miércoles, 22 de febrero de 2012

San Isteban (Valle Bah.u de Peñamellera) - Cuetu La Cerralosa - Urdón (Saja - Nansa)

22 de Xineru de 2012

Track: San Isteban (Valle Bah.u de Peñamellera) - Cuetu La Cerralosa - Urdón (Saja - Nansa)



Domingu de finales Xineru, nel que se supón que nótase un pelín que crecieron los díes pero nun demasiáu la verdá, ya que tamos Paulina y yo nel coche en direición Unquera y nun vimos l'alborecer en tol camín.

Esta vegada salimos de Llugones y garramos tola autovía del Cantábricu asturiana a una "velocidá constante" hasta arribar a Unquera onde quedamos con Fernan na cafetería Río Deva pa desayunar.

A les 8 la mañana tamos ellí plantaos desayunando los dos solos, hasta que llamo pa ver onde tan metíos y entérome qu'hai otra cafetería Deva onde ya taben almorzando con ellos, los nuesos collacios Carlos, Canta, Pangua y Rebe, Fernan y Bittor y dos collacios cántabros, Tino y Juan que conociéramos na ruta a la Torre de las Coteras Roh.as.


Semeya de grupu en San Esteban (241 ms)

Finalmente, xuntámonos toos y magar de los abrazos y presentaciones, vamos garrar la N-621 pasando pel pueblu cántabru de Molleda, hasta tornar p'Asturies nel pueblu de Buelles y siguir per El Mazu, Panes y Colosía pa meténos pel beyu del ríu Deva, hasta la llende con Cantabria n'Urdón onde dexaremos la furgo de Fernan y ún de los coches, ya que será'l nuesu puntu final de ruta.

Equí daremos la vuelta un kilómetru y mediu, pa garrar en Rumenes la carretera que xube al nuesu destín, San Esteban, onde tan esperándonos ellí, dos collacios más que xúnense al grupu, Silvia y Toni, que durmieran na furgo na capital del Valle Bah.u de Peñamellera, Panes.

Magar d'algamar que toes y toos temos a la fin preparaos, facemos la semeya del abundante grupu, nel qu'aprovechamos pa posar colos carnés nuevos de federaos 2012. Agora sentímonos seguros, jeje.


Primeros pasos de San Esteban al cuetu la Bea cola Torre d'Arguma de fondu

Como'l qu'esperézase pa llevantase de la cama, entamamos a caleyar sele peles cais d'esti guapu y fríu pueblu y bien ceo aportaremos n'ascensu hasta'l Cuetu la Bea, onde hai un mirador pal beyu del Deva.

Dende equí, baxaremos un pelín hacia l'área recreativa de la Cárcova Robicores, y nesa baxada tendremos enfrente nuesa la Torre d'Arguma, la cual ye la protagonista cimera de gran parte d'esta ruta, ya que pente les sos falderes, percorre l'ablucante sienda que vamos descubrir, la Pasá'l Picayu.


Pasando pol área recreativa de la Cárcova Robicores

Llevamos un cuartín d'hora caleyando y hai dalgunos de nós, que-yos apetez más preparar una parrillada nesta guapa viesca que siguir la ruta. Nun m'estraña y eso que nun sabíen lo que-yos asperaba y yo tampocu defechu.

Bien ceo, entamen les fostilidaes y vamos separtándonos en dellos grupinos, pa facer caún al so ritmu les envueltes que teníen de dexanos nel colláu Mediu (460 ms), nel que tornamos a facer xuntanza y acolumbramos ya, magar de dexar la viesca abaxo, les ablucantes parés, aguh.es y h.orcaes pente les que tendremos que restolar el camín.


Xubiendo al colláu Mediu

Darréu, tendremos un tarrén nel que diremos siguiendo'l senderu qu'en delles envueltes, pola canal de las Teh.ucas, fadrá dalgún xube-baxa y dempués de superar dalguna h.orcada qu'otra fáinos aportar al enllaz cola canal del Infiernu, que vien al traviés de la de Rucláu dende'l propiu ríu Rumenes.


