuando aporto a Vegabañu, con otra pareya de corredores, adelantamos a dellos, dalgunos míticos como Ana Cristina Aguado, una gran campeona, quedándome ablucáu col ritmu que llevo y paez qu'anímome calculando que'l grupu monte con Kíla nun tarán mui lloñe.

De Vegabañu toca l'ascensión final al picu H.ariu y caltengo bon ritmu col restu de participantes, hasta que tópome con una perrina blanca que güelme a distancia y hasta que nun m'alcuentra nun para, lo que faiga que tea un ratín acariciándola y recibiendo llametones.

Haritz tien que garrala y toi oyendo los sos lladríos durante bon ratu, pero nun m'atrevo a llevala conmigo por si molesta a los corredores. Con semeyante dolor por abandonu a mi perrina, aumento'l ritmu tolo que pueu pa salir del radiu d'alcance de la so vista y olfatu... pasando a varios corredores y faciendo l'arista final con otru gran corredor veteranu del Quebrapates... Zacarías.

Aportando a la meta dempués d'una carrera preciosa

Facemos el tramu final del H.ariu xuntos llevándome a un ritmu brutal y sin parar entamamos el descensu diciéndome que pase si quiero, pero nun lo faigo hasta que veo que piérdese nunos banderinos y tómo-y el relevu.

Alcuéntrome bien y sin dame cuenta, faigo la baxada téunica como un tiru y pa cuando llego al caberu avituallamientu en Llabeñu, diz un rapaz que voi'l 46 o 47... nun lo pueu creyer, pero anímome más y sigo per tarrén más favoratible baxando ainda más rápidu.

Llevo otru corredor detrás, que va encantáu col ritmu, pero pa cuando aportamos a la pista, les pates siguen respondiéndome xenial y tiro a unos ritmos que nin me los creo, pasando a dalgún participante más.

Primera prueba de la Seronda Trails completada

Pa cuando aporto a la senda l'Arcedianu pa baxar definitívamente a Oseya de nuevu, alcuéntrome con un par de repechinos que camiento que pueu aguantar corriendo y el primer sí, pero'l segundu fai que se me xuba'l cuadriceps teniendo que parar un ratín.
 
Nesi tiempu, pierdo dos puestinos que ya nun volveré a recuperar y eso qu'acabo bastante fino de nuevu, pero dame igual, l'allegría d'entrar pente los 50 primeros nun trail de 25 km y 3800 m de desnivel nun me lo quita naide.
 
Acabar una carrera el 43 faciendo 3h y 34 minutos fué quiciás el cambiu de chip que necesitaba pa tomame más en seriu mi participación en carreres pel monte. Ver veremos hacia onde vamos tirar, si entreno más o sigo confiando na esperiencia d'andar pel monte como principal puntu fuerte.
 
Como siempre, lo meyor... l'ambiente y compartir rises y sufrimientu con Alberto, Rubén ya Illán que son ya como dos compañeros más d'alcontranos de carrera en carrera... dar les gracies a Noe, Wifre y Gael pol recibimientu y les semeyes na meta, los ánimos del GM Xuan de la Borrina y les semeyes a MV Fotos.

Cobarcil (Sayambre) - Tolivia (Ponga) - Llué - Llaete - Ribota (Sayambre)

27 d'Agostu de 2016

Track: Cobarcil (Sayambre) - Tolivia (Ponga) - Llué - Llaete - Ribota (Sayambre)

Munches vegaes si restolamos pente'l mundiu blogueru de monte, vemos como ta entrándose nuna especie de profesionalización de los blogues de la xente. Ya nun entro si queremos sacar perres o non, si la nuesa afición acaba convirtiéndose nun trabayu o en daqué monetariu, eso ya caún tien qu'estudiar si-y renta o non.

