lunes, 12 de septiembre de 2016

Recuerda (Tierras del Burgo) - Gormaz - Vildé - Villanueva

3 d'Agostu de 2016

Track: Recuerda (Soria) - Gormaz - Vildé - Villanueva


Como tolos años nel mes d'Agostu préstame pasar unos díes pel pueblu de mió pa y siempre faigo dalguna ruta nos dosmiles sorianos y tamién dalgo de senderismu nes cercaníes del pueblu pa dir tachando montes con vértice pela zona.

Esti añu, les rutes fíceles corriendo asína que nun facer casu de los tiempos porque nun ye factible pa andarinos, asína que seríen rutes que defechu diben llevanos a lo meyor una xornada más curiosina y non les poques hores nes que les fice, por muncho qu'entretúveme conociendo tal o cual senderu pa poder algamar un camín curiosu.

Esta primer ruta, va facenos conocer con "suerte" cuatru pueblinos de la redolada, entamando por Recuerda y siguiendo per Gormaz col so nomáu castiellu, pa siguir tarrenes fluviales hacia Vildé y Villanueva.

Na realidá, esta entrada va ser pelín estraña porque voi poner varies posibilidaes dependiendo d'un pasu clave al traviés del banzáu de Vildé, que dependiendo de la cantidá d'agua que tea garrando la presa, podremos pasar o non.

Baxamos per camín dende Recuerda hasta Gormaz con vistes del Castillo tol tiempu

De toes formes, saldremos de la plaza de Recuerda, xubiendo pela cai del Pozo, pal final d'esta salir per un camín a la mandrecha, el cual va dividise al par d'una torre esbarrumbada en dos garrando'l de la mandrecha pa más alantre dixebrase en dos tamién, garrando tamién el de la mandrecha pasando al llau d'una nave y empobinándose cuesta abaxo hacia los corrales de la Torrecilla, pa en descensu acabar na puente vieya sol ríu Duero.

Esta puente ye perinteresante de conocer puesto qu'antaño tuvo dos arcos fortificados, siendo de gran interés la so reconstrucción, lo que podría ser un puntu turísticu importante. Dende llueu, agora que ta zarráu al tráficu, nun sería descabelláu esta idega, personalmente, prestaríame enforma conocelu como yera enantes del so derribu pal pasu de camiones.

Cruciamos la puente que cuenta con 18 güeyos y vamos entamar l'ascensu pela calzada romana a Gormaz, personalmente nestes cuestes aprovecho pa entrenar y voi xubiendo peles envueltes a bon ritmu, aportando al pueblín de Gormaz topándonos cola so ilesia y garrando un guapu senderu con escultures, que ficieron pela faldera'l castiellu pente unes peñes, p'aportar a la propia entrada principal del Castillo de Gormaz.

Ascensión correndera al Castillo de Gormaz y trepe hasta'l puntu más altu

En total dende'l ríu Duero, serán unos doscientos metros de desnivel que xubo corriendo ensin parar, teniendo que tar unos minutinos garrando aliendu tres de les muries del Castillo. Equí bien paga la pena, tomarse unos minutos de tranquilidá y pal que nun lo conoz, caleyar sele descubriendo tolos requexos d'esta enorme fortificación... la más estensa d'Europa.

Yo conozola bien, pero nunca me diera por cotar el puntu más altu del castiellu, asina que póngome a trepar peles muries hacia'l torruxón del homenaxe, aportando al vértice xeodésicu que tien un altor de 1057 m y unes vistes increyibles del castiellu y tola redolada.

Puntu más altu del Castillo de Gormaz (1057 m)

Baxo de nuevu y recuperáu del esfuerzu salgo corriendo hacia la proa oeste del castiellu, saliéndome per una muria esbarrumbada pa bordiar pol senderu la muria oeste, mítica por tener delles esteles discoidees, con una flor del agua que siempre prestóme enforma.

Agora entama l'aventura y tírome campu a traviesu hacia la carretera pa baxar en direición a la ermita garrando un camín a la mandrecha, que va faceme descender hacia Valdehuevo, quedándonos el castiellu a les nueses espaldes.

