viernes, 13 de mayo de 2022

Sellañu (Ponga) - Semeldón - Llevarda - Llagosciegos - Agüera - Tarañes (Ponga)

 7 de Mayu de 2022

Track: Sellañu (Ponga) - Semeldón - Llevarda - Llagosciegos - Agüera - Tarañes (Ponga)

Tornábemos al monte col GM Xuan de la Borrina, llueu de les vacaciones esguilaores y facíemoslo con una ruta potente, propuesta por Mario. Hai que dicir, que'l fichaxe d'esti collaciu nel grupu, ta dando los sos frutos, ya que ye del mesmu palo que los integrantes más vieyos, como Charly, Simón o yo, dexando casi de llau cumales míticos o grandes ascensiones en Picos, centrándonos en conocer y bregar per fasteres desconocíes pa nós.

D'esti xeitu, terminar la ruta, coles pates enllenes d'escayaes y pinchos de cotoya ye lo más normal y como non, ún de los nuesos tarrenes de xuegu preferíos ye'l conceyu de Ponga. La idega d'entamu yera quedar tol finde, pero nun podía Charly por temes de curro y el restu la xente, van un pocu al día, asina que decidimos tirar la travesía pela fastera del rigu Semeldón nel día.

Partimos de Sellañu (230 m) con un día soleyeru

Pegamos un madrugón terrible, pa esta dómina del añu y dempués del cafetín y pinchos na Huera en Cangues d'Onís, continuamos hacia Ponga, llevando de primeres coches a Tarañes y tornamos a Sellañu, onde a les 10 menos cuartu la mañana, entamamos a caleyar, ya camentando que diba ser tarde, pa tolo que queríemos facer.

Facemos camín pel guapu percorríu del rigu Semeldón

El día nun pue tar más prestosu pa caleyar, fresquín pela mañana, pero sabemos que vamos pasar calor de xuru, aún así facer los primeros pasos pel PR del rigu Semeldón, ye una delicia, esfrutando de la solombra los árboles y del propiu frescor del rigu, nun trazáu que percorre un antiguu ferrocarril pa baxar maera, como bien despliquen los collacios de Las Claras

Perpasamos distintes pontes y enllazamos col camín que vien d'Ambigue hasta la última ponte

El camín ye guapu enforma y vamos a bon ritmu, travesando delles pontes y empatando col camín d'Ambingue, el cuál ya conociéramos al igual que'l siguiente tramu, na ruta que ficimos al Picu'l Cuniu, pasando per tramos bien guapos a la vera'l rigu Semeldón, hasta aportar a la ponte colgante, que casi llévase un argayu nel regueru'l Duernín.

Travesamos l'argayu pa xubir per Valdinobiu hacia la collada Semeldón

Travesaremos l'argayu y ascendemos per Valdinobiu, siguiendo'l PR que termina na Collada Semeldón, anque poca xente paezme a mí, qu'aventúrse hasta la cabaña que domina tan guapu llugar. Dende equí, baxaremos a la mandrecha la cabaña, pel tarrén más llimpiu qu'atopemos hasta dar con otra cabaña esbarrumbada y cola mecedura de los rigos Semeldón y Piedrafita.

Cruciamos el Semeldón y entamamos la xubida pela Cuesta Morena

Equí siguiremos a la vera'l rigu Semeldón y buscaremos un vau pa crucialo, descalzándonos y xubiendo a la mandrecha'l Porru Felechalón, ganando aína altor primeru per fayéu, tapizáu d'arandaneres, pa llueu aportar al cantu, onde algamaremos vistes hacia tol valle Piedrafita pel que baxáremos del Picu'l Cuniu va unos añinos.

A la fín vemos la lluz empobinándonos hacia la mayada de Llevarda

Les vistes ampliaránse fondamente, tamién acolumbrando a la preciosa peña La Llambria, enfrente nuesu, asina como'l Pierzu y les Peñes Santes per detrás d'esti, pero tamién, vamos entrar en fastera de beriza y cotoya baxa, mui rabiosa na primavera, que fai les delicies de les nueses pates, demientres ascendemos pela Cuesta la Morena.

Baxamos a Llevarda onde atopamos a la solombra la riega, un merecíu descansu

Nel intre, Carlos diz que ta tocáu de la espalda y nel tiempu qu'entamamos la baxada hacia Llevarda, onde vamos abandonando'l tarrén más abegosu d'esti tramu, tenemos claro, que toca preparar una paradina pa reorganizar la ruta y ver que posiblidaes tenemos.
 
Con tres hores y media de ruta, vamos parar dellos minutinos pa xintar, refrescar a la vera'l rigu Llevarda y desplicar a Carlos, que camín tien que tomar pa llegar a Vallimoru y más menos, per onde vamos a siguir nós, nel nuesu camín, que tien de llevanos a una fastera dafechu desconocida.