Cuantes vegaes dixéronme, que por qué nun escribía en castellán, que diba tener milenta visites más y de xuru que yera ricu y famosu. Pues non, esti blogue ye mi pequeñu requexu pa contar lo que me peta pel alma y cuéntolo n'asturiano o al menos nel asturiano más curiosu que pueu ufrecer, que nun tuve la oportunidá d'estudialu nel cole y tampoco mamalo en casa... que mi Pa ye soriano y mi ma d'Ortigueira en Cuaña y ellí fálase l'eonaviego.

Con too esto, quiero remembrar y destacar, qu'esta ruta que ficimos el mió collaciu Charly y yo, ta clavada, calcada y copiada de la que ficieron dos de los blogues que sigo con más enfotu: Los de las Claras y Caleyando con Cienfuegos.

Tamos en momentos cafiantes pa los blogues que llevamos bien d'años (dende'l 2 de Xineru de 2009 nesta xera), con cambeos en blogger, con cierre de portales onde aloxar semeyes y con ciertu cansanciu d'escribir y nel casu del collaciu Cienfuegos ver como otros "profesionales" con llibros a cuestes, cópiente'l trabayu que'l nuesu tiempu nos lleva y nada de perres nos da.

Asina, qu'en tiempos de falta d'orixinalidá na conceición de rutes, muncha profesionalidá y llistaos de los meyores blogues en fala hispana, d'aventures o la de su madre en calzonciellos, quiero dedicá-yos y da-yos les gracies fonderes a Jonatan y Cienfuegos... porque son munches les rutes que-yos copié y llueu conté a la mió manera, pero que siempre puse d'au venía'l trabayu y búsqueda de percorríos.

Un abrazu collacios... espero conoceros dalgún día en presona, que tien coyones la cosa dempués de tantos años, a Monchu cola so biblioteca d'ascensiones que tien por blogue, ya tuvi la suerte unes cuantes vegaes... así que vémonos pronto espero.

Partimos de Cobarcil (503 m) nos Beyos

Beyo (Ayer) - Cordal de Cotobeyo

20 d'Agostu de 2016

Track: Beyo (Ayer) - Cordal de Cotobeyo

A la vuelta de les vacaciones per Soria, tuve dellos díes intentando cuidame mentalmente ya físicamente, pero ya tocaba intentar buscar les miós llendes otra vegada. Poro, restolé pente les milenta rutes preparaes que siempre tengo nuna carpetina polo que pudiera pasar y saqué de paséu la que meyor veníame pa entrename un pocu corriendo cola mió perrina, Kíla.

Salimos entós, Kíla y yo, col coche hacia Ayer, faciendo'l camín davezu dende Xixón, pela autovía minera hasta Mieres del Camín y desviándonos de camín hacia L.lena pel corredor del Ayer, pasando pelos pueblos de Morea, L'Escuyu, Los Estrul.lones, Cabanaquinta y L.levinco onde tendremos el desvíu a la mandrecha pela Ae-4 hasta Beyo.

Partimos del pueblu de Beyo n'Ayer (505 m)

La Ñora Bloque (Xixón)

27 de Mayu de 2016

Los xixoneses siempre andamos a la gueta d'un requexu onde poder trepar y ún d'ellos ye la sablera de la Ñora na llende pente Xixón y Villaviciosa. Pues bien, aparte de los bloques d'escalada con cuerda na fastera xixonesa, tenemos bloques pa bulder a ambos llaos del ríu Ñora.

A la gueta de bloques pa entretenese

Nos díes d'entrenu corriendo pela Costa Xixonesa, parábemos munches vegaes a garrar aliendu nesta sablera, enantes de siguir de vuelta y echando una güeyada paeciónos que dalgo podría salir, sobre tou nos afloramientos d'arenisca pente los bloques de conglomeráu.

Conglomeráu pero con dalgún florecimientu d'arenisca

El día que tuve pegándome una tarde per ellí, tan sólo tuviemos na fastera xixonesa nel cachin pequeñu que queda pente'l ríu y la mar, sacando dellos bloques bien entreníos, pero hai que dicir que pal cantil de Villaviciosa vense bloques con munches posibilidaes anque ye zona d'argayos y nun se cuanta seguridá p'andar per ellí tendríemos.