Descendemos dende la proa oeste del Castillo hacia'l GR hacia'l Burgo

Siguiremos hacia las Tainas de la Fuente Maya, onde alcontramos un cartel de propiedá privada, pero son tan solo unos pocos metros, que pasamos al llau d'unos corrales y siguiremos pel tramu más feu del día, baxo les torres llétriques d'alta tensión, que dan un mal rollu tremendu.

Aumento'l pasu, porque nun me presta res el soníu penriba la cabeza, hasta descender hacia'l Piojar onde desviámonos al banzáu de Vildé, onde tendremos un finxu importante pa ver si podemos siguir de ruta o non.

Metémonos pela pasarela de metal y plántome na muria'l banzáu, viendo que l'agua rebasa ésta con una velocidá que nun me presta res. Descálzome y nel primer pasu, veo la cayida a la mandrecha y como patina de mugor el suelu y decido nun arriesgar... pa un llau tengo un bañu nel Duero y pal otru una resbariada con posible hostión fina... pasando.

Facemos a bon ritmu y con un collaciu tol camín hasta'l banzáu de Vildé

Dicir que col nivel d'agua baxo y la muria seco, tengo pasáo hasta cola bici de llau, así que lo d'esti añu, abultóme hasta estrañu. En fín, con estes condiciones nun me quedó otra que tornar so los miós pasos hacia Valdehuevo y siguir de frente esta vegada en baxada pasando per una pequeña foz hacia la dehesa de Gormaz, onde si tamos con ganes podemos intentar alcontrar los restos d'un monasteriu que llevóse va años una riada.

Siguiendo la pista, tornaríemos a la puente p'andar dellos kilómetros de carretera hasta'l desvíu hacia Vildé saliéndonos pocu más alantre, nuna curva per una pista que va llevanos a una piscifactoría, onde entamaría la segunda opción pa la nuesa ruta.

Dicir que si ya conocemos el Castillo de Gormaz d'una visitina en coche y nun tenemos ganes de xugánosla col banzáu de Vildé, lo meyor ye salir de Recuerda pel mesmu camín, pero nel últimu cruce comentáu garrar el camín de la manzorga que va dexanos al altor del desviu a Vildé en plena carretera.

Empobinámonos hacia Vildé desviándonos penriba'l ríu Duero... con visita a collacios risqueros

Una vegada que tamos ante la piscifactoria, hai años, salía de la mesma puerta un senderín que diba llevanos al llau del ríu Duero hasta'l mesmu banzáu, pero ta tomáu y nun fuí alcontrar como pasar. Asína que lo meyor ye enantes de les valles del recintu, arrodialo pela manzorga pasando al llau d'un bebederu y dir caleyando penriba los riscos hasta tener una vista del Duero ablucante.

Nel intre, alcontréme con un fotógrafu que vióme venir corriendo y paró a charrar un ratín, comentándome lo guapu del sitiu que pude dir comprobando corriendo y sacando tamién yo semeyes de les utreres y del ríu Duero dende un llugar que nunca lo viera enantes.

Abaxo veremos como'l senderu enantes comentáu ye dafechu prauticable, así que diremos baxando a él cuando alcontremos un ampliu canalizu nuna resquiebra del cantil. Llueu siguiremos caleyando pegaos al ríu, hasta unos sembraos nomaos como la Cañada, onde entraremos nuna parte un pelín más abegosa de siguir.

Alcontramos formes d'antañu de pasar y muncho xube-baxa hasta'l banzáu

El siguiente tramu entre la Cañada y el banzáu de Vildé, como dixe, será más complexa, ya que'l ríu métese muncho sobre'l senderu y tenemos ciertos puntos nos que me fué imposible continuar y tuve que xubir penriba sobre tarrén de monte baxo.

Ye más, aconseyo casi restolar un senderín pel monte baxo y dir tol tiempu dende riba, ya que camínase bien y siguir la sienda del ríu, va dexanos en continos xube-baxes pa llibrar conflictos, poro siguir esti tramu pel alto, hasta acolumbrar el banzáu y descender hacia esti.