Guapísimu terrén de xube-baxas bordiando l'Arguma

Al traviés d'esta canal del Infiernu, será cuando ganemos un gran desnivel, nel que se pone la patata a furrular a esgalla y será cuando más diremos separtándonos unos d'otros. Penriba Fernan escaparáse con Juan y sobretóu Tino, qu'está a tope y per detrás dando ánimos dirémonos camudando les posiciones pa nun dexar a naide atrás.

Na parte final, tendremos inclusu dalgún pasín protexíu per cables, que ciertamente molesten más que protexer y entraremos nuna fastera de varios collaos como'l de San Esteban, viendo de colláu en colláu guapísimes canales como la de los Obreros o los Llobos, que xuben dende lo más fonderu del ríu Deva.


Siguimos pel senderu colgáu na faldera de la Torre d'Arguma

El día sigue ensín abrir, anque nun fai fríu y paez que la lluvia va respetanos, lo cual ye perimportante nesti tarrén de senderos colgaos sol vacíu, nel que na mayor parte vas pisando al llau de yerba llargo, lo cual ye perpeligrosu si tuviera moyáo.

Siguiremos avanzando, pel faldón de la Torre d'Arguma, superando collaínos y faciendo xube-baxas al pasar pelos finales de toles canales que xuben, faciendo'l senderu un auténticu quebrapates , hasta qu'aportamos al colláu de L'Arguma (880 ms).


Pasando pol colláu de l'Arguma

Llevamos una hora y media hasta aportar a esti colláu, onde a pesar de que'l día nun quier abrir del too, tenemos unes nueves vistes hacia la Hermida, picos de Cantabria como'l Sestón, Treslah.ora, Gamonal, Obán, Cuetos De la Pelea y Del Ave o sobretóu l'espeutáculu de la Cuchiella d'Urdón que xube hasta nós, dende'l mesmu ríu Urdón.


L'acoyonante Cuchiella d'Urdón

Nel intre, vamos trespasar la llende d'Asturies con Cantabria y xustu nesti momentu tamién, vamos entamar la verdadera Pasá'l Picayu, la cual ye un pasu estrechu n'escalera que ta dafechu protexíu n'escesu, con barandielles de madera na primer parte y con cables d'aceru na cabera y más espuesta.


La Pasa'l Picayu

Defechu, la nomada Pasá, nun tien mayor dificultá, a nun ser que teas poco avezáu a estos pasos aéreos o que teas faciéndola nun estáu d'humedá importante, na que deberíemos andar sollertes de nun tener nengún erru, porque pue ser fatal.


Caberos pasos al colláu del Requeh.u

Finaremos la Pasá'l Picayu nel colláu del Requeh.u, que da pasu a la canal del mesmu nome y nesti llugar a 930 ms, taremos un bon ratín axuntándonos y xintando daqué pa recuperanos del esfuerzu de 700 metros de desnivel superaos.


Baxando del colláu metíos en Cantabria dafechu

Darréu, dalgo descansaos físicamente, nun hai que peder nin una migaya d'atención, ya que la Pasá'l Picayu ye muncho menos peligrosa que lo que vamos tener que facer nel descensu del colláu a la canal de Requeh.u.

Como amuesen les semeyes, paez imposible la baxada del colláu anque seya bien cenciella y llueu'l pasu que tenemos pocu dempués, con tola canal que vien del Regueru del Sáu, embaxu nuesa ye tan guapu como aéreu y peligrosu.


Pasu aéreu enforma perguapu

Una placa d'un accidente va unos años, dános un toque d'atención p'andar sollertes, anque'l cable que lu protexe sirva de quitamieos, hai que tener güeyu col pasu y nun facer el fatu, porque ye mortal dafechu.

Hai que dicir qu'anque seya un tramu de la xubida perguapa, ye pelín desilusionante, ya que vamos baxar casi un centenar de metros de desnivel, hasta aportar al colláu del Cantu Morón, onde vamos tener que desviános del senderu, ya qu'esti sigue baxando hacia'l pueblu cántabru de Tresvisu.