Seutor na fastera maliaya con bloques d'arenisca

Póngovos una especie de croquis de los pocos que probamos, a la espera de siguir pegándonos un pocu con estes peñes nos próximos branos y de pasu un vidiu d'un d'ellos, quiciás al más duru y espeutacular pol altor que gárrase y la salida guapa que tien.

La Ñora (Bloques visitaos) 

Croquis fechos ensin tener ni idega de cotaciones... o se xube o non se xube jeje.

Recuerda (Tierras del Burgo) - Morales - Cabeza Rivilla

10 d'Agostu de 2016

Track: Recuerda (Tierras del Burgo) - Morales - Cabeza Rivilla

Últimu de mis paseos pela redolada de Recuerda en Soria, nel qu'esta vegada diba averame corriendo a un monte con vértice xeodésicu nomáu la Cabeza Rivilla. Como siempre tengo tiempu nos díes qu'ando per ellí y yo suelo madrugar, pues llevo preparadines cosuques pa dir conociendo los montes con vértice más averaos al pueblu.

Saldremos de Recuerda, provincia de Soria, en direición Este, per una pista agora asfaltada, qu'empobínase hacia las Bodegas de Recuerda. Este conxuntu de bodegues escavaes na tierra ye un bon atrautivu del pueblu, si se supiera xestionar, ya que la visita, cata y picar dalgún productu de la tierra sería una bona idega a llevar alantre.

Camín asfaltáu hacia les bodegues de Recuerda

Quebrapates de Peña Mea (Llaviana)

4 de Setiembre de 2016

Track: Quebrapates de Peña Mea (Llaviana)

Web del Trail: Quebrapates de Peña Mea

Clasificaciones: Clasificaciones 2016  

Cuando se fae l'imbécil, al día siguiente págase... como ye normal. Pues eso fice pa correr la Quebrapates de Peña Mea, con 32 km y dalgo más de 4400 m de desnivel acumuláu, por tanto la carrera más dura no que llevamos corretiando pel monte.

Sálese a un ritmu infernal

Y ye que si te pica'l niki, pues sal de folixa con toles consecuencies y nun vayas a sofrir ensín xacíu durante más de 5 hores. Aún así, lo únicu positivu, fué saber aguantar el chaparrón resacosu, malestar xeneralizáu y el calor que fizo, deshidratándome con muncha facilidá.

Perdura ascensión per Doñangu a Peña Mea

Dende'l primer momentu, la carrera salió como un tiru, yera campionatu d'Asturies y notábase, qu'había xente mui fuerte, colo que sin querer, tol mundiu nos primeros kms llanos diba a un ritmu mui altu pa lo que teníemos per delantre.

L'ascensión a Peña Mea per Doñangu... pues nin tan mal, floxu de ritmu pa lo que solemos facer, pero aportamos al Picu Dubil dignamente dentro de lo que cabe. Llueu, na baxada, nun m'alcontraba mui allá y pené durante varios kilómetros hasta l'avituallamientu, onde nun pude xintar nada sólidu, asína que sólo aquarius y agua.

Dende equí tol descensu hasta Tolivia, con sensaciones alcontraes dacuando unes males y otres piores y les ñubes que desapaecieron del cielu y entamó a cascar Llorienzu como si nun hubiere mañana, pasando un calor infernal.

Tengo de dicir, que menos mal que los 7 avituallamientos fueron clave, pero tuviemos la suerte de que'l públicu nos pueblos viesen el percal y sacaren agua frío de les sos cases y mangueres pa metenos una ducha y refrescar, ya que correr a más de 35 graos ye percomplicáu.