Ascendemos hacia Brañatorpe pa siguir hacia'l Porru Llagosciegos

Magar del descansu, continuamos ya per bon camín y xustu enantes d'una cabaña con prau, vamos garrar una vallina n'ascensu, que llevarános a la solombra de la solana, lo cual agradecemos, nun pindiu ascensu hacia Brañatorpe, onde dexaremos la llimpia vallina, pa continuar hacia'l Porru Llagosciegos, saltando y llibrando como podemos les urticantes cotoyes.

Brutales vistes dende'l Porru Llagosciegos (1230 m)
 
Arribaremos a los 1230 m del Porru Llagosciegos, magar d'un ascensu direutu de 550 m, con un tramu final pindio y abegosu d'avanzar, pero con una recompensa descomunal, siendo esti cumal un mirador increyible de Ponga, Casu y Piloña, teniendo a la vista a montes tan guapos como La Llambria, Peña Crespa, el Maoñu y el picu Les Vízcares, cola hermosa collada Treslafuente.

Les vistes, como non, del macizu occidental coles Peñes Santes son de primera, anque será una costante hacia'l nuesu destín en Tarañes. Nel intre, Mario, comentamos mil xugaes, mil sitios más a conocer pero tenemos la vista puesta nuna braña, que sólo viéramos nos mapes, la de Borondanes, puntu siguiente nel nuesu camín.

Baxaremos a Borondanes, preciosu mayáu enmediu de la nada

Cuando pintes una ruta penriba'l mapa, nun sabes lo que vas a atopar y de momentu la xubida teníemosla nel bolsu y la baxada a Borondanes, anque tamién tocó llibrar cotoyes, fuimos alcontrando pasu, hasta aportar a esti perguapu mayáu, enmediu dafechu de la nada, con unos averamientos a dalgún llugar pobláu, mui, mui llonxanos.

Continuamos baxando hacia Agüeria, llugar onde cruciaremos el rigu Semeldón

Fadremos una mini parada pa quitar pinchos en Borondanes, alcontrándonos con un par de cabañes en bon estáu y garramos la riega homónima como referencia, yendo siempre a la so mandrecha, alcontrando senderu en dellos tramos, abandonando la riega que va encaxonándose, xubiendo al Xerru Les Balses, onde tomaremos el descensu final hacia Agüeria pel Pandón d'Agüeria, pelín tomáu pero transitable entá.
 
N'Agüeria, ya tomáramos la decisión de facer otra paradina a xintar y ye que ya llevábemos nes pates 7 hores de camín. Na xinta, viendo la hora, les 5 la tarde, decidimos escaecer la posibilidá de cruciar la foz de Saolla y dar la vuelta a La Llambria, ya que tampoco queremos llegar de nueche y tenemos al collaciu Carlos esperando en Tarañes.

Ascensu pel Paréu Valleyu hacia'l Colláu Valleyu per un fayéu de llibru

Ensin más, cola tiesta puesta na xubida qu'espéranos intentamos garrar bon camín, alcontrándolu a la salida d'Agüera, llevándonos un bon tramu cómodu, hasta que vemos qu'empobínase de más hacia'l barrancu Melendreres y preferimos xubir pela viesca a pinchu, topando más caminos tresversales, acabando por tirar más a pinchu si cabe hasta'l colláu Valleyu, onde ya atopamos una bona y conocida pista hasta la Collada Llués.
 
Nunca sabes bien, si abandonar una pista ye bona idega, nesti casu, quiciábes lo meyor fuera siguir hacia la riega Melendreres, pel camín de salida d'Agüeria hasta aportar a Les Felgueres, onde según los mapes tendríemos camín hasta la collada Llués.

Vamos pasando de colláu en colláu hasta la de Tarañes pa baxar al pueblu con vistes a les Peñes Santes

De toles formes, una vegada que garramos pista tiramos a bon ritmu a Llues primeru, pa continuar pela nomada pista hasta la collada Tarañes, onde ya tocaba'l descensu final hacia'l pueblu de Tarañes, onde esperábanos Carlos, dende va bona, nel chigre'l Quintanal, onde tuvimos una charra animada cola dueña y colos paisanos del pueblu, qu'alloriaron un pelín colos llugares que conociéramos nesta xabazada de ruta.
 
En resume, ruta de les que me presten pola vida, conociendo llugares nuevos, perdíos enmediu de l'Asturies xabaz, que túvonos perentreteníos durante les 10 hores y media de duración, saliendo una ruta de 20 km y 1725 m de desnivel positivu y 1370 m de negativu.

Camudando'l Camín dende Tarañes

No hay comentarios:

Publicar un comentario