Entragu - Pena Sobia (Teberga)

14 de Mayu de 2021

Dempués de finiquitar cola escuelina de Villanueva en Santu Adrianu, dormíemos n'Entragu pa pasar el restu del finde en Teberga trepando. Al día siguiente, ente avisos de tormentes, miraes pa la meteo y almuerzos interminables, arrancamos pa la Pena Sobia, col envís de conocer el nueu seutor del Rincón, equipáu por Richie de Roca Verde.

Ya pasáremos per ellí, de la que baxábemos de facer Distrito Apache en Placas del Sol, pero esi día, colos deberes fechos, nin siquiera diérame por prebar dalgún sestín. Esta vegada, pesie a los bonos pegues de tol equipu, nel día anterior, teníemos ganes d'esguilar tolo que nos diese la meteo.

Camín hacia'l Rincón col desfiladeru de Valdezreizales

D'esta miente, con un chornazu asfisiante, anque col día nubláu vamos preparándonos, metíendose Lau y Mario a prebar un par de 6as, demientres que Suco y yo, dempués de mirar bien les opciones tirámonos dar un pegue a vista a La Presa de Prisa (7a), metiéndo un pegazu a vista Suco y pringándola yo tamién al flash.

Al segundu pegue, cayendo dalguna gotera y cola truena sacudiendo pente Teberga y Somiedu al altor del Camín de la Mesa, fuimos a encadenala los dos, paecíendonos una vía perfanática, con movimientos mui guapos, quedándonos con munchísimes ganes de siguir trepando nesti requexu de la Sobia.

Mario apretando un pelín nos sestos baxos del Rincón

 

Tanto Suco como yo, tábemos ya a gustu, dando un par de pegues más Lau y Mario, pa encadenar otra bona vía, Stairway to Heaven, con primer llargu de 6a, a lo que quedamos con ganes de da-y pa tastiar el segundu llargu de 7b.

 

Ya con esto, Alón, decidimos baxar nun fuéramos a pillar una chupa fina moyando tol material, baxando hasta Entragu, onde probes de nós, pensábemos xubir a Bóvedas de tarde si llibraba pa montar dalgún proyeutu pal domingu, pero lo únicu que ficimos ye enganchando al chigre en mou vermú interminable.

Kíla esfrutando de los pies de vía de la Pena Sobia

Pena Sobia (Teberga)
Croquis modificaos por mi de la escuela d'escalada de La Depuradora, por mor del GM Aguja de Sobia: La Depuradora. Gracies y col so permisu.
 --------------------------------------------------------------------

3, 4 d'Abril de 2021

Últimos coletazos de les vacaciones per Asturies y coles fuercies ya pelín xustes y la motivación escaladora un pocu baxa, el sábadu decidimos xubir hasta la Depuradora, viendo que tábemos sólos, pa probar dalgún proyeutín que nos quedaba nel tinteru.

La primer idega yera dir  Placas del Sol, pero viendo la tranquilidá nel seutor, quedámonos pela Depu, metiéndose Anna a probar Garrote Vil, sufriendo un pelín pa montala y con un día fríu y pelin repunante, decidió desmontar namás aportar a la cadena.

Pateín hasta Placas del Sol nun día perguapu

Por obligame un pocu, monté'l 7b sin nome del seutor, dándo-y un primer pegue mui afayaizu, sacando tolos pasos hasta la cadena. Nesta salió'l sol y animé a probala a Anna, que-y entró con ganes y tamién salió a cadena, gustándo-y más que Garrote Vil... camiento que fue'l solín más que la vía, la que traxo ánimos renovaos, jeje.

Nel segundu pegue, entro con ganes, aportando a un pasu enantes del bloque que pensé que nun yera difícil y por nun tenelo matizáu, nun soi a salir. Allorio un pocu, probándolo y quédame claru, que ye tan pasu como'l d'arriba, asina que col cansanciu de 8 díes pel monte, decido matizalo too y desmontar, porque nun hai res de pila a estos altores de la selmana.