Nesti puntu, xuntaríemos la opción 1 cola 2 y si viniésemos del Castillo, podríemos tornar a Recuerda penriba del Duero o a la escontra cruciar el banzáu y tornar visitando'l Castillo, pero que pasa si tenemos más ganas de caña o viniendo pela opción 2 de la piscifactoria alcontramos que nun podemos cruciar al otru llau del Duero?

Pasáu'l banzáu toca ponese en mou pista hasta parar en Vildé a por agua

Pues na, entramos na opción 3 que va llevanos a facer una xatada fina. Pa ello, siguimos del banzáu pela manzorga, pasando per un senderín hasta alcontranos con una bona pista, que llevarános hasta un crucie, tomando'l de la manzorga que tien de llevanos hacia Vildé, magar de casi 3 km, pegaos dalgunos al ríu Caracena.

En Vildé podremos garrar agua, descansar y si hai suerte y el bar ta abiertu podemos echar una cervecina enantes de continuar cola ruta. Pa ello, saldremos per una cai a la mandrecha de la ermita de las Angustias y cuando pasemos la última casa, taremos atentos a garrar un senderín penriba d'una especia de casetos de ladrillu.

Ehí garraremos un senderín, que va llevanos pegaos a un canal d'agua, tornándose a cada pasu'l camín más guapu, adientrándonos na foz del ríu Caracena. Tengo que dicir, que nun conocía esti camín y que paecióme guapísimu, la forma más guapa d'aportar al banzáu del Caracena nel municipiu de Villanueva de Gormaz.

Perguapu paséu dende Vildé al banzáu de Villanueva pela foz del Caracena

Llueu d'esfrutar d'esti paséu encoñáu ábrese'l paisaxe hasta'l banzáu de Villanueva, onde tantes vegaes vinimos en bici a bañanos, cola barca hinflable y un llargu etcétera d'actividaes xuveniles. Faigo les semeyes a tan guapu llugar, cruciaremos la muria y saldremos per pista hacia la Cerrada del Alto, onde tendremos vista del pueblu de Villanueva de Gormaz.


Dende equí garraremos un camín que va facenos descender hasta'l pueblu, pudiendo una vegada más recargar d'agua y descansar un ratín. En Villanueva, si la ruta ta faciéndose llarga podemos salir per detrás del frontón a garrar un camín qu'al traviés de Valparaíso llevaríanos a Recuerda de nuevu.


Pero nun momentu de llumbrera mental, a pesar del calor, dame por facer un pocu más de vuelta, saliendo de Villanueva hacia'l sur, xubiendo al llau de les bodegues de vinu p'aportar a un altu dixébrense los caminos, garrando'l de la manzorga que tien de baxanos pel barrancu Carramosarejos, que va descender al barrancu del Val.



Son munches les vegaes que ya pasé per equí, pero nunca lu pasé tan mal pol chornu enorme que facía y la falta de correr una plizca d'aire siquiera. Tiré tol Val alantre, corriendo a un ritmu curiosu, más poles ganes d'aportar a Recuerda que poles fuercies que me quedaben, hasta alcontranos col camín que vendría más direutu dende Villanueva.

Dende equí dalgo más de dos kilómetros con una pequeña xubida, va dir faciéndonos llegar de nuevu a Recuerda, onde podremos tomar dalgo pa refrescanos en cualesquiera de los dos bares col que cuenta'l pueblu.

En resume, ruta qu'intenta amosar dellos senderos fluviales, conociendo un garrapiellu de pueblos sorianos y ún de los referentes d'esta fastera de Soria, el Castillo de Gormaz, el cual durante tol percorríu diremos viéndolo dende distintes posiciones.

Como siempre apúrrovos dellos datos pa que vos faigais una idega de lo que vos espera, si facéis esta ruta, tomando como referencia la ruta más llarga, xubiendo al Castillo de Gormaz y pudiendo cruciar pel banzáu, con un total de 22.5 km, 475 m de desnivel positivu y unes 7 hores de camín.


Camudando'l Camín per tierres sorianes

No hay comentarios:

Publicar un comentario