Sesanes (Valdión) - La García - Senda'l Rabicu - Colláu Solano - Asotín

16 de Xunetu de 2020

Track: Sesanes (Valdión) - La García - Senda'l Rabicu - Colláu Solano - Asotín

 

Magar de dos díes bien prestosos de monte, de primeres pela fastera'l Llambrión tocando tolos sos altos
y el segundu día pel Cornión, conociendo la Torre Los Cabritos, esta vegada nel tercer día, queríemos facer dalgo de tarrén d'aventura, menos andáu... a la fín, salínos de les rutes davezu qu'atopamos en páxines y bloques.

Siempre que colamos Ana y yo, pa Caín, intentamos dixebrar los díes de monte, con actividaes más téuniques como pudieren ser cresteríos y otros pateos más físicos percorriendo grandes desniveles, pero si dalgo nos presta ye conocer llugares y pasos menos andaos, como ya ficiéramos en Tres la Envernosa va pocu tiempu.

Preparámonos pa caleyar en Sesanes (640 m)

D'esti xeitu, saldremos de Caín cola furgo de camín a Cordiñanes, dexándola nel aparcaderu enfrente'l Chorcu Los Llobos. Nesti puntu, al llau de les cabañes de Sesanes, vamos entamar una ruta que tien de llevanos per un tarrén dafechu desconocíu pa mí, col envís d'enseñá-y a Ana les mítiques travieses del Llaz, que percorriera va dellos años y de les que tan bona vista tuviéramos dende la Torre La Celada va munchu menos tiempu.

Daquella, Ana quedara priendada daquel paisaxe y de la posibilidá de percorrer llugares tan guapos, que dende la nuesa posición paecíen inaccesibles. Esta vegada, queriendo dar un pasu más, nun díbemos llegar a elles dende'l Colláu H.ermosu, sinon que queríemos conocer el Sedu La García y la riega que da continuidá hacia la parte baxa d'estes travieses, pa enllazar coles travieses baxo les Torres del H.ou La Llera.

Averámonos adulces hacia'l mundiu inesploráu del argayu Mermeyu

Poro, saldremos de Sesanes, lliándonos un pelín con dellos senderos esistentes que tendríen de llevanos hacia los H.oyaos. El tema, ye que ficimos más envuelta de la prevista y acabamos nos Manzaneos, per meyor camín que los atayos, pero perdiendo dalgo de tiempo.

A lo tontu, tamos falando de 2,5 km y un horina de camín, hasta aportar a los H.oyaos, onde tenemos que dexar unes pequeñes aguyes a la manzorga y una guapa e imponente aguya a la nuesa mandrecha. Vamos tener dos senderos baxo l'aguya, que lleven al mesmu llugar, teniendo que travesar una viesca d'ablanos, garrando nós el más baxo de los dos, calteniéndose marcadín anque dalgo zarráu.

A lo lloñe achisbamos el perguapu sedu la García

Baxo l'aguya, vamos ver a la nuesa manzorga la riega'l Mermeyu, la cual más alantre vemos que zárrase enforma y somos a aldovinar per onde podría percorrer el nomáu sedu La García. Taremos nel puntu más repunante del día, teniendo que lluchar enforma colos ablanos hasta alcontrar per onde descender a la Mermeyu, la cual siguiremos un tramu pel mesmu calce, hasta topar dalgo de marca de senderu que sáquenos a la manzorga la riega.

Dicir que tamos nun tarrén mui pocu andáu, ye más, costónos alcontrar información del sedu, remontándose a más de diez años, los últimos reportaxes que pudimos lleer. Sacante les cabañes perbien conservaes no más averáu al Cares, na parte alta nun alcontramos muncha vida ganadera, poro siguimos el nuesu instintu, hasta metenos nuna viesca baxo los parés onde creyenos qu'alcuéntrase'l sedu.

