viernes, 19 de agosto de 2016

Cordiñanes (Valdión) - Asotín - Torre del Hoyu Lliordes - Chavida - Santa Marina (Valdión)

10 de Xunetu de 2016

Track: Cordiñanes (Valdión) - Santa Marina (Valdión)


Un día más tamos preparaos pa salir a l'aventura de la Travesera y fadrémoslu con un par de baxes (Benjamín y Natalia) pero reponemos con Zori y Richar, asína que siguimos un grupín col envís de finar los nuesos pasos en Santa Marina en Valdión, saliendo nel día de güei a les 9 la mañana.

Partimos dende l'hostal El Tombo en Cordiñanes (847 m)

Esto significa que vamos travesar el subgrupu del macizu de los Urrieles conocíu como Peñes Cih.uentes y pa ello tenemos que caleyar de nuevo dalgunos y conocer otros, la resquiebra que lu dixebra de los Urrieles: la canal d'Asotín.

Como siempre pa ello, tendremos d'ascender pel seu de la Rienda, qu'esti añu ye más sienda que seu, ya que punxeron unos pasamanos, por mor, de la ferrata que tan montando, quitándo-y esi picantón aéreu que tien esta sienda.

Averándonos a Asotín pela ablucante sienda la Rienda

Aún así, siempre ye gozada pasar per equí y más a la solombra ya qu'espéranos otru día de calorón supremu. Los collacios van esfrutando de les vistes, según salimos penriba de la Pica'l Castro con tol Cornión al fondu, destacando como non la Peñasanta de Llión.

Perpasamos la Vega d'Asotín saliendo a la canal asoleyando con fuercia

Agradeceremos la solombra de la viesca d'Asotín y ceo saldremos baxo'l sol na Vega d'Asotín y anque llevamos bon ritmu nel comienzu, diremos baxándolo adulces, demientres personalmente voi camentando como nel día de güei prestaríame dalguna ñube y fai dos años naguaba por ver un rayu sol.

Perpasaremos el desvíu hacia colláu H.ermosu, metiéndonos dafechu na parte encaxonada de la canal, teniendo a mandrecha los corredores que baxen del Frieru y a la manzorga toles muries de les torres de las Colladinas y más enriba del propiu Llambrión.

Salimos de la canal d'Asotín hacia Llagu Bah.eru

Aportaremos a la fín, magar d'unes 3 hores y cuartu al colláu (1880 m) onde asítiase'l Llagu Bah.eru, el cual entá nun fuera a conocelu, pero esta vegada averéme hasta ellí y sorprondióme pola so fondura y llargura... pensaba que yera un champán namái.

Salímonos hacia l'Hoyu Chico dexando tres de nós les muries del Llambrión

Equí descansaremos un plizcu, pa reponer llíquidos ya picar daqué y siguiremos hacia'l nuesu destín: la h.orcada del Hoyu Chico, la cual queremos tomar directamente ensin metenos hacia'l colláu de la Chavida.

De primeres, paecíanos que pudiera ser más abegosu, pero sigun vamos llibrando un h.ou tres d'otru, alcontramos dalgun h.itu y demás, cuando dámonos cuenta tamos metíos ya na faldera oriental del Hoyu Chico y vamos avanzando per una pedrera viendo cada vegada'l nuesu destín más cerquino.

Llibramos l'Hoyu Chico pela manzorga baxo los parés de la Torre Olavarría

La verdá ye que según diba ascendiendo tamién veía que sería posible xunir la Torre Olavarría a la nuesa manzorga cola del Hoyu Lliordes, pero lo meyor yera ciñise a los planes y siguir alantre. D'otra miente, la que sí me dexó acoyonáu fue la Torre del Hoyu Chicu... la cual paecióme un castiellu naipes con mui mala pinta jaja... alcordándome claramente de la mió amiga la cuarta arenera, jeje.

El casu ye qu'aportamos a los 2306 m de la h.orcada y decidimos xintar dalgo enantes d'atacar el gran oxetivu del día la Torre del Hoyu Lliordes, la cual presentóse antes nos como un conxuntu caóticu de pequeñes aguyes y muries verticales que de primeres dexente dalgo fríu.

Metémonos nel llaberintu la torre del Hoyu Lliordes

Esa sensación vi na cara de dalgunos de nós, como dudando per onde díbemos atacar semeyante llaberintu, pero tiramos alantres y fuimos restolando per onde entrá-y con dalgún pequeñu trepe hasta un primer pasín delicáu llateral, sin dificultá pero meyor nun resbariar ya que ye una escupidera hacia un canalizu perpindiu y con cayida.

