Retuerto (Valdeburón) - Cordal de Pármede

15 de Xunetu de 2024

Track: Retuerto (Valdeburón) - Cordal de Pármede

Continuamos de Travesera per Picos, yéndonos hasta la comarca de Valdeburón, col envís de pasar de Valdión a Sayambre, faciendo una paradina de camín pa conocer el cordal de Pármede, colos picos Parme, monte cimeru del Cordal Cantábricu y Pozúa, como referentes del cordal y grandes miradores de los Picos d'Europa.

Pa ello, vamos averanos, al pueblín de Retuerto, onde tendremos nuesu puntu de partida, aportando a una hora mui tardía, magar d'almorzar na furgo y en Posada pa despedinos de Pepa, lesionada del cuadriceps. Asina que vamos prepararnos y salir de Retuerto, por suerte con un dia fresquino, so les 11 y media la mañana, teniendo ya un pelín de presión pola hora, ya que tienen dellos compañeros que facer viaxe de vuelta.

 

Partimos de Retuerto (1200 m) nun día estupendo de temperatura

Cruzaremos el rigu Pármede, echando un vistazu al cartelu indicativu, ya que tamos en fastera pelín desconocida y siempre aida a orientase y alcordase de llugares cercanos pelos que ya tuvimos de monte, saliendo per una amplia pista, que va llevanos per un fayéu preciosu, baxo la faldera del picu Navarín, desdexando nel nuesu casu, les indicaciones de rutes hacia Burón, ya que'l nuesu destín son los praos del Hedo, onde aparte de vistes al Cornión, atoparemos caseta forestal a la vera la viesca.

 

Ascendemos cómodamente hasta'l Hedo xunto al enorme fayéu na faldera'l Navarín

Alloriando cola masa de viesca que que dexamos embaxo demientres xubimos pelos praos, vamos averanos hacia otra enorme, con esa sensación d'entrar nun mundu tolkinianu, atopándonos nel nuesu paséu, con exemplares de carbayu y faya dafechu impresionantes, que faen que tomémoslo con tranquilidá pa salir de la viesca.

 

Travesamos un fayéu con exemplares con tamaños increyibles

Llueu de travesar la viesca, saldremos a un tramu de praos, nos que diremos siguiendo'l senderu pente l'alta yerba, p'averanos al Cantu Las Rozas, onde tendremos que dir mui atentos pa empobinanos hacia una vallina onde tendremos la posibilidá d'evitar tol mantu d'urcies que pueblen les falderes del cordal de Pármede.

 

Avanzamos pente los praos hacia'l Cantu Las Rozas onde fadremos ascensu final al cordal

De primeres siguimos un valle hacia una valla nel cantu, pero tuvimos que danos media vuelta hacia la vallina, ya que ye'l únicu llugar d'accesu al cordal p'atacar el Altu de Pármede. Na vallina, travesaremos una amplia llerona de cuarcita y tendremos sienda pindia pero cómoda, hasta ganar el cordal, onde en pocos metros taremos pasando pel altu de Pármede y esfrutando de les increyibles vistes d'esti cordal.

 

Ganamos el cordal algamando unes vistes increyibles del Cordal Cantábricu y Picos

Alloriando coles vistes a los montes de Riañu, Mampodre, Cordal Cantábricu y Picos d'Europa, nun mos da la tiesta pa conocer tolo que vemos, asina que siguimos caleyando pel cordal hacia'l norte, apuntando na llibreta tolos montes que mos quede por visitar, averándonos hacia'l puntu más altu del cordal, el Picu Parme, al qu'aportaremos per senderu cenciellu de primeres y per dalguna trepadina de bloque cuarcíticu en bloque cuarcíticu, hasta los 1916 m d'altor.

 

Facemos cumal nel Picu Parme (1916 m) puntu más altu del cordal de Pármede

Col oxetivu cimeru fechu, quédanos per delantre una llarga crestería pela que diremos navegando, dacuando pela propia arista, con bon senderu y otres teniendo que faldear con más o menos dificultá, cuando ésta tien bloques que mos faen abegosu la continuidá. A destacar enormemente, les vistes hacia'l valle Becenes y tola redolada, que percorriéremos en parte na ruta a la Peña Mora, volviendo a encatarme esta fastera tan xabaz.

 

Entamamos un llargu crestería hacia'l picu Pozúa a tramos pela crestería a tramos faldiando

Na so parte final, tendremos un acusáu descensu hasta'l Portillu Becenes, onde toparémonos ya con una pindia ascensión de dalgo más de cien metros hasta poner puntu final al cordal nel picu Pozúa colos sos 1911 m, siendo l'auténticu miradar del Cornión y los Urrieles, ensin desdexar les vistes a montes de la llende piquista, como'l Gildar o el propiu Escañu, que ficiéramos el primer día de Travesera.

 

Esfrutamos d'un merecíu descansu nos 1911 m del picu Pozúa

Abellugaos del vientu, baxo les peñes del cumal del Pozúa, vamos tomar un merecíu descansu de casi media hora, xintando tolo que teníemos nes mochiles y los ladrillos que dexáranos d'alcordanza Pepa, a la qu'echamos muncho de menos, ya que le diba encantar esta ruta, tanto pol percorríu, como pol cordal ascendíu, pero sobretou pol allugamientu d'esti cordal, que brindónos de les meyores vistes d'esta fastera oriental asturllionesa.

 

Descendemos hacia'l valle de Pármede con ciertes dificultaes pola broza primaveral

Con ganes ya de tomar unes cerveces en Sayambre, tomamos l'arista Sureste per tramu llimpiu de vexetación, hasta aportar a la llende pente Valdeburón y Sayambre, onde diremos navegando pente les urcies, hasta salir hacia'l valle del Pármede, pel H.oyu Quemao, onde ya tendremos un descensu más cómodu, siguiendo'l cursu de ciertes riegues hasta aportar a una pista ganadera, que ya siguirá'l cursu del rigu Pármede hacia'l pueblu de Retuerto.

 

Descendemos per pista ganadera hacia'l pueblu de Retuerto

En resume, ruta completísima que durante 6 hores fízonos conocer el cordal de Pármede, percorriendo 13 km con un desnivel acumuláu de +/- 940 m, pero como siempre, lo más importante, fue pasar un día de monte colos collacios que con tantes ganes vinieron a esta Travesera per Picos y de los que despedímonos en Oseya con unes cerveces tranquiles, falta d'un par de díes más de monte, nos que quedáramos Mario y yo sólos.