Esfrutando del Sedu La García... un pasu elegante enforma

Como referencia, topámonos unes llambries prietes, peles que trepamos aportando a una repisa con vexetación onde alcontramos l'entamu del barrenáu del sedu La García. Nesti puntu, garramos aliendu, ya que nun mos apetez muncho dar media vuelta y entamamos a esfrutar d'un paseín pela vertical, nuna obra xenial pastoril como solo podíen facer les xentes del Cares.

Dicir que'l sedu ye lo suficiente ampliu pa dir tranquilos, pero munchu güeyu coles mochiles ya que'l barrenáu nun ye mui altu y puede tiranos al vacíu, sobretou na parte final onde la cayía so la riega ye mortal de necesidá.

Degolamos al otru llau del sedu alcontrándonos tola riega La García

Degolaremos al otru llau del sedu, pasándonos a entrar na riega La García, ya que la de Mermeyu, desvíase a la mandrecha al entamu del sedu y nun sabemos si tien salida o non hacia'l colláu Solano. Nós, siguimos per tarrén aéreu y herbosu pasando d'hombru n'hombru del sedu hasta ver cláramente que nos pide descender per tarrén pindiu hacia la propia riega.

Si'l sedu La García fue una maraviya de conocer, siempre sabiendo per onde nos movemos, darréu pasaremos a un parque d'atracciones, onde nun tarrén llimpiu y calizu, vamos dir trepando pela mesma riega, superando bloques empotraos, llambries nidies, con pasos llaterales, pasos n'oposición... lo que bien siendo un esfrute total, eso sí, siempre que la riega nun traiga agua y tea sequina, sinon habría que buscar forma de dir pela faza esquierda terraceando ya que la drecha ye un paré vertical dafechu.

Esfrutando pel parque d'atracciones de la riega La García

Tamos falando d'un día de calor y vamos encantaos de la vida, a la solombra, pero tolo bono tien de terminar y quitáronmos los xuguetes a esti par de neños y los trepes y bloques desapaecieron y la riega la García va tocando a la so fín, abriéndose y empobinándonos a un mundiu nuevu, un mundiu de vallines herboses nel que tenemos qu'escoyer correutamente si queremos aportar al nuesu destín.

 

De primeres, cometemos un erru, queriendo siguir pela riega más tiempu del necesariu, desdexando una amplia vallina baxo dellos cuetos qu'estremen les riegues de la García y Mermeyu, teniendo que salir igualmente a la mandrecha pero per tarrén menos agradable, estráu de cotoya baxa rabiosa que fae les delicies de les nueses pates.

Salimos de la García pa metenos en tarrén ampliu, pero abegosu de caleyar, dando vista al colláu Solano

De toes formes, tamos nun llugar privilexáu, con brutales vistes hacia'l Cornión, a tol seutor de la Bermeya y a la Torresanta pente les cuales tuviéramos el día anterior. Lo guapo de too esto ye, parase, mirar y albidrar onde tamos nel intre y eso fadrémoslo más arriba, onde decidimos que ye hora de parar, beber y xintar dalgo ya que llevamos una bona bregada a estos altores del día.

Y los altores nun son otros que 4 hores y cuartu de ruta, apostaos a 1450 m d'altor, magar de superar más 800 direutos per tarrén xabaz. Tamos nel hombru correutu, el que deberíemos entamar a ascender pa garrar la vallina que tendría de dexanos a los pies de les travieses del Llaz, ye más, somos a ver la Torre del Mediu baxo la cual deberíemos empatar col traveséu hacia Colláu H.ermosu.

Les vistes son una auténtica maraviya

Pero sentaos, xintando dalgún frutu secu y dalguna barrina enerxética d'eses de salir corriendo pal bañu, somos acolumbrar un senderu que paez dir hacia'l colláu Solano, del que si tenemos referencia clara. Nun tenemos más que miranos, ya que vemos qu'entá queden otros 500 m de desnivel casi hasta les travieses y que se nos va convertir nuna xatada infame la ruta.