Entamamos l'ascensu dende'l colláu del Cantu Morón (898 ms)

Nun llegan a les 2 hores y media de ruta cuando magar d'otru descansín, vamos entamar a xubir a la cresta del nuesu oxetivu cimeru de güei, el Cuetu La Cerralosa. Pa ella, escaecemos tou camín o sienda a siguir y metémonos de llenu, nun tarrén amestáu de caliza y yerba, pel que progresaremos poquín a pocu.


Dellos pasos de trepada nel entamu de la cresta

Sigún vamos xubiendo vamos tener a la ñebla asperándonos penriba los 1000 ms y hasta qu'aportemos a ella, tendremos delles trepaes prestoses penriba la caliza. De xemes en cuando hasta vinieron bien, pa nun andar esmolecíu pol cansanciu de xubir pelos pindios praos.

Una hora vamos facer d'ascensu cuando aportamos al primer cumal d'esta cresta, el Cuetu'l Paré de 1216 ms, el cual faínos envolvenos un pocu más na ñebla, anque tendremos dalguna visión pantasmal qu'otra de la guapísima Torre d'Arguma pembaxo nuesa, que tanto costónos arrodiar.


Vamos superando dellos cuetos como'l Paré y el Valledal

Siguiremos alantre, ya con muncho menos desnivel y metíendonos en plenu crestéu, daremos pasu al siguiente cumal que ye'l Cuetu'l Valledal (1269 ms) nel qu'aportaremos nun cuartín d'hora.

A estes altures la xente, va sofriendo'l cansanciu acumuláu y nun ver el final de la cresta por mor de la ñebla, faise dalgo pesáu, ya que nun s'acolumbra'l Cuetu y eso fai tener cierta ansiedá por saber si ye esti, si será'l siguiente y así aumentándose col pasu de los minutos y los metros de cresta fecha.


Enmediu la ñebla averámonos al nuesu oxetivu: La Cerralosa

Asína pues, dempués del Valledal, inda quedónos un bon crestéu al traviés de los varios cumales del Cantu Las Rubias teniendo'l so puntu más altu nos 1408 ms, que facíenmos dempués baxar un pocu más a un colláu, qu'al fin meterános na canal d'ascensu al Cuetu La Cerralosa al qu'aportaremos dempués de 5 hores y 15 minutos dende San Esteban.


Nel Cuetu La Cerralosa (1561 ms)

Les cares de felicidá de toos al aportar al cumal, contrasten dafechu coles cares de cansanciu y sufrimientu nos caberos pasos de delles persones, sobretou Paula y Rebe que llucharon con brenga, pa da-y preste a esti Cuetu La Cerralosa. Cume que nun foi tolo agradable que debiera con nós pol esfuerzu fechu, ya qu'en nengún momentu quiso amosános tola ayalga de vistes que tien solos 3 macizos de Picos. Una pena, la verdá.


Demientres la mayor parte del grupu descansa xintando

A pesar de les casi 3 hores de crestéu dende'l Cantu Morón hasta La Cerralosa, yo tenía en mente quitáme un par de cotes más d'esti guapu conceyu que ye'l Valle Bah.u. Asína que demientres la mayoría del grupu, baxó de nuevu pola canal de xubida hasta un llugar protexíu del fríu, onde poder xintar con tranquilidá y llueu baxar a Tresvisu, Fernan, Pangua y yo siguimos cordal alantre.


Los tachamontes vámonos al Vih.uegu (1541 ms)

El primer finxu a tachar yera casi una antecima occidental de La Cerralosa, el Vih.uegu, qu'en menos d'un cuartín d'hora ya teníemos nel bolsiellu colos sos 1541 ms. Magar del Vih.uegu, teníemos una baxada muncho más grande hacia'l colláu de Pandecova, pasu ñatural utilizáu tamién pa dir pente San Esteban a Tresvisu.


Baxando al colláu de Pandecova (1408 ms)

Aportaremos a los 1408 ms del colláu de Pandecova y la ñebla va dexános ver la nuesa última ascensión, el Cantu Las H.uentes, la cual díbanos facer un esfuerzu perimportante, con un ascensu y un descensu pela mesma vía.