Distrito Apache: Prestosa y completa vía en Placas de Sol

 

El domingu, con mui poques ganes de trepar, obligámonos a xubir de nuevu hasta Placas del Sol, por mor de la visita d'Andrea, que tornaba a escalar dende los díes per Somiedu. Enantes de qu'entrase'l sol, ya tenía montada Distrio Apache, un 7a dafechu encomendable, que pringué a vista nuna travesía a falta de la cabera chapa pa reunión.

Darréu, dába-y un bon pegue Anna que ya la conocía, cayendo nun pasu anterior, pa matizala hasta la reunión, convenciéndome pa que-y diese otru, anque ya taba entrando'l sol na vía. Asina ficelo, aseguráu por Andrea, sufriendo al sol na placa del entamu pero faciendo'l restu bastante bien, hasta agonizar un migayina na llegada a la reunión.

Nuevu seutor del Rincón na fastera de la Sobia

 

Col trabayu fechu por mi parte, Anna decide nun esguilar más y ye que llevamos práuticamente diez díes siguíos esguilando y ya nun damos pa más. D'esti xeitu fuimos d'inspección hasta'l nuevu seutor del Rincón, equipáu por Richie, onde Andrea tuvo de chequéu nun par de víes de sestu grau baxu.

 

La verdá ye que tanto la roca como la pinta de les víes ye perbona, poro tendremos de volver per ellí a esguilar, al igual qu'a Placas del Sol, ya que les víes son una pasada y dexamos deberes pendientes que nun pueden quedar pa mui lloñe.

Andrea probando les primeres vies nel Rincón

Pena Sobia (Teberga)
Croquis modificaos por mi de la escuela d'escalada de La Depuradora, por mor del GM Aguja de Sobia: La Depuradora. Gracies y col so permisu.

 --------------------------------------------------------------------

Añu 2019

Si'l branu del 2018 nun mos dexara casi esfrutar de la escalada per Teberga y más en concretu de la fastera de la Pena Sobia, onde alcuéntrase la Depuradora, l'iviernu del 2018-2019, fuera mui, mui secu y pudiéramos esguilar con calma visitando esta escuela varios díes hasta'l mes de Xunu.

Probando'l 7b sin nome, una vía de bloque concentráu en dos chapes

Daquella andábemos a la caza d'encadenar Garrote Vil (7a+), pero nun fuimos siquiera a poder da-y en condiciones ya que siempre taba moyada o la montábemos, dábemos un pegue, entraba la solana y nun había quien parase y de tarde llovía volviendo a la rueda una vegada más.

Guapes vistes dende les altures de la canal de la Depuradora

A finales d'añu, casi de nueche, algamamos l'encadene esfrutándo munchísimo del pegue, con un color al atapecer brutal. Tamién, naquella dómina, tuviéramos probando la vía más dura, "factible" del seutor, un 7b ensín nome, perguapu d'esguilar pero que tien tol problema concentráu en dos chapes.

Ani esguilando delles víes de la Depu

Les últimes visites na primavera, centráronse más bien, en tachar segundos llargos de 6c y 6c+ que perpasaben los 40 metros de vía y dalgunu de primer llargu perplaqueru, nel qu'había qu'apretar con too pa salir de los pasos.

Orlando dándo-y cera a Garrote Vil

Ensin más, quedámonos con esti seutor casi ventiláu a falta d'esti 7b, qu'intentaremos volver a atacalu lo antes posible, anque probáblemente les siguientes visites nos lleven a facer víes na Cova Negra o más arriba en Placas del Sol, que tovía nun conozo y ye un seutor perfeutu pal iviernu.

 --------------------------------------------------------------------

6 al 13 de Xunetu de 2018

Esti añu aparte de les distintes visites en fin de selmana a Teberga, tocó facer la selmanina de vacas de rigor por segundu añu de secute. Pero, nun tuvimos tanta suerte y tando en plenu xunetu, el tiempu fadiónos enforma, con tormentes y orbayu al atapecer, varios de los díes.