Sin mediar casi pallabra, dámoslo por decidíu, brindamos con agua poles decisiones sensates y polos nuevos caminos por conocer y ascendemos unos cien metros hasta la cabecera l'argayu Mermeyu, onde deberíen tar les mines del Rabicu y por tanto la senda'l Rabicu, de la qu'oyera falar va tiempu, asina que nun podemos pedir más a un plan B, qu'espoxigó so la marcha, como tolos grandes planes.

Percorremos felices tola senda'l Rabicu lo que nun entraba nos nuesos planes

Alcontrámonos, de secute, percorriendo un guapu senderu colgáu, sol argayu Mermeyu, nel que tampoco somos a albidrar nenguna bocamina, quedándonos coles ganes de saber per onde metíense a trabayar esta xente tan duro, que guiyaba'l ganáu de madrugada y facia'l so tayu pel día nes mines de los Picos.

Nós, aficionaos a patear nos nuesos díes de descansu, per onde otros ganábense la vida o más bien,  sobrevivíen, nun podemos facer más, que caleyar en silenciu, esfrutando d'unos paisaxes que nos llenen de vida y que quiciás a esta xente dába-yos hasta ciertu refugu, porque anque fuera la so tierra, la dureza y hostilidá de vivir nos Picos, de xuru pasaba factura.

Descansaremos nel colláu Solano pa descender una vegada más hacia la riega Asotín

A tramos más marcáu y a tramos menos, pero siempre cenciellu de siguir, fadremos la perguapa senda'l Rabicu aportando al colláu Solano (1617 m), cota más alta del día, onde milenta llirios, convídenmos a sentanos a descansar y nun parar de sacar semeyes del Cornión y d'un nuevu collaciu de xuegu como pudiera ser el Cuetu Bellán, nesti día preciosu de monte.

Una vegada más, tomamos les decisiones oportunes, ensin decinos nada, ensin forciar la máquina y quiciás a sabiendes que nun tamos como otres vegaes y que'l confinamientu pasó factura y nun tenemos l'entrenu necesariu pa tres díes a lo xole per Picos.

Descendemos tola riega Asotín hasta enllazar nos H.oyaos cola ruta d'ascensu

Sicasí, tovía tenemos fuelle pa baxar corriendo una vegada más dende Solano hasta la vega Asotín, tan sólo por pura gayola, hasta topanos col enorme argayu que baxa del Frieru, el cual aparte de comese'l camín hacia la vega, lleva años faciendo nuevu calce a la riega Asotín.

Riega que debemos siguir, lo que llévanos a siguir argayu abaxu, per tarrén pelín abegosu de caminar, hasta abandonalo pa siguir un guapu senderu, que más marcáu de lo camentáu, va dir sacándonos per varios collaos, hasta topanos con ciertes aguyes que nos suenen de varies hores enantes, como son les de los H.oyaos.

Despedímonos d'esti pequeñu mundiu... vieyu pa unos nuevu pa otros

Tovía tenemos tiempu a intentar atayar, como non con trabayu y llianos nel descensu de nuevu hacia Sesanes, non ensin antes, parar dacuando, a echar un vistazu a esi mundiu nuevu al que-y dimos un bon mordiatu, pero nel que creyemos tenemos munchu más tarrén de xuegu.

Aportaremos finalmente a Sesanes, so les 6 y media la tarde, teniendo tiempu pa pasar el restu d'ella, tomando unes cerveces per Caín enantes de la cena. Cena, que munches vegaes, si'l tiempu paez que párase en dellos requexos de los Picos, nos menús de los chigres de Caín, va años que tan somorguiaos nel tiempu... menos mal que tenemos el nuesu campu base particular nel Albergue de Caín (mil gracies pol tratu como siempre).

 

En resume, ensin ser una ruta de gran percorríu colos sos 11,2 km, tamos falando de tarrén de navegar nel 90% de la ruta, superando unos 1250 m de desnivel nes 8 hores y cuartu que llevónos algamar otra pequeña ayalga en forma de ruta, pelos desventíos del Cares.

Camudando'l Camín pela baxera del colláu H.ermosu