El Cantu Las H.uentes delantre y el Vih.uegu detrás

Nun-y damos más vueltes y tirámonos a pol cantu, alcontrándonos con una ascensión prestosa na primer parte onde arrodiamos dalguna aguh.a qu'otra y llueu metémonos nun terrenu permalu, con yerba alta na que nun veíemos onde pisábemos y aparte nun yera mui afayaizu averase al crestéu ya que les caídes hacia la canal Negra, pela que baxa la riega Sombeh.u, meten mieu.


Ascensión al Cantu Las H.uentes (1505 ms)

A la fín, llantámonos nos 1505 ms del Cantu Las H.uentes y dempués de xintar un pocu de turrón qu'inda tenía Fernan pela mochila, decidimos non baxar al colláu occidental de H.ermosa, escoyendo baxar pel mesmu llugar de xubida, pa nun perder más tiempu, ya que son casi les 4 la tarde y les hores de lluz nun son abondes nesta dómina del añu.


Tornamos a Pandecova pa empobinanos hacia Tresvisu

Baxaremos entainando y al aportar al colláu de Pandecova, vamos garrar un senderín bien amañosu, que va facénos ganar tiempu na baxada hacia les cabañes de La Mesa, onde tomaremos una bona pista de formigón qu'empobínase a Tresvisu en varies envueltes.


Pasamos pola Mesa onde acolumbramos Tresvisu al fin

Nuna hora clavada dende'l Cantu Las H.uentes, aportaremos al pueblu onde la visión de tol grupu de collacios, relaxaos cola so mahou caún na man, fízonos tamién a nós baxar el nivel de nerviu, a pesar de que sabíemos que teníemos una carrera contrarreló coles hores de lluz.


Xintamos dalgo demientres los collacios tan chigreando

Un cuartu d'hora de descansu y partimos del perbien conserváu pueblu de Tresvisu, raspiando les 5 y media de la tarde, poro vamos baxar lo más aína posible pela nomada ruta dende Urdón a Tresvisu, pol Balcón de Pilatos.


Entamamos la baxada col día tocando al so fin

La primer parte fadráse nun descensu sele, nel que dibamos viendo como l'atapecer diba xuniéndose a l'apertura de ñubes penriba del macizu oriental per primer vegada del día. Manda coyones lo caprichosu que ye'l tiempu a vegaes.


Delles semeyes del Balcón de Pilatos

Baxaremos a pasu ampliu hasta les envueltes de los Ivernales de Prías, p'a posteriori facer otra recta en descensu hasta'l nomáu Balcón de Pilatos onde vemos les mil y una envueltes que nos van facer perder desnivel d'una forma bien rápida, anque dolorosa pa les pates y pies, por mor del pedreru del que ta fecho'l camín.


A última hora del día abre dafechu'l tiempu

Baxaremos les primeres envueltes del Balcón hasta'l mirador onde paez que faíse imposible qu'esista un camín que tenga continuidá y hasta esti puntu vamos toos xuntos más menos, pero al dar esa envuelta vamos perder la poca lluz que teníemos y unos con mayor confianza y otros con menos, vamos dir separtánondos en tantos grupos como envueltes tuviemos que facer pegaos a les verticales parés d'esti increyible camín.


La lluz escápasenos adulces

Finalmente, aportaremos a la parte más baxa, onde ya oyemos embaxo nuesa'l ríu Urdón, Paula y yo solos, a los que túvonos l'amabilidá d'asperar Canta, que tenía una pequeña llinterna que vínonos al pelo, pa facer tola sienda del beyu del Urdón. Una pena nun ver res, porque imaxinamos esti beyu con bien de guapura, anque lo cimeru yera nun tropezar con dalguna piedra del camín y meter una focicada o cayer unos metros al ríu que sería pior.