Vistes dende la Depuradora

Y nun sólo yera la lluvia la que nos cafiaba, sinon que cuando taba espeyáu poles mañanes, el sol pegaba con fuercia y facíase imposible trepar a partir del mediudía. L'añu pasáu esto tamién pasaba, pero en seutores a la solombra pela tarde teníemos les víes seques, cosa qu'esti añu nun fué posible y quedamos práuticamente obligaos a pasar les tardes nel seutor del Río, dándonos un bañu a la espera del tormentón o echando la siesta.

Bañu a posteriori en díes de calor

Asina que con esti plan, na fastera de la Pena Sobia, tuvimos más bien dando palos de ciegu, nunos intentos infructuosos de poder meter pegues con ganes a Garrote Vil, un 7a+ preciosu, mui del mió estilu con metros y pasín de bloque pa siguir aguantando hasta la cadena como meyor se pueda.

El descansu del guerreru

A la fín, nun pude encadenalo, teniendo tiempu de da-y un pegue seriu namás que un día y ya entraba'l sol con fuercia, teniendo que colar del seutor. Otru de los díes, nin siquiera pudimos entrar a la vía, por mor de tar pingando, asína que dedicámonos a facer metrinos cenciellos con unes collacies andaluces bien gayasperes.

-------------------------------------------------------------------------------------------

Branu 2017

Esti branu, tengo que dicir, que fue mi confirmación escaladora nes grandes escueles asturianes, ye dicir, Quirós y Teberga sobretoo. Pesie a entamar a esguilar en Quirós fae unos añinos, la verdá ye que siempre me prestaron más les escuelines pequeñes, llocales y nes que siempre tabes, más menos, sólo o con mui poques cordaes.

Munchos fueron los díes nos que tuve d'un seutor a otru, poro tocará facer un pocu de resume, entamando pela fastera de la Pena Sobia n'Entragu. Equí, pel momentu, namás que conocía el seutor de la Depuradora, quiciás l'únicu seutor de Teberga que puede considerase d'aniciación.

Día de bautismu en roca con collacios del Indoorwall

Na Depuradora, tenía feches toles víes cencielles y nun par de visites más pudi afondar en graos muncho más curiosinos, destacando Master 40, un 6b+ con un pasu perrísimu y sobretou Paisanos Motivaos que si xuntamos los dos llargos queda un viote de 40 metrazos de 6c pa quedar bien contentu de la trepada.

Tamién tenemos un par de 6a+ apretones, siendo un d'ellos, una variante de Garrote Vil, un 7a+ que tengo munches ganes de probar y si tuviera que destacar una vía de les que probé, quédome con 37 grados, un 6c+/7a impresionante, con tramos d'escalada de babaresa al entamu, placa increyible dempués, un pasín de bloque y unos cuantos metros finales de bon cantu y aguantar que son una delicia.

Conociendo la Cova Negra... bon seutor pero que necesita un reequipáu

Pa más rises, otru día, con una resaca perimportante, tuviemos conociendo un seutor antiguu que pelín penriba de la Depuradora, nomáu como Cova Negra. La verdá ye que nun pude probar gran cosa, porque tuve más tiempu faciendo les víes cencielles de la parte alta de la Depuradora, pa qu'unos collacios qu'entrenen nel Indoorwall fueran fogueándose, pero otros collacios sí que tuvieron metíos nelles.

Dicir, que ye un seutor pelín escaecíu y la equipación ye de la dómina pasada, con anclaxes dudosos, alloñes de meter mieu y lo pior, los descuelgues nun tan casi nin pa recomendar metese. Habrá que dir probando dalguna más pa ver si paga la pena metese a trabayar duro nesti seutor, porque víes llargues y con bona pinta vimos... pero hai qu'andar fino y lo de volar... con cuidadín.

La Depuradora y catando la plaquina d'Esto da pa mucho  (6a+)

Supongo que llegada la temporada ivernal, la Depuradora sedrá un tarrén de xuegu estupendo en díes soleyeros, poro tornaremos per equí a metese en coses series y tamién a dir quitando dalgun sestu por ahí que quédanos pendiente de probar.