Llueu d'esti pasu, treparemos per un ampliu canalizu hasta encaxonanos viendo la única salida posible al traviés d'una llambria la cual tendremos de superar faciendo una zeta baxo un pequeñu techín, teniendo'l pasu duru al final de la travesía ascendente pa salir a la mandrecha.

Pasamos los pasos más duros y delicaos hacia la arista con calma

Ye un mínimu pasu, pero nun pue tener fallu y hai que fiase de les botes y de los pocos agarres, la verdá ye que la verticalidá con una posible cayida d'unos 5 o 6 m nun echa un gabitu precisamente y sinon se ve unu pa xubir pa baxar pue ser pior, así qu'Haritz y Dani ficieron bien en non tirar p'arriba.

Demientres sofitaba a los collacios a xubir, anque yera dificil por nun tener munchos pa echar un gabitu, Alberto y Richar andaben a la gueta d'una salida y nun la veíen hasta que metíme yo per un canalizu a la manzorga con un trepe vertical pero de bonos agarres.

Algamamos el cumal de la torre del Hoyu Lliordes (2473 m)

Dende equí n'adelantre queda salir del too del canalizu y facer una envuelta hacia l'arista pela que caleyaremos per un tarrén un pocu sueltu, pero sin peligru dengún, hasta topanos nos 2473 m d'esti increyible monte.

Un diez pa tolos collacios del grupu, animándose unos a otros, intentando echar un gabitu y dándose la vuelta cuando nun lo vieron claro, ensín poner en peligru a otros del grupu por intentar ayudalos... en serio.... mui bien collacios.

La baxada del mesmu xeitu o más... con muncha calma y curiáu los movimientos

La baxada pues igual mirando cada pasu que se pon y trepando ún tres d'otru mirando que tou vaya bien, incluyendo'l pasu complicáu de la Zeta onde nun alcontraba postura pa baxar hasta qu'alcontré una mandrecha n'oposición y de culu hasta la repisa... nun ye un pasu cenciellu y ye espuestu enforma.

Lo demás ensin problemes baxando toos de la mesma forma y d'ellí con curiáu hasta aportar de nuevu a la h.orcada del Hoyu Chico onde taben echando un pigazu Haritz y Dani a la espera de que sacásemos caún los sos esquisitos tupers con tortiella, embutíu o quesu.

Tramu podre superior p'acceder a la collada la Chavida

Llueu de 45 minutinos tiraos na h.orcada, paez que nun teníemos ganes de movenos, tocó entainar y baxar hacia la collada la Chavida y pa siguir cola roca podre, esti tramu ye pior de roca que cualquier tramu del Hoyu Lliordes, pedreres sueltes, casi d'arena y pindiu enforma.

Baxaremos como podemos un pindiu canalizu y a lo postreru garramos una terracina en travesía que ya tien de depositános na propia canal de Chavida, a la cual nos metemos como podemos per onde más estable lo alcontremos.

Salimos con cuidadín hacia la collada la Chavida

De la canal de Chavida, tal como lo recordaba, ensin senderu claru, mala d'andar y pela qu'hai que dir como meyormente se puede. La primer parte aún sigue en senderu areneru pero la segunda parte, magar d'un bon tramu de "lleroning" finu, metémonos na llera de bloques grandes y hai que dir mou Mario Bros hasta garrar los primeros tramos de yerba onde hai senderu claru.

Garrarémoslu y pararemos a la sombra d'un Peñón a descansar y esperar pol restu del grupu, ya que como dixe caún tien que llevar la so velocidá nestos tarrenes. Toos xuntos baxamos hasta la fonte onde nos refrescamos y tal como lo recordaba enguedeyámonos pente les urcies ya beriza pa baxar hasta'l prau del Toro.

Pestosa baxada hacia Santa Marina per senderos pente urcies

Del prau del Toro, alcontramos ya'l senderu del Prnpe-15 del que sal otru que más menos puédese siguir ensin perdese, baxando paralelos a la riega de Piedras Negras hasta'l depósitu d'agua de Santa Marina onde salimos a la carretera y entramos con tola felicidá del mundiu nesti guapísimu pueblu.

En Santa Marina, unes cerveces, una estancia comodísima y agradable y total porque preciu... 12,6 km de percorríu en casi 11 hores, un desnivel positivu 1740 m y otru de baxada de 1420 m... nun ye na comparáu colo que nos prestó tar na terraza esperando pola cena dempués de duchanos.

Un abrazu al Albergue La Ardilla Real... marchamos encantaos!

Camudando'l Camín en Valdión

No hay comentarios:

Publicar un comentario