A les 7 y diez de la tarde y baxo la más prieta nueche, sacante de les lluces de la central, vamos pisar al fin l'asfaltu de la carretera, onde teníemos los coches y nel intre, xuntáronse munches sensaciones: felicidá y cansanciu, tensión y responsabilidá, mieu y alliviu, relaxación y cabréu... de xuru que'l que más o menos, tuvo en tola baxada y al final de la mesma, una, dos,... o toes estes sensaciones.

En resumen, ruta muncho más llarga de lo que camentábemos que llevónos 9 hores y 35 minutos, nos que tuviemos que superar 1650 ms de desnivel acumuláu nos 20,4 kms del percorríu total.

Siempre depréndese delles cosines en cada ruta. Nesta, la programación d'horarios nun foi la más afayaiza y quedóme grabáu nes cares de la xente que veíen que facíase de nueche baxando un camín nel que nun se pue tener despistes y otra cosina... mercar un frontal ye dafechu imprescindible.

Aún así, el bon ambiente siempre foi lo cimeru nel grupu y finamos con unes cerveces n'Unquera onde más relaxádamente, pudimos comentar fallos, aciertos, lo guapu y lo feu de la ruta y dempués despedímonos toos (astures, cántrabros y vascos) hasta la siguiente...

Asína que... ta la prósima tamién.


Camudando'l Camín na nueche de Picos

Nesta increyible ruta pela llende Asturcántabra ficimos: Cuetu La Cerralosa (1561 ms) primer cota de l Valle Bah.u de Peñamellera y monte prestosu astur, Vih.uegu (1541 ms) y Cuetu Las H.uentes (1505 ms) segunda y tercer cota del Valle Bah.u.

Ver progresos en: Retos montañeros

19 comentarios:

  1. Una ruta muy prestosa a la par que dura en la que unos sufrimos mas que otros, pero que disfrutamos todos por igual.
    Ah! Por cierto, en la foto de cumbre, Rebe y yo tenemos la misma cara de felicidad que todos los demás ;).

    ResponderEliminar
  2. Buena pateada nos dimos, y como siempre un poco más, aunque todo salió bien.
    Paula y Rebe sufriendo, pero hasta arriba como el resto.

    A por otra¡¡¡ un abrazu.

    ResponderEliminar
  3. Nun m'espresé bien Pau, agora camiento que fícelo meyor. Quería amosar la cara de felicidá nel cumal, colos últimos pasos que dimos per esa canal que paecía nun acabase nunca.

    Un besín neña

    Fernan, esti finde a por otraaaaa!!!

    ResponderEliminar
  4. Un rutón espectacular. Encantome. Cómo presta echar el domingo faciendo deporte, riéndose de tonteríes y conociendo requexos d'Asturies (y de Cantabria, nesti casu) completamente nuevos pa mí...
    Una auténtica pasada. Del Picayu.

    ResponderEliminar
  5. ¡Vaya cómo me prestó ver les fotos y un articulín sobre mio pueblu y la Pasá'l Picayu n'asturianu! Por ciertu, una pequeñuca corrección: el nome'l conceyu tradicional ye "Valle Bah.u de Peñamellera".

    Saludinos!

    ResponderEliminar
    Respuestas
    1. Dalgo oyera de lo del Valle Bah.u, pero como sigue ensín normalizar la toponimia de les Peñamelleres pues mil duldes que tengo, collaciu.

      Polo qu'agüeyo tamién sedría San Isteban entos non??

      Si pues confirmámelu, doble correición entos

      Un abrazu

      Eliminar
  6. La verdá ye que tengo munches duldes sobre'l nome'l pueblu. Nosotros siempre diximos "San Esteban" (vamos, lo que yo siempre oyí), pero en Cuñaba y na redolada ye común dicir "San Isteban". Como nun soi más filólogu que de caleya, prefiero nun indicar más qu'esisten les dos formes...

    ResponderEliminar
  7. Munches vegaes les deformaciones acastellanaes de los nomes nos propios pueblos ye onde suel caltenese más, por mor de la xente de mediana edá.

    Solo los más mayores suelen dicir el nome correutu.