 --------------------------------------------------------------------

10 de Setiembre de 2016

Como faláremos na entrada d'Entragu en Pena Gradura el segundu finde de Setiembre, coincidiendo col Teberga Block averámonos hasta Teberga pa trepar con cuerda a nuestra bola, como siempre, yendo pela mañana namás llegar hasta la Depuradora.

Caleyando hasta la Depuradora

Facía tres años, de la primer y única visita a esti guapu paré de Pena Sobia, asína que tornamos con ganes Haritz y  yo, anque a dicir verdá venga a pasar un finde de tranquilidá en cuanto a apretar porque'l pié sigue doliéndome enforma y asina nun hai quien disfrute.

Haritz na cadena d'un guapísimu V+/6a

Poro, dexo qu'Haritz foguése con toles víes cencielles de la parte superior, faciendo tan solo les que tenía na fueya de ruta, ye dicir les que nun taben tachaes y ensin forciar nin lo más mínimu. Con ello, fuimos turnándonos vía tres vía, pa finar con tolos quintos que nos quedaben nel seutor, terminando xustamente con un llargu V+/6a que pudiera ser de lo más guapu a esguilar n'Asturies nesti grau.

Vistes d'Entrecampos dende la Depuradora

Pa cuando terminamos de trepar y tocaba xubir un pelín el grau, el propiu día, con bien de calor, fizo que colásemos d'ellí a echar una cervecina y baxar al alcuentru, nel aparcaderu d'Entragu, con Pepa y Jose que llegaben pa la xornada vespertina.


 

--------------------------------------------------------------------

15 de Setiembre de 2013

Hai que dicir, que llevamos un branu esguilando munchísimos díes y con dellos oxetivos a facer: Unu yera'l 6c a vista y otru facer otru 7a, y algamaos quedaron. Así que, tanto tiempu metíu en delles escueles, bien merecía facer una visitina sele a dalguna nueva.

Que meyor pa ello, qu'averase a esguilar a Teberga, que dicho así, pa unos pininos de la escalada suena mui fuerte. Pero tuvimos la suerte, de que llegásenos a les manes un croquis d'un seutor, de moza creación paezme, na fastera de la Pena Sobia.

Gus y Sonia esguilando nel V+ de más arriba'l canal

El seutor nómase la Depuradora, porque ta nuna canal penriba la Depuradora, y apórtase a él, xubiendo per una pista que sal a la manzorga, según venimos pela carretera enantes d'entrar n'Entragu. Lo meyor, ye siguir la pista cimera hasta'l final, onde topámonos con una gran esplanada.

Echándo-y valor podríase xubir el coche hasta riba d'ella, pero llueu de conocer el camín, nun paga la pena muncho, porque ta mui mala. Así que de la esplanada, cruciamos la canal, per un senderu y plantarémonos nos pindios pies de vía.

Asegurando al sol y Pau n'adherencia na vía

Quiciás el pior d'ellos, será'l de la vía 22, onde nun hai munchu sitiu y la terracina pa tar ye más pequeñina. Aún así, la vía 22 (V+), ye mui guapa faciéndola de frente y aunque más abaxo tengamos 5 víes na mesma terraza nun hai qu'escaecela.

Como ya dixe, tocaba día d'aselar, así que nun mos metímos en graos duros (pa mi claro ta, que caún ye caún y...), faciendo como siempre los más cenciellos pa una primer visita. Poro, del V+ últimu de la canal, baxamos a la terraza inferior, onde les víes de la 17 a la 21 van cotaes como V, V, V+, V y IV.

La Depuradora en Teberga... perguapu llugar

Siendo unos cuantos como yeramos, tuvimos turnándonos de vía en vía, dándome tiempu namái a facer, a vista, les víes 17, 18 y 19, toes elles con dalgún pasín bien guapu, anque lo de menos casi yera'l grau... tocaba esguilar ensín sufrir.

Tolos presentes, Berto, Gus, Sonia, Paulina y yo, ficimos lo que teníemos un mente, pasar un día tranquilu esguilando nun sitiu nuevu, y alcontrámonos cola Depuradora, qu'a pesar del pindiu pié de vía, ye un llugar a tener mui presente pal iviernu, pola so orientación sur.