lunes, 5 de septiembre de 2016

Santa Marina (Valdión) - Gildar - Panderruedas - Vegabañu (Sayambre)

11 de Xunetu de 2016

Track: Santa Marina (Valdión) - Vegabañu (Sayambre)


Tercer estaya d'esta Travesera 2015 - 2016 y tamos en Santa Marina nel valle de Valdión, onde ayeri llegábemos bien cansaos magar de dos rutes consecutives de bona paliza. Descansáremos estupendamente y güei como novedá vamos salinos de Picos p'atacar los montes del cordal cantábricu, col consiguiente llarguísimu percorríu.

Dimpuestos pa la salida en Santa Marina (1161 m)

Despedímonos de la xente de l'Ardilla Real del que tan bon recuerdo quedónos y travesamos el pueblu al debalu hasta qu'atopamos la ponte que crucia'l ríu Arenal onde garraremos el Prpne-14 que lleva hasta la mayada del Montó.

El camín llevarános pegaos al ríu Arenal onde alcontramos varios campistes faciendo les sos necesidaes en comuña (cosa raruna) y llueu fai una envuelta pa metenos nun senderu estrechu tomáu pela yerba que nesti día taba pingando... la ducha fue un dolor... nun soi a pescanciar un pior entamu de ruta.

Dempués d'un entamu pasáu per agua garramos pista per guapes viesques

Cuando salimos d'esti senderín del degorriu, tábemos completamente moyaos, siendo hasta munches hores dempués, caleyando per pistes, que nun fuimos secando. Estes coses nun faen nin puta gracia y tardamos en recuperar el bon humor, demientres conociémos guapes viesques pel valle de la riega Llalambres.

Siguiremos xubiendo cómodamente per pista, siempre col borrín de compaña y la riega Llalambres a la manzorga, hasta que casi de secute, pasaremos los mayaos de Brez y más enriba'l de Montó... de los que siendo sinceros nun sabemos si son más o menos guapos porque nun vimos nada.

Arribamos a la mayada Montó per cómoda pista

Vadiaremos un afluente de la riega Llalambres y sin ver nada, dexaremos la peña Gulugas a la nuesa manzorga, alcontrándonos nun colláu de 1648 m con dos xemelos pastores qu'andaben restolando p'alcontrar una vaca recíen parida.

Llevaben munches hores ya y dixéronmos que nun tenía pinta de que llevantase'l día, lo que fadiónos un pocu, pero dempués de que nos empobinaren correutamente, siguimos camín hacia las Hoyas de Montó, onde paramos a descansar y ver pente'l borrín los Picos nun momentu d'apertura.

Buscando un llugar pa descansar nas Hoyas de Montó

Magar de xintar, beber y descansar de les dos hores y media de camín, dame por mirar el mapa y dime cuenta que teníemos enfrente un dosmil, el picu Anzo, asína que punxímonos a restolar cuala yera la meyor manera de xubir.

Dempués de descartar una canal más direuta, viendo a los robezos movese vimos que nun yera bon sitiu, tiramos pa otra más lloñe del cumal pero con meyores posibilidaes d'ascensu, lo que nun quita que fuera abegosa y mui pindia, tanto que pa los nuesos cuerpos cansaos, l'aportar a l'arista y alcontrase dalgun trepe intermediu, fizo que tuviera que dir yo sólu hasta'l cumal del Anzo.

Dificultaes nel tarrén na escapada al Pico Anzo (2015 m)

Dexé a los compis descansando del esfuerzu de la canal y salí corriendo ensín mochila, trepando pel camín un par de peñes y teniendo que meneame con xeitu nel propiu cumal ya que tamién había peñes per tolos llaos hasta acceder a la campa final del picu Anzo de 2015 m.

De vuelta con una sudada fina y pagando l'esfuerzu, retomamos el camín pela xerra de Cebolleda, averándonos hacia'l picu Las Brañas, onde tendríemos d'aportar nel nuesu camín marcáu, si nun ficiese'l monu yendo a cada montucu qu'apaez per uquiera.

Siguimos la marcha pela cuerda de la xerra de Cebolleda hacia'l Gildar

Del picu Las Brañas n'adelantre, xúntense los cordales de Gabanceda col de Cebolleda que vien dende l'Anzo, siguiendo col nomatu de xerra de Cebolleda y siendo un crestéu de lo más entreteníu, con dalguna peña pelín aerea y munchu faldéu herbosu.

Tol faldéu fadrémoslo pela fastera sur, ya que na norte, anque vense dellos senderos, tenemos una fonda borrina que nun mos dexa ver per onde tenemos los pasos, asína que tiramos tol camín mirando al sur y echando una güeyadina cuando lo permite al Picu Gabanceda y al cordal pel que venimos dende'l picu Anzo.