    Como exemplu pueu dicite'l pueblu de mio ma: Ortigueira en Cuaña. Nun oyerás a casi naide (sacante los más vieyos) dicir Ortigueira, toos dirán Ortiguera.

    Por embargu, xente de los pueblos de la redolada, dirán Ortigueira siempre, jeje

    Esi mieu al aldeanismu ta mui presente.

    Préstame esi San Isteban... voi dexalu asína. Tamién rectifiqué los nomes de los conceyos por Valle Altu y Valle Bah.u, que ya oyera delles vegaes

    Un abrazu y gracies polos comentarios

    ResponderEliminar
  8. Berto guapa ruta, si señor, la conozco aunque nosotros no teníamos mas que un coche, y por ello no hicimos el picu, que sería muy larga, teniendo en cuenta que al final tuvimos que subir andando hasta San Esteban también.
    Un saludo

    ResponderEliminar
  9. Buff, l'enllaz d'Urdón a San Isteban, ye mui llargu pa facelu andando. Pues metete fácilmente 11 hores. Otra opción pa facer el Cuetu si ya conoces el Balcón de Pilatos, ye xubir pol Picayu, da-y preste a tola cresta y baxar al colláu hasta'l Cantu Las H.uentes como nós y baxar pol colláu de Pandecova al valle de San Isteban y too p'abaxo.

    Pue ser llargu, pero mui prestosu y queda circular

    Un abrazu

    ResponderEliminar
  10. Respuestas
    1. Gracies Jose... ya ties un seguidor más del to blogue

      Saludos

      Eliminar
  11. Berto, menuda calcetiná pa facer unu de los díis más curtios de añu. Menuda bayura hores pa una ruta de xineru. Ser ye prestosa a más nun poder. Una pena non haber podido esfrutar de les que de xuru, son maravielloses vistes dende cume, y digolo porque nun conozco el Cuetu la Cerralosa, unu de los que me falten del llibru de les 100 montañas más guapes d´Asturies. La Pasá el Picayu ye ablucante. Cruzámosla va un par d´años. El Camin de la Peña va muncho más que lu fice y prestaríame tornar. Habrá que pensalo. Lo dicho una ruta como puen facese poques.
    Un saludu.

    ResponderEliminar
    Respuestas
    1. De xuru que la parte más dura de la ruta ye lo llargu de la cresta hasta'l Cuetu. Faise llarga, llarga, pero'l como ya conoces, el senderu trazáu nes parés de la Torre d'Arguma, ye una pasada, jeje

      Un saludu

      Eliminar
  12. Que pasada la Pasá Picayo, una pena las protecciones de madera que ami gusto sobran. El Cerralosa lo tengo pendiente, ya que el día que hicimos la Pasá Picayo bajamos luego por la canal de Reñinuevo y ya era mucho pal cuerpo.

    ResponderEliminar
    Respuestas
    1. Entos llegásteis al colláu del Cantu Morón, y por onde cruzásteis el ríu Urdón pa pasar a la canal de reñinuevu?? Esa canal nun ye la que baxa del Cuetu Del Ave... ye que nun pillo la ruta, si nun baxes pel Balcón de Pilatos

      Un saludu

      Eliminar
  13. Muy buenas collaciu:
    Buenos recuerdos me vienen del dia que pasamos todos juntos saltando de un provincia a otra.Lo pasamos bien de verdad.
    La ruta una pasada,como la mayoria de las que preparais,la pena que el dia no nos fue propicio del todo.
    Paula y Rebeca,nos os hagais caso de todos estos energumenos que tanta prisa tienen por llegar a todos los lados,lo importante es llegar,que en la foto no ponen el puesto en el que llegamos cada uno,y la cara de satisfaccion es para todos igual.
    Un saludu para todos,formais un grupo con el que da gusto salir a zapatear por las montañas.
    Un abrazu y a ver cuando nos volvemos a ver.

    ResponderEliminar
    Respuestas
    1. Un abrazu Juan, espero que vos animéis a dalguna ruta más, ya vos diremos contando.

      Porque un par d'elles por Picos vamos tener, y vos vienen bien.

      Eliminar