El Vidral (Babia) - Cuspasante - Vallina L'Arca - Picu Colines - Muezca Colines - Chanu Guardafrais - Vachalacha

29 de Mayu de 2022

Track: El Vidral (Babia) - Cuspasante - Vallina L'Arca - Colines - Muezca Colines -  Guardafrais - Abesedón

Tornamos al monte, dempués d'un par de selmanes nes qu'anduvimos más ocupaos en correr pel monte y esguilar, asína que repasando un pocu que podíemos facer, ya que tábemos asitiaos en Teberga esguilando, alcordéme que tenía un par de dos miles nel Macizu de Penaubina de ciertu renome por facer y ún d'ellos yera'l Picu Colines.

Nesti plan, xuntámonos a les 9 y media la mañana en Samartín y salimos hacia'l Puertu Ventana, pa baxar dellos kilómetros en direición Torrebarriu onde ya saliéramos va dellos años pa los Picos del Fontán, parando esta vegada nel PK10 de la Le-481, nun crucie xustu al llau del picu d'El Vidral.

Partimos d'El Vidral (1295 m) nel PK 10 de la Le-481

Equí sal una pista ganadera hacia los ivernales de Cuspasante, la cual, nun bon día soleyeru, vamos garrar con calma, caleciendo músculos po la xubida que teníemos per delantre. Ensin más, diremos dando zapatu a la vera'l rigu La Venta'l Paniceru, hasta aportar a Cuspasante, onde tendremos de tar sollerte de garrar el camín adecuáu, pa siguir valle alantre y nun subir hacia les cabañes del Pedregal.

Caleyamos per cómoda pista hasta Cuspasante pa continuar pela Vallina L'Arca

Travesaremos los praos de Cuspasante, siempre a la manzorga del rigu hasta aportar a la mecedura los rigos de Campu Formosa y Vallina L'Arca, que formen el que siguíemos de la Venta'l Paniceru. Nós, vamos continuar pela Vallina L'Arca, la que pesie a lluchar en dalgún pasu coles urcies, vamos avanzar siguiendo senderu, hasta la parte media d'esta vallina, onde saldrémonos a la mandrecha pa dir al alcuentru de l'antiguu refuxu de la Pierna, nun estáu de desaniciu total.

Picamos dalgo a la solombra del refuxu y continuamos ampliando vistes hacia'l colláu del Robezu

Si siguiéramos de frente, aportaríemos al mayáu L'Arca, per onde pasamos en delles ascensiones a la Pena'l Ranchón, Güertu'l Diablu o Pena Cigacha. Nesti casu, esfrutaremos d'esta variante hacia la Vega'l Robezu, que magar d'un descansín nel refuxu, va regalanos una ascensión pindia enforma, na que diremos ganando metros d'altor y vistes hasta'l colláu'l Robezu.

Facemos la cabera parte de crestéu hasta los 2212 m del Picu Colines

Ente una charra animada, de les grandes posibilidaes d'esta vallina pal esquí, vamos sufriendo la ganancia de desnivel, caún al nuesu ritmu, demientres milenta cumales perconocíos van apaeciendo antes los nuesos güeyos, destancando sobretou l'ablucante Pena Ruea, tol Puertu Güeria y la menos conocía Penarpín, arrodiada peles foces Grande y Pequena.

Cume nel Picu Colines (2212 m) increyible mirador

Aportaremos por partes a los 2212 m del Picu Colines, sorprendiéndonos a toos, el llugar tan guapu nel que t'asitiáu, alloriando la vertical y xabaz paré norte del Práu Fontán y Picos del Fontán. Nun mirador tan privilexáu, nun podemos otra cosa, que sacar los pinchos y xintar con tola calma posible, anque la posible tormenta a la tarde, tenémosla rondando pela tiesta durante'l descansu de media hora.

Baxamos hacia la Muezca Colines con un guapu crestéu

Pa cuando ponémonos en marcha, les primeres ñubes d'evolución van formándose y tenemos per delantre un prestosu y cenciellu crestéu hacia la Muezca Colines, pasu que queremos conocer pa continuar cola baxada de la que nun tenemos info denguna. Como siempre, son coses que nos presten y na muezca alcontrámonos con un parapetu de la guerra civil y con una baxada evidente per una pedrera xunto con dellos fitos que paecen bordiar el Prau Fontán pa enllazar cola xubida dende Torrebarriu.

De la Muezca Colines alternamos tramos de pedrera con pinda panda hasta'l Chanu Guardafrais

Baxaremos unos pela pedrera y otros pelos fitos, pa llueu facer una envuelta y empatar col final de la pedrera pa siguir descendiendo per una amplísima y pindia panda, amiestu de yerba y piedra suelta, hasta finar nel Chanu Guardafrais, onde delles vaques pastien tranquilamente.

Continuamos crestéu pela Cerra hasta la collada Chera

Coles ñubes tornándos prietes, continuamos crestiando pela Cerra, pasando pente dellos monolítos de conglomeráu, enantes d'apoartar hasta la collada Chera, onde bien podriemos baxar pela Vallina'l Tochu hasta Cuspasante, pero escoyemos superar un últimu resalte y descender pela riega Vachalacha, pente les viesques de Valtarón y Abesedón.

Aportaremos a les praderíes de Vachalacha pa empatar cola pista que vien de Cuspasante

Les rises baxando per Vachalacha enterraos en fueya seco, fueron unes poques, esfrutando d'un fayéu bien guapu, d'esos que faen llende profunda con tola vega a la que salimos, hasta aportar de nuevu a la pista  que vien de Cuspasante, xustu dellos minutos enantes de qu'entamase'l torbón cola trueno y les primeres gotones.

 

Pelín moyaos, aportaremos de nuevu a los coches, llueu de facer una prestosa circular durante 6 hores, pa completar l'ascensión del Picu Colines, nun total de 11 km y con un desnivel de +/- 930 m, ye dicir, una actividá bien afayaiza pa nun llegar mui tarde nuna xornada con probabilidá de tormentes.

Camudando'l Camín pel Macizu d'Ubiña escaecíu