12 de Xunetu de 2024
Track: Pandetrave (Tierra La Reina) - Puermán - L' Escañu - Mostayal
Primer día de la Travesera 2023 - 2024 dempués del parón del añu pasáu pela lesión de cadera, pero viendo qu'esti añu tamos pudiendo xubir el nivel de rutes, entráronme ganes otra vegada de preparar dellos díes pelos Picos d'Europa y como siempre, préstame pegar un pateín de vienres, restolando pente los llistaos de pendientes dalgún monte que conocer.
L'anterior travesera averárame corriendo hasta'l picu Gabanceda en solitariu y esti añu quería conocer xustu'l monte a la otra vera la carretera del puertu Pandetrave, siendo L'Escañu, el monte escoyíu al ser un dos mil de segunda categoría de Picos, xustu na llende pente Llión y Cantabria, ya que sigue la cuerda hacia'l Coriscáu.
Esta vegada tengo la suerte de tar acompañáu, por Pepa, Sara y Rubén, que tuvieron tamién la posibilidá d'animase a la ruta y llueu del llargu viaxe per Tarna y Riañu, aportamos per Portilla la Reina, a la mayada'l Santu, a malpenes una recta del puertu de Pandetrave, nuna curva d'esquierdes perzarrada, onde tendremos apartaderu pa los coches y preparámonos rápidamente pa salir de monte.
Nesti puntu, perteneciente entá a la comarca de Tierra La Reina, entamaremos la ruta, llueu de comentar colos guardes del Parque, si nun díbemos pelín tarde jeje. Saldremos, travesando unos praos, pa garrar a la mandrecha un ampliu camín que tien de llevanos a la parte alta de los mayaos del Santu, onde veremos al otru llau de la riega de Puerma una cabaña, anque nós siguiremos pela mandrecha la riega, ascendiendo apriesa per esti valle de Puerma.
Llegaremos a un puntu, nel que'l senderu paez desviase hacia L'Altu los Texales y nós vemos mui cerquina la collada Bragatesa, asina que cruciamos la riega y continuamos a la manzorga, siempre llibrando pelo más llimpiu del monte y echando un vistazu a los montes que dexamos atrás, atrayentes como'l Corcadas.
Aportaremos a la panda final, onde ya somorguiámonos na borrina, que tendrá una carga brutal d'humedá, que fainos aportar a L'Escañu (2113 m) ensin ver res y con una bona moyaura. A falta de vistes, qu'intento describir igualmente, ya que tamos nun mirador de los tres macizos de Picos, siendo una auténtica pena, tendremos la suerte de tener al espectru de Brokon, como compañeru de cumal.
Nuna hora y cuartu tamos nel cumal, pero siendo les 6 y cuartu, queremos apurar pa tar colos collacios en Santa Marina con tranquilidá, asina que nun mos demoramos más y viendo que nun abre pa tener vistes, vamos continuar tol crestéu alantre col envís d'aportar hacia l'altu del Mostayal, teniendo una primer parte de crestéu calizu bien entreteníu, anque como siempre, ensin vistes faise hasta llargu.
Siguiremos navegando pente la borrina, ensin ver res, alternando siendes h.itaes de caliza, con dalgún tramín de prau, onde la pingadura del tren superior, axúntase nel intre, a la moyadura terrible de pies, que nun hai goretex que lo soporte, terminando finalmente, por pasar fríu enforme y faciendose más que llargu tol tramu hasta'l Mostayal, lo que diz a les clares, como les condiciones marquen un ruta.
Finalmente, aportaremos al altu'l Mostayal, onde garramos una evidente vallina, que nun debemos abandonar, ya que col borrín, nun paga la pena andar a la gueta de siendes ganaeres, aparte que la vallina, anque per tarrén pindiu pero cómodu, va dexanos si o si, nel valle Mostayal.
Na parte final de la vallina, diremos saliendo del borrín, pudiendo entrar un pelín en calor, sobremanera les manes que nin les sentíemos de la moyaura y fresquín, aportando al senderu que percorre'l valle Mostayal, que nun puede ser más guapu, colgáu sobre la riega.
El tramu final dirémoslo esfrutando, secando un pelín y garrando calor al cuerpu y ye que vamos pensando, na mala suerte que tuvimos col borrín, qu'aparte de pinganos enforma, quitónos toles vistes d'una ruta qu'albidramos ye maraviyosa, pa una mañanera o una tarde, enantes de metese nos Picos.
Siguiremos, camín alantre, con dalgún pasín bien guapu sola riega, Mostayal pa na parte final, cruciala a la mandrecha y ya per camín bien ampliu cola compaña d'un mastín mozu y bien guapu, aportaremos de nuevu al aparcaderu onde tenemos los coches, teniendo hasta sol, pa poder cambianos y secanos de la tremenda pingadura.
En resume, ruta qu'hasta apetezme repetir poles pérdida de vistes, que llevónos nun guapu patéu al Escañu, nun total de 3 hores y 40 min (dafechu rebaxables sin borrina) a percorrer pocu más de 9 km con un desnivel acumuláu de +/-735 m, terminando los Dosmiles de Picos de Segunda Categoría
No hay comentarios:
Publicar un comentario