Averámonos al Gildar pasando pelos Verdes de Cable

El crestéu faise llargu y paez que'l picu Gildar nun acaba de llegar, pero siguimos avanzando, destacando en mediu'l cordal el pasu pelos Verdes de Cable, otru pequeñu dosmil que toma'l nombre d'una riega na so faldera, la de Cable, qu'acaba vertiendo les sos agues al ríu Cares.

Dempués de casi 5 hores y media y 11 km percorríos, aportamos a los 2078 m del Gildar, el cual recíbenos con un prestosu mar de ñubes, destacando los macizos del Cornión y los Urrieles, pelos cuales anduviéramos fai un par de díes.



Nel Gildar (2078 m) col Cornión al fondu

Sinceramente, les cares son de cansanciu, ye'l tercer día y tovía tenemos per delantra una llarga xornada hasta Vegabañu, poro descalzámonos ya intentamos descansar los pies, que tan recocíos de la primer parte de la ruta con tanta moyadura.

Magar de xintar, intentar secar los calcetos y garrar un pelín de fuercies, siguimos alantre, teniendo que navegar pente'l borrín pela fastera norte del Gildar. Esti ye un tramu complexu, nel que malpenes vamos alcontrando dalgun restu de sienda, que faenos travesar enormes lleres.

Descendemos del Gildar hacia'l ñacimientu del ríu Cares

Dalgun h.itu empobínanos pel camín correutu tamién, descendiendo tol espolón norte del Gildar, hasta aportar a tarrenes más amables con campes, mayaos y munches siendes que faldean el Gildar, lo que fai que nos cueste un triunfu llevar la direición correuta.

Dicir que si nun ye pol GPS, a saber onde acabamos porque la visibilidá por momentos yera nula. Asína que pocu a pocu, aportarmos a las Hoyas de Frañana, pasando penriba del ñacimientu del Cares, lo cual diba prestar ver pero nin siquiera lo pudimos intuir.

Dempués de garrar senderu nas Hoyas de Frañana, el tema meyora muncho y al menos siempre llevaremos un marcáu senderu hacia'l colláu Sotres, onde percorreremos el pequeño cordal de Cuénabres, siempre enmediu del ríu Cares y el valle de la Iglesia.

Baxando a Panderruedas pa siguir hacia Piedrashitas

Cola pena de nun ver na y cola sensación de tar perdiéndonos una zona bien guapa de conocer, métemonos nel final del cordal de Cuénabres, entrando en una de les viesques más guapes peles que nunca anduve, llevándonos bien entreteníos hacia'l Puertu de Panderruedas.

Con casi 8 hores enriba y una kilometrada épica, intentamos aldovinar cuanto de camín nos queda a Vegabañu y viendo la hora na que nos movemos, ya sabemos que vamos llegar pilladísimos a la cena, poro tiramos hacia Piedrashitas baxo un orbayu curiosu y ye que'l día nun pudo tar más repunante.

Siguimos navegando pente viesques, campes y faldeos de pequeñes xerres

Nun vemos nada... simplemente guiámonos pol GPS y caleyamos lo más apriesa que podemos. Pasaremos baxo les muries del picu Camboriscu hacia la mayada de Piedrashitas, p'ascender fuertemente hacia'l colláu Viejo, onde tendremos de facer varies envueltes hasta les muries de la cerra Centenal.

Llibraremos esta pela manzorga y tendremos un llargu caleyar baxo los picos Guadañas, Cuetos Negros y Cerra Dobres los cuales nin somos a ver, pa baxar a la collada Dobres, onde descenderemos hacia'l puertu Dobres, pasando al llau del ñacimientu d'otru gran ríu... el Dobra.

Aportaremos a Vegabañu a la hora la cena y con una reventada fina

Una vegada que somos a aportar el puertu Dobres, los cartelos empobinánodonos hacia Vegabañu son de continuu casi y dexamos atrás un tarrén más confusu y abegosu de siguir, pa metenos nuna viesca ablucante con un toque casi máxicu envuelta nel borrín.

Col tiempu pegáu al culu y casi perdiéndonos la cena aportaremos a Vegabañu dempués de diez hores y 20 min, nos que percorrimos un total de 25.5 km y superamos un desnivel acumuláu positivu de 1755 m y descendimos 1590 m.

Con esta estaya... al día siguiente tendríemos de retiranos por mor del mal tiempu p'atacar el nuesu oxetivu... que tendrá que quedar pa otra vegada.

No hay comentarios:

Publicar un comentario