Acabamos con un ritmín hasta potable y too

Como meyor pudimos, ascendimos esa "putada" que ye'l tramu hasta la Campa Corián y ya tocó baxar colo xusto, teniendo que baxar ritmos y casi deseyando que llegara una pequeña xubida pa parar de correr... fatal, fatal de sensaciones.

A la fín, casi con 5 hores y media de penosu correr, caleyar o arrastrase llegué a la Pola Llaviana fundíu, menos mal que'l bañu na piscina fría, la ducha posterior calentina y la xinta curiosa, amatagó les ganes de nun volver a correr mas... eso sí, cuando tomamos el vermú y marcaba 43 graos yera pa camentar el peligru de díes así pa correr.

Asina quedes magar de 32 km a más de 30 graos

Puerto de Santa Inés (Pinares) - Castillo de Vinuesa

5 d'Agostu de 2016

Track: Puerto de Santa Inés (Pinares) - Castillo de Vinuesa

Como tolos branos y semanes santes, intento facer una escapadina per Soria, al alcuentru de los dosmiles sorianos. Una vegada más tuve compaña, Miguel y Río, que seríen los agasayaos con una rutina pela xerra de Cebollera.

Entamaremos la ruta nel puertu de Santa Inés, onde asítiase una estación ivernal d'esquí, aportando a ésta dende'l pueblu de Vinuesa, enmediu de los estensos pinares madereros que dan-y calter a esta fastera soriana.

Más menos, el percorríu p'aportar al Puerto de Santa Inés, sedría dende'l Burgo de Osma, salir direición Soria pola N-122 hasta'l desvíu de la SO-910 hacia Abejar. Ellí, garramos la CL-117 que va pal banzáu de la Cuerda del Pozo y bordiándolo pela manzorga, pasaremos per Molinos de Duero y Vinuesa, onde garraremos la SO-830 hasta'l propiu puertu de 2004 m.

Partimos del Puerto de Santa Inés (2006 m)

Recuerda (Tierras del Burgo) - Gormaz - Vildé - Villanueva

3 d'Agostu de 2016

Track: Recuerda (Soria) - Gormaz - Vildé - Villanueva

Como tolos años nel mes d'Agostu préstame pasar unos díes pel pueblu de mió pa y siempre faigo dalguna ruta nos dosmiles sorianos y tamién dalgo de senderismu nes cercaníes del pueblu pa dir tachando montes con vértice pela zona.

Esti añu, les rutes fíceles corriendo asína que nun facer casu de los tiempos porque nun ye factible pa andarinos, asína que seríen rutes que defechu diben llevanos a lo meyor una xornada más curiosina y non les poques hores nes que les fice, por muncho qu'entretúveme conociendo tal o cual senderu pa poder algamar un camín curiosu.

Esta primer ruta, va facenos conocer con "suerte" cuatru pueblinos de la redolada, entamando por Recuerda y siguiendo per Gormaz col so nomáu castiellu, pa siguir tarrenes fluviales hacia Vildé y Villanueva.

Na realidá, esta entrada va ser pelín estraña porque voi poner varies posibilidaes dependiendo d'un pasu clave al traviés del banzáu de Vildé, que dependiendo de la cantidá d'agua que tea garrando la presa, podremos pasar o non.

Baxamos per camín dende Recuerda hasta Gormaz con vistes del Castillo tol tiempu

Santa Marina (Valdión) - Gildar - Panderruedas - Vegabañu (Sayambre)

11 de Xunetu de 2016

Track: Santa Marina (Valdión) - Vegabañu (Sayambre)

Tercer estaya d'esta Travesera 2015 - 2016 y tamos en Santa Marina nel valle de Valdión, onde ayeri llegábemos bien cansaos magar de dos rutes consecutives de bona paliza. Descansáremos estupendamente y güei como novedá vamos salinos de Picos p'atacar los montes del cordal cantábricu, col consiguiente llarguísimu percorríu.

Dimpuestos pa la salida en Santa Marina (